親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
粟米媽
他的寶貝
他的興趣
文章分類
日期
#Tag
Hi~ 小寶真是可愛
資料載入中...
真是一個特別的體驗啊！由於粟米的腳進院，腳腫情況雖然有一天比一天消腫了一點，可是還是有腫，這幾天都一直打抗生素跟吃藥！情況由快爆的腳，慢慢變成正常的腳！ 驗血報告正常，白血球指數有點高，不過發炎指數算正常！唯獨最久的X光照報告最遲知道！結果也是正常，沒骨折！ 醫生預定1月1號早上可以出院！ 沒想到我們竟然由2019年住到2020年！除夕大餐也在醫院吃！真是一個特別的除夕啊！
在日本旅行的第五天（26/12），粟米忽然左腳背痕，當晚回酒店只見腫起一小部份。 27號繼續行程，一路上說痕，回到酒店，發現腳很腫，成個腳背腫起，當時覺得可能是走路太久，休息就沒事！ 沒想到28早上起床，腳依然腫，比昨天更厲害！走路都一拐一拐的！今天剛好 3點的飛機回港！ 幸好住的酒店就在車站對面！一早check out就趕去坐車到機場！到機場就先拿行李車，叫粟米坐上去，免他走路！ 坐到可以check in，再過關，粟米爸都抱粟米，直到上飛機回到香港！ 還好gogovan 很快就到，回到家放下行李，打電話問診所有沒有開，護士說11點之前要到，就趕快去看醫生！ 沒想到醫生一看腫到不行的腳就說：「腫到這樣不尋常，要入醫院！我不收你診金，你馬上去醫院！」 一出診所門口，粟米爸就趕著上計程車，就這樣。。。什麼資料都沒有帶的情況下，決定去法國醫院！！ 一到醫院夜診部，我看到櫃台上的字才意識到（啊，出世紙沒帶，連我自己的身份證也沒帶。。。。。） 護士問我出示證件，我說沒帶，之後問我之前有沒有看過，我說：「他是在這裡出生的！」 護士問出世日期跟我的名字，護士說要趕快補回身分證明，先幫粟米寫"盧司徒xx之嬰兒，你有資料就趕快給我們，再幫你改！因為夜診沒兒科，所以就先看普通科！ 當時已經差不多11點，看夜診的人還算不多，也不少！等半小時就到粟米看！醫生看一看粟米的腳就說：「因為腳腫得太厲害，要入醫院檢查，要住院，叫護士看看有沒有房間！明早才有兒科的醫生來看！」 在等房間辦手術期間，粟米爸回家拿出世紙跟我的身份證！在這段期間，我又發現我沒有信用卡。。。。還好還有提款卡！ 護士給我資料，去辦入院手續，她還說要盡快補資料，不改資料的話，如果保險賠償方面，可能沒辦法拿到賠償！另外會有藥給粟米吃！粟米很快說要藥丸不要藥水！護士嚇一跳，不太相信這麼小就會吞藥丸！不過因為還沒有配藥，護士說到病房之前再跟護士說要藥丸！ 還好粟米爸已經到家，叫他先把我的身份證跟兒子的出世紙先傳到whatsapp，到櫃台辦手續時都可以先給職員看！ 登記完去交按金，職員就要先付7000按金，我把提款卡給她，她說：「提款卡就立刻過數！」我說：「沒關係，我忘記帶信用卡！」她說：「那就多除少補啦！」 付完按金又等醫院的阿姨帶我們到病房！先到四樓報到！護士問關於粟米一些資料！量體重，度身高！當時粟米已經累到不行！護士還幫粟米抽血，種豆！護士說會有藥給粟米吃，我跟護士說盡量給藥丸！ 因為只可以一個家長陪，所以我就陪粟米睡在醫院！本來說粟米爸買東西給我們吃！由下機到現在都沒吃晚飯！直到上房間，安排粟米上床休息，粟米爸出去買吃的再回來！當粟米爸回來時，粟米已經沉沉睡著了！那就我們自己吃！！ 粟米爸陪我吃完就先回家去！我就回病房陪睡！護士正在拿藥給粟米吃，我把粟米叫醒吃藥！ 睡到沒多久覺得有點冷，結果我起床，找一下有沒有被子，還好在另一邊的櫃子找到枕頭跟被子！即時暖很多了！！ 突然護士又來，原來是幫粟米量體溫！一晚來兩次！三點才睡，結果。。。。7點半就被醫院阿姨叫醒！多麼累人啊！
今天第一天註冊日，不論喜歡與否都要先註冊，不然就會被當棄權。 送完粟米上學，回家休息再出發註冊。 地圖教先坐83A小巴，總站下車就會到。我就去小巴站等車，看到小巴來了，結果沒有停，原來83A小巴不停這小巴站，它是停前在巴士站前一點的小巴站，現在才知道。 到站了，學校真的很近，不過在屋村裡面，感覺有點困住的感覺。 去到門前，想推門進入，原來上鎖了，等裡面校工按，才可以進去。（有必要嗎？） 剛好有兩個家長在填表，我去問校工註冊事宜，校工拿了一張表格給我填，填完就上一樓交。 填表時覺得這份表好奇怪，先是班別，班別我應該要填什麼？幼稚園的？結果問了校工，校工說不用填。。。。。。 再來就是語言，問 平常用 "華語/ 非華語"，什麼東西華不華語啊！就選華語吧！ 地址也是，學生資料填了一次，父親又一次，母親又一次，有必要嗎？隔壁還有格子選"與學生同住/不同住"，那不是選同住就成了？還要人多寫地址兩次幹什麼！ 可能不是心儀的學校吧，填一個資料表都有點不順眼！哈哈 最後簽名也是，父親簽名，母親簽名，監護人簽名，是要簽嗎？我還是去問校工，這一欄是隨便一個簽，還是父親也要簽？ 還好校工說隨便一個簽就好！ 真不曉得是誰設計這份資料表！給人很煩的感覺！ 填好簽好就可以上去交表。 上了一樓，進一間小房，裡面有一個女人，負責收註冊資料！當時沒其他人！ 把資料交給她，她問我聯絡人要先聯絡誰，我說我就可以了，之後她問除了這兩個電話，還有其他電話聯絡嗎？ 我說沒有了。她好像不太相信。 對齊資料，她就給我一堆文件，有書費單跟校服單，7月2號會有書商跟校服商來學校幫同學訂書跟校服。還有8月底有三天小學適應課程。 還有一份小學簡單資料，簡單到沒說明派中結果。 交完註冊完就離開了。 這小學感覺舊，也給我一個會有很多新移民的感覺。希望叩門成功！不然就要在這讀一年了！
自從交了叩門表，一直怕會漏接電話，不想錯過小學通知，所以電話無時無刻都留意，後備電也帶在身上！ 等了幾天，結果小學打來，不幸我剛廁所出來，想要的時候已經太晚，對方掛了。 我打回去幾次，幾次都沒有通。再多等一下再打，後來通了。 我：請問哪位打電話來呢？ 她：學生名字是什麼？ 我：盧晉宇 她： 啊，是我找你的，通知星期六來面試，時間是9點，要早15分鐘前來到學校，要帶文具 我：好 她突然緊張的說： 家長要陪同出席 我：好的，謝謝你！ 終於等到電話了，總算是有個機會！希望成功吧。 我想我們是第一批要見的，因為面試時間是9:00-12:30。我們應該是最早面試。
