親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
粟米媽
他的寶貝
他的興趣
文章分類
日期
#Tag
Hi~ 小寶真是可愛
資料載入中...
係未生粟米之前,成日就睇D BB攝影公司,因為之前FB都見過朋友影個D好得意!!咁岩我都睇中左間,又唔太貴,又幾得意!!! 因為呢間野要等BB 3個月以上先可以影,所以粟米出世後,等到佢將近3個月先BOOK影相,當然媽媽會都不斷影過唔同既攝影公司,有平有貴有遠有近!!! 上星期天氣凍,粟米係麻麻屋企玩3粒鐘,結果俾麻麻屋企個暖爐搞到成塊面都乾晒,又紅面又起粒!! 已經每日都幫粟米搽lotion,但係都仲係好唔晒!!直到今日要影,塊面都仲係有紅粒,只係俾之前無咁嚴重!!! 但係都到左影相日,無計啦,都要去影!!! 去個時都驚唔知會點,驚粟米扭計,驚佢訓左覺之類... 好彩攝影姐姐都好勁,用扇去令粟米笑,見住攝影師姐姐又上又落,又彎腰又換景咁,真係好勁!!! 最後因為影飛機師造型要戴帽,粟米開始扭了,因為佢最唔like戴帽,加上有暖氣,佢又怕熱,開始唔奈煩,到最後影裸照更加難,因為佢仲未係好識趴係到台頭,所以只有幾張台頭相!! 影完幫粟米著返衫,等20分鐘到有相睇,total 50張相揀!! total 俾 800蚊 就有晒50張相既file!!! 由出發,影相,取相,到返屋企都係個半鐘咋哈哈!!正!! the new classic the new classic the new classic the new classic
天氣凍,唔知係咪粟米玩得太累,沖完涼飲飲下奶訓左(好彩都飲晒5安),正放佢落床仔,佢突然又再喊,俾奶咀佢又喊,關燈唔好曬到佢又喊,諗諗下問佢係咪仲要飲奶?佢喊得仲勁!! 於是沖多兩安奶,結果佢同我飲晒,竟然飲到7安? 飲完就訓啦訓啦!!! 天氣真係凍左好耐,我地大人有羽絨被都覺得凍,好彩粟米肯乖乖地訓厚睡袋,之前佢點都唔肯訓,今次凍到我訓覺都覺得塊面好凍,半夜都起一起身睇下粟米夠唔夠暖!! 就係咁訓到今早8點半都仲未捨得起身,佢連半夜有一兩下叫聲都無,訓得好林!!
終於捨得去開架BB車黎用,因為今早要返公司整野同收貨,抱住粟米返去工!! 打開大紙箱,拎架車仔出黎,感覺架BB車比想像中輕,拎出黎見到車轆係有D紫銀色,覺得好靚(發瘟中),之後慢慢研究點樣打開架BB車!! 此時粟米訓左係油壓凳上面!!! 係開BB車個陣,真係覺得好好玩,又開又合,哈哈!!(痴左) 之後放粟米上BB車訓,扣好安全帶!! 又試下連粟米帶車咁拎起睇下有幾重,又OK喎,我都叫做拎得起!!! 講真,買BB車個時,我都係上網睇到個款好鍾意就決定買,至於功能/重量...等等我其實買個陣無試過!!我諗應該無咩人會好似我咁痴線,因為睇圖LIKE而去買掛....!! BB車對我黎講架架都一樣,我唯一知既分別係重D同輕D!! 就係咁終於都開左架BB車黎用!!仲用得好開心!!粟米應該唔知我開心D乜哈哈!!! 又試下帶粟米出去深水步買野,又去葵芳!! BB車當然係好,唔洗揹住咁重,但係諗到有D地方係用唔到BB車,所以出街前就要諗定要去既地方應該揹丫定係BB車!!! 我成日去既地方都只係旺角同深水步比較多!!! 淨係旺角,信和已經唔容許我用BB車!!尤其係繁忙時間!!!再講深水步既黃金都係唔容許我用BB車,因為地方窄同樓梯上落!!諗諗下其實都有好多地鐵站無LIFT上落,呢D都係揹帶方便D!!! 我都有試過上巴士,連車帶粟米,我諗都只限唔多人上車個陣可以,仲要架巴士係闊門先OK!! 當一個人帶BB出街都係揹帶方便!!! 不過我實在太愛架BB車,覺得好靚好靚哈哈!!!用得好開心!!!
由無陪月幫手開始,粟米就習慣左夜晚先沖涼,每晚10:30就沖涼,好多人都話夜,對於我黎講只係就返我地生活習慣既時間啫! 繼定時沖涼後,我都開始定時地餵奶,目的係想自己輕鬆d,唔洗半夜起身餵奶咁累! 慢慢地變成沖完涼後,飲奶,睡覺! 近呢星期,粟米每次沖完涼,就會開始咀郁郁,啜啜下!即係表示佢已經知道同習慣左,沖完涼就有得飲奶,但係月訓覺依然未意識到! 今晚唔知係佢累定係乖左,沖完涼飲奶之後,佢竟然識得示意(唔想我抱)放佢落bb籃,之後要奶咀,就乖乖地自己訓,當然都有扭一陣,但係佢扭既原因係要我關門(因為客廳有光)!唔洗一陣就訓左(((o(*゚▽゚*)o))) 佢究竟係被訓練到咁,定係咁岩得咁橋?
