facebook pixel code
寶寶爬爬搬搬趣味競賽！孩子人生中的第一場賽事！熱烈報名中～

粟米媽

粟米媽

他的寶貝

370貼文
0話題
0關注他

日期

#Tag

  1. 網誌
網誌區塊

產檢 (政)

2013年06月17日
公開
51

今日2:00pm要去瑪嘉烈做產檢,因為張紙乜都無寫,唔知係搞d咩,不過都帶定小便去啦!! 因為食飯時間後,所以都同粟米爸出去葵芳食午飯先,食完午飯就打的上去醫院! 去到大約 1:35pm啦,一上到去已經見到有一條龍排緊,等緊下午產檢啦!! 姑娘見到咁多人排,都叫阿嬸盡快安排,所以未夠2點就開始登記了!! 都係做例牌要做既野啦,磅重,量血壓同驗小便!! 話晒都係食飽飯先去磅,又唔係重好多咋BOR,都係58KG,重過上次 0.5KG咋!! 姑娘對住我地講話有個小講座叫大家入去聽,入左去一間細房,大家分批聽!! 其實個講座同我上次聽既都係差不多,不過呢個係短版,咁呢次粟爸可以聽下囉!! 出到去搵張凳住,俾人叫名入護士室交資料,交完又係出面坐等叫名!! 今次原來係會見醫生既,好彩既係見我個位係女醫生,見醫生之餘仲會幫你驗下個胸同陰道,仲會聽埋bb既心跳!! 醫生問我知唔知預產期幾時,我答11/17,但係私家報11/22!!醫生話如果唔係差好多日既話,人地問你預產期係幾多你就答11/17,除非超過十日啦!! 粟米爸就坐係到等,拉埋簾,因為聽左心跳先,醫生一搵到bb心跳就扭到勁大聲,當然坐係簾後既粟米爸都聽到啦!!醫生話:"聽到啦咁大聲,係正常架"(佢究竟係指有心跳係正常丫,定係心跳既次數係正常呢下???) 驗胸個陣好似有d求其,淨係禁幾下就無野了,跟手就驗陰道,插舊野個陣有d痛,跟住醫生話陰道無問題,咁就落返床!! 之後又醫生講之前既報告都無問題,叫我地之後去健康院做檢查!! 又再出去等叫名,叫名入1A房,叫我揀一間健康院,我都係揀返娘家個邊啦,搭車方便D,之後又去2號窗登記!! 健康院要自己打電話去登記,阿姐話可以依家打,但係我打左幾次,唔係唔通就無人聽!!一.一"唯有聽日再打啦!! 8月要做糖水測試,10月先會再返黎醫院產檢!!

粟米b仔?(私)

2013年06月06日
公開
56

約左12:00見醫生,唔知係咪醫生有事,好耐都唔見醫生出現,仲見到有d約左 11:00am都仲未睇添!! 大約 13:45pm 終於醫生返黎啦,可能醫生去左接生,佢著住左藍色既衫返黎!! 等到差不多2:00pm 終於到我啦!! 今次有細姨都跟埋去,原因係細姨驚我唔話佢知男定女!!XD 醫生如常咁問我有冇咩特別野,CHECK返我之前政府照既唐氏有冇事,問返我個邊有冇叫我照結構,我講俾左醫生知7月4號照,醫生就MARK起!! 跟住都係問我有冇肚痛同流啡,我話無,醫生問我有冇咩特別野?? 我問醫生最近D便便係黑色,係咪無事架?? 醫生話係正常,因為MATERNA係有鐵質,所以D便便係會有灰黑色!! 之後當然就係照下粟米啦,醫生話15W6應該就知性別,睇下照唔照到!! 醫生照左佢個頭仔先,度完話佢個頭仔都OK!!都係正常既呎寸!! 之後照大脾仔,都係正常!! 跟住又係見到粟米淺淺地色既閃閃下心跳,我見到佢食手指囉!! 醫生話粟米坐左係到,所以比較難照D,照左好耐,醫生話見到少少白色,估計應該係仔,以佢既經驗就多數係仔!! 之後都左照右照,照左好耐,照到兩隻腳既中間,都唔太見粟米有明顯既特徵,所以醫生以經驗睇係仔!! 雖然有D開心俾我估中係仔,但係始終一日未完全見到佢個特徵,一日都唔敢肯定係咪仔!! 之後無咩特別就再約下一次見 預約左 2013-07-11 11:45PM 走個時姑娘忘記俾照片我,粟米爸就好緊張咁問我點解無張相既??係喎點解呢???所以問姑娘拎返囉!!哈哈!! 15w6 頭圍 15w6 大脾骨

