[left1]我爸爸識游水, 但我媽媽唔識游水, 仲幾驚水添, 當年去峇里島玩香蕉船, 以為會被拋落海, 抱住送死的心情去玩, 點知個船夫原來要收貼士先肯拋人落海, 同船的人好失望, 但媽媽好開心, 因為覺得執返條命, 可見我媽媽真係好怕水.
之前三次游水都係爸爸陪住我地, 今日june姨姨話要同雅雯游水, 媽媽心大心細十五十六, 最後抵受唔住夏日和陽光的誘惑, 決定一齊去玩! 媽媽和june姨姨互相幫忙, 一個睇bb, 一個換衫, 然後調轉, 好順利咁我地就準備好落水. 雅雯係第二次落水, 我第四次, 經驗多佢少少, 所以我無緊張, 完全唔洗warm-up, 一落水已經化身為飛魚, 媽媽托住我比我踢水, 因為無爸爸在場, 所以媽媽要特別小心!
玩左大概一個鐘頭, 我地兩個都好攰, 返屋企即刻沖個暖水涼, 食粥仔, 好開心的一天!
第一次同雅雯游水!