打完針過左一星期,係時候帶粟米去食輪狀,因為政府唔包,所以自己去兒科醫生到俾錢食! 早排仲諗邊到先有得食,咁岩見到粟米爸睇開既醫生原來都係兒科,所以打左去問,好彩都有得食,同埋行去就得,唔洗搭車!食3劑,每劑$560!剛好係我想要既!仲諗如果係2劑點好! 3點打去book(因為之前問,姑娘話係即日book就得),姑娘問4:30-5:00到唔到,當然無問題啦! 去到登記完,唔洗等好耐,就入醫生房!入到去都幾搞笑! 醫:你係睇醫生,唔係食輪狀架? 我:下?係食輪狀喎 醫: bb幾大? 我: 2個月多d啦! 醫: 你係邊間醫院生? 我: 法國醫院 醫: 順產定開刀啊? 我: 順產 醫: 順產咁好啊? 我: 好咩? 醫: bb係咪可以就咁除揹帶?係到食? 我: 可以除•••(咩意思呢?) 醫: 丫,睇下有冇奶粉先,依家都好少人黎宣傳。 我: 咁好? 搵左一陣••• 醫:哎呀,得2號,有排你都未食得 我: 唔緊要! 之後睇針卡 醫: 丫,依家有寫13價喎,之前無寫架,我地靠估架咋,都唔知10價定13價•• 我: 係? 醫:輪狀呢就唔同打針,分開既,我幫你mark架啦喎 我: 哦••• 跟住有兩姑娘黎,原來係餵粟米食輪狀!一個拎住水同膠羮,一個拎住枝透明物體(輪狀口服液) 醫:啊,我都睇下點餵先,未見過! 我:係? 醫: 你知唔知輪狀幾多錢一劑啊? 我: $560蚊一劑丫嘛(驚我唔知價?) 醫: 哇,乜起左價啊? 我: 咦,醫生你唔知價既咩?你唔好嚇我喎! 兩位姑娘都係到笑! 醫: 我淨係知舊價咋! 醫:你依家呢個時間黎好,你咁多人,朝早好多人好忙,晏d又係好多人! 我:係?d人放工所以又忙! 食完,醫生俾我睇返針卡察左既野,再用memo幫我mark返幾時再食第二同三劑! 今次都俾定退燒藥我,有燒先食,無就唔洗食,下次會有另一枝退燒藥,今次個枝就唔岩用,到時可以掉得架啦!
話咁快又覆診! 去到俾錢($60),拎籌再坐低等! 見醫生,醫生話照過晒無事,又再check多次粟米d腳較,醫生就話無事喎,唔洗再返黎覆診啦! 因為健康院個女醫生,搞到我要行三轉,仲要浪費左160蚊!唉•••真可惡!不過照左都安心好多!
又係時候打兩個月針啦,今日要打兩枝針! 照常準時到登記同拎籌,職員問我有冇填過問卷,我答無,佢就叫我填,填完就交返俾佢,再等叫名! 份所謂問卷都只係想睇下做媽媽湊bb既心情,對我黎講都無咩特別,好快填完交返俾職員! 叫名入2號房,一樣之前咁,除晒粟米既衫,磅重度頭仔,今次有得度身長啦! 體重 5.15KG 頭圍 38.3cm 身高 59cm 搞掂著返衫又等叫名! 呢次要去14號房,入到去姑娘就問名同幾大! 姑: 咩名 我: 盧晉宇 姑: 幾大啊? 我: 2個月 姑: 係啦,睇返佢既體重各樣都好好喎,身長有59cm,唔錯喎,算係中上(75條線) 我: 哦 姑: 睇返媽媽你方面,問卷個到分數都幾高分喎,媽媽心情都幾好喎 我:係? 姑: bb都幾乖啊 我: 一時時啦 姑: 我見佢依家都幾定喎 我: 因為佢仲未知發生咩事囉 姑娘笑左! 姑: 佢依家食幾多安奶? 我:4-5安啦 姑: 戒左夜奶未? 我:••••戒左掛 姑: 應該都戒左架啦,keep到12點之後5點先醒就係戒左架啦! 我:咁戒左啦(其實都係一時時) 姑: 兩個月啦喎,今日要打兩枝針! 我: 正啊! 姑:你睇下bb有冇張紙寫既情況? (發燒,水痘•••) 我:無啊 姑: 咁打完可能會發燒既,俾定枝退燒藥你,知唔知幾多度係發燒?識唔識肛探? (下•••肛探•••••) 我: 38度發燒 姑: 係啦,腋下就35度低d 我:哦 姑:無咩出去等叫名打針,打完就四個月大先返後架啦! 姑:啊,你瑪嘉烈2月係咪睇骨科? 我: 啊,我轉左去QE睇啦! 姑:咁有冇結果 我:醫生話無野,照左超聲波都無事! 姑: 哇,咁快?照埋超聲波?個邊d期咁快? 我: 係啊! 姑: 咁幫你mark返低先!咁無野啦88! 我: 哦,(用粟米手)88姑娘 等叫名期間好彩粟米都訓返! 到叫名去1號房受死,入到去姑娘已準備好兩枝針(13價同白喉個堆)! 因為打兩枝,所以兩邊大脾各一枝! 第一枝打完,粟米先岩岩喊,轉頭就第二枝哈哈! 不過都算係咁,喊一分鐘就收聲,打完要等15分鐘無事先走得,粟米爸就襯呢個時候約下次打針期! 15分鐘過了,落地下取退燒藥!化••••落到去,多人都算,氣氛好似好多病菌,拎完籌,拿拿聲返出門口等叫number!從未試過驚到覺得要口罩,有個好心既阿叔話我知入面有口罩拎,仲叫我拎多個俾粟米爸,仲仲同我講叫我去拎藥粟米爸同粟米留係門口等,哈哈,真係多謝佢既關心! 睇返d number 好似有排等,我就叫粟米爸一齊去食個早餐,食完再返黎拎藥都唔遲! 果然食完就有得拎,因為已經過晒number!哈哈 有枝藥水同針筒,方便餵藥! 走個陣,原本諗住搭的士,咁岩有巴士黎緊,飛咁快行去搭巴士啦!跑去期間有堆公公婆婆欄路,唉,可唔可以俾條生路黎行啊,我唔理佢地,一路講唔該一路撞出條生路,粟米爸仲慘,佢揹住粟米叫阿婆借借,阿婆唔讓仲要叫佢"你行你就行啦”,老人家點同佢鬥丫,唯有行出馬路!好彩都趕到上巴士!
