親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
粟米媽
他的寶貝
他的興趣
文章分類
日期
#Tag
Hi~ 小寶真是可愛
資料載入中...
話咁快又覆診! 去到俾錢($60),拎籌再坐低等! 見醫生,醫生話照過晒無事,又再check多次粟米d腳較,醫生就話無事喎,唔洗再返黎覆診啦! 因為健康院個女醫生,搞到我要行三轉,仲要浪費左160蚊!唉•••真可惡!不過照左都安心好多!
又係時候打兩個月針啦,今日要打兩枝針! 照常準時到登記同拎籌,職員問我有冇填過問卷,我答無,佢就叫我填,填完就交返俾佢,再等叫名! 份所謂問卷都只係想睇下做媽媽湊bb既心情,對我黎講都無咩特別,好快填完交返俾職員! 叫名入2號房,一樣之前咁,除晒粟米既衫,磅重度頭仔,今次有得度身長啦! 體重 5.15KG 頭圍 38.3cm 身高 59cm 搞掂著返衫又等叫名! 呢次要去14號房,入到去姑娘就問名同幾大! 姑: 咩名 我: 盧晉宇 姑: 幾大啊? 我: 2個月 姑: 係啦,睇返佢既體重各樣都好好喎,身長有59cm,唔錯喎,算係中上(75條線) 我: 哦 姑: 睇返媽媽你方面,問卷個到分數都幾高分喎,媽媽心情都幾好喎 我:係? 姑: bb都幾乖啊 我: 一時時啦 姑: 我見佢依家都幾定喎 我: 因為佢仲未知發生咩事囉 姑娘笑左! 姑: 佢依家食幾多安奶? 我:4-5安啦 姑: 戒左夜奶未? 我:••••戒左掛 姑: 應該都戒左架啦,keep到12點之後5點先醒就係戒左架啦! 我:咁戒左啦(其實都係一時時) 姑: 兩個月啦喎,今日要打兩枝針! 我: 正啊! 姑:你睇下bb有冇張紙寫既情況? (發燒,水痘•••) 我:無啊 姑: 咁打完可能會發燒既,俾定枝退燒藥你,知唔知幾多度係發燒?識唔識肛探? (下•••肛探•••••) 我: 38度發燒 姑: 係啦,腋下就35度低d 我:哦 姑:無咩出去等叫名打針,打完就四個月大先返後架啦! 姑:啊,你瑪嘉烈2月係咪睇骨科? 我: 啊,我轉左去QE睇啦! 姑:咁有冇結果 我:醫生話無野,照左超聲波都無事! 姑: 哇,咁快?照埋超聲波?個邊d期咁快? 我: 係啊! 姑: 咁幫你mark返低先!咁無野啦88! 我: 哦,(用粟米手)88姑娘 等叫名期間好彩粟米都訓返! 到叫名去1號房受死,入到去姑娘已準備好兩枝針(13價同白喉個堆)! 因為打兩枝,所以兩邊大脾各一枝! 第一枝打完,粟米先岩岩喊,轉頭就第二枝哈哈! 不過都算係咁,喊一分鐘就收聲,打完要等15分鐘無事先走得,粟米爸就襯呢個時候約下次打針期! 15分鐘過了,落地下取退燒藥!化••••落到去,多人都算,氣氛好似好多病菌,拎完籌,拿拿聲返出門口等叫number!從未試過驚到覺得要口罩,有個好心既阿叔話我知入面有口罩拎,仲叫我拎多個俾粟米爸,仲仲同我講叫我去拎藥粟米爸同粟米留係門口等,哈哈,真係多謝佢既關心! 睇返d number 好似有排等,我就叫粟米爸一齊去食個早餐,食完再返黎拎藥都唔遲! 果然食完就有得拎,因為已經過晒number!哈哈 有枝藥水同針筒,方便餵藥! 走個陣,原本諗住搭的士,咁岩有巴士黎緊,飛咁快行去搭巴士啦!跑去期間有堆公公婆婆欄路,唉,可唔可以俾條生路黎行啊,我唔理佢地,一路講唔該一路撞出條生路,粟米爸仲慘,佢揹住粟米叫阿婆借借,阿婆唔讓仲要叫佢"你行你就行啦”,老人家點同佢鬥丫,唯有行出馬路!好彩都趕到上巴士!
一直都擔心如果粟米發燒,我會唔會唔知點算! 今日打既針聽講會發燒,所以返到屋企都緊張check住! 仲買定退熱貼添! 返到屋企當然就拎定探熱器出黎,隔一個鐘於check一次,都見粟米體溫開始上升! 大約下午4點,去到37.9 ,都俾佢食定退燒藥再加退熱貼! 因為退熱貼放過雪櫃,所以好凍,當貼落粟米個頭時,佢當然就喊到好大聲啦!(我就黑心地笑死左) 食左藥,都退左d燒,夜晚見佢都有36.9,都同佢貼定退熱貼! 亦都因為發燒唔舒服,所以食奶時間都有d亂,唯有之後再調整返啦! 有驚無險咁,粟米只係發一次燒!亦都第一次用針筒餵藥!
不知不覺呢...粟米都叫出左世成兩個月,我竟然依家先收返影孕照個D相!!仲要我爸爸幫我係公司收件!! 係我追完間野先識寄!!係咪真係咁忙?定係太小事被漠視?? 不過收到CD,相架同相簿都放心晒,唔洗記住未收到咁煩既!! 望返D相...真係不知不覺,咁樣就生左粟米仔出黎!!時間過得真係快!!
