今日天氣好差, 全日都落大雨, 原定的計劃一改再改, 本來爸爸下午去踢波, 媽媽帶我返青衣, 然後去開工, 但婆婆話落雨叫我不要出街, 過來湊我, 最後太大雨, 球場水浸, 爸爸無波踢, 就在家湊仔, 媽媽去開工.
誰知5:00左右, 媽媽忽然收到爸爸電話, 語氣十分凝重, 原來我在搖椅上跌左落地! 事情係咁, 話說爸爸餵我食奶, 我突然"唔..唔.."聲, 因為我已經第三日無大便, 媽媽已經好擔心我又便秘, 爸爸見我有料到, 將我放落搖椅比我慢慢疴, 不過活潑的我一放落椅就扭來扭去, 爸爸為求讓我暢快地疴, 無用安全帶將我綁住, 就走入房攞尿片準備同我清理, 但係包尿片夾得好實, 爸爸搞左十幾秒先攞到塊尿片, 突然間聽到我高聲呼叫, 爸爸心想:"乃"嘢喇! 慌忙出來見到我側身橫臥地上, 沒有喊, 只是大叫, 爸爸好驚咁幫我檢查, 無表面傷痕, 但佢好驚好驚, 於是打比媽媽, 媽媽其實仲有一堂未上, 即刻打電話比個家長然後趕返屋企.
媽媽一入屋見到我比爸爸剝晒光豬, 原來爸爸想睇清楚我有無受傷, 我一見到媽媽就笑得好鬼馬, 媽媽見我無乜異樣, 照常we嘩鬼叫, 打電話問婆婆點做, 婆婆話: 細路仔有邊個唔跌過架? 唔跌下又點會大架? 碌落樓梯都無事啦! 爸爸媽媽觀察左我一段時間, 見我無事無幹, 如常地大飲大食和搞搞震, 先至安落d!