一直都擔心如果粟米發燒,我會唔會唔知點算! 今日打既針聽講會發燒,所以返到屋企都緊張check住! 仲買定退熱貼添! 返到屋企當然就拎定探熱器出黎,隔一個鐘於check一次,都見粟米體溫開始上升! 大約下午4點,去到37.9 ,都俾佢食定退燒藥再加退熱貼! 因為退熱貼放過雪櫃,所以好凍,當貼落粟米個頭時,佢當然就喊到好大聲啦!(我就黑心地笑死左) 食左藥,都退左d燒,夜晚見佢都有36.9,都同佢貼定退熱貼! 亦都因為發燒唔舒服,所以食奶時間都有d亂,唯有之後再調整返啦! 有驚無險咁,粟米只係發一次燒!亦都第一次用針筒餵藥!
不知不覺呢...粟米都叫出左世成兩個月,我竟然依家先收返影孕照個D相!!仲要我爸爸幫我係公司收件!! 係我追完間野先識寄!!係咪真係咁忙?定係太小事被漠視?? 不過收到CD,相架同相簿都放心晒,唔洗記住未收到咁煩既!! 望返D相...真係不知不覺,咁樣就生左粟米仔出黎!!時間過得真係快!!
一早打的去醫院,要照超聲波,照下粟米既大髀骨位! 我以為要去大樓登記,就殺上去日間大樓,點知原來唔洗,直接去K座照超聲波就得! 去到K座,拎張紙出黎登記,之後等叫名啦! 我見當時都有廿人,應該都無咁快,坐陣等下啦! 唔洗十分鐘,無啦啦就叫粟米個名! 一入到去,原來好多格既,唔怪之咁快啦! 姑娘叫我幫粟米解件衫先,等醫生黎就幫粟米照! 照完左再照右,醫生一路同粟米講野一路照!照晒醫生話無事!可以著返衫走得啦! 順便幫粟米換埋尿片再走! 仲可以去搵朋友lunch!正啊!
不知不覺60日啦,代表我安全照顧左佢六十日! 為左慶祝粟米60天,我帶左佢去玩baby spa! (我自己都無咁好享受) 近排d媽媽開始流行帶bb去做spa!吸引的會帶粟米唔你因為有得俾粟米按摩,而係見到人地既bb箍住bb水泡浸係水個樣實在太好笑,令我想帶粟米去玩下,主要可以影下相! 襯仲係新開張擒打去book,問幾時有位,竟然可以book到今日實在太好了!(應該係因為閒日再加下午無咩人book呢d時間!) 一去到,間野得我同粟米,無其他客人! 將于米放低,交俾spa個阿姐,阿姐抱粟米去床仔,就幫佢除衫,跟住開始用按摩油幫粟米按摩! 開頭驚粟米會驚,點知佢唔驚之餘,仲會同阿姐笑! 按摩完就落水啦,睇住佢帶上水泡(箍住個頭仔),個樣真係好好笑,好彩落水個刻無爆喊,比起之前開頭沖涼,一落水就爆喊,第一次落咁大缸水都無驚,當場放心晒! 落左水浮下游下個樣,我覺得有d似水母哈哈!游左差不多半個鐘,係時候上水了,著返衫!呢個時候都剛好要食奶了! 之後,搭返車返歸,因為麻麻病左,所以順便買野返屋企煮,再順便買個蛋糕慶祝60日既粟米! 當粟米返到屋企,係我煮飯時,粟米對住粟米爸不停講野同笑(當然粟米話係無人識聽既),我聽到粟米爸不停講”得啦知你開心啦,知你叻仔啦”時,又聽到粟米不停地”姨姨丫丫”,真係好搞笑! 等得閒再帶粟米去玩! ps: 其實有好多想寫,但又未有時間寫返晒,仲有好多相都未處理好,唯有打左文字,相片後加啦!
