親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
現在大家都用FACEBOOK, BLOG已經越來越少人看了, 這個台灣的BABYHOME又不爭氣, UPLOAD相片諸多限制, 連WINDOWS 7也不支援, 實在好不便, 媽媽越來越不想用了, 不過昭駿的世界寫了這麼多年, 捨不得放棄, 偶然自己打開看看, 都覺得好有意思, 所以媽媽會KEEP住寫, 但會寫少些, 相片就不可能像以前那麼多了. 爸爸經常將東西亂放, 餐枱(不知多久沒有用餐枱吃飯了)都是他的雜物, 信件, 報紙, 銀包, 手機, handfree, 和大量不明來歷的東西, 都塞滿餐枱, 媽媽今晚很生氣, 狠狠責罵爸爸, 我看見了很害怕, 哭起上來:"媽媽你唔好angry爸爸啦~~~" 媽媽抱著我安慰說:"因為爸爸唔乖, 好污糟, 所以媽媽發嬲囉." 媽媽叫我和爸爸說一下, 叫他稍為注意一下保持整潔, 我說:"爸爸你唔好咁污糟啦, 你快啲沖涼啦!" 看來媽媽解釋得不太清楚, 令我誤會了爸爸沒沖涼而令媽媽生氣了!
著冷衫的蜘蛛俠
俾錢婆婆
每日放學我都好開心咁同媽媽講今日有咩功課, 今日寫"走"字和細階p, 我同媽媽一齊講下有咩字係P字頭, 我地講左pen, pencil, pancake, percy, 突然我想起有playground, 我提議去屋企平台的公園睇下, 媽媽唔知我搞乜鬼, 驚我想去公園玩唔返屋企, 但見我興致勃勃, 就同我去睇下啦, 哈哈, 原來我去到公園外圍望一望, 指住:"呢度就係playground嘞!" 然後就走得, 媽媽就提議不如影張相留念啦, 我就拿住今日的small letter p功課留影一張. 晚上在婆婆家食左飯, 返屋企前要同公公婆婆拜拜, 然後錫錫, 但今晚公公竟然在刷牙, 我話:"公公, 我唔錫你嘞, 你個口有泡泡呀!" 笑鬼死.
今日Ms Ngai來電報告說, 我食茶點時唔見左個杯蓋, 大為緊張, 在課室走來走去, "可能係門口度啦.." "可能係個垃圾桶度啦..." 食完茶點都未揾到, 大家開始做堂課時, 我繼續坐係座位度諗下個杯蓋去左邊, 唔肯寫堂課, 突然又起身走出位:"可能係D玩具度啦..." Ms Ngai最後勸服我唔好揾住, 先上課. 放學返屋企, 見到杯蓋在飯枱, 原來媽媽忘記幫我放入杯碟袋! 媽媽問我係唔係揾得好辛苦, 我竟然否然說:"無呀!"
今日係本年度第一次生日會, 慶祝八九月生日的小朋友, 媽媽差點忘記今日有生日會, 好彩爸爸醒目睇到月曆, 唔係就唔記得著靚衫, 著左校服返去就唔開心. 放學落校車拿住一份禮物, 原來中秋花燈又贏左, 禮物係泥膠怪獸, 呢盒玩具之前參加暑期班已經收過了, 媽媽提議我送比小朋友, 但我話放在婆婆屋企, 留返下次玩. 書包裡有好多小食, 我馬上飲左包維他奶, 仲有好多餅仔, 朱古力, 糖果...好多, 仲有兩本功課, 今日要寫個果字和豆字, 我對中文寫字仲未好有信心, 要媽媽陪住, 幫下我先寫到, 希望遲D有進步.