一早打的去醫院,要照超聲波,照下粟米既大髀骨位! 我以為要去大樓登記,就殺上去日間大樓,點知原來唔洗,直接去K座照超聲波就得! 去到K座,拎張紙出黎登記,之後等叫名啦! 我見當時都有廿人,應該都無咁快,坐陣等下啦! 唔洗十分鐘,無啦啦就叫粟米個名! 一入到去,原來好多格既,唔怪之咁快啦! 姑娘叫我幫粟米解件衫先,等醫生黎就幫粟米照! 照完左再照右,醫生一路同粟米講野一路照!照晒醫生話無事!可以著返衫走得啦! 順便幫粟米換埋尿片再走! 仲可以去搵朋友lunch!正啊!
不知不覺60日啦,代表我安全照顧左佢六十日! 為左慶祝粟米60天,我帶左佢去玩baby spa! (我自己都無咁好享受) 近排d媽媽開始流行帶bb去做spa!吸引的會帶粟米唔你因為有得俾粟米按摩,而係見到人地既bb箍住bb水泡浸係水個樣實在太好笑,令我想帶粟米去玩下,主要可以影下相! 襯仲係新開張擒打去book,問幾時有位,竟然可以book到今日實在太好了!(應該係因為閒日再加下午無咩人book呢d時間!) 一去到,間野得我同粟米,無其他客人! 將于米放低,交俾spa個阿姐,阿姐抱粟米去床仔,就幫佢除衫,跟住開始用按摩油幫粟米按摩! 開頭驚粟米會驚,點知佢唔驚之餘,仲會同阿姐笑! 按摩完就落水啦,睇住佢帶上水泡(箍住個頭仔),個樣真係好好笑,好彩落水個刻無爆喊,比起之前開頭沖涼,一落水就爆喊,第一次落咁大缸水都無驚,當場放心晒! 落左水浮下游下個樣,我覺得有d似水母哈哈!游左差不多半個鐘,係時候上水了,著返衫!呢個時候都剛好要食奶了! 之後,搭返車返歸,因為麻麻病左,所以順便買野返屋企煮,再順便買個蛋糕慶祝60日既粟米! 當粟米返到屋企,係我煮飯時,粟米對住粟米爸不停講野同笑(當然粟米話係無人識聽既),我聽到粟米爸不停講”得啦知你開心啦,知你叻仔啦”時,又聽到粟米不停地”姨姨丫丫”,真係好搞笑! 等得閒再帶粟米去玩! ps: 其實有好多想寫,但又未有時間寫返晒,仲有好多相都未處理好,唯有打左文字,相片後加啦!
終於產後檢查,粟米同粟米爸留係屋企,我自己一個去,去到食左個難食既雞批!! 見醫生幫我CHECK下個傷口好返未,之後就超聲波CHECK下我既子宮收縮情況! 但係....好痛,因為要插枝野入去CHECK!! CHECK完一切正常,咁就走得!!醫生仲話可以正常性生活添!! 醫生都好好有問候粟米仔既情況!! 仲同我講如果有咩婦科問題都可以睇佢,如果生第二胎都可以搵佢架!! 醫生問我有冇問題問佢!!當然有,我問醫生點解我尾龍骨好似好痛咁!!醫生話叫我做到多D收縮既動作,咁就會無事!! 就係咁完成左檢查!!多謝醫生咁多個月既幫忙!!
為免同人迫,所以今早早D起身,去旺角朗豪坊,因為十一點先開放俾人影相,所以我地去麥記食個早餐先再去影相!! 話雖早上無咁多人,但係都有一D人企係到等影相!!終於都影到我愛既TWINSTARS!! 人真係好怕蝕底,有個老女人無啦啦話人地打尖唔排隊,但係其實人地只係搵一個代表排隊啫,到排到之後先叫老婆同仔女埋位!!其實在場都有職員把關,大嬸你洗唔洗咁緊張呀!!! 依家D人語氣都好差,唔會好聲好氣!!事源排隊影XO,我後面個女人好急不及待咁要同XO個FD影相,XO個FD係排隊位置,可能真係好心急啦,有D忘我,阻到我地前面個位影相,前面個位剛好就係頭先話人地既個位大嬸!! 大嬸: 哇,你咁樣阻住晒點影呀(語氣爆衰) 女人: 哦(之後移過D) 大嬸: 乜D人咁架,點樣影呀 女人又再移過D 大嬸: 得啦,咁鬥耐囉,你阻我時間,咪大家鬥阻囉,無野既!!(又係超衰語氣) 女人: 乜我企係到都阻到你咩?(其實都應該阻唔到既),我企係到都仲阻到你呀?(有D火)咁我再企過D囉(又忍左火) 其實當然女人無啦啦心急走去影XO朋友係唔岩,不過大嬸又唔洗咁既語氣,如果好聲好氣同個女人講"唔好意思,你阻到我,可唔可以借一借先呢"咁聽起上黎都舒服D人地又會知自己唔岩會退俾佢,如果講完都唔退先鬧人都未遲丫!!影相大家都係想開心啫,唔洗野野都開口鬧人既!! 依家既香港人就係咁燥,一有咩唔滿意就鬧左先!!香港就變得好燥!!! 影左一陣放低粟米去星巴克飲杯野,再餵埋粟米先!!餵餵下...粟米便便左,要去育嬰室,朗豪坊既育嬰室真係同新世紀差好遠呀!!首先,呢到要問詢問處叫人拎鎖匙開門,再講餵奶既話會唔方便,因為入面得張摺凳,唔會好坐!!風口係正換片位上面,吹到BB正一正!!真係同新世紀差好遠!! 換完片就去信和買GAME,又再返朗豪買壽司外賣,搭車閃人!!! 粟米爸似乎都好樂意帶粟米出旺角,佢話朝早好行好多,朗豪又有育嬰室,搭車又可以去對面搭小巴,實在太方便!