終於產後檢查,粟米同粟米爸留係屋企,我自己一個去,去到食左個難食既雞批!! 見醫生幫我CHECK下個傷口好返未,之後就超聲波CHECK下我既子宮收縮情況! 但係....好痛,因為要插枝野入去CHECK!! CHECK完一切正常,咁就走得!!醫生仲話可以正常性生活添!! 醫生都好好有問候粟米仔既情況!! 仲同我講如果有咩婦科問題都可以睇佢,如果生第二胎都可以搵佢架!! 醫生問我有冇問題問佢!!當然有,我問醫生點解我尾龍骨好似好痛咁!!醫生話叫我做到多D收縮既動作,咁就會無事!! 就係咁完成左檢查!!多謝醫生咁多個月既幫忙!!
為免同人迫,所以今早早D起身,去旺角朗豪坊,因為十一點先開放俾人影相,所以我地去麥記食個早餐先再去影相!! 話雖早上無咁多人,但係都有一D人企係到等影相!!終於都影到我愛既TWINSTARS!! 人真係好怕蝕底,有個老女人無啦啦話人地打尖唔排隊,但係其實人地只係搵一個代表排隊啫,到排到之後先叫老婆同仔女埋位!!其實在場都有職員把關,大嬸你洗唔洗咁緊張呀!!! 依家D人語氣都好差,唔會好聲好氣!!事源排隊影XO,我後面個女人好急不及待咁要同XO個FD影相,XO個FD係排隊位置,可能真係好心急啦,有D忘我,阻到我地前面個位影相,前面個位剛好就係頭先話人地既個位大嬸!! 大嬸: 哇,你咁樣阻住晒點影呀(語氣爆衰) 女人: 哦(之後移過D) 大嬸: 乜D人咁架,點樣影呀 女人又再移過D 大嬸: 得啦,咁鬥耐囉,你阻我時間,咪大家鬥阻囉,無野既!!(又係超衰語氣) 女人: 乜我企係到都阻到你咩?(其實都應該阻唔到既),我企係到都仲阻到你呀?(有D火)咁我再企過D囉(又忍左火) 其實當然女人無啦啦心急走去影XO朋友係唔岩,不過大嬸又唔洗咁既語氣,如果好聲好氣同個女人講"唔好意思,你阻到我,可唔可以借一借先呢"咁聽起上黎都舒服D人地又會知自己唔岩會退俾佢,如果講完都唔退先鬧人都未遲丫!!影相大家都係想開心啫,唔洗野野都開口鬧人既!! 依家既香港人就係咁燥,一有咩唔滿意就鬧左先!!香港就變得好燥!!! 影左一陣放低粟米去星巴克飲杯野,再餵埋粟米先!!餵餵下...粟米便便左,要去育嬰室,朗豪坊既育嬰室真係同新世紀差好遠呀!!首先,呢到要問詢問處叫人拎鎖匙開門,再講餵奶既話會唔方便,因為入面得張摺凳,唔會好坐!!風口係正換片位上面,吹到BB正一正!!真係同新世紀差好遠!! 換完片就去信和買GAME,又再返朗豪買壽司外賣,搭車閃人!!! 粟米爸似乎都好樂意帶粟米出旺角,佢話朝早好行好多,朗豪又有育嬰室,搭車又可以去對面搭小巴,實在太方便!
都知今日出面超多人,所以粟米爸放工去買壽司返黎食,粟米爸話元氣壽司超多人排隊!!好彩我地揀外賣!! 食完壽司先慢慢換衫帶埋粟米出街,原本諗住去朗豪坊影相,點知一上到去,排晒長龍呀,每影一個公仔都要排長龍,見勢色唔對閃人唔影啦,第時先再去過!!! 走左去LOGON買左兩位NANOBLOCK就閃人LU!!
生左之後都無係奶奶屋企食飯,因為有陪月煮麻,今日因為無煤氣,要下午先有返,所以無叫陪月黎,夜晚落左去奶奶屋企食飯,照樣都係用揹帶揹粟米落去,咁近無理由用車仔啫!!! 但係唔知點解其他人仲比我緊張,我將粟米放係梳化,佢地好驚佢會翻身跌落地,又問點解唔推車仔落黎,粟米依家都未識轉身,點會反呢??再講你地屋企又唔係大,又整多架車仔阻住做咩呢又? 食完飯,二姑媽不斷同粟米講野,想話睇下粟米幾時醒,結果越嘈越訓得,粟米點樣整都係訓緊覺!!真係搞笑!!!當然我都有幫手叫醒粟米,但係佢都真係太好訓了,可能食完奶先落去啦!! 奶奶笑住話我殘忍,我話BB又唔係玻璃造既,玩下唔會死既!哈哈 奶奶又諗返起佢大女個陣有幾緊張個B,個陣無人敢掂佢個BB!! 我只可以講,唔同人唔同睇法既,大家姐不嬲都係緊張大師,所以都唔出奇既!! 二姑媽突然講返起佢地21號做節既事,原來二姑媽因為睇唔實隻豬撞到頭,俾大姑媽話佢唔識湊細路,二姑媽唔忿氣就話自己無生過,所以唔識湊都係正常!!!之後仲講左好多大姑媽既野!! 做節食飯去到老遠仲要受氣又真係幾氣憤既!!好彩我同粟米爸唔洗去呵呵!!