見護士(政)

2013年05月28日
公開
58

預約紙話今日係 抽血,見護士,聽講座, 仲要帶丈夫身份證副本同小便 個心當然唔想抽血啦,因為上星期先抽完,仲抽左咁多,今星期又話抽,真係有D怕怕!! 約左9:30,我9:15到,先去登記,之後自行去量血壓機量血壓,再去磅重,重量同上星期一樣57.5KG,再坐埋去驗小便個邊坐低等驗小便!! 今日遇到既護士同阿嬸都好好人,好NICE又有笑容!! 無耐阿姐出黎叫我地開蓋,俾枝試紙我地驗小便,拎住一陣間,無變色,咁樽小便就掉得啦!!我仲以為佢地會沒收小便添...原來唔會!!! 之後就交晒D資料俾阿姐,就出去等叫名見護士!! 等見護士期間,有播片,講關於驗血既原因,睇睇下就被護士叫入房,見護士原來都只係問返我之前填左個張FORM既資料,同埋話我知上星期抽血檢左報告無問題,但係報告就未出,無得俾我睇,仲有德國麻疹抗體係到,由於驗血正常,今日唔洗再抽血,聽到都鬆口氣!! 見完護士出返去,又另一位護士講解,話我地知打後要做既野做咩,點解次次都要驗小便,因為要驗糖尿同蛋白尿,最好係一早起身就留起小便帶到醫院驗,如果食左早餐糖份高左就會無咁準確!!如果有驗到有糖尿就要再等飲水再驗架啦!! 亦都講第幾週要注意既事項: 22週前見紅就要去急症CHECK下,怕小產!! 28週後開始要每日數住胎動次數!! 34週就要CHECK B型鏈球菌!! 37週為足月,隨時會生,叫我地留意返,CALL 白車有機會送你去就近急症醫院,個D醫院未必有產科,白車只會車我地去急症室急救,之後先再轉送有產科既醫院!!所以如果無見紅,而又可以自行去醫院既話,最好就自行搭車去醫院!!! 聽完講座就走得了!! 亦預約左下次產檢日期:2013-06-17 2:00PM

聽講座

2013年05月28日
公開
46

登記左今晚聽某雜誌搞既講座,係講BB護理及疫苗! 粟米爸同我都一齊去聽!! 由於7:00PM開始,8:30PM先完,所以我地都去左食個粉麵打底!! 6:45PM前到達,第一次去童軍總會!!去到都仲未太多人!!!當然揀比較前既座位坐啦,咁樣清楚D!! 好奇怪,我竟然見到有人唔係聽講座,在講者講緊期間,佢地竟然玩手機,玩遊戲,佢地來只係為左------> 禮物!!! 其實護士講既BB護理同醫生解釋既疫苗真係好值得聽,聽完唔洗淨係盲目咁聽某D人或者網上睇某君寫既唔知真定假既方法同解釋!!! 我同粟米爸都覺得呢次講座很實用!!! 當講者講完之後,大會安排左抽獎,第一次抽三個幸運,答中問題就可以得到價值480蚊既嬰兒攝影套餐,之後就抽大獎,我就聽唔到係D咩啦!!不過都登呢D幸運兒開心!! 係抽獎期間...發現在場有大半既人真係好唔識尊重呢兩個字!! 人地抽緊大獎,係咪應該俾D尊重等埋先呢??佢地急不及待就排隊走,而在台上既司儀一路望住走緊既人,一路講多謝,是多麼難受呢...!!!你地成日話內地人無文化,但係你地都做唔到尊重人喎!!好彩仲有數位坐前面既人等待司儀謝意,拍手之後才離開!!! 我知道好多人為左禮物而聽講座,但係去得聽講座既係咪都應該都聽下呢,入面都有好多重要既野,如果唔係有心聽既話,就唔好霸住個位,等個D想聽而又聽唔到既人無得聽,你地就貪人地禮物!!唉....咁同某D人有咩分別呀???多麼可悲的人類!!! 是次大會禮物係一對MIDES牌子既襪仔,質地厚厚的,應該很適合冬天出世既粟米B!!

