昨日在富士急下起毛毛細雨, 氣温驟降, 黃昏返回東京都係濕濕凍凍, 晚上媽媽同我一齊禱告, 請天父俾我地好天氣, 嘩! 今早我五點鐘自動起床, 原來太陽伯伯已經準備開工, 晨光第一線射入酒店房間, 媽媽只係瞓得三四個鐘, 但見到咁好天氣, 都忍唔住起身睇睇, 真係雨過天清, 再開電視睇睇天氣報告, 東京今日將會全日天晴, 平均氣温13度, 真係感謝主!
我地住新宿太子23樓, 窗外望出去就係歌舞伎町全景, 同時亦見到超大型的新宿車站, 早上起來食支奶奶, 梳洗一下, 就睇下風景, 玩下玩具睇睇書, 俾爸爸瞓多一陣.
爸爸都瞓得好少, 但見到天氣好成咁亦唔捨得浪費, 寧願瞓少d, 起床梳洗後七點正全家ready出發!
前兩日都無搭過地鐵, 買左張suica今日先有機會用, 倒屎咁早去得邊? 梗係去築地市場啦. 住新宿勝於池袋就係搭車超方便, 地下鐵線如丸之內, 日比谷, 都營大江戶線, JR山手線等常用線都貫穿此站, 減少轉車次數, 方便得很.
去築地市場可以在銀座線的築地站落車, 或都營大江戶的築地市場站落車, 今次係爸爸媽媽第一次搭大江戶線在築地市場站出, 原來呢個站係較近場內市場和販賣新鮮水產的街市, 而築地站就較近場外市場, 即係有好多食肆和零售的地方, 主要做遊客生意.
上圖就係築地市場入口, 真係完全唔似入口, 見到好多貨車和運魚車閃來閃去, 揾食車唔會因為你係遊客而禮讓, 帶住小朋友真係要好小心, 橫過呢度爸爸全程抱住我呢.
一到步梗係揾野食先, 未食早餐吖嘛, 場內市場有四十幾間食店, 大部份係壽司, 其中兩三間特別多人排隊, 出來旅行時間最寶貴, 我地先唔會傻到花個幾兩個鐘去排隊. 我地揀左一間想入去, 但有個大嬸出來話:"No baby!" 示意唔歡迎帶住小朋友的人幫襯, 懶巴閉咁, 我地再去隔離一間.
壽司店得十幾個位, 已有一對日本情侶坐低左, 我地坐低後不久再有兩名日本男子入來食早餐. 伺應叔叔好好人, 見我係小朋友主動比杯水我, 爸爸媽媽就飲綠茶. 但唔知點解日本人特別鍾意飲冰水, 都未係天熱就飲冰水, 唔係好慣.
我地叫左一個三千幾yen十五件壽司set, 壽司師傅好嚴肅, 一臉認真地默默工作, 做好後將壽司三件三件咁放在我地面前, 燒玉子當然歸我, 我亦食左少少其他壽司和飲左d麵豉湯, 新鮮手握壽司真係好好味, 果種鮮味相信好難可以在香港可以食到!
食完就去參觀下啦, 媽媽見到d運魚車風馳電掣, 好驚, 但爸爸唔理, 想入街市睇睇, 最後我地誤打誤撞入左中央缷賣市場. 嘩~~! 原來呢度好多野睇, 好多奇型怪狀魚類, 海產, 手板咁大隻鮮帶子, 仲有平到笑o既海膽, 三文魚子.... 街市裡面遊客較少, 主要係本地人出入, 似乎來入貨居多, 好似我地一家三口入來好似去海洋公園睇魚魚的港燦家庭, 幾乎無.
街市裡面都幾繁忙, 但衛生良好, 亦無魚腥味, 唔似得香港街市d魚檔咁dirty. 爸爸媽媽都有幫襯, 買左一盒2000yen的海膽和一盒1000yen的三文魚子, 預備中午去賞櫻時野餐食.
我鍾意食蛋, 媽媽買一條細size的燒玉子俾我專享, 再買一盒士多啤梨(十幾粒又大又甜只售500yen), 然後再去便利店買飯團和飲品, 就出發去新宿御苑賞櫻去!