擒日收到電話,我既伯娘打黎,佢話想黎探下我同粟米,真係有D意外!! 三點鐘到伯娘黎到,粟米應該係叫佢做 - 伯婆(有D似...粗口)!!伯婆買左件衫仔同俾左封利是粟米,其實咁岩同一個月堂妹都生左個仔,早粟米13日,我托伯婆拎封利是俾堂妹!! 伯婆抱下粟米又影下相咁!!好彩屋企有PRINT相機,可以即時PRINT張相俾伯婆!!佢坐左一陣就走了!!我都同伯婆講等粟米大D可以去同堂妹個BB玩下!! 伯婆都教曉左我一樣野,就係同粟米沖涼時可以俾條毛巾仔放係佢心口,咁佢就無咁驚架啦!! 當晚幫粟米沖涼個陣,都真係試下,果然伯婆有料到,粟米真係無咁緊張,雖然都係要俾多條紗巾佢拎住,但係多條毛巾仔係心口定好多!! 伯婆走左之後,我地出旺角配眼鏡,再去信和買下野!!HEHE!!而粟米依家係訓覺,唔知係咪有人揹住,安全感大D,比起係屋企訢覺會訓得耐D!!
今日帶粟米去QE睇骨科,本來係瑪嘉烈既,有次同朋友講起,佢又唔抵得排咁耐先有得睇,所以幫我去左QE排期約左20號睇,所以粟米可以快D有得CHECK!! 由於粟米爸今日要返學校教書,所以唔可以一齊去,粟米爸都有提議叫我搵姨姨陪,但係最終佢地都唔得閒,就係咁我就第一次帶粟米出遠門(其實都唔係咁遠啫)!!! 一早起身餵完粟米,就換好衫,整好揹帶出發,當然帶粟米去睇醫生係打的啦!! 上左的士竟然遇到個多咀司機,佢問我點解去咁遠睇(的確我地應該係去瑪嘉烈比較近既),解釋佢知因為朋友幫我排期之後,開始就係政治論,好彩既係咁岩佢既睇法同我都一樣,都可以傾幾句既!! 不知不覺到左QE,估唔到去QE既的士錢同去西九龍健康院一樣價喎!! 去到就要搵,QE原來都幾大,我有D迷路雖然係有問姑娘但係都有D迷失,最後都搵到主座大樓啦!! 搭電梯上到去6樓,朋友叫我去7號窗登記,但係我只係見到 1-6號窗,咁見有人排隊,都去排下啦,結果埋到去,小姐話叫我去7號窗,原來7號窗係入面,唔怪之搵唔到啦!! 去到7號窗登記,小姐話唔見我有BOOK,問我係睇邊個醫生,好彩朋友都俾定資料我,其實個封信都有寫咩醫生,不過小姐漠視左,講完佢知之後,佢就打去問醫生係咪有預約,原來小姐檯上有個透明FILE係有寫架,小姐對返之後就繼續幫我登記!! 係登記期間,小姐瞄到粟米,同我講"你好似揹住個公仔咁呀",因為今早我幫粟米著左件啡毛BEARBEAR衫哈哈!! 登記完就出返去6號窗約期同俾錢,多謝1百大洋!!望返個期寫今日11:30AM,即係仲有成個鐘要等啦!! 期間粟米成日放屁,幾驚佢大便左要去換片,CHECK過好彩唔係!!好彩無行開,11點就已經俾人叫入房啦!!! 入到去我俾健康院既資料醫生,醫生望完,就問我幾個問題: 順產? - 係 係咪頭出先? - 係 足月出世? - 係 屋企人有冇骨既問題? - 無 之後就放粟米上床俾醫生CHECK,我今次都有留意呢個男醫生同上次女醫生檢查有咩分別,結果係估唔到男醫生比女醫生更溫柔,呢個醫生會耐心等粟米郁完先再按粟米D關節,除左腳仲有CHECK埋手,膊頭同背脊!!真係同上次女醫生有好大分別!! 檢查完醫生同我講暫時檢查唔到粟米有D咩問題,其實多數都係怕BB骨折(呢個我都有所聽聞),好少話BB關節有問題!!我問醫生:"咁唔知係咪上次BB太緊張,所以令到關節好緊" 醫生答:"都有咁既可能,同埋始終出世無耐,BB習慣係肚入面屈埋未適應,所以未見係有關節問題,不過都為左穩陣起見,都約一約睇下有冇期照個超聲波,你可以返出去等叫名啦"我:"唔該晒醫生" 聽到醫生話粟米無事,都鬆口氣,證明有時女人比男人更粗魯呀!!! 之後聽到叫名去拎預約紙,咁岩同健康院打針撞期,問姑娘仲有冇第二個期,姑娘幫我CHECK,CHECK完之後話我知改唔到期,醫生都想快D幫粟米照!!咁唯有返去改健康院個期啦! 拎住張通知紙,去窗口約期,我去左啦,我以為係6號窗搞啦,點知原來要去返7號窗!! 排7號窗期間,我前面個麻煩女人搞好耐,佢仲好煩咁不斷同姑娘講"可唔可以幫我排快D,我坐骨神經痛,好痛呀真係,唔該你幫我排快D!!!姑娘答:"個期係最快架啦,我地都係跟電腦架咋,到時如果醫生有期既就會寄信通知你早D返黎睇"個女人KEEP住話自己好痛,又話係美國睇過都睇唔掂,依家痛得好緊要,想快D有得睇!!!姑娘依然都係同一答案,不過加多句,呢個期係最快架啦,如果你真係痛到頂唔順既話,可能你要睇住私家等私家俾D止痛藥你先得啦! 之後佢走左到我,小姐應得我,仲同我講"咦?BB走得啦?"我答"係丫走得啦" 完成預約期就走得人LU!!!!
