痛左成晚，個人好累，7：30am，粟米爸就準時黎到！
8點幾又俾姑娘撩陰道，感覺真係唔係太好受••••
之後，陪到我9：50am,姑娘叫佢回避下，因為要過床，我地都以為所有人都要轉床，點知•••原來只係有位媽媽要生了，所以要轉床，我見咁耐都未有動靜，又call返歎緊星巴克既粟米爸返黎！
大約11點，醫生黎睇我，睇返紀錄，又check陰道•••，結果係話我陣痛時間夠，但係力度唔夠，子宮頸仲係未開，俾兩個建議我，同粟米爸考慮！
1. 自然生，照進度應該要夜晚甚至半夜先會生
2. 落藥加速子宮收縮令子宮頸開快d，就早d生
咁我問粟米爸點，粟米爸話叫我自己決定，我當時揀前者，之後去完洗手間，姑娘問我點，我話等，姑娘就叫我落藥會好d，因為已經穿左水，即係同外界空氣有接觸，驚隔太耐會有感染，叫我落藥會安全d！我擔心落藥會令我痛楚增加，姑娘又話唔會好痛，結果，我就試下揀落藥！當然我被騙了！
姑娘先幫我放大便，痀清再幫我吊藥！吊藥插針有d痛！之後就慢慢開始陣痛加大，姑娘由10，30，45，最後去到75度，當佢set到75時都插定笑氣，而我既痛苦就由佢轉75開始頂唔順，一痛就聞笑氣，鼻吸口呼，聞聞到唔痛就停，會有d暈暈地，可以眠下！
其實笑氣真係幫到咩？我諗只係有好過無，因為一痛就會醒，吸多幾口崑就暈甚至昏迷，但係都會有識意，聽到人講野，不過我已經控制唔到自己想講既野，知道自己只係發出單音，仲有dd幻覺，覺得粟米爸睇住我咁辛苦，唔開心，我想講野又無力，結果望住粟米爸流眼淚，而粟米爸當時就以為我痛到流眼淚！斷斷續續咁重覆，心諗究竟幾時會完，如果呢包吊完要幾耐呢？又如果吊三包都唔得，咁到時要轉做手術點算，定係吊完一包就算，轉開刀好d!不停就諗好多野！又同自己講做咩要揀順產咁自虐•••
期間姑娘有問有冇痛到呼吸困難，又或者有大便既感覺，如果有就叫老公幫手call姑娘！
結果，捱到所謂痛到頂唔順同想痀既感覺，用盡氣力同粟米爸講”叫•••姑•••娘•••”
之後，粟米爸就禁制call姑娘，姑娘幫我check下體，話開左3-4度，就call阿嬸準備推我入產房！
無咩氣力既我真係只有慢動作，人講咩我做咩，粟米爸就去出面等，等人通知佢入產房陪產！
我就先坐上輪椅，被除下底褲，阿嬸同姑娘講話一陣問粟米爸，仲要唔要條底褲！我用無咩氣力既聲黎講”唔要架啦，掉架啦”
之後，約4點送我入產房，再上產床！
姑娘先黎同我講幫我打止痛藥，就叫我打側俾個pat佢打！之後，就放個笑氣係我側邊，叫我痛就吸，當時有痛但已經唔係個種痛，而係想痀屎想痀個b個隻！期間我有發出聲，姑娘聽到，仲問我做咩嗯嗯聲，其實我想痾•••但係姑娘叫我痛就吸笑氣！
聽到阿嬸話幫我叫粟米爸入黎，我只係點頭回應！朦朧地見粟米爸入左黎，佢聽見我有”嗯嗯聲”，又問我係咪好痛，但係我已經無氣回應佢，姑娘同粟米爸一直哪我痛就吸笑氣，有一次仲要係姑娘迫我用，我其實只係知我要痀個b，但係又知要留力，個一下要忍住而發出既聲，就俾其他人認為係痛，我真係好難控制，每次又忍又痾都feel到必水，當時只係諗，快d幫我check，我幾時生得啦唔該，要生又唔生得咁，好慘丫！
之後終於有姑娘幫我啦，終於有7-8度，好快生得，仲幫我call醫生，姑娘仲俾我試睇下我識唔識用力！到醫生黎，以為我谷緊，我其實好努力忍緊，醫生話比預期快，原本諗住我7點先生得，睇黎6點都得了！醫生問姑娘我識唔識用力，姑娘話識，就開始生既過程了！醫生叫我一痛就出力痀，來回幾次之後，醫生話見到頭髮了，之後再努力重複，加上醫生既技術，結果就出左頭仔，再努力就出埋個身了！
當成個b出晒黎，個人鬆了，醫生將bb放我胸前確認一下男嬰，眼前就係一個有血絲既男嬰，聽到粟米既喊聲，醫生要粟米爸報時，痛楚過去了，姑娘抱走抹乾淨，剩低既就係等胎盤了，我已經唔記得胎盤係咪都係要我痀出黎，淨係記得同胎盤一出好似有堆野咁！
姑娘抹好粟米身上既血，用毛巾包好，就問我地有冇相機，幫我地三人影相，此刻粟米爸話自己笨左，無帶相機，好彩有手機！
再黎就係醫生幫我縫傷口，期間有問我痛唔痛，可能怕止痛藥過，縫完再check有冇咩遺漏，跟手就到另一位姑娘幫我打針，打落手大脾，話係幫助收子宮！粟米爸都要返出去，去返病房等我，而我係產房等阿姐推床黎，有位姑娘又黎初我肚，幫我check子宮情況，佢好大力地初，好痛，但係佢話係幫助收子宮，等d血唔洗流咁多！仲叫我得閒自己都要大力初下，快d收肚，教我摸子宮係邊個位！之後就過床，再送返入病房休息！
亦提我千其唔好食雞酒之類既補品，返去兩個鐘後先飲啖水，睇下有冇嘔，無就可以試下食野！
當送入病房，個人又舒服晒，抖一陣就試下飲啖水，因為口乾了！姑娘放低d藥，之後叮囑粟米爸，第一次落床就要記住扶我！