都知今日出面超多人,所以粟米爸放工去買壽司返黎食,粟米爸話元氣壽司超多人排隊!!好彩我地揀外賣!! 食完壽司先慢慢換衫帶埋粟米出街,原本諗住去朗豪坊影相,點知一上到去,排晒長龍呀,每影一個公仔都要排長龍,見勢色唔對閃人唔影啦,第時先再去過!!! 走左去LOGON買左兩位NANOBLOCK就閃人LU!!
擒日收到電話,我既伯娘打黎,佢話想黎探下我同粟米,真係有D意外!! 三點鐘到伯娘黎到,粟米應該係叫佢做 - 伯婆(有D似...粗口)!!伯婆買左件衫仔同俾左封利是粟米,其實咁岩同一個月堂妹都生左個仔,早粟米13日,我托伯婆拎封利是俾堂妹!! 伯婆抱下粟米又影下相咁!!好彩屋企有PRINT相機,可以即時PRINT張相俾伯婆!!佢坐左一陣就走了!!我都同伯婆講等粟米大D可以去同堂妹個BB玩下!! 伯婆都教曉左我一樣野,就係同粟米沖涼時可以俾條毛巾仔放係佢心口,咁佢就無咁驚架啦!! 當晚幫粟米沖涼個陣,都真係試下,果然伯婆有料到,粟米真係無咁緊張,雖然都係要俾多條紗巾佢拎住,但係多條毛巾仔係心口定好多!! 伯婆走左之後,我地出旺角配眼鏡,再去信和買下野!!HEHE!!而粟米依家係訓覺,唔知係咪有人揹住,安全感大D,比起係屋企訢覺會訓得耐D!!
今日帶粟米去QE睇骨科,本來係瑪嘉烈既,有次同朋友講起,佢又唔抵得排咁耐先有得睇,所以幫我去左QE排期約左20號睇,所以粟米可以快D有得CHECK!! 由於粟米爸今日要返學校教書,所以唔可以一齊去,粟米爸都有提議叫我搵姨姨陪,但係最終佢地都唔得閒,就係咁我就第一次帶粟米出遠門(其實都唔係咁遠啫)!!! 一早起身餵完粟米,就換好衫,整好揹帶出發,當然帶粟米去睇醫生係打的啦!! 上左的士竟然遇到個多咀司機,佢問我點解去咁遠睇(的確我地應該係去瑪嘉烈比較近既),解釋佢知因為朋友幫我排期之後,開始就係政治論,好彩既係咁岩佢既睇法同我都一樣,都可以傾幾句既!! 不知不覺到左QE,估唔到去QE既的士錢同去西九龍健康院一樣價喎!! 去到就要搵,QE原來都幾大,我有D迷路雖然係有問姑娘但係都有D迷失,最後都搵到主座大樓啦!! 搭電梯上到去6樓,朋友叫我去7號窗登記,但係我只係見到 1-6號窗,咁見有人排隊,都去排下啦,結果埋到去,小姐話叫我去7號窗,原來7號窗係入面,唔怪之搵唔到啦!! 去到7號窗登記,小姐話唔見我有BOOK,問我係睇邊個醫生,好彩朋友都俾定資料我,其實個封信都有寫咩醫生,不過小姐漠視左,講完佢知之後,佢就打去問醫生係咪有預約,原來小姐檯上有個透明FILE係有寫架,小姐對返之後就繼續幫我登記!! 係登記期間,小姐瞄到粟米,同我講"你好似揹住個公仔咁呀",因為今早我幫粟米著左件啡毛BEARBEAR衫哈哈!! 登記完就出返去6號窗約期同俾錢,多謝1百大洋!!望返個期寫今日11:30AM,即係仲有成個鐘要等啦!! 期間粟米成日放屁,幾驚佢大便左要去換片,CHECK過好彩唔係!!好彩無行開,11點就已經俾人叫入房啦!!! 入到去我俾健康院既資料醫生,醫生望完,就問我幾個問題: 順產? - 係 係咪頭出先? - 係 足月出世? - 係 屋企人有冇骨既問題? - 無 之後就放粟米上床俾醫生CHECK,我今次都有留意呢個男醫生同上次女醫生檢查有咩分別,結果係估唔到男醫生比女醫生更溫柔,呢個醫生會耐心等粟米郁完先再按粟米D關節,除左腳仲有CHECK埋手,膊頭同背脊!!真係同上次女醫生有好大分別!! 檢查完醫生同我講暫時檢查唔到粟米有D咩問題,其實多數都係怕BB骨折(呢個我都有所聽聞),好少話BB關節有問題!!我問醫生:"咁唔知係咪上次BB太緊張,所以令到關節好緊" 醫生答:"都有咁既可能,同埋始終出世無耐,BB習慣係肚入面屈埋未適應,所以未見係有關節問題,不過都為左穩陣起見,都約一約睇下有冇期照個超聲波,你可以返出去等叫名啦"我:"唔該晒醫生" 聽到醫生話粟米無事,都鬆口氣,證明有時女人比男人更粗魯呀!!! 之後聽到叫名去拎預約紙,咁岩同健康院打針撞期,問姑娘仲有冇第二個期,姑娘幫我CHECK,CHECK完之後話我知改唔到期,醫生都想快D幫粟米照!!