上次中秋花燈比賽, 我隻肥豬仔順利勝出, 大家都好開心, 媽媽對美勞有少少興趣, 好想在今次聖誕裝飾比賽中再發揮一下, 雖然我仲未識得設計呢d作品, 但我都鍾意剪剪貼貼, 媽媽會將材料和配件預備好, 然後引導我自己貼上.
最近媽媽沉迷玩happy farm和在淘寶網購物, 無好好準備今次比賽, 截止日期到了, 先臨急抱耶穌腳, 最後用好多現成物料(上次肥豬仔用好多環保物料哦!) 做左一個聖誕樹+雪人掛飾, 想用桂花粉做雪花, 營造飄雪效果, 但又無時間去買街市買桂花粉, 最後只能用閃拎拎珠片充當雪花, 效果都ok, 但創意稍欠, 亦毫無環保概念可言.
最後媽媽用現成的英文字母貼紙貼上MERRY XMAS, 我只知道Merry Christmas, 唔知xmas係乜東東, 竟然大發脾氣:"唔係Merry Xmas呀, 係Merry Christmas呀! 我要搣咗佢呀~~~~~!!!" 媽媽解釋Xmas和Christmas是一樣的, 唔夠位整Christmas, 唯有整Xmas啦, 但我唔理, 仲大哭一場. 媽媽見我情緒激動, 知道周公來揾我了, 就氹我訓晏覺先.
半夢半醒間我竟然開口說話:"唔好寫字呀~~~~" 媽媽實在頂我唔順, 決定咩字都唔貼上去, 空白的地方就貼多十幾二十塊閃拎拎雪花, 填塞算數