到看結果的時候了，說緊張又不是，不緊張又不是，只想快快知結果，看看粟米會被派到哪間小學。 一早起床，不是因為心急知結果，而是今天粟米要上興趣班，剛好看結果的時間是9:30才開始，那就先送粟米上興趣班，再搭車去看結果。 早前已預備了叩門的文件，放好背包便出發。 吃早餐時，手機不停收到家長們緊張的訊息，"沙田拿了籌，排第200個"，"我這邊很長龍人很多"。。。。。。 手機不斷開始發放緊張的賽果，有第一志願的，也有失落要叩門的。 送完粟米上學，便搭車去看結果。以為有很多人排隊，結果沒有要拎籌，只有踏入門口便看見的白板，白板貼上編號，分了顏色，找到了所屬顏色便上一樓去領註冊證。 上了一樓，突然被問是否拿叩門表格，真的反應不來，我只是來看結果，說著又被問知道是什麼顏色嗎，我回答紫色，職員便指著那間房，順道叫我們找紫色那行領證。 入到像禮堂的地方，入面人很少，紫色那行是沒有排隊的人，很快對了號碼及身分證便拿到了註冊證。 起初沒留意那間小學，我和粟米爸可能太急，看了頭4個字就開心起來，以為是第一志願，高興地離開及搭車往荃灣叩門。 在車上，我填資料時，才看真我們空歡喜一場，是第三志願不是第一志願，看錯原因是同名但差兩個字，看漏了"千禧"這兩個字，沒有這兩個字就不是第一志願了。 由非常高興變成有點失落，不過話說回頭，就算得了第一志願，我們都是會去叩門，這點也是沒變的。 去到心儀小學交叩門表，人同樣不多，只有校工在幫忙收表，有幾位家長忙填表及對資料，校工問我是否交表，接過我手中的資料，核對了一下便可以走，回去等電話通知。希望有機會面試吧！ 交完表再去接粟米放學，時間剛好，亦算順利。 整天收到朋友的關心，很感謝他們對粟米關心。 替可以得到第一志願的同學們高興，也有替要好的同學們擔心！！ 最後結果還是不知道，希望大家都有好消息。
不經不覺5歲啦!!!時間說長不長,說短不短!! 當然越來越多咀了,成長了不少,也頑皮了不少!! 因為5歲生日,就特別來一個特別點的慶祝生日地方!! 應該是對粟米來說是特別,第一次可以去迪士尼酒店吃自助餐過生日!! 又剛好遇著學校教展日,放假一次,難得不用上學,可以先去迪士尼樂園入場玩一下,拿生日襟章!! 差不多時間就行過去迪士尼翠樂庭酒店! 事前打電話訂位時都有說是生日,亦訂了蛋糕,(加了點錢訂了一個米奇造型的解果蛋糕)!!幸運地遇著米奇90大壽,自助餐有75折(本身銀卡會員才得9折)!! 職員帶我們到座位,桌上放左一些生日禮物!!粟米見到這些小禮物也非常開心! 每隔一段時間便有卡通人物輪流和每檯客人影相,粟米份外開心!! 突然全部卡通人物走出來,站好一行,職員們一個一個拿著生日蛋糕,每個蛋糕都有不同造型,原來是慶祝生日時間到了!! 先來一個熱舞,再唱一首生日歌,職員把粟米專屬的蛋糕放在檯上,點起臘燭,粟米非常開心!!! 職員還幫我們拍照!! 拍照後,職員跟我們說,如果暫時不吃蛋糕,可以先幫我們包起放雪櫃,走時再拿給我們!! 這個服務實在是太好了!! 今晚的自助餐,雖然不及外面的那麼高級多款,但味道算不錯!! 至於生日蛋糕,我們拿回去和嫲嫲他們分享!!意想不到的是,這蛋糕很好味!!! 粟米表示下年生日都要去迪士尼食自助餐!!現在的小朋友真識選!! 下年就小學了,希望派到一間好學校!!亦希望長大的粟米少點刺激我!!
由於每次嫲嫲都會襯我們去日本旅行時,叫我們買納豆回來給她,可惜每次都真的找不到她想要的玻璃裝納豆.為免她會覺得是我們不買給她,加上上次去日本前有被輕怨不帶她一起去日本玩,今趟就嘗試帶著她一起同行!! 由於她腳力不是很好,在計劃行程,有好多我都不選,盡量在不換酒店的情況下,盡量去特別的,好玩的地方!!其他太遠的地方,下次我們再去好了!! 行程如下: DAY 1 到名古屋 第一天到步,通常都沒什麼時間逛,只去附近的BIC CAMERA,看附近有什麼餐廳吃晚餐,結果找到一家日本料理店,不好吃的..... 再去便利店買明天早餐吃的跟牛奶!! 日本旅遊 - 名古屋 2018年08月06至11日 由於每次嫲嫲都會襯我們去日本旅行時,叫我們買納豆回來給她,可惜每次都真的找不到她想要的玻璃裝納豆.為免她會覺得是我們不買給她,加上上次去日本前有被輕怨不帶她一起去日本玩,今趟就嘗試帶著她一起同行!! 由於她腳力不是很好,在計劃行程,有好多我都不選,盡量在不換酒店的情況下,盡量去特別的,好玩的地方!!其他太遠的地方,下次我們再去好了!! 行程如下: DAY 1 到名古屋 第一天到步,通常都沒什麼時間逛,只去附近的BIC CAMERA,看附近有什麼餐廳吃晚餐,結果找到一家日本料理店,不好吃的..... 再去便利店買明天早餐吃的跟牛奶!! DAY 2 LEGO LAND 預先在網上買票,到現場排隊換票,網上價錢比較平,幸好排隊換票不是太長龍!! 入門口會有工作人員幫忙拍一張大合照! 玩一兩個遊戲便去吃午餐,隨便找一家快餐店吃,仲有免費飲料任飲,真難得!! 每個遊戲粟米都覺得好玩,想再玩多次,雖然不像迪士尼那麼長龍,不過時間也是有限(因為很晚出發)! 最好多的是玩噴水,可以射到對家船上的人,也可以射上岸上的人!! 之前有人說LEGO LAND很小,玩不到一天,怎知道我們玩到關門....!!! 出園後,在附近日本料理店吃,這一家的刺身飯很好吃!! DAY 3 麵包超人博物館 --> OUTLET DAY 4 NORITAKI之森-->大須觀音寺及商店街 DAY 5 和服體驗--->名古屋城-->榮行逛 DAY 6 JAPAN MONKEY PARK --> 西松屋 -->燒肉放題 DAY 7 名古屋水族館 DAY 8 機場行逛-->回港
早排見學校有某幾間小學既講座通告派（深水埗區），諗有機會葵青區同荃灣區都會有小學開講座，就即刻上網搵下資料！ 果然俾我見到有啲已經截止左報名，有啲仲未到時間，有啲就正接受報名！其中一間係荃灣區見有得報，就報去聽下！ 粟米爸因爲公事，所以唔可以一齊去！唯有我自己同粟米去聽啦！ 由於位置有點隔涉（我唔太熟），所以我打的去哈哈！ 去到見大門無開，隔離停車場反而入到去，咁就停車場入啦，點知俾啲校工話唔係呢到入，係返大門入！ （心諗：咁你地又唔開定大門，關晒大門叫人點入喎！） 10點開始係禮堂，其實都已經有啲早到既家長等緊，眼見都快10點，好自然大家都會自動波行去禮堂啦，點知又俾校工們截住，又話未夠鐘，叫我地等下，一陣會叫我地上禮堂！（好心就安排好啲啦，妖） 諗住坐低等，又突然話可以上去禮堂，頂！