反正都出開街,梗係順個便都去行下街啦,JOIN埋大姨打的去新世紀廣場行下,亦都順便要去買藥膏俾粟米搽面,因為佢呢排塊面好乾紅晒,唔買唔得!! 新世紀裝修過同之前唔同,亦多左好耐鋪頭添,行行下粟米開始肚餓,原本訓緊覺既佢,開始有微言啦,唯有去育嬰室啦,真係第一次去育嬰室,好彩呢到有一層賣BB既,實有育嬰室!! 去到育嬰室都幾大,有兩個換片位,仲有一個間開左既餵奶室,方便餵奶!!餵奶期間...有個媽媽走黎餵人奶,佢一入黎就話粟米好細隻,我只係笑一笑算了(一個月多D有幾大隻呀?!)不過如果相比佢個BB...粟米就係超細,佢抱住個巨B,而且我覺得個BB...有D恐怖,個咀大仲要黑邊咁,又大舊,可以用樣衰黎形容,望左一眼就唔敢望了!!!好彩都就快餵完換屎片就走人!! 出去個陣,咁岩有一對夫婦帶住BB想入育嬰室,個位爸爸見到我同大妹一齊出黎,佢好驚咁問佢老婆育嬰室係咪女人先入得架?我想答佢唔係,不過都係唔好多事了呵呵!!餵粟米開頭都有對夫妻入去幫小朋友換片片!! 呢間有得分開換片同餵奶區都好D,咁爸爸都可以入去!!
不知不覺4年了,今年多左粟米,未生之前有左粟米會唔會唔方便出街呢?? 由於唔知佢幾時出世,所以無BOOK到我地擺酒個間酒店食自助餐,事後當然都有試過BOOK,當然答案都係好似我估咁"滿晒"!! 期間都有試過BOOK其他酒店,又要就粟米爸放學,所以結果都係無得揀,最後我都係去BOOK食丼吉!! 等粟米爸返黎,我地再打的出去!!由於呢間野我地未去過要搵路,平時去開THE ONE個間,但係我怕無咩位坐,所以BOOK呢間諗住佢十樓全層D位會好坐D!! 上到去,等經理帶位,果然好好彩呢間D位闊D,仲有就係俾左個卡位我地!! 由於粟米仲係細,所以我都係用揹帶揹佢出街,BB車總係唔太方便,有卡位俾我地實在太好了!! 食完之後都有去行一陣,周圍既人都開始買聖誕禮物,見到LOGON排長龍,本來想買野既,見到咁長龍即刻走人!! 都順便行去ISQUARE既MOTHERCARE,因為有野要買,好彩都買到!!HEHE!買完就閃人LU!!! 估唔到粟米出街咁乖,佢只係訓同訓,訓到我地返屋企!!有時諗佢訓咁多,會唔會餓過龍架??? 不過如果佢真係餓應該會醒既!! 返到屋企,餵完粟米,就拎粟米爸買既蛋糕一齊影相同切黎食!! 由今年起就有個燈泡一齊慶祝啦,而呢個燈泡將會越來越大粒呀!!! PS: 昨日粟米爸落去食飯個陣,佢屋企人知我地出街食,好勇躍咁話可以放低BB俾佢地睇住先!!好彩粟米爸無話放低粟米!!而粟米今次出街都好乖,下次出街都可以帶埋佢!!HEHE!!
BB食得多奶粉自然去得快,之前已經食左一罐雅培一罐能恩,今日又開第二罐雅培,點知一拎起我星期六先買既雅培,發現同之前個罐唔同樣,隻BEAR鮮色左,名又唔同左! 萬寧買個罐係叫”雅培心美力”,藥房買個罐係”皇牌心美力” 不過問題最大係,當我開左膠蓋,見到有入面鐵蓋有爆口,粟米爸又快手開左鐵蓋,然後沖左4安俾粟米飲,餵既途中,我先開始清醒地諗:”其實係咪唔應該食,唔知爆口左幾耐,會唔會有細菌感染左” 之後,同粟米爸講,我地蠢左,應該唔好開,寧願去惠康買罐新既,爆左口驚有菌,一陣粟米肚痀病左就仲死! 結果,就將個罐奶粉掉左!浪費左260蚊!錢事少粟米健康緊要! 260蚊買左個教訓,就係要影低行貨奶粉,唔好買到水貨,再而就係要開膠蓋check下入面鐵蓋有冇爆口,粟米爸之前買都無check過,依家我地學精了! 上次仲買左罐牛欄牌,粟米爸去惠康買個陣都有望返同我係藥房買既同唔同樣! 呢次真係要學精明d! 事後上網check,以為藥房個罐係台灣版,但係對過又唔一樣,所以都係不明來歷既水貨奶粉!小心小心!
