家長日真係好似好遙遠之前既野，依家又再出現！以前daddy mammy 唔得閒，我就會代佢地去兩個妹既家長日！估唔到，依家就係自己個仔！
好想知呢個古惑仔有冇曳！有冇俾老師罰！又或者多咀！
由於唔可以帶埋粟米去家長會，唯有放低佢去麻麻到玩，我同粟米爸再搭車去學校！
3:15 準時到校，先拎通告俾門口校工望下，之後入去做登記，拎左張籌，就行去課室坐係到等，但係未行到課室時，有個老師竟然問我係咪盧晉宇家長，我答係，心諗點解佢會知？佢無教幼兒班架喎，唔通粟米好曳？
入到課室廖老師俾左份folder 我地睇，係粟米返學時既野！呢份野會係裝三年既野， 有佢上堂時既畫，有上堂時既練習，仲有每月評估表，有一張係寫左粟米上學期既表現！
原來佢真係有做過組長，個時佢講過我知，我以為佢吹水扮野，原來真係有！
仲有兩張相，一張係佢斟緊水，另一張係佢練習小肌肉！
評語係要佢練習好小肌肉！
本野唔多野睇，好快睇完！因為唔俾影相，又得影低張評語！
原來3點個位家長都未入去，又見有成6個等緊，仲諗住有排等啦，因為都3:25分！仲拎手機出黎打道場，諗住有排啦！點知突然又叫粟米既家長！乜又咁快啊！
好彩係我最想既梁老師同我地講返！梁老師話粟米上堂好專心，學野都快，記性好好，有日播返開學9月個陣啲歌出黎，粟米係唯一一個識唱返晒全部既小朋友！
英文底子好好，外籍老師都讚聰明！ (呢樣真係完全意料之外) 老師話佢竟然可以同老師同英名溝通，仲要係一串句子，而唔係單字！老實講英文差既我絕對唔會同佢日日講英文，亦無教過佢啲咩英文，老師竟然話佢英文底子好！我打個突！我好懷疑呢樣真實性！因為就算我無聊用英文問佢野，佢都只答yes 或者 no! 未聽過佢講成句英文囉！
老師話粟米其實好好教好受教，仲話粟米好多野都識，又知咩老師可以做啲乜！數學都好叻！
係唯獨填顏色就無咩心機填，呢樣我信，因為功課要填色既時候佢都求其油，又或者唔想油！
同埋食茶點慢，老師依家就要佢知每個活動都要時間限制！
老師叫我同粟米練習多啲填色，或者要由少少地油起，daddy mammy 同佢一齊油！或者今日mammy油一啲粟米油一啲！用佢最鍾意既公仔開始！
粟米竟然同老師講捉精靈！ 俾佢激死！
睇返成績表，其實都好多係4, 係得自理差少少，希望下學期會有改進啦！