時間話咁快又下學期尾聲，又係時候見家長，雖然下星期都要返多4日學先放暑假，但係因為學校有拆樓工程，所以家長日都提早左！ 今日都係最後一堂興趣班上堂日，日前都同粟米去買定朱古力同寫感謝卡，送俾桌遊班同足球班老師！ 放學接粟米時見佢拎住一盒好大盒既顏色水筆，仲諗住去書展買返盒水筆俾佢用添，依家可以慳返啦！粟米仲同我講今日頒獎！有兩張證書！ 因為落雨關係先搭車返屋企，等粟米食埋飯，送佢去嫲嫲到，我就同粟米爸去搭車去學校！ 唔知係咪落雨關係，好似唔太多人咁，先去登記，再行去課室睇粟米在校既資料！ 今次評語大概都係講粟米禮貌有待改善！我都覺佢近排禮貌欠奉！好明顯做幾次禮貌大使都係學唔到有禮貌啦！！ 睇完佢既評語，唔夠一陣就已經俾老師叫左去見！ 竟然係見蘇老師，我仲以為係又係梁老師添！ 老師拎出評估表同張獎狀出黎，今年佢拎既係"語言能力表達獎"，老師同我講"你應該都唔意外啦"，我點頭，就講粟米既學習係無咩問題，唔洗擔心，學得快記性好，係大小肌肉就爭少少，最要改善就係禮貌方面，有時拎完野就行左去，問佢應該要講咩，佢就望住你，再同佢講佢先會講唔該或者多謝！ 老師話粟米瘦，俾粟米食多些，老師話問佢食左咩，佢好驚咁！ 我話係呀係呀，上次去麥當勞，佢好驚，佢話老師話麥當勞無益，一陣仲話如果老師問我食咩點算，我同佢講咁你同老師講，你唔係成日食既，咁岩今日趕時間先食 老師話原本無諗住問，見粟米偷望自己，所以先叫佢過黎問，佢就講唔係成日食 我都應該想像到粟米俾老師話既情境 老師話粟米大小肌肉都一般，叫我俾粟米跑下，做下運動 老師仲問我粟米飲唔飲奶 我話都冇飲既，依家比較鍾意飲鮮奶，即係屋仔個款，奶粉都飲，但係比較鍾意飲鮮奶 老師話鮮奶好，俾芝士粟米食 我問老師係咪有同粟米講食芝士 老師話 係呀，有呀 我笑住講 唔怪之得佢無啦啦同我講好想食芝士啦 老師話粟米都偏食，要粟米食多少少 我話粟米有時又會食好多，有時又好少 老師話會架，叫我留意係邊個時候食得多就俾多少少佢食，老師仲話自己個大仔都係咁，之後健康院姑娘就講留意邊個時期食得多就俾多多佢食，又好似真係得，叫我都試下！ "我希望我做到啦" 之後都無咩特別野要講，主要都係呢堆，講粟米就快高班，暑假訓練下佢！！ "唯有係咁啦" 就係咁就見完家長，都係預期之耐！！ 寄望出年佢可以做到有禮貌啦！
今次真係學寫中文名啦，寫個"盧"字！ 學校另外有張紙仔教點樣寫自己個中文全名既筆劃，叫佢地一定要放筆袋！ 仲以為粟米寫個姓會要我教佢寫好耐添，估唔到最多筆劃既字佢竟然寫到喎，都寫得唔錯！！ 大個仔啦，開始寫自己個名！
返學前粟米講話今日開始寫自己個名，我以為係中文名啦，點知。。。原來係英文全名！！
黎緊9月要為選小學作準備，雖然我不會揀深水步區，見學校派左幾間小學既講座通告，都搵一間去聽下啦，大前提是不要撞興趣班的時間！ 最終揀左基愛，去到間小學，學校大門其實都不太似大門，好像有點似後門！！ 疑惑之際，有老師剛好由樓梯下來，指示我們上3樓禮堂！！ 因為天氣熱，想快快進校涼一下冷氣，估唔到我們是第一個到，先找位置坐一會！ 有一位男老師問粟米是否初班，便帶粟米去一個課室！ 家長在禮堂聽講座，小朋友就在指定課室玩中英文文字遊戲！ 一開始由校長講，校長太長氣，講太多唔關事既野，又要睇片，但係其實影片並無意思！！ 這間學校規定小朋友一定要學武術和陶笛！每星期有兩堂體育課，一堂是學武術-詠春！！ 本來並無不妥，可惜最後目的只是為了表演，並無實意義！ 言語間覺得這位校長其實好表現自己！多次提及叫大家上網看他放的影片。。。。。。 雖然這間是有宗教的小學，但也不用乘機宣傳吧！！教人摺十字架，又教人拼字！「拼。及永生」確係有點討厭！！！ 最有用資料是 - 這年雖然沒龍那麼多小朋友，但也不少，學位也很緊張！！
不知不覺又到母親節，昨日先同嫲嫲佢地一齊去一間叫"海底撈"既打邊爐店到慶祝母親節，當佢地舉杯講母親節快樂時，我完全唔覺得自己係有份，我叫粟米同嫲嫲講母親節快樂，嫲嫲就話我都係母親， 說真的....我真係對呢啲節日無咩感覺，我諗就算無人同我慶祝母親節，其實我都唔覺有問題！ 星期五接放學時，粟米拎住老師教佢整既母親節勞作，送俾我，當然每個小朋友都有，無咩特別，特別在粟米剪紙技巧唔太好，啲花剪得唔太圓，十分搞笑！ 星期六興趣班，接放學時，粟米竟然拎住紮花，一紮康乃馨，事後先知足球班既小朋友先有！我仲以為每個興趣班小朋友都有添！估唔到我會有機會收到呢隻花！真有點意外！ 到左今日，母親節正日，粟米同我講母親節快樂，仲話送錢俾我，佢走去拎佢郵筒形既錢罌，倒出佢儲既零錢，之後拎左25蚊俾我！ 其實呢啲錢係公公每次賣單，一有散紙，又唔想俾貼士人，就會俾晒粟米，粟米就會儲落去佢個郵筒錢罌到，所以先有錢，而我地本身就無俾零用錢佢儲既，話晒都係幼稚園，無理由要俾零用錢掛！不過粟米對錢都有一定概念，希望佢大時都會識得儲錢！ 收到粟米既母親節禮物，當佢拎錢俾我時，都真係覺得幾好笑，亦都有種唔知點既感覺，好似拎左佢好難有既錢，有啲唔忍心！ 除左俾錢我，佢都有送25蚊俾嫲嫲，嫲嫲轉頭就俾返粟米爸！嫲嫲當然好開心，個孫會真係送錢俾佢！我諗都唔會有好多好似粟米咁既年紀既小朋友會咁做或者捨得俾！ 睇住佢既成長，真係好覺得時光飛逝，開始懷念初開識行同講野既佢，依家已經咁大，唔知過幾年後，佢會係點呢？
4月3晚上，迪士尼玩完返黎，地鐵再轉搭巴士回家，到站時趕住落車，無留意粟米竟然留低左佢既duffy 掛頸搭車套！ 直到4月4晚要出街，搵極都搵唔到佢個搭車證，心知不妙，諗起粟米當時無掛頸，一定係急落車時，佢擺係凳無拎到！ 真係大獲，八達通事少，學校接送證事大，仲要加埋興趣班接送證！好頭痕！ 即時去九巴app到用即時聯絡，問下有冇見過啦，當然回覆既答案係，叫你辦公時間，打電話去九巴失物認領到查詢！ 當時已經 6:38，表示唔洗打啦，人地5點收工！ 當然4月5 又係唔洗問啦，紅日公眾假唔！ 4月6 一早9:06 打去，可惜無人聽，得留言，咁照留啦！ 9:45 九巴打返黎，係一位講野比較慢既阿叔聲，話收到留言，之後問返我唔見既套係咩樣，公仔係點樣，張學生證係咩小學（其實係幼稚園囉），學生叫咩名，張八達通係成人定小童，⋯等等。 之後，阿叔話見到電腦有個粟米名既file，之後，叫我mark返失物認領既地址，再寫低認領號碼，仲要帶小朋友證明文件，如果唔方便，可以用手機影低，拎去俾職員睇。 太好啦！真係有執到，雖然要去九龍灣車廠到拎返，但係好過無左，即刻拿拿聲去拎返！ 搭的士時，唔知係咪司機厭我短途，開頭佢唔知九龍灣有巴士車廠，後尾佢諗到係邊，就多口問我點解要去個到，我話因爲小朋友唔見左八達通同學生證，司機竟然話"比著我就唔鬼拎啦，要人去咁遠" 我話"搵得返已經好好啦，仲厭遠？" 佢話\"啲外國人就唔會咁諗,又話自己都試過唔見身份證回鄉證，佢都唔拎返⋯（下刪數十句）！ 又唔係佢要拎做咩咁多野講呢，好煩！ 去到車廠，去搭電梯上2樓，唔知點解覺得部電梯好似好唔似電梯咁，之後上到去，同個接待員講失物認領，俾個號碼佢時，我又好低能咁抄少個號碼，好彩都有照搵俾我，對一對身份證明，好搞笑地問粟米識唔識簽名，粟米話識，職員又真係俾佢簽，結果粟米寫左LO 就停左，職員就話："你又話識簽名既？下次問你呢個係咪你簽名，你要認得喎" 講完之後，唔知點解職員覺得粟米個O字唔靚，又幫佢連返埋個O字，真想講咁加左筆就唔係我仔簽啦咪哈哈！ 好彩巴士司機有執到，最後都拎得返，聽日返興趣班接放學，就唔洗抄身分證，又唔洗要老師再整過啲接送證俾我！ 第一次失物認領，確實有啲開心既！
