今日3:30學畫, 應承左媽媽食左午餐就去訓覺, 果然守信, 飯後玩一陣玩具就自動入房眠一眠, 1:15訓到3:00, 食支奶就去畫畫, 今日畫班竟然得我一個, d小朋友唔知去晒邊.
上完堂去惠康買野, 我負責將貨品放上收銀機枱, 我竟然好大力將一盒德清源雞蛋"拍"落張枱, 八隻蛋爛左兩隻, 被媽媽教訓, 本來有得去公園玩, 但媽媽話要返屋企處理左d爛蛋先, 我以為媽媽罰我無得去公園, 傷心得喊起來, 攬住媽媽說:"媽咪~~對唔住呀~~~"
媽媽見我知錯, 搞掂d蛋後就帶我去公園, 媽媽提議我帶少少thomas火車去同小朋友玩, 真係好主意, 我問媽媽要左一個環保袋, 精選左六架磁石火車頭, 準備去公園同小朋友交流一下.
平台公園真係好地方, 每日下午都有好多小朋友來玩, 老人家一堆, 菲傭姐姐一堆, 小朋友又一堆堆, 各有各hea. 我興奮地從環保袋攞晒D寶貝在花槽邊石壆推火車, 但發現無小朋友同我一齊玩, 有點無癮, 玩左一分鐘就收檔, 去sir滑梯.
跑跳一輪後, 開始有小朋友開檔玩火車了, 又係上次果個小朋友, 佢次次都帶好多架車來, 上次唔比我玩, 今次我都有帶來, 二人馬上撻著, 問佢借車馬上答應, 我亦好大方, 願意同小朋友分享我D靚車.
無幾耐越來越多小朋友, 成班三,四歲男生, 個個都係thomas專家, 你有mighty mac, 佢有charlie, 我有rusty hiro...全部角色名都滾瓜爛熟, 媽媽對Thomas都有研究, 同小朋友都搭得上嘴, 無代溝.
天氣非常好, 涼涼地好舒服, 忽然一陣東風吹來, 有小朋友大叫:"好大風呀!" 唔知點解, 我認為好大風就唔可以再留o係公園, 我馬上將自己的六架火車收返入環保袋, 拖住媽媽要返屋企, 煞有介事同媽媽講:"好大風呀, 我地唔玩嘞..要返屋企嘞..." 因為玩左都一段時間, 媽媽正煩惱用咩方法叫我走, 誰知我突然自動離開, 非常好.