咁唯有返去改健康院個期啦! 拎住張通知紙,去窗口約期,我去左啦,我以為係6號窗搞啦,點知原來要去返7號窗!! 排7號窗期間,我前面個麻煩女人搞好耐,佢仲好煩咁不斷同姑娘講"可唔可以幫我排快D,我坐骨神經痛,好痛呀真係,唔該你幫我排快D!!!姑娘答:"個期係最快架啦,我地都係跟電腦架咋,到時如果醫生有期既就會寄信通知你早D返黎睇"個女人KEEP住話自己好痛,又話係美國睇過都睇唔掂,依家痛得好緊要,想快D有得睇!!!姑娘依然都係同一答案,不過加多句,呢個期係最快架啦,如果你真係痛到頂唔順既話,可能你要睇住私家等私家俾D止痛藥你先得啦! 之後佢走左到我,小姐應得我,仲同我講"咦?BB走得啦?"我答"係丫走得啦" 完成預約期就走得人LU!!!!
反正都出開街,梗係順個便都去行下街啦,JOIN埋大姨打的去新世紀廣場行下,亦都順便要去買藥膏俾粟米搽面,因為佢呢排塊面好乾紅晒,唔買唔得!! 新世紀裝修過同之前唔同,亦多左好耐鋪頭添,行行下粟米開始肚餓,原本訓緊覺既佢,開始有微言啦,唯有去育嬰室啦,真係第一次去育嬰室,好彩呢到有一層賣BB既,實有育嬰室!! 去到育嬰室都幾大,有兩個換片位,仲有一個間開左既餵奶室,方便餵奶!!餵奶期間...有個媽媽走黎餵人奶,佢一入黎就話粟米好細隻,我只係笑一笑算了(一個月多D有幾大隻呀?!)不過如果相比佢個BB...粟米就係超細,佢抱住個巨B,而且我覺得個BB...有D恐怖,個咀大仲要黑邊咁,又大舊,可以用樣衰黎形容,望左一眼就唔敢望了!!!好彩都就快餵完換屎片就走人!! 出去個陣,咁岩有一對夫婦帶住BB想入育嬰室,個位爸爸見到我同大妹一齊出黎,佢好驚咁問佢老婆育嬰室係咪女人先入得架?我想答佢唔係,不過都係唔好多事了呵呵!!餵粟米開頭都有對夫妻入去幫小朋友換片片!! 呢間有得分開換片同餵奶區都好D,咁爸爸都可以入去!!
BB食得多奶粉自然去得快,之前已經食左一罐雅培一罐能恩,今日又開第二罐雅培,點知一拎起我星期六先買既雅培,發現同之前個罐唔同樣,隻BEAR鮮色左,名又唔同左! 萬寧買個罐係叫”雅培心美力”,藥房買個罐係”皇牌心美力” 不過問題最大係,當我開左膠蓋,見到有入面鐵蓋有爆口,粟米爸又快手開左鐵蓋,然後沖左4安俾粟米飲,餵既途中,我先開始清醒地諗:”其實係咪唔應該食,唔知爆口左幾耐,會唔會有細菌感染左” 之後,同粟米爸講,我地蠢左,應該唔好開,寧願去惠康買罐新既,爆左口驚有菌,一陣粟米肚痀病左就仲死! 結果,就將個罐奶粉掉左!浪費左260蚊!錢事少粟米健康緊要! 260蚊買左個教訓,就係要影低行貨奶粉,唔好買到水貨,再而就係要開膠蓋check下入面鐵蓋有冇爆口,粟米爸之前買都無check過,依家我地學精了! 上次仲買左罐牛欄牌,粟米爸去惠康買個陣都有望返同我係藥房買既同唔同樣! 呢次真係要學精明d! 事後上網check,以為藥房個罐係台灣版,但係對過又唔一樣,所以都係不明來歷既水貨奶粉!小心小心!
滿月之後就係打針日,打乙型肝炎第二針! 9:30去到健康院,今次補返出世紙登記,登記完就拎返出世紙再等叫名! 先叫名去二號房,又係時候除衫除片,度頭圍36.5cm(出世時33.5cm),磅體重4.1kg! 著返衫又係出面等叫名!呢次去5號房! 姑娘問我粟米一日幾多餐,便便有冇唔正常,講粟米體重同頭圍都好好,係健康手冊到畫左條線,又問我粟米有冇唔舒服或者發燒!我答:無發燒,都正常!姑娘就講正常既話就可以打針啦!又出去等叫名! 聽到叫粟米要入1號房,之前我產檢1號房有幾個人,依家bb打針入去呢間房就變成得一個!姑娘叫我跟住海報上既姿勢,禁住粟米,左手攬粟米上身,右手捉實粟米大脾!之後姑娘就準備幫粟米打針!我望住姑娘手中枝針吉入粟米大脾,望一望粟米佢原本瞓覺既樣,變成紅面同喊!我又望返姑娘枝針入面既液體注射入粟米大脾,完左之後聽到粟米喊聲!我同粟米講”無事啦,你發夢咋,訓啦訓啦”粟米就好快唔喊,再訓返了! 出返去再約期,下一次打針1/17!