派成績既時候到啦！ 早上送完粟米去學校興趣班，跟手接放學搭車返屋，食完個飯，將佢交落去俾二家姐睇住！就搭車去學校！ 今次竟然忘記帶通告，幸好都無俾人話，2:45 準時入學校！由於流感問題，家長入學校都係要戴口罩！ 對好時間，跟住就入去課室睇粟米K2上學期所做既野，打開個文件套睇下第一頁，上年張學生相同今年已經唔同晒樣！ 今年啲老師都比上年nice！不過佢地都好細心，見到有張評語話粟米對畫畫填色媽虎，真係笑左出黎啊哈哈！佢的確對填色麻麻地，好多時亂油就算！ 睇完之後，交返俾老師，等叫名見班主任！原來係見梁老師！ 梁老師話粟米好好認字好叻，各方面都好好都有4，係唯獨腳差少少，要佢行一直線，佢都會搖搖地，我得閒訓練下粟米，帶佢公園跑下，行下平衡木，剪紙都係麻麻，填色又無咩心機，要陪佢油先比較好少少！ 執筆都要提佢，成日用錯力，執筆手勢唔正確！（呢個我已經次次做功課都叫佢提佢，係好過之前少少，但係都係唔太岩） 老師話佢有時會無大無細，有次食茶點，老師問可唔可以請我食少少，粟米回應老師：出面咪有囉！ （正衰仔） 其實大致上都無大問題！老師講完，我又剩機問有關升小一問題，雖然都好似有啲早，但係我想知道小學有冇關係，因為德貞幼稚園屬寶血會，寶血會都有幾間小學，我想知如果報返呢啲小學，會唔會優先收生，不過老師都唔講的太多，佢只係話同一辦學團體，講就話唔關事，實際暗地裡收生係咪優先都唔知，仲講到時學校會有個關於小一申請既會，就會同家長講！ 希望同一辦學團體著數啲啦，咁我就可以煩少啲，不過我都已經預到時可能要自己去叩門！
不知不覺4歲，又係時候返健康院啦，主要係檢查視力！ 一大早搭車去健康院，因為巴士慢，有啲遲到，去到就俾本健康紀錄冊登記姑娘，當然姑娘有講話我點解咁遲，我講唔好意思，因為塞車！ 今日都幾多人，不過都係bb多！唔知要唔要等好耐呢？ 姑娘俾左張野我填，叫我填完張紙等叫號碼，我唔記得影低，所以內容唔太記得，大約都係問家長擔心子女啲咩情況（例如：飲食，體重，行為之類），當中我有兩項係剔左！ 見張紙要寫體重身高，心急地行去2號房，叫粟米除鞋上磅，點知俾姑娘喝住，問我做咩事，問係咪check 視力，仲話唔洗磅住，一陣醫生會叫你填，叫我出去等叫名！ 再望真⋯原來睇漏左（由職員填寫）！ 都等左幾耐先聽到叫名，去19號室，入到去有個女醫生係到，問我幾條問題，問粟米爸同我有冇家族遺傳視力問題，又問粟米爸近視度數，又問我視力同散光度數，之後，就叫粟米去坐凳，再幫佢戴上一副無鏡眼鏡，但係遮左一邊既，再叫粟米拎住一張紙牌，紙牌上有啲英文字，叫粟米望住出面醫生指住既字，再係手上卡紙搵返出黎，先測試右眼，完成後再叫我幫粟米換另一副遮右眼既眼鏡！ 當然全部都無問題，指完紙就睇圖畫，問圖中既野係咩色，係咩位置！ 好快粟米就完成左個測試！醫生讚佢好好！ 醫生同我講每日最多睇一個鐘既電子產品，如果有兩歲以下既小朋友，最好唔好俾佢地睇！ 醫生問我有咩要問，我問醫生點樣為之發現小朋友視力有問題？ 醫生話其實有時唔係咁易發現，係粟米呢個年紀有遠視係正常，係正常範圍可以接受，但係如果有近視，大個就會好深近視，通常佢地都要好近先睇到，又或者瞇眼睇野，都有可能係視力有問題，就要帶佢驗眼！ 我覺得好似問左同無問無分別⋯ 之後就出去等叫名，呢次被叫入2號房，真係度高同量體重，重13.5kg，高 99.2cm！ 姑娘就講 你咁輕既，但係高度又ok喎，再望我填個張紙，嗯，的確係有啲擔心既！之後，又無啦啦同另一個姑娘講野，另一個姑娘話唔洗見都得蹬其實，但係姑娘話由佢啦，俾佢見下姑娘啦！ 我都唔知搞乜，佢哋自己兩個講完，就叫我地出去等叫名！ 又要等，唔知要等幾耐，因為都有啲肚餓，想快啲走！ 等到姑娘叫名，又入房見姑娘，姑娘問粟米食野點，之後又拎左幾本書仔出黎，粟米磅數係爭啲，佢叫粟米食多啲野！ 另外又再幫粟米做埋測試，姑娘話順便做埋，俾幾粒積木粟米，問佢有幾多粒，粟米望左一陣答4粒，姑娘就話佢勁，唔洗一粒一粒數，第日心算應該幾叻！（真的嗎？） 姑娘話頭先醫生幫粟米驗眼，讚粟米好乖好叻（有咩？） 姑娘話 都無咩問題啦，唔洗再黎健康院啦，第時上小學跟學校打針啦！唔會返黎健康院架啦，本書收好佢啦！針卡都收好佢！ 就係咁完成晒健康院既檢查！
開學啦!! 照舊幫粟米係學校門前影相留念!! 之後排隊等入學校!! 我同粟米講,今日媽媽可以同你一齊入去課室喎!!! 粟米同我講,唔洗啦我自己入得啦!! 我話佢知因為佢依家大左係K2,課室唔同左,所以要家長帶去課室! ******************************************** 到左入得既時候!!唉,唔明點解有個家長要塞住門口同老師講野,亦都唔明點解老師唔叫佢企埋一邊!! 我地企係到個時,修女又叫我地入去,但係塞住點入呀!!門口都細啦!! 跟住到我地行左入去少少,又好似好亂咁,因為要交暑期功課,修女手拎人地個份,又想幫我地CHECK,結果又塞住後面!! 唉....可以入去先再搞嗎? 之後,修女俾個名牌我幫粟米個書包塞返個名牌!! 另外之前張接送證,老師收返,俾張今年既我!!(頂....乜會收返架....早知SCAN低佢啦!!) 去到入面課室我先慢慢幫佢塞,跟住粟米去玩玩具,而我就走得啦!! 其實都係好少野啫,點解搞咁耐,又要塞鬼住!! 一個鐘後又去接返佢!!就係咁又開始左佢既.....K2學期啦!! ************************************** 記得上年D老師好好,做野好快,都無好似今次咁亂同埋塞人!有D掛住上年既班主任S!!