媽媽暑假時在書展訂購左國家地理雜誌的幼兒版Little Kids雙月刊比我, 九/十月號昨天寄來了, 地址係寫婆婆青衣的屋企, 婆婆今手接我放學時帶埋過來比我, 婆婆話:"郵差叔叔送左一封信來, 唔知係比邊個呢?" 我接過公文封, 睇睇上面寫的英文地址, 收信人係MR ISAAC AU, 開心大叫:"係Isaac架!" 婆婆扮懵說:"係咩, 邊有寫啫!" 我指住自己個名:"呢度呀! Isaac Au呀!" 此時媽媽打電話返來, 我興奮告訴媽媽郵差叔叔送我一份禮物, 係雜誌呀, 今期係講貓頭鷹BB, 我特別喜歡裡面的野生動物卡, 撕出來儲埋一叠, 當係寶.
我愛月餅, 見到月餅廣告特別興奮, 今日和媽媽在大家樂排隊買厚切焗豬扒飯時, 見到有月餅單張, 好想攞一張, 但媽媽叫我唔好攞, 會製造垃圾, 我說:"咦, 呢度寫住Please take one喎!" 媽媽苦笑, 就容許我攞一張, 結果當然又製造了一張垃圾. K2開始每日有兩本功課, 今日的功課係寫個"叉"字和細階f, 之前我寫字都無乜信心, 要媽媽幫, 喊打喊殺, 但今日寫f時突然大發神威:"我寫得好靚架, 我唔出界架, 睇住我嘞!" 果然寫得幾靚喎, 唔知班主任Ms Ngai用左咩方法令我寫字充滿自信, 真係要多謝老師.
今日媽媽放假, 我地全家中午返爺爺嫲嫲度食午飯, 無線播多拉A夢, 我當然用來送飯. 我好喜歡食嫲嫲煮的餸和湯, 爸爸裝左好大碗飯比我, 我食晒仲要添飯. 飯後去太空館, 媽媽想比我試下睇天象電影, 今日兩場電影, 和, 我話想睇sea monsters, 入場前見到裡面黑蚊蚊, 有啲緊張, 問媽媽:"係咪spooky架?" 媽媽話唔係, 我入到天象廳見到熒幕在頭上面, 仲要訓低睇喎, 好得意, 但開場唔夠15分鐘就訓著左, 完場竟然即醒, 又去展覽廳睇展品, 不過太空館真係幾唔掂, 展品十年如一日, 太空科技進程如果係咁就大件事. 離開太空館去食晚餐, 媽媽聽到前面有位國內女士用普通話問孩子:"你要吃甚麼晚餐?" 媽媽有樣學樣用普通話問我, 估唔到普通話水平普通的我竟然識聽, 但唔識講, 想講"壽司", 但講左"shi shi", 爸爸媽媽大笑一輪, 就向加連威老道方向前進, 本打算食板前, 但見到開左金水壽司, 聽聞幾好, 就試下, 果然唔錯.
Little Gym完晒之後, 媽媽唔知我對學游水的接受程度有幾高, 事前已諮詢過我的意見, 問我去Swim school好唔好, 我話好, 點知因為泳池工程延誤, 本應七月初開始的游泳班, 左搞又搞, 整到八月先開班. 我喜歡同小朋友玩, 所以爸爸媽媽認為班際課程比較適合我, 我那組有三個小朋友, 做完熱身運動就落水, 老師比塊浮板我, 我就笑騎騎攬住塊板游到好遠, 被老師叫返來! 之後我地用水袖和龜背學踢水, 有個肥妹妹好驚水, 郁都唔敢郁, 我伸手去拖佢, 但佢都唔郁, 原來佢真係好緊張. 一個鐘頭好快過, 上水後我即刻同媽媽講:"我地下次再嚟過囉!" 睇嚟我真係學得好開心. 夜晚我仲同媽媽講游水要好似飛機咁伸直手, 係老師講的.