終於滿月啦,即係我放監哈哈 午飯帶埋粟米去同公公姨姨們飲茶,之後粟米爸去拎我之前訂既滿月蛋糕,再同姨姨們影相。 影完就出街,去荃灣吉之島買野,買返把bb剪指甲既較剪,同裝奶粉既樽! 見到之前係網上同bb雜誌見到既公仔,叫粟米爸買俾粟米,299吉之島會員仲有折添! 買完又打的返屋企,夜晚又同公公打邊爐! 九點幾就拎埋滿月蛋糕去爺爺麻麻屋企,影相同食蛋糕! 就係咁過左一個滿月既一日!
擒日麻麻有問我地洗唔洗整紅雞蛋,我地講左唔整,因為都唔會派,唔搞咁多麻煩野! 點知今日粟米爸食飯時,麻麻又問,大伯都出聲講:你擒日咪問左囉! 粟米爸就同麻麻講:我地就唔派啦,如果你想派俾朋友,你咪整囉!我又唔會阻止你派俾d朋友! 因乜麻麻咁高興要派紅雞蛋呢?!如果佢要派咪自己派俾d朋友囉,唔洗問咁多次,定係佢d朋友又多口問,所以佢又問我地呢? 其實我對於呢一類既傳統零知識同覺得無需要,生bb係自己既事,關人地乜事,做咁多無謂野,d人又唔會幫你養大個小朋友,仲要搞一大餐,真係太多餘了! 真心登你開心既人唔洗做呢d野先識登你開心!
粟米爸上網預約幫粟米拎出世紙,上星期太full,所以book左今日去申請! 拎出世紙要帶:結婚證書,父母身份證! 粟米爸自己去申請,申請左兩張,以防萬一唔見左,都有另一張! 估唔到粟米爸咁快就拎到出世紙,仲好快返添,book左十點,十一點就返到黎! 果然上網預約,粟米爸仲print定張form帶去,所以好快就拎到! 依家既出世紙電腦print出黎,想當年我個張出世紙係人手寫,感覺真係好唔同! 粟米有了出世紙! [盧晉宇 ] 就係粟米仔既全名啦! 至於英文名,到時學校要改既話,再幫佢改啦!
媽媽會有媽媽post左兩箱奶水,問有冇人要,仲要係粟米仔食緊既牌子,我當然留言話要啦,不過留完先知已經好多媽媽話要,見到都打消念頭! 點知星期三,有媽媽pm我,話之前話要既媽媽全部都話唔要,問我仲要唔要,我當然要啦,唔洗錢喎! 今日粟米姨丈幫我去九龍灣拎,仲送埋黎屋企,實在太好了! 呢d就係粟米剛出世係醫院像個d奶水啦,座熱之後可以即棄!
今日收到封信,由醫館局寄黎,仲以為係d咩,原來係粟米排骨科改期,由2014年11月25,改為2014年2月5日。 又會無啦啦寄信黎既,之前又話會打電話通知,收到封信都幾突然,不過都好,早d睇,唔洗等到識行先睇!
又係檢查時間,今次有帶定奶粉同水,以備粟米肚餓食奶! 搭車去到健康院,岩岩好9:30!拎左籌等叫名!見粟米開始肚餓,又未叫到,人又好似好多,都係餵左先穩定,唔洗好似上次咁陰公餓咁耐!餵緊個陣先黎叫名,粟米爸就去同姑娘講聲,姑娘好nice叫我地餵完再去搵佢! 餵完當然就搵返姑娘啦,好在有暖氣,除晒衫都唔會太凍,今次粟米3.29kg,比上次重左! 跟住返出去等,等個陣無晒位坐,突然好討厭一d帶埋賓賓黎既夫婦,因為佢地霸晒d位坐,兩夫婦已經坐左兩個位,仲要坐多個賓賓,就一家霸三個位!非常討厭,搞到好多抱住b既都無位坐! 企係到的叫名,之後見終於有位就坐陣啦,點知又叫名去18號房,去到門口先知你醫生房!係個女醫生黎既! 醫生叫我放粟米去張床上面,放完就叫我幫粟米除衫,咁我問係咪要除晒,但係醫生又好似好怪咁叫除衫,係幫粟米解衫時佢又用儀器check 粟米既黃膽指標,之後講無黃,又無啦啦就去摸粟米骨關節!摸摸下又叫我幫粟米除晒所有野,又話咁多野阻佢check,我真想講醫生你d指示可唔可以清楚d啊,我幫粟米解衫你又無啦啦check,我梗係唔再除啦,依家又話叫我幫粟米除晒所有野,一早俾我除晒先check啦! 睇見醫生check粟米就覺得好痛,醫生check 粟米大脾關節,唔知係粟米緊張驚得濟,定係醫生問題,大脾仔俾醫生禁平個陣,粟米喊晒同好似唔柔軟混咁,禁完左又禁右,睇住粟米痛到側埋一邊!之後醫生叫我幫粟米著返衫! 醫生同我地講,粟米大脾關節好似有問題,寫左封信叫我地去瑪嘉烈骨科排期去照下! 出去又等叫名,拎返本手冊,下次就打針12/16! 同粟米爸食早餐之後就搭車去瑪嘉烈約期,我已經有心理準備,骨科要排好耐,一去到接待處,拎籌等叫number,果然一排個期就去到出年2014年11月25!職員話可能會早,睇呢兩個星期有冇人打電話俾我,如果無就照返呢個日子去睇! 俾醫生講到好似有d問題咁,事實真係有d擔心,但係平時又有幾何要粟米打開大脾呢?依家唯有做既就只有幫粟米做腳部運動!等佢d關節無咁緊!我諗粟米應該係成日曲住對腳,所以關節唔靈活!希望快d有期,可以快d照,快d知係咪有問題啦!