話咁快暑假尾聲,又到左家長會時候! 我一個人去家長會,因為粟米爸今日有D事,唔可以睇住粟米~,所以同粟米一早食完飯,就將佢放係奶奶個到,再自己搭車去開家長會啦!! 去到校門已經入得,拎張紙去登俾老師望,就行入去通告上既課室,開家長會既課室就已經係佢地今年要開學既課室了!! 同舊年一樣,都係要睇兩條片啦!!一條係介紹學校同今年既課程,另一條係家教會既片,講今年家教會換界,叫大家勇躍去做幹事!! 上年開家長會有野要MARK,所以今年都帶定簿同筆去MARK野,但係都好多家長去到課室先問老師借筆同紙!! 今年既班主任係 : 蘇老師,林老師同梁老師 2018年既1月會有自由設計活動 又會去下交通城,海洋公園等地方!!好似幾好咁喎! 9月1開學 返1:10,放2:10 淨係帶書包,仲可以由家長帶埋小朋友去到課室先拜拜!!因為轉左新課室,要家長帶一次都係正常既!! 9月4放假,因為學校要集中人手去照顧K1小朋友!! 9月11先係正式上堂及放學時間!! 至於排隊位置同方法,今年K2同上年唔同位,要係正校門個到企,初班(即係K2),要排出面個條隊等接放學!! 黎到K2佢地都會有課前活動,老師講得太快,所以我只係MARK到星期一係大堂,星期二係德小,星期4 花園!! 而今年親子操係星期三,好似初班都分幾唔同日子做!!10月9先開始有!! 興趣班方面,今年多左少少,有本身都有既親親主耶蘇,英文班,創意藝術班,珠心算同舞林之外,今年多左足球班同桌遊!!我諗我應該會JOIN下足球班,因為之前老師話佢踢呢個動作唔係幾好,俾佢練下都係好事!! 返學方面,我地係下初丙, 逢星期一同4都係著運動衫!! 每日背包都會裝住: 1)主題書,功諄套(改左拉鏈袋), 英文書同手冊 2)帶3個口罩 3)筆袋(3枝三角鉛筆,一舊擦膠) 4)智能學生證,體溫卡 5)名牌 + 計劃紙 6)水杯同毛巾盒 7)乾手帕 老師話手冊要包好!! 今年因為大個仔大個,老師好多野都唔會再俾紙仔我地家長,會靠小朋友個口講返俾我地聽!!同埋每個月都有一本主題書,主題書既第一頁會寫左叫家長幫小朋友預備D乜野圖片之類既野,叫小朋友帶返學校分享!! 每個主題都會有5至6個詞語 老師教法會有D唔同,唔會好似K1咁圖加字俾佢地 變成: 圖+字 --> 字 ---> 拆字---> 評估 藍色個本主題書係唔洗屋企做既,學校老師會同佢地做,係功課袋入面既功課先要!! 今年會有 [識數] [英文寫字] [中文] [活動冊-常識] [閱讀報告] [親子閱讀] 親子閱讀 - 十月先會開始 本英文書有D特別,老師特別叫家長唔好亂咁幫小朋友填字!!因為本書係用兩年既!!會有隻碟跟埋俾我地,本英文入面有D填字位,呢D係留返高班先做,叫家長千其唔好同小朋友填左D吉位!! 所有功課都係印左日期先做,填色主要用"蠟筆"或者"木顏色筆"!! 家長簽名就盡量用 黑筆或者藍筆 最開心既事就係~~今年開始,唔洗交學費!!YEAH!!!!!咁D錢留返去興趣班啦!!哈哈!!