滿月之後就係打針日,打乙型肝炎第二針! 9:30去到健康院,今次補返出世紙登記,登記完就拎返出世紙再等叫名! 先叫名去二號房,又係時候除衫除片,度頭圍36.5cm(出世時33.5cm),磅體重4.1kg! 著返衫又係出面等叫名!呢次去5號房! 姑娘問我粟米一日幾多餐,便便有冇唔正常,講粟米體重同頭圍都好好,係健康手冊到畫左條線,又問我粟米有冇唔舒服或者發燒!我答:無發燒,都正常!姑娘就講正常既話就可以打針啦!又出去等叫名! 聽到叫粟米要入1號房,之前我產檢1號房有幾個人,依家bb打針入去呢間房就變成得一個!姑娘叫我跟住海報上既姿勢,禁住粟米,左手攬粟米上身,右手捉實粟米大脾!之後姑娘就準備幫粟米打針!我望住姑娘手中枝針吉入粟米大脾,望一望粟米佢原本瞓覺既樣,變成紅面同喊!我又望返姑娘枝針入面既液體注射入粟米大脾,完左之後聽到粟米喊聲!我同粟米講”無事啦,你發夢咋,訓啦訓啦”粟米就好快唔喊,再訓返了! 出返去再約期,下一次打針1/17!
終於滿月啦,即係我放監哈哈 午飯帶埋粟米去同公公姨姨們飲茶,之後粟米爸去拎我之前訂既滿月蛋糕,再同姨姨們影相。 影完就出街,去荃灣吉之島買野,買返把bb剪指甲既較剪,同裝奶粉既樽! 見到之前係網上同bb雜誌見到既公仔,叫粟米爸買俾粟米,299吉之島會員仲有折添! 買完又打的返屋企,夜晚又同公公打邊爐! 九點幾就拎埋滿月蛋糕去爺爺麻麻屋企,影相同食蛋糕! 就係咁過左一個滿月既一日!
擒日麻麻有問我地洗唔洗整紅雞蛋,我地講左唔整,因為都唔會派,唔搞咁多麻煩野! 點知今日粟米爸食飯時,麻麻又問,大伯都出聲講:你擒日咪問左囉! 粟米爸就同麻麻講:我地就唔派啦,如果你想派俾朋友,你咪整囉!我又唔會阻止你派俾d朋友! 因乜麻麻咁高興要派紅雞蛋呢?!如果佢要派咪自己派俾d朋友囉,唔洗問咁多次,定係佢d朋友又多口問,所以佢又問我地呢? 其實我對於呢一類既傳統零知識同覺得無需要,生bb係自己既事,關人地乜事,做咁多無謂野,d人又唔會幫你養大個小朋友,仲要搞一大餐,真係太多餘了! 真心登你開心既人唔洗做呢d野先識登你開心!
晚上食完飯,大伯打黎,話伯娘想上黎睇粟米,因為伯娘聽日就要返大陸。(有冇咁掛住人地個b啊又) 麻麻都有上黎,仲問起滿月訂左位未? 粟米爸答:今個月book 唔切啦,近聖誕又貴又你位!要過左十二月先! 二姑媽:1月又近新年喎 大伯:咁不如100日先食,到時bb大d,你地都易湊d!阿珍都要新年後先返! 我真想講唔關事囉,帶住個b,一個月同3個月都唔會方便架啦!同埋依家只係自家人屋企食飯,又唔係好似人地咁擺酒,關乜野大d易湊d事!一.一根本就係想等埋佢老婆先食! 麻麻就唯有講:咁100日囉! 結果滿月酒,唔係我地做父母既話事,變左就人食飯!打亂我個plan!不過算啦,咁等我多d時間諗邊到食都好! 麻麻又講大姑丈話如果我地book酒店自助餐,可以搵佢幫手! 我地聽完就算,心當然唔高興啦,唔明點解d人扮到好似乜都識咁,都唔明d人點解要叉隻腳落黎粟米既飯宴,我真係好憎d人咁自大同虛偽!真係想鬧佢唔好叉隻腳埋黎,我地寧願俾貴都唔洗佢幫!免得人地以為自己有好大功德!亦唔想欠呢種人既人情!衰d講我地唔當佢係一份子!最好食飯個日佢唔得閒成家都唔好黎! 真係聽到呢句之後,真想乜都唔搞,唔好食,免煩!買個蛋糕切就算!
粟米爸上網預約幫粟米拎出世紙,上星期太full,所以book左今日去申請! 拎出世紙要帶:結婚證書,父母身份證! 粟米爸自己去申請,申請左兩張,以防萬一唔見左,都有另一張! 估唔到粟米爸咁快就拎到出世紙,仲好快返添,book左十點,十一點就返到黎! 果然上網預約,粟米爸仲print定張form帶去,所以好快就拎到! 依家既出世紙電腦print出黎,想當年我個張出世紙係人手寫,感覺真係好唔同! 粟米有了出世紙! [盧晉宇 ] 就係粟米仔既全名啦! 至於英文名,到時學校要改既話,再幫佢改啦!