原來自從粟米出世放產假後,我就無計日子,究竟係我懶丫,定係太多野搞呢? 話就係放產假,實在我都有做公司野,只係home office咁解! 訓醒等陪月黎,陪月同我講今日要食d補身既野,煮雞酒,燉下湯咁!原來今日十二朝,其實擒日麻麻拎薑醋黎,我都無為意!哈哈!不知不覺就已經十二日!時間過得好快! 真係佩服d媽媽咁有心機日日都同bb數日子,我就連係咪日日都有同粟米影相都唔係好記得哈哈! 睇黎要檢討下!
之前麻麻係粟米出世無耐,佢就同粟米爸講開始煲薑醋,因為我知麻麻一定會煲一d俾我地,我叫粟米爸同佢講聲,我要十二朝後先食得補既野,所以照煲無問題,唔洗拎上黎,但係麻麻話要就埋我先整,對於唔食豬腳薑既我真係好無奈,避唔到添! 聽日就十二朝了,麻麻今日就拎左一大竹兜上黎,雖然唔係大兜,不過對我同粟米爸黎講就係超大兜,因為我地唔食架!粟米爸話麻麻講點都要食隻蛋!所以佢真係食隻蛋! 我就影張相留念算!
唔知係咪BB同媽媽有一種感應,對一D我唔鐘意既人,粟米會訓覺,而我喜歡既人粟米都會清醒!不過暫時未能證實,可能只係咁岩得咁”喬”! 因為坐月,不能同爸爸飲茶,唯有屋企自己煮,叫粟米爸買野返黎煮! 突然爸爸打黎,話上緊黎,咁岩粟米又唔肯訓喎,就係咁公公同大姨上黎,就見到粟米開眼精靈樣啦! 公公大姨走後,就收到d討厭既人電話打俾粟米爸,大姑媽同姑丈話要黎睇下bb喎! 一大堆人上黎,爺爺,大姑媽&姑丈同表姐,大伯同伯娘! 剛好佢地黎,粟米岩岩食完奶換完片訓左,仲訓得好林,咁多人講野都嘈佢唔醒,賤格大姑丈仲抱起粟米添,好彩粟米照訓可也! 即係呢d人個時鬼咁緊張自己個件,連我呻鼻都唔高興既人,抱人地個BB就好地地,個時人地個女仲係BB個陣,仲要滿q左月,都唔俾得人掂,但係就黎搞我個一星期大而訓著左既粟米,調轉咁做d人發左癲九世啦!大姑丈就係咁無啦啦抱起粟米!(�み�) 大姑丈見到飯權上有兩罐奶粉,就問我地BB食緊邊隻奶粉,我答”食緊雅培,另外個罐只係俾BB試,方便第時轉奶粉!”點知大姑丈又黎料,佢話”咁點解唔試下illuma,都只係貴多你百幾蚊,又唔會食你好耐!肯定無人爭!”我回應:”咁hollie都無人爭,依家唔同你地個陣,你地龍年多人爭,今年無咁多人爭!”佢收聲!(真想鬧爆條友,奶奶貴同平唔係重點囉,我地唔係俾唔起,點建d人一開口就咁乞人憎呢,我究竟要對住呢d無聊人問無聊問題幾多次呢?) 大姑媽又以自己既經驗套落我到,佢同我講”辛唔辛苦啊?” 我答”ok啦”佢講”係咁架啦,開頭係辛苦d,餵奶掃風差不多一個鐘!”(唔係掛••咁耐?!)諗住求其回應佢之際,突然大伯幫我回應大姑媽:”唔係喎,佢好快飲完,唔洗一個鐘!”大姑媽眼神放大,講”係?!” 有證人咁回應,咁我又唯有老實答”係啊,佢飲奶掃風半個鐘(其實只係15分鐘)”大姑媽話”咁快?”我俾個位佢落,我話”咁佢依家3安奶啫咁梗係快啦”大姑媽都仲要死撐話”可能係啦,我地要睇返之前d記錄先知” (~_~;)有冇需要咁小既事都要check啊?!真係痴線! 之後因為人地個女曳,周圍搞野,所以就走人返落樓下! d人走晒,安靜晒,心情非常好,粟米係我最唔鍾意既人黎訓左!太好了!錫晒你丫粟米!