話咁快學期完左啦！又到家長日日子！ 粟米爸要返工，未必趕得切，今次1:30見家長，我一早同粟米食完午飯，12:30 就送佢去揾嫲嫲同爺爺， 12:45 我就搭車出發！原本諗住趕唔到既粟米爸突然打黎問我係邊，話應該趕得切去，見完家長先食飯！好明顯就好想聽下老師點講啦！ 去到登記完，再入課室坐一陣，好快就叫我地過去，今次又係梁老師，太好啦！ 老師話粟米整體都好好，係唯一唔滿意粟米一樣野，就係品行方面，差少少就拎到品學獎，學野好快，好專心， 係品格個到差少少，已經比上學期好左，正所謂品學兼優，品行係最緊要既！ 老師話粟米太有主見，佢認定左既野，佢就唔會認錯， 好似上次咁，佢整跌左人地杯水，老師要佢同小朋友道歉，粟米就死都唔講，仲話係同學將隻杯推左去佢個邊唔岩先， 佢覺得自己無錯， 老師同佢講\"就算隻杯放左係你個邊，你可以請小朋友拎返去佢自己位個邊，而你確實係整跌左人地隻杯，係你唔岩！" 粟米依然硬頸唔講對唔住！ 老師話粟米唔鍾意人地當佢b咁話佢，佢好似大人咁，要有下台階俾佢先得，已經比上學期好左，上學期可能要成個鐘先肯講對唔住， 下學期就15分鐘！就算講都係唔憤氣，你要我講，咁我講囉，咁既感覺！ 老師亦都話粟米試過茶點個日個飽唔岩食，佢咬一啖就扮跌落地！諗住唔洗食，老就同佢講\"係啊？老師知你肚餓，俾個新既你再食過！"(哈哈哈哈，俾老師發現左佢古惑啦，仲要唔成功哈哈) 我都覺得粟米最近呢方面真係差啲，試係搭車，隻腳整到人，要佢同人講sorry, 佢死唔肯，老師要我要留意返佢呢方面，希望黎緊下年拎埋品學獎！ 我好奇問老師，其實啲獎用咩作準則？ 因為佢地都唔洗考試默書， 點樣計到粟米拎學業獎？！ 老師話"有得睇架，你望下張評估表，好多都係4" 老師指俾我睇粟米個啲又真係全部都係4, 老師話佢好多方面都好好，認字係完全無問題，完全唔洗老師提佢，佢好快講到出黎， 不論英文，普通話，音樂，佢都好快俾到反應同回答！ 係真係唯獨品行爭少少！如果佢做得到既話，佢就好好，拎品學獎！ 梁老師亦都同我講叫我留意返，俾佢玩下麵粉，有咁黏得咁黏，佢越怕既野就要佢克服，叫我唔好俾泥膠佢玩，因為唔夠黏！ (好明顯似粟米爸啦，上次食軟雪糕都話污糟，食到咁污糟！ 我話小朋友必經喎， 唔試多啲又點迫點樣食得乾淨！粟米爸最怕佢成手痴立立咁樣) 較剪都要練習下， 好過一排，依家又黎返， 又變左較剪向住自己剪！上到k2 只可以靠佢自己啦， 唔會再有老師幫佢架！ 仲有跑步，俾佢練多啲，佢隻腳仔仲未得！帶去公園練下！ 俾多啲刺激佢，行下草地，俾佢隻腳都有啲刺激！ 暑假俾多啲呢啲訓練佢！ 梁老師話出年都唔知會教邊班，我話如果係你教返最好，我最like! 就係咁見完家長走得了！粟米算係比我負期中好！ 最起碼佢專聽書！ 而返到屋企，我地同粟米講，佢禮貌差少少就100分，差少少就可以拎禮貌獎！叫佢出年加油！ 希望出年k2,佢如老師所講可以拎到品學獎啦！
星期三放學，粟米同我講話今日影相，我問佢影咩相無啦啦，佢話影學生相，我話之前咪影左囉，點會又影？佢話係啊，今日影學生相！(星期4先派返啲多左既學生相返黎) 我答佢：係啊？ 又影相啊，到時我問老師係咩相啦！ 謎底終於解開啦！無聊成日都會禁下學校個EVI APPS 睇有咩相UPDATE, 結果俾我見到新相簿，原來個日真係有影相，仲要係頒獎禮！ 相中見到粟米個張係學業獎，其他同學有 品學獎，操行獎，禮貌獎，語言能力表達獎，創意獎，服務獎，進步獎。。。 估唔到粟米會有獎，啲獎應該家長日派返黎！ 有啲媽媽話間間幼稚園都有，都係豬肉獎，有啲媽媽就話有啲獎係真獎，有啲係豬肉獎。。。。 對我黎講都只係豬肉獎，因為唔知點解佢會無啦啦有獎拎哈哈哈！
第三年的母親節，依然對呢個節日無感覺！ 返左學當然老師就會教佢講\"母親節快樂" 但係佢其實都唔知邊日係，放學搭車既兩位k2姐姐都唔知邊日係，佢地只係知係星期日， 所以正常都未識咩係母親節！ 由於無幫麻麻慶祝，所以我地同公公都係留返屋企打邊爐， 唔洗出街食貴餐！ 開始食飯，我夾烏冬俾粟米，佢突然同我講"多謝你啊" 我問："多謝啲咩呢？" 粟米："多謝你囉" 我問："咁做咩事要多謝呢？" 粟米："因為你煮飯俾我食囉" 我問："係啊？ 咁你食多啲啦咁" 我又再問："邊個教你講多謝我架？" 粟米："無啊" 我問："老師教你？" 粟米："無啊，老師教整母親節禮物之嘛" 其實我應該開心，粟米識得多謝我，但係我聽完感覺又唔係好似人地啲媽媽講到咁感動！ 仲諗係咪有人叫或教佢講！哈哈我真衰！ 希望佢唔好激我就夠！
一放學，粟米就即刻急不及待拎佢手上既作品俾我，母親節禮物！ 佢話係盆栽黎， 盆栽既入面(紙杯入面) 貼左一個小禮物！ 上巴士個陣，同k2 姐姐們玩時，粟米已經拎左去玩！ 一個手袋掛勾黎既！ 其實即係之前交書簿費個陣，俾左錢買既母親節禮物！ 都未到母親節，就已經俾佢開左黎玩！好明顯就唔知咩係母親節啦！
好彩今日粟米無咩事,我都諗住37.2都照去!!反正1:30-3:00!如果有咩事,至多...即時帶佢走!! 聽同學媽媽講擒日有8張LABEL,但係最後得6個家長出席!! 今日....12張LABEL,有11個家長出席,多麼想係擒日出席,唔洗咁多人!! 送完粟米入學校,我就係附近行陣先,之後見差不多時間,就行去門口等!! 到夠鐘,我地就入去先拎返自己仔女個名既LABEL,再跟返班別排隊!! 先係翁主任講下野,之後就到校長講解返展示會既目的!! 每班既設計活動主題都唔一樣!! A班係襪,B班係鞋,C班係麵,而D班就係麵包!! 原來最近復活節學校都有D野係紀念耶蘇,當校長問我地D仔女有冇講係D咩特別既包時,我地十一個人都唔知,原來係提子十字麵包,校長一講,有幾位家長就話有講過!! 而我同前面個位家長都異口同聲講完全無講囉,淨係講提子麵包咋哈哈,仲要唔鍾意食,要點茄汁先肯食囉!!估唔到原來咁多小朋友唔LIKE提子麵包!!不過我都唔LIKE哈哈!! 校長講完野,就安排我地去返各自課室啦!!睇完展示會仲要做份問卷,放完假先交!! 入到課室家長坐晒後面D小凳子到!!睇大電視,睇老師整既POWERPOINT,睇老師影既相同片!! 真係唔睇唔知原來佢地咁細竟然學識PRESENT,感覺都幾得意!!仲有老師都會俾佢地自己試下搽麵包,同埋幫手整佈置!! 睇片時,D小朋友好搞笑,佢地會記得做收銀個小朋友有D咩錯處,例如:夾麵包入袋時,佢用左隻手去掂麵包,唔記得左收錢啦,同埋用個夾吉爛個麵包!!佢地一路睇一路大笑!!真係好搞笑!! 睇完,就去參觀下佢地既成果啦!!即係佢地成個整既野!! 有親子做既功課 - 麵包同工具 有學校做既功課 - 麵包鏈,麵包面具,麵包袋等等 最搞笑係有得俾佢地模擬做收銀,我地扮買麵包,小朋友就收錢同幫我地入D麵包入袋!! 參觀完之後,就去其他班到睇!!拖住粟米一齊去睇人地既野!! A班既襪,唔係話唔好,但係有D親子功課....我見到有D黑黑地既...舊襪整成既公仔,感覺好似有D污糟咁!! B班既鞋,淨係聽老師既POWER POINT D小朋友已經無耐性啦!! C班既麵,有幾種麵放係檯,好處係任人摸D質地,但係問題係無標籤到,有堆麵無人係乜,而我多口問老師先知,原來係味千拉麵既麵條!!我仲以為係??麵添,有家長仲估係上海麵!!哈哈!! 或者可能都係自己個仔既關係,感覺好似麵包比較好!! 參觀完了,家長要走先,放學時間先再接返小朋友!! ************************************ 老師問我點解粟米好得咁快,擒日仲狂打乞次,我其實都唔知,講真天氣唔好都有關,同埋其實只係有D鼻塞又唔係真係發高燒(38度),小小野其實抵抗力夠都可以好快好返!! ************************************** 聽日開始放假LU!!又要做假期作業啦!! 24號先返學!!幼稚園真爽呀!! **************************** 唔知到左初班粟米又會做咩主題呢??^^
其實都唔係第一次早退,老師打俾我個陣,我正去緊收票,咁岩想聽電話時收左線,見有留言就聽下啦!! 原來老師話粟米體溫有37.6,話佢發燒(學校角度),仲話粟米話個鼻唔舒服,咁我又打返去學校同老師講我去接返粟米!! 去到校門禁鐘,嬸嬸拎左我張學生接送證之後,就幫我去接粟米出黎,而我係門口等個陣,大堂有一堆學生玩緊,唔知係依家好緊張啦,有位老師見我企係門,佢問我咩事!! 我同老師講接返個學生走,嬸嬸叫我係到等既!!(唉,頭先我禁鐘你地都見到架啦,又唔問下嬸嬸),之後老師叫我等陣! 接到粟米,多謝嬸嬸之後,見到精神過我既粟米...!!其實一D事都無!見有D餓就帶左粟米去麥記食D野先,再搭車返屋企換衫睇醫生!! 醫生話粟米個鼻係塞晒,俾左D藥粟米食!! ******************************** 聽日展示會,希望粟米唔好發燒(唔好過37.2),返到學,唔係既話,我就無睇去睇下咩叫展示會!! 今日都有展示會,我問粟米見唔見同學媽咪,佢話見到,佢仲話鬼我:"你又唔黎"!! 大哥,通告叫我聽日先去呀!!你聽日好返咪可以去囉衰仔!!!