年票快到期, 爸爸媽媽趕緊同我去多次迪士尼, 上星期二去左一次, 之後7月30日媽媽的年票就expire. 爸爸就遲媽媽一星期買, 所以8月4日先完, 仲可以再去, 唔蝕底的爸爸專登調假, 今日同我去多次, 媽媽就趁機去腳底按摩. 最近反斗奇兵大熱, 我身為小FANS, 豈能唔同胡迪巴斯作近距離接觸, 下午的parade唔單止有toy story的主角, 仲會噴水! 被水噴到濕晒, 笑到卡卡聲, 真係好好玩. 之前幾次去都停駛的小火車, 今日有得玩了, 我最鍾意坐火車睇動物(假的), 仲見到三眼仔, 返來我同媽媽講:"我坐火車見到三眼仔, 佢用個telescope望Isaac呀!" 我又收到職員姐姐送的閃卡, 知道三眼仔的英文原來係little green men, 而唔係three eye boy... 爸爸又破天慌耗資十蚊同我玩鑄造銅幣機, 由於事關重大, 我同媽媽仔細匯報:"爸爸整左golden money, 佢用八達通doooo~~架, 係mickey嚟架, 無donald同minnie, sold out!" 爸爸一向反對我食爆谷, 今日竟然又買比我食, 真係少有. 年票到期, 我地暫時唔會再買, 去左咁多次, 乜都抵晒, 而且好悶, 真係要暫別一下, 等有新遊戲, 我地再考慮買唔買啦!
跌晒雞蛋仔!
今日媽媽去書展搏殺, 請婆婆來照顧我, 我上午返學校玩活動, 中午放學, 婆婆已預備午餐比我, 我不停問:"今日食咩呀? 有無蛋呀? 要加D蕃茄先好味喎!" 最後婆婆煮左蕃茄炒蛋加一條炸魚手指比我, 全部都係我至愛, 我當然狼吞虎嚥, 婆婆去完廁所出來, 我已經食晒! 婆婆覺得我好乖(食飯快都算乖?), 應承我訓醒晏覺帶我落街行下. 訓醒了, 婆婆話帶我去麥當勞買無益薯條, 我當然喜歡, 點知去到商場, 我話要入玩具商店, 一眼就睇中一個TOY STORY 3玩具:"係生猛仔呀! 我鍾意呢個!" 婆婆唔知生猛仔係邊位, 亦唔知個玩具係玩乜, 毫不考慮就買左比我! 媽媽返來, 見到有個三眼仔玩具, 大驚, 因為係一個扑傻瓜電子遊戲機, 仲要賣到九十幾差唔到一百蚊! 一來破費, 二來玩電子玩具唔健康, 唔買都買左, 真係搞鬼! 另外媽媽已糾正我, 係三眼仔, 唔係生猛仔!
昨晚媽媽和我禱告, 求主今日唔好三號風球, 因為三號風球幼稚園要停課, 我就無得返暑期班, 逢星期一三五有美勞和其他好玩野, 二四就温習和MS BERNIE教英文, 所以媽媽希望星期三我有得返啦. 天父真係比我今日有得返喎, 因為天文台話下午先掛三號, 我放學返來食完午餐, 返完English Excel先掛三號, 上完英文去百佳買左抵雞蛋仔, 返到婆婆屋企都仲未掛三號, 直到四點幾先掛, 但風勢雨勢都一般. 明天應該無得返學, 因為三號風球會持續一段時間, 要蝕一日添.
