今日爸爸媽媽接我放學, 我例牌拖住媽媽去操場玩車, 正午時份太陽在頭頂, 我依然玩得投入認真, 難為爸爸媽媽在旁等我晒到變鹹魚. 然後我地坐火車去旺角新世紀, 我好少有機會坐火車, 覺得好新奇, 由九龍塘坐到旺角, 得一個站, 唔夠喉, 落左車我企係月台睇左好幾班車, 先肯走呢!
同世儀姐姐去潮樓飲茶, 我鍾意去酒樓飲茶, 好多野食, 尤其是蝦餃, 我次次都指定要食. 然後媽媽要去開工了, 爸爸同世儀姐姐就帶我去金魚街睇金魚, 上次來係婆婆帶的, 好多個月之前了, 我知道金魚係goldfish, 同時又睇左錦鯉, rabbits, hamsters(我叫做mouse), cats...爸爸報告指帶我去街極度艱難, 原因係我不受控制, 亂衝亂撞, 呢一點媽媽完全理解, 毋須多加說明.
晚上係太婆生日, 今年係食自助餐, 我非常喜歡食buffet, 好鍾意媽媽同我一齊揀野食, 抱我睇廚師叔叔整甜品, 玩朱古力噴泉...全部都令我好興奮, 今晚我食左半碗芝士天使麵, 少少蒸魚, 半隻蔗蝦, 一件蛋糕, 一杯雪糕(係我最唔鍾意的高級雪糕movenpick, 不過都食晒), 半粒炸雪糕球, 一粒朱古力棉花糖(我話係lollipop).
唔敢食得太多, 因為我好易嘔, 因為明天要返學, 8:30就先行離去, 但返到屋企沖涼換洗, 到最後竟然12:00幾先訓著, 仲係大吵大鬧到攰先訓到, 可能今日太興奮, 玩到個心創晒, 夜晚就訓唔到囉!