今次生日會,粟米竟然話老師叫佢買一包薯片!!本來唔想買!但係同學媽咪話佢個仔都有話要帶紫菜!!所以都帶左粟米去超市到揀!!買左兩包紫菜薯片,因為兩包抵D!!索性兩包都俾佢帶返學校!! 3:30就放左學啦!!今次生日會好鬼多糖!粟米話無食到薯片!!話老師食左! 同學媽媽八到,原來之前兩次生日會,因為小朋友未識講,老師就會打俾家長叫家長準備!!今次可能見D小朋友都識講,就叫佢地返屋企同家長講!! 或者下次7月生日會時再諗下買D咩俾粟米帶返去啦!
第一次JOIN親子旅行,粟米爸錢多...,丫...唔係,係佢話覺得D行程都岩爺爺嫲嫲,所以報名時都加埋兩老一齊去!! 親子旅行地方係流浮山同錦田!!講真我真係無去過流浮山!!就當係見識下啦!!錦田個D親子活動地方都未去過!!未去過有到好既,去一次唔會死既心態!! 就係咁係呢個難得既親子旅行就報左名!! ************************************************** 通告寫10點係學校到集合,帶住兩老就早D去搭車啦!! 9:45AM 已經去到學校,仲諗住要等多陣添,點知又聽見老師話可以跟返之前派俾我地個張貼紙既車號上旅遊巴!仲好,唔洗係街到等,直接上車坐住等!! 又好好彩,我地架車D人都算準時,可以準時開車出發!! 原來我地....係跟緊團,本地團,我望返張貼紙...先知原來我地係JOIN緊"悠閒假期"!!有個跟車導遊叫做SANDY! 一路上當然佢有佢既講解,同埋老餅既歇後語!!再黎就係問答遊戲,大人同小朋友都可以答!!答中有份小禮物!! 粟米當然都有嘗試舉手答啦,雖然都係答唔中!!而我地....係無興趣答哈哈!! 雖然答中係有禮物,但係D禮物好肯定會俾我當做垃圾掉左佢,寧願答唔中!!哈哈!! 粟米問我做咩唔答,我話唔識咪唔答囉,撞都廢事!! 無幾耐就去到流浮山啦!!其實主要係要開餐!!講真十一點就食午飯...真係有D早!!! 因為人數多,所以都分左兩間酒家食!! 我地只要跟返貼紙寫既檯號坐就得!!好彩同檯既人都正面!!無麻煩人!! 食飯時,粱老師巡視學生,呢一幕真係好好笑,所有小朋友即刻乖晒!!梁老師話要乖乖地自己食晒D飯,唔準餵,轉頭會返黎CHECK!!即刻個個都乖乖地食飯!! 食完當然可以係附近睇下野啦,原來都係買D乾貨既地方,但係感覺都係有D貴同奇怪!! 諗住有導遊會平D,結果係無既,嫲嫲買左半斤金蠔,咁就95蚊!!OH NO!! 我地就買左三包蝦片50蚊有三包!!行到街頭,見到有椒鹽銀魚仔,嫲嫲話大伯LIKE食,我見佢好似有D厭貴...所以話同佢SHARE,100蚊4樽!每人兩樽!! 對我黎講...流浮山好似無咩好野!!!見無咩特別野行,就返上車啦!! 原來係車上係唔可以食野...係導遊講我先見到張紙貼左係到!! 人齊了就出發去錦田啦,估唔到我地又係第一架車出發!! 導遊話去到之後大家要等一等,影個大合照先,係大草地到影張合照!!等埋下一架車個BANNER先影相!! 但係最好笑既係.....佢所講既草地...我完全唔覺得係草地喎!!爛地咋喎!! 影完就行入旅面,當然入面既野全部都要自費啦!!除左用眼睇唔洗錢!!餵動物食野,機動遊戲都續樣收費!! 同學媽咪話一齊玩碰碰車,結果原本諗住想隊粟米爸去同粟米玩既,變左由我去陪佢!! 玩完唔見左爺爺,爺爺去廁所,但係搵極都唔見,到佢返黎,我地以為佢去左廁所啦,點知佢原來未去,之後就指佢睇咩方向啦,結果一去不回,又唔見左人,唯有粟米爸周圍搵啦,最後見爺爺行過,我即刻跑去捉佢返黎!正想打俾粟米爸時,粟米爸都返到了! 有個同學父母買左呢到所有遊戲卷,但係個小朋友唔肯玩,就送左一張飛俾我地!!咁就益左粟米,叫左粟米爸同粟米去玩,我地想俾返錢人地,但係人地唔肯收!!OH!唯有等下次有機會補返啦!反正同班!! 玩完就行去動物,有兔仔同羊,俾粟米去試下餵羊,竟然條友仔餵得好開心,仲哈哈大笑!!十蚊一紮菜都抵既!! 跟手又行去第二到睇有D咩玩,只見吹氣彈床同BBQ地方!!@@即係都無咩野玩啦!! 一齊去左食豆腐花,不過D豆腐花無想像中咁好味囉,仲勁多水添....!!唉! 到臨夠鐘兩老又再去廁所,呢次我陪佢地去,免佢地又唔識路,爺爺竟然仲想自己行返去豆腐花到,我叫佢千祈唔好,唔想又唔見一次,因為夠鐘上車架啦,到時唔見人就死!! 就係咁玩左成大半日,搭車返歸,返回學校!! 是日雖然陰天,好好彩唔太熱又唔曬,最緊要係無雨呀!!