輸左發爛渣
新蒲點
反斗奇兵3
平溪小旅行
Baby Boss
懷舊小火車
第二天清早起床, 露台外的景色是這樣的, 又是一片雲海. 太舒服, 唔想起床. Charly叔叔9點鐘會到, 我地要快D去食早餐, 唔好賴床囉. 黃慶果園民宿有四棟, 係美國式木屋建築, 屋前有小花園, 真係以為去左外國. 上午叔叔車我地上合歡山睇風景, 車子越走越高, 走到海拔三千幾米, 合歡山係由五座山峰組成, 係太魯閣國家公園範圍囉. 我好想試用望遠鏡, 爸爸就俾10蚊台幣成全我的願望, 但我太矮, 又唔肯俾人抱, 所以最後只睇到少少山頂和大部份天空, 但我報稱睇到好多野. 感謝主, 天氣好得令人感動, 你睇個天藍到! 雖然好曬, 但唔潮濕, 流汗都好快乾. 我已經登上海拔3150公尺了! 返回清境食午飯, 去雲舞樓食雲南菜, 門口有個木鞦韆, 咁靚影下相先. 終於到羊咩咩時間了, 台灣爆發羊痘症, 羊咩咩被關起來, Charly叔叔靜雞雞車我地去揾羊咩咩屋企, 雖然只可以隔住木欄睇, 但能夠咁近距離睇佢地, 都好開心! 青青草原有得騎馬, 大中細馬可選, 我選了小馬小花, 姐姐帶我繞場一週, 我騎馬個樣真開心, 記得三歲半時去祈福農莊騎馬我扭計, 今次咁醒目騎馬馬行圈, 真係叻仔. 買水蜜桃懷疑被騙, 算吧, 老闆送我一個, 媽媽食左, 真係好甜好多汁. 我地住的民宿四週都係果樹, 散發陣陣果香, 今期係布冧仔, 台灣人叫李子, 樹上熟的李子好靚哦. 晚餐在民宿DIY打邊爐, 民宿供應材料, 我地要自己落手落腳, 食完仲要洗碗, 好似中學生去宿營, 幾好玩. 我地兩晚BOOK左唔同房間, 呢間歡樂親子房係媽媽特別幫我揀的, 有一張特大的滑梯床, 房間仲有積木和圖書, 條滑梯都幾滑, 唔知我係咪覺得太刺激, 玩左一兩次就唔玩, 每次下床都扶住手小心翼翼下來. 不過能夠在房間有一條SIR滑梯, 相信所有小朋友都會好開心, 我都好開心, 臨退房前仲大左個便便, 旅行時都有便便, 十分好.
暑假7月1日開始, 爸爸媽媽又帶我去旅行嘞, 今次夥同姑媽一齊去台灣, 目的地係台中+台北, 搭華信航空直飛台中清泉崗機場, 個半小時就到, 我地做落地簽證, 竟然出奇地快捷, 論盡的我地連台幣都未換, 航空公司竟然連錢都借埋比我地!做好證後再出去換錢還返比航空公司. 我地去南投縣交通不便, 於是包左架車, 司機+導遊CHARLY叔叔準時到機場接我地, 有車坐唔洗舟車勞頓, 真開心. CHARLY叔叔車我地出市區埔里食午飯, 係一間街邊食店, 都幾好味, 尤其是一碟名叫"過貓"的蕨類蔬菜, 撈醬油凍食, 好爽甜, 口感好特別! 飯後去參觀埔里酒廠, 買下野食咁, 無乜特別. 我地試左酒糟雪條, 無乜酒味, 爸爸買左兩隻酒蛋, 夜晚做宵夜. 埔里以造酒和造紙聞名, 於是CHARLY就帶我地睇下廣興紙寮, 呢度仲係用人手做造, 造的係高級書畫用紙. 我仲DIY做左一把多啦A夢扇, 但天氣太熱媽媽懶得郁手, 交由CHARLY叔叔代勞, 幫我將扇子完成. 跟住駕車上山往清境了, 沿途風景好靚, 經過萬大水庫, CHARLY叔叔停在一個小食檔, 原來請我地食炸杏包菇, 超好味! 到了清境, 見到好多歐式建築, 都係民宿, 其中一間特別浮誇, 名叫老英格蘭, 係新開的古堡式酒店, 係現時清境最昂貴的住宿, 睇個外殼都知道玩高格調路線. 呢間就係我地今晚和明晚住的黃慶果園民宿嘞, 呢間係"景觀四人房", 我地都好滿意. 媽媽特別高興, 因為有L'OCCITANE洗頭水和梘液, 仲有香薰浴油! 露台睇到好靚日落, 仲有雲海添, 當然啦, 我地身處海拔二千米高山呢! 民宿同時又係果園, 每日都有水果送比住客, 今期係李子, 即係布冧仔, 好甜好新鮮! 晚上CHARLY叔叔收工, 民宿姐姐就開車車我地去廣場食飯, 新開左一間叫"紙箱王"餐廳, 以紙作主題, 餐廳有好多紙做動物, 連窗簾枱櫈枱櫈都係紙做, 幾有特色, 但我個人覺得唔係好環保. 食物質素OK, 食飽飯四圍行下, 就打電話叫民宿職員車我地返去休息了.