今日朋友黎探粟米,仲等特登等粟米醒,餵粟米飲奶添,佢話好耐無抱過d輕既bb,自己個女歲半好重,已經係唔想抱。 係餵粟米時,朋友feel,到粟米大便左,之後講起奶粉問題,由於佢老公係醫生,所以佢既意見都值得參考下! 依家粟米係餐食餐清,佢就話第時出街會好唔方便,因為尿可以耐d先換,屎就必須即刻換,再講襯BB仲細俾多幾隻奶粉佢試,以防萬一缺貨都有第二隻頂住,同埋等BB唔洗習慣一隻味,而唔肯食其他! 聽完都有d道理,所以都叫粟米爸買罐能恩俾粟米試!
今早八點幾餵完奶,就換衫出發去健康院,本身諗住好快,可惜我錯了,錯在無帶奶! 一去到登記,首先要填Form,都未填晒就俾人叫名話要對資料。到的交資料,又問大量問題。之後,姑娘叫我去2號房! 行到去2號房,又俾姑娘問我係幾號籌,原來未有資料,又要返出面等叫number! 到叫我地時,行入去又一大堆人,姑娘要粟除衫磅重,咁唯有搵個護理位幫粟米剝光豬!剝晒之後,抱粟米上磅,真係好怕佢會凍親,磅完有2.92kg,姑娘就幫佢測黃膽指數,原來測黃膽指數只係用儀器係心口照一下就check到,我仲以為要抽血添!姑娘話黃膽指數正常,聽到安落晒!之後抱設走粟米,點知俾個大陸男人擋住!真想鬧人! 埋返位之後,幫緊粟米換衫時,突然俾隔離位既大陸阿嬸撞到我,真係開始有d想鬧人,粟米爸見的俾人撞,佢就撞返個阿嬸!我明白大家都怕bb凍親,但係唔關事既人係咪應該企埋一邊呢,係到阻到其他人,仲要撞到人,真係好討厭! 著返衫就拿拿聲離開咁迫既地方,出去等叫名,此時粟米開始喊,似乎想飲奶,我只有俾奶咀佢頂住! 之後叫名,去7號房見姑娘,姑娘話第一次登記會耐d,之後就好快!粟米就不斷喊,姑娘就不斷問,我就不斷答!真想快d搞完快d閃返屋企!粟米喊到好陰公咁!唉!最錯係我竟然聽姑娘講學點埋身餵! 填完資料叫我地走去出面19號房等,突然又俾人叫名要行去登記處,通知我地約左期,下次覆診同埋約12/16打針!又返去19號門口坐係到等! 到入得去餵哺室,我簡直係自己攞黎,姑娘一黎就話我,點解第一日唔俾bb啜奶頭,我話”因為未見有奶(仲要無沖涼)”,姑娘話”邊個話要上奶先啜得?!”我答”我覺得啫” 之後佢教我埋身餵,我覺得佢好暴力下,不斷禁粟米個頭埋我乳頭,又不斷壓佢個身埋我個身,又講叫我將粟米擺埋d,心諗”已經好貼啦大嬸,我右邊有胸架點樣貼都有個距離丫!”試左一輪最終都係唔成功,粟米唔太慣啜乳頭,唯有餓住等返屋企食啦!見佢喊得好淒涼咁,真係唔忍心再迫佢啜乳頭! 最手拎返本好似手冊咁既健康紀錄就走得了! 下次11/29再返黎覆診! 姑娘仲幫我約左26號餵奶講座,仲話有d人奶媽媽會分享下心得添!我求其應承就算!俾人虐待過一次就夠了!(~_~;)
出院時姑娘叫我地記住預約健康院,最緊要check黃膽,所以今日打去預約! 可能蛇不及龍,打去預約,姑娘竟然問我今日下午帶唔帶到B去健康院,我就問聽日有冇期,姑娘就幫我約聽日早上9:30! 原本想搵陪月陪粟米爸去,但係粟米爸好似唔太想,唯有同陪月講叫佢聽日唔洗咁早黎!
第一晚半夜照顧粟米,粟米都算定時,三個鐘醒一次,所以我半夜起身一次,晨早起身一次,都仲頂得順! 不過夜欄人靜的確對我唔太好,半夜頭腦唔清醒,有時腦諗既野真係比較負面。 三更半夜起身沖奶同餵奶,只有望住粟米,見到佢飲完奶之後唔郁咁,突然頭一跌,我個腦浮現"驚”!個心離一離!心諗”下?死左?”之後當然就摸下粟米有冇呼吸,見佢有呼吸,我鬆一口氣!但係腦又浮現第二個恐懼,聽到粟米急速既透氣聲,就諗”佢呼吸咁急有事嗎?點為之鼻塞呢?塞左會唔會透唔到氣?咁會唔會窒息?點為次發燒?會唔會發燒我唔知?吸鼻器係幾時用?••••••(十萬個問題,直到最後既問題)究竟我可唔可以湊得佢健康成長?” 其實我知自己諗多左,不過半夜本來就應該俾大腦休息,所以控制唔到個腦諗野應該係正常吧! 望著粟米好一陌生,真係我生既?佢咁大舊點解可以係我肚屈得埋? 突然粟米露出笑容,幻覺?定係粟米不自覺既表情? 之後又再重覆,對粟米訓著左,但又會笑既表情,真係完全唔知佢搞乜!