又係訓前傾計,粟米好開心咁話今日做組長! 粟:"今日返學好開心" 我:"係呀?點解咁開心呀?" 粟:"我做組長呀" 我:"咁叻?點解會做到組長既?" 粟:"老師揀架" 我:"咁組長做D咩架?" 粟:"負責拎水" 我:"拎水呀?咁洗唔洗斟水俾小朋友架?" 粟:"唔洗架,淨係拎水架咋" 我:"哦,咁洗唔洗派飽俾小朋友架?" 粟:"老師派架" 我:"哦,即係組長淨係負責拎樽水返張自己組到" 粟:"係呀"
上星期五晚照樣陪粟米訓覺,訓前都會傾下計問下即日既野,點知突然粟米爆喊話唔返學,佢話老師掉左佢張貼紙,佢好驚唔想返學!! 對於惡我只係會諗到梁老師,我問係咪梁老師,佢又話唔係,佢話係C班既老師,掉左佢張羊羊貼紙,佢話好驚,不斷喊,仲話星期五唔返學! 當然唔知佢係曳左丫定係點樣啦,我唯有同佢講,一係媽媽問下梁老師發生咩事點解個位老師會掉左你張貼紙啦一係!! 粟米雖然成日都會講梁老師好惡架,但係原來佢對梁老師都幾信任架喎,佢聽到我話問下梁老師發生咩事,佢今次竟然話"好呀,你依家打去問梁老師啦" 我:"點解會掉左你張貼紙?係咪你曳左呀??" 粟:"無啊" 我:"咁個老師係邊個老師?" 粟:"C班關老師" (好記仇喎,連隔離班老師都記得) 我:"咁我問下梁老師咩事啦,唔洗驚既,但係你個名牌唔係有兩張貼紙咩?" 粟:"係呀" 我:"咁係邊個老師俾你架?" 粟:"係梁老師俾我架" 我:"係呀?梁老師咁好既?俾兩張貼紙你,咁你鍾意梁老師嗎?" 粟:"鍾意" 我:"點解梁老師會俾兩張貼紙你?" 粟:"梁老師話我乖囉" 我:"係呀?!,咁你返學咪好開心囉" 粟:"係呀!" 安慰完就訓左!!返左學以來都無見過佢因為驚老師而爆喊話唔返學!!唯有真係去問一下老師啦!!不過應該唔會係大件事掛!! ************************************************* 放學時,我問一問企係門口個位老師可唔可以問一問老師野,老師都好NICE咁俾我入去問梁老師野!! 我同梁老師講星期五晚訓覺前突然爆喊話有個老師隔離班既掉左佢張貼紙,係咪有咁既事! 梁老師話:"哦,因為粟米跌左張貼紙落地下,隔離班老師見污糟左所以掉左,唔係特登掉佢張貼紙" 梁老師再對粟米講"傻豬黎既,唔係咁架,老師見污糟左所以幫你掉左張貼紙,梁老師個日俾左兩張貼紙你架記唔記得呀?!" 粟米話記得,跟住我就對粟米講:係囉,老師唔係特登掉你張貼紙架,你記錯左啦" 之後,都唔阻老師,我地同老師講拜拜就返屋企了!!
呢幾日都有同佢練一次哈哈哈，因為我懶，只要佢答到我就算！ 擒日親子操邱老師都有講話有同粟米練習過，我同老師講我係屋企練習，佢會亂講野，老師笑住話唔緊要，到時佢會再兜！ 不知不覺到左啦，因為唔可以入學校望電視，唯有等係出面門口偷望入去個電視到啦！ 好彩無人趕我，的確係難睇左啲，因為學校玻璃門會反光， 有巴士經過遮到光我就會睇得清啲！ 雖然聽唔到聲，不過都好似幾順利！睇到人地開始親子操我就走lu!
第一次有機會觀課，就諗會係點， 會唔會影響上堂，會唔會好嘈既呢？以前睇啲日劇啲父母觀課都係企晒後排望啲仔女點上堂，唔知係咪都會咁呢？ 結果。。。做戲當然同現實唔同啦！ 等到差不多1:45 我同同學仔媽媽一齊入去學校，先去個櫃拎返自己個班個子女既貼紙！ 之後就去返個班既牌排隊！覺得自己呢刻似學生哈哈哈！ 首先校長同我地講解，之後就跟老師指示去返課室！ 原來唔係全校一齊有得觀課，今日同聽日得幼兒班有，仲要一班分兩批，都岩既。。人太多好難控制，尤其係啲家長！ 行經課室，聽見老師同小朋友講"佢地黎啦" 入去首先去返自己小朋友既附近，成班小朋友已經分左三個group! 當大埋好位企，老師就開始同小朋友講野！用車去揀小朋友，問小朋友想玩啲咩！ 原來分組係玩唔同野，粟米揀左語文區，仲識講話想玩車袋(咩係車袋啊) ！之後有個女同學都話玩車袋，老師就會問所有小朋友，當有人揀同一樣野點算啊，佢地就會識得答大家一齊玩！ 另一part 係扮演區小朋友， 會有張公仔卡代表佢地要扮既角式！揀好晒就開始玩！ 而呢一刻我竟然係一對3,一個對三個小朋友！其他都好似有兩三個家長同組！ 不過對我黎講都ok既，咁岩女同學都叫做同佢媽咪有幾句，唔太陌生！另一個男同學雖然唔熟，不過都唔係好怕醜！ 佢地不斷玩不斷換，有時老師行黎，會叫左個同學去睇圖書，佢都乖乖地去，又會返黎同我玩！ 亦都有多一個怕醜既女同學轉左過黎玩， 佢就唔係好肯同我講野，不過都尚算ok既，我又唔會去特登搞佢既！ 不知不覺老師就話仲有兩分鐘，佢地就好快咁收拾啲玩具！ 之後坐返埋位，原咁細都會賽後分享，呢一刻覺得粟米好陌生，原來佢真係比我想像大得快！識得踴躍舉手分享頭先玩過啲乜，亦都會聽老師指示去幫手揀小朋友出黎！ 眼中既粟米原來已經學左咁多野，依家啲細路真係不能睇少啊！ 分享完，我地家長要先出面排隊，因為佢地已經係要去洗手間同轉第二個活動！ 係小朋友離開課室時，老師就會請家長分享經驗， 問我地有咩可以提議，有咩可以改善！仲有張紙俾我地評分！同寫意見！ 老師話其實佢地小朋友早啲返到學校好緊要， 因為佢地返黎又要除書包除校褸，又去下廁所，跟手就要揀自己想玩既區，有5 個區(語文區，扮演區，益智區，建構區，創意區), 遲左返就會少啲野揀架啦！ 有時有啲堂都會有2 堂俾佢地玩，時間係好緊密，老師食飯時間得40分鐘，其實係幾趕架！ 老師話希望家長有時可以同老師合作，一齊教好小朋友！ 分享完就走得了！其實比我想像中好，因為主要都係想睇自己小朋友係學校係點既， 我都無咩要求哈哈哈！ *************************************** 邱老師係小朋友玩緊期間走黎同我講粟米星期五會拎咪講野帶祈禱，叫我返去同粟米可以練習下！不過因為星期5先做，所以變左無得俾我睇到！ 主要都係類似 老師 先介紹自己 粟米 介紹自己 老師 下星期幼兒班有新既活動，係咩活動啊？ 粟米 設計活動 老師 咁係關於啲乜架？ 粟米 麵包 之後就祈禱唸經 估唔到我以為做呢啲野既多數係初班同高班既小朋友做，原來粟米咁細都有份，感覺突然好似唔太認識自己個仔啊！ 老師話其實每個小朋友都有機會做，會輪住做！ 諗返以前返幼稚園都係返去食下茶點，油下畫，唱下歌！ 估唔到依家啲幼稚園係咁勁，咁多方面可以學習！
