我出世之前爸爸買左部攝錄機, 用來拍低我的一舉一動, 因為成長的每一個片段都好珍貴架! 爸爸就成日用部機來攝我, 攝好一盒帶媽媽就用電腦燒落dvd保存, 今日媽媽將我四, 五個月的片段播比婆婆睇, 佢地一邊食lunch一邊睇, 我就趴在地下玩, 玩玩下我發現電視機裡面有個細路好似我, 連d叫聲和喊聲都一樣, 我睇到入晒神, 睇到某d片段我仲偷偷地笑添! 本來在旁邊睇緊dvd的媽媽和婆婆, 轉移視線睇我睇自己! 佢地仲笑到碌地添!
今日媽媽用三文魚煲粥比我食, 三文魚含omega 3, 營養豐富, 不過脂肪含量亦高, 媽媽整好d粥之後發現個煲呀, 碟呀, 攪拌機呀, 全部都係油, 所以都不能多吃, 我對三文魚粥反應一般, 不過都成功食晒一碗.
夜晚爸爸媽媽去五十嵐食飯, 上次去過媽媽覺得麻麻地, 今次叫套餐竟然幾好, 上次我架私家車唔比入, 今日竟然有個卡位比我泊車, 我坐車仔坐到扭計, 媽媽抱我一齊坐卡位, 我好開心咁自己玩, 爸爸媽媽就好安落咁食晒個餐!
食完晚飯我地去obi屋企坐一陣, obi佢大隻左, 佢成日彈彈下, 好似彈弓人, 十分搞笑!