暑假開始
今日係學期最後一日, 學校好有心思, 安排左Junk food專家麥當勞餐廳搞Party, 每個小朋友都有一份兒童餐, 跟據我返來報告, 有一個漢堡包, 兩舊麥雞(麥樂雞), 好多薯條, 橙汁, 媽媽問我有無麥樂雞醬, 我話無, 但有茄汁. 禮物係一個史力加玩具, 但我無興趣. 媽媽問可唔可以請佢食, 我好招積咁話:"食晒囉, 係我個肚DUM度, 無得食!" 真可惡. 食完junk food真係無胃口食飯, 炒米粉食左好少就話夠, 媽媽叫我去眠一眠, 訓醒去玩. 訓到三點食奶彈起身, 就出發去迪士尼. 媽媽的annual pass就快到期, 要爭取機會去多一次. 今日好曬好熱, 但不減我的興致, 人唔算太多, 但已有點暑假FEEL, 我地成功玩左巴斯光年兩次, 小熊維尼, 史迪仔, 太空船, 小小世界, 但馳車天地太多人, 最後都放棄. 今日突然想睇煙花, 最後睇晒成場先走. 出到葵芳已9:00, 晚飯都食得唔多, 可能唔啱胃口, 之後竟然撞到蘇姑娘, 我一見到佢就"摷"佢個手袋揾玩具! 講開又講, 蘇姑娘大學時期原來同媽媽住同一間宿舍, 即利希慎堂, 仲住過媽媽Yr 1時住過的906號房, 蘇姑娘同行的兩名朋友都係希慎人, 見到媽媽呢位大大大仙, 幾乎要下跪! 飯後去葵涌廣場食十蚊三球好味雪糕, 我揀左曲奇, 朱古力和綠茶, 返到屋企已經11點!! 沖涼後仍堅持要睇下書, 最近媽媽在淘寶買左一套國內版Oxford reading tree, 係正版仲連CD, 我愛不釋手, 一口氣睇左十七個故事, 睇到眼垂晒先肯訓.
宇晴軒百佳超級廣場門口開左一個小食檔, 有一個姨姨專賣雞蛋仔, 格仔餅和小丸子, 星期一上完畫班, 婆婆帶我買雞蛋仔, 我唔係第一次食, 但新鮮做起的雞蛋仔熱辣辣香噴噴, 特別難忘. 今日上完english excel, 我又拉住媽媽去買, 話想食"蛋仔". 姨姨話要等一陣, 因為已經有一位叔叔O係度等緊, 我話"我地等一陣啦!" 等待係漫長的, 媽媽抱起我睇住姨姨, 解釋製作過程俾我知, 其間又有其他人來買, 真係好受歡迎. 等左5-7分鐘左右, 終於等到了, 我興奮地問:"係咪Isaac架? 係咪Isaac架?" 問完又問, 直到俾左錢, 唔該和拜拜姨姨, 雞蛋仔攞到手, 我先相信紙袋裡面的雞蛋仔係我的. 雙手捧住雞蛋仔返屋企, 沿途我愉快地向小朋友展示:"睇下, 有雞蛋仔呀!" 想請人食, 但對方當然婉拒. 未返到屋企已忍唔住想食, 媽媽見我剛剛去過洗手間洗手, 就容許我"住行住食", 咁先夠街坊feel. 一包雞蛋仔已夠我開心半天, 小朋友的願望真簡單直接, 真可愛.
海洋公園閃電遊
大霧上山頂