媽媽終於肯買泥膠比我玩了! 點解遲遲唔買呢? 因為先前在協康會playgroup玩麵粉, 我好抗拒, 而且市面上的泥膠有一陣好臭的香味, 媽媽好怕果種似酒樓廁所好俗的香薰味, 所以一直唔買泥膠!
媽媽終於克服到呢種心理障礙, 今日在青衣一間玩具店仔買左一盒用泥膠做車的玩具比我! 夜晚食完飯, 我和媽媽在廳地下鋪張墊, 一齊玩泥膠, 我可以四個唔同款式的車殼倒模成車, 然後加上車底, 就成了一架上鍊會行的泥膠車! 不過呢盒玩具有另一樣野更吸引我, 就係一支可以將泥膠"吱"出來成條狀的針筒, 我見到泥膠好核突咁從針筒走出來, 就大笑, 然後我用刀將呢條核突泥膠切切切和斬斬斬.
隨盒只有黃, 藍, 紅三色泥膠, 媽媽將黃加藍扭作一團, 變成我心愛的綠色, 紅加藍變紫, 黃加紅又變橙! 真係神奇!