媽媽會有媽媽post左兩箱奶水,問有冇人要,仲要係粟米仔食緊既牌子,我當然留言話要啦,不過留完先知已經好多媽媽話要,見到都打消念頭! 點知星期三,有媽媽pm我,話之前話要既媽媽全部都話唔要,問我仲要唔要,我當然要啦,唔洗錢喎! 今日粟米姨丈幫我去九龍灣拎,仲送埋黎屋企,實在太好了! 呢d就係粟米剛出世係醫院像個d奶水啦,座熱之後可以即棄!
今日收到封信,由醫館局寄黎,仲以為係d咩,原來係粟米排骨科改期,由2014年11月25,改為2014年2月5日。 又會無啦啦寄信黎既,之前又話會打電話通知,收到封信都幾突然,不過都好,早d睇,唔洗等到識行先睇!
我真係唔明點解d人咁叉多問題,係咪真係要每見一問啊!究竟佢想表現到自己有幾勁定幾啞有父愛啊! 今日無啦啦粟米爸屋企人殺上黎,其實都唔算無啦啦,只係當時粟米爸訓左無睇whatsapp,所以唔知佢地上黎,但係我唔明點解之前佢屋企人都打過黎問粟米鋼食唔食盤菜,點解個時又唔問埋呢?!都算••• 成堆上黎(除左爺爺)7條友洗唔洗啊,我地屋企好細咋! 極度討厭,最討厭係某人既言行! 首先,麻麻開心地話粟米飲飽奶會露出笑容,大姑媽就即刻話佢個女細時都係咁! 再黎就係大姑丈問,夜晚邊個湊,其實關唔關佢事呢?我只係做手勢示意我湊就算,實在唔明點解佢總係每次都有問題問!佢究竟想點啊!成50歲人可唔可以唔好咁低能啊! 再係咁的驚我頂佢唔順會話佢,唔再客氣! 粟米出世兩星期,麻煩人就連續黎左兩次,真係想快d坐完月,星期六或日帶粟米閃人! 佢地驚個女無人錫,驚粟米得寵佢地既事,唔好煩到我!真係好討厭呢d麻煩既人!
又係檢查時間,今次有帶定奶粉同水,以備粟米肚餓食奶! 搭車去到健康院,岩岩好9:30!拎左籌等叫名!見粟米開始肚餓,又未叫到,人又好似好多,都係餵左先穩定,唔洗好似上次咁陰公餓咁耐!餵緊個陣先黎叫名,粟米爸就去同姑娘講聲,姑娘好nice叫我地餵完再去搵佢! 餵完當然就搵返姑娘啦,好在有暖氣,除晒衫都唔會太凍,今次粟米3.29kg,比上次重左! 跟住返出去等,等個陣無晒位坐,突然好討厭一d帶埋賓賓黎既夫婦,因為佢地霸晒d位坐,兩夫婦已經坐左兩個位,仲要坐多個賓賓,就一家霸三個位!非常討厭,搞到好多抱住b既都無位坐! 企係到的叫名,之後見終於有位就坐陣啦,點知又叫名去18號房,去到門口先知你醫生房!係個女醫生黎既! 醫生叫我放粟米去張床上面,放完就叫我幫粟米除衫,咁我問係咪要除晒,但係醫生又好似好怪咁叫除衫,係幫粟米解衫時佢又用儀器check 粟米既黃膽指標,之後講無黃,又無啦啦就去摸粟米骨關節!摸摸下又叫我幫粟米除晒所有野,又話咁多野阻佢check,我真想講醫生你d指示可唔可以清楚d啊,我幫粟米解衫你又無啦啦check,我梗係唔再除啦,依家又話叫我幫粟米除晒所有野,一早俾我除晒先check啦! 睇見醫生check粟米就覺得好痛,醫生check 粟米大脾關節,唔知係粟米緊張驚得濟,定係醫生問題,大脾仔俾醫生禁平個陣,粟米喊晒同好似唔柔軟混咁,禁完左又禁右,睇住粟米痛到側埋一邊!之後醫生叫我幫粟米著返衫! 醫生同我地講,粟米大脾關節好似有問題,寫左封信叫我地去瑪嘉烈骨科排期去照下! 出去又等叫名,拎返本手冊,下次就打針12/16! 同粟米爸食早餐之後就搭車去瑪嘉烈約期,我已經有心理準備,骨科要排好耐,一去到接待處,拎籌等叫number,果然一排個期就去到出年2014年11月25!職員話可能會早,睇呢兩個星期有冇人打電話俾我,如果無就照返呢個日子去睇! 俾醫生講到好似有d問題咁,事實真係有d擔心,但係平時又有幾何要粟米打開大脾呢?依家唯有做既就只有幫粟米做腳部運動!等佢d關節無咁緊!我諗粟米應該係成日曲住對腳,所以關節唔靈活!希望快d有期,可以快d照,快d知係咪有問題啦!
原來自從粟米出世放產假後,我就無計日子,究竟係我懶丫,定係太多野搞呢? 話就係放產假,實在我都有做公司野,只係home office咁解! 訓醒等陪月黎,陪月同我講今日要食d補身既野,煮雞酒,燉下湯咁!原來今日十二朝,其實擒日麻麻拎薑醋黎,我都無為意!哈哈!不知不覺就已經十二日!時間過得好快! 真係佩服d媽媽咁有心機日日都同bb數日子,我就連係咪日日都有同粟米影相都唔係好記得哈哈! 睇黎要檢討下!