今早8點去餵粟米,餵完抱左陣,先交俾姑娘,之後返房。 兒科醫生黎左,佢話粟米黃膽指數超標,要留院照燈,所以唔可以出院。 突然聽到粟米唔可以出院,當然有失落既感覺,不過問題來,要等埋粟米(留多一日醫院)定自己出院先呢?!亦都順便whatsapp粟米爸呢一個消息,粟米爸正搭車黎緊,話黎到再決定! 係粟米爸未黎,我都係決定走人,原因係昨晚黎左個問開刀產子既麻煩產婦,我半夜俾佢整醒,好耐先訓得返,今日其實好眼訓,醫院張床已經唔係好訓,加上聽到佢同姑娘既白痴對話,真係頂佢唔順!我再留多晚會好辛苦! 拿拿聲執定晒d野,等走人! 結果,粟米爸一到,佢就同我講留多晚等埋粟米個時,我就同粟米爸講我都係出院先,唔想等粟米,講就話醫院床唔好訓,暗地裡做口形話俾粟米爸知隔離床好很煩同埋我訓唔到覺! 等到醫生黎,檢查完,我同醫生講,我唔等bb了,我出院先! 之後,等埋單,同埋幫粟米辦入院手續!重新拎張探bb牌!姑娘問我餵唔餵埋粟米,我好奇問”咦?得咩?”姑娘話梗係得,之後仲話推粟米俾門外既粟米爸見下,點知粟米爸返左入我病房,姑娘仲搞笑地對人地爸爸望下粟米,我個刻即刻講,唔係呢個爸爸,之後我就飛奔返病房叫粟米爸見下粟米!望完我又入返嬰兒房等餵粟米,點知姑娘又話俾返文件我,我話一陣餵完粟米先,姑娘又話叫我收好先,怕唔見文件,我又再拎疊文件去門口,粟米爸又唔係出面,結果我又行多轉去病房,真係想講”why play me?" 我諗應該無咩產婦好似我咁跑來跑去! 返去嬰兒房門口,發現關左門,禁鐘,姑娘問我咩事,我話開門丫唔該(我諗我應該講餵奶會好d,結果•••無人開門,直到有姑娘出黎我先有得入返去,入去粟米仔喊緊,我抱住佢有d無奈,因為臨時話餵奶,所以未有奶準備,臨急黎座熱,睇住粟米喊,我好似搞到佢無得食咁••••,又終於等到有奶,但係座熱得一陣,枝奶又唔算凍唔算熱,只係室溫,姑娘就拎俾我餵••••,餵完真係有d擔心粟米唔知會唔會肚痛! 就係咁,我就出院先,返到屋企休息,call陪月下午黎整野我食!回家感覺真好! 擒晚十點個胸有d谷,有熱敷過,今日係屋企試泵,泵到一兩滴,但係谷胸真係幾痛下! 是日粟米重2.74kg,1-1/2oz-2oz奶
原本以為今日可以出院,點知,原來bb出世後要留院最少48小時先可以出院,換句話講就即係留多日,所以都叫陪月今日唔洗黎,我又留多一日醫院,等埋粟米仔先出院。 擒晚獨霸三人房,真係訓得好好,雖然七點幾就起身,不過無其他人真係訓得自在d。 今日無人黎,所以好hea,可以休息下。 一早阿姐黎,仲問我點解唔洗出去餵奶,我完全唔知有咁既事。望返時間表,果然8:00係餵食時間,不過要事前登記,擒日我係有登記,可以指定時間去餵,不過我又因為太多人黎探b無去。 到9:00姑娘巡房同問餵唔餵bb,我報話去,問定姑娘係邊到排隊,11:45就餵第一次! 到就黎夠鐘,就係嬰兒房門口等,只限媽媽進入,入面當然唔俾影相啦,因為會有媽媽餵人奶。 入去先洗手,後著袍(人奶就開口向前穿,奶粉就開口向後穿)。 第一次餵粟米飲奶,原來醫院d奶係特別樽,護士只要坐返熱就得,只係唔太環保啫! 護士會教點餵同點掃風,餵人奶既要先用棉花消毒,都會備定枝後備奶,以防媽媽未夠奶補奶粉! 今日total餵左三次,可能我餵奶粉,粟米又飲的好快,掃風都好快掃到,次次都第一個閃人! 希望佢日後餵奶都咁順咁乖啦! 是日粟米重2.78kg,1oz奶
都唔知係咪粟米咁識時候,竟然擒日出世,今日好多好朋友放假,都可以黎探我,順便望下粟米! 一早,十點半就開始有第一位朋友:Zoe 之後,十二點幾就到粟米爸一家:爺爺,麻麻,細姑媽,大伯,伯娘 無幾耐就到朋友:Lorraine 食完飯之後,四點就到:大姑媽同姑丈,仲有彥洛表姐(不過因為表姐病,所以無睇粟米就走lu)! 跟住朋友:Coey 同佢老公 同時朋友:Violin 無幾耐:公公同姨姨黎左,細姨又到埋!(佢地仲睇左2次粟米先走) 諗住無人黎啦,點知廢人舅父同舅母帶埋5個月大既表姐諾晴黎 (真唔想見到) 是日粟米體重2.77kg, 1oz奶 今日變成探訪日了!真係多謝咁多位我既朋友黎探我,同埋送俾粟米既禮物啊!