驗唐氏(政)

2013年05月21日
公開
80

今日要去check唐氏,如果唐氏ok既話,粟米爸話會買bb籃俾你丫!!^^咁你就可以一出世到4個月大都同daddy mammy同一間房訓啦!!你要乖乖地! 驚多人,所以早d放工走,約左粟米爸12:45 係附近等,之後一齊打的上去瑪嘉烈!! 去到都係1:00到,由於唔太熟地方,所以都要搵下邊樹係會計部,問個詢問處,佢又老點我地去另一邊,好彩我地之後都搵到會計係邊,先去登記,唔洗俾錢,拎左張紙條,就上去2樓搵B2係邊!! 去到當然因為仲係午飯時間啦,所以姑娘叫我地坐係到等陣先!!坐到咁上下夠鐘,我又行去問下姑娘係咪就咁等叫名,定係要登記左先!姑娘望一望時間,先知夠鐘,就走去叫人埋去登記!!! 登記完就等叫名,係等叫名期間,有個姑娘走黎開DVD俾我地睇片,講關於唐氏既片!聽完晒都未見叫名!!差不多2點阿嬸先入黎叫名!!! 我當然係第一個啦,第一個跟阿嬸,阿嬸問我有冇俾過份粉紅色紙我填,我當然無啦,入到去坐叫我去磅重先,今日57.5KG,之後阿嬸拎左一疊粉紅色紙俾我,當我見到份野,我就知係咩啦,其實之前登記約時間係有既,但係張紙唔係粉紅色,而且夾埋係預約紙到,我見咁就同阿嬸講,呢張我有丫,阿嬸有D唔耐煩,仲想鬧人咁款,我叫佢聽左我講先,我話佢知我頭先登記個陣俾左份野當值護士,個到有份一樣架,之後佢不耐煩咁睇返份野,見到真係有張紙夾埋,我再問佢,係咪同呢份一樣架??阿嬸先至講係丫一樣架,咁唔洗再填啦!! 跟手就跟左另一個姑娘入超聲波房,訓上床等照,訓係床望到個好大既MON,姑娘照佢個陣真係超清楚,見到佢個腦同心跳,同埋見佢個嘴不斷郁!!姑娘問我最後經期幾時,我答2月10,姑娘話:咦?!點解你之前報係2月15既??我話可能登記個陣姐姐幫我照私家醫生照完寫出黎個張野個期,所以唔同,姑娘話,其實都係差好少咋喎!!我話係丫!佢又再講咁我唔幫你改啦,我話OK!! 姑娘話粟米依家坐左係到,好難照到頸皮!!叫我打側訓下!!再訓返正試下,都係照唔到,姑娘話咁要出去行下先,半個鐘到再返黎照啦,如果出面有得抽血就抽血先!! 咁行出房門,就聽話行來行去試下啦,行到咁上下, 另一個姑娘又叫我名啦,呢次係抽血,真係有D擔心,因為之前睇D媽媽講D姑娘手勢唔好會好痛,唉...都黎到又唔擔心得咁多!!我當然睇住佢拮啦,佢拮落去個野都幾痛架,仲唔止咁,佢個針頭要HOLD住,睇住佢換8枝試管,佢換一枝我都好驚,好驚佢郁到個針頭我就會痛到飛起,期間仲有另一個姑娘同佢講野,我個心真係驚,好想同個姑娘講,你可唔可以等佢抽晒血先同佢講野呀!!!最後終於抽完啦,之前燥燥地既阿嬸又黎搭咀,又話叫我行下,如果兩個字後唔見暈,就可以走架啦,你依家行,行到落去就差不多架啦!!我又同返阿嬸講,未呀仲未走得丫,一陣又要返去照過呀,阿嬸就講係呀?未照到呀?咁你再等下行下先,抖陣再照囉! 之後,返埋位,粟米爸問我痛唔痛,我話梗係痛,點知俾後面對夫婦聽到,個老婆仲好驚咁,仲聽到個老婆同老公講,人地話好痛呀,點算呀,佢老公答你唔望咪唔痛囉!!!哈哈,早知唔答粟米爸啦!!!嚇親人添!! 坐一陣又走出去行下啦,廢事你係入面唔轉,咁就有排都照唔到走唔到!!行左陣,咁岩姑娘見到我行來行去,佢叫我入房,話試下睇下度唔度到,呵呵,又走入去照下先!! 今次照到啦好彩!!姑娘話你正常,我睇個MON係 0.198, 13W6, 7.98CM!! 仲見到你郁郁下係到唔知搞咩,個口係到郁,我問姑娘,佢話你係到飲緊胎水,自己痀完又會飲返,姑娘仲好好咁同我講邊到係頭,眼,鼻同嘴,又話我知手腳係邊!!大MON真係睇得好清楚!!哈哈! 我問姑娘幾多歲先叫做高齡呢,佢話35歲,我就講:"咦咁我生個陣咪高齡!",姑娘望一望就話係丫話我岩岩好擲界!! 照完落返床,姑娘俾個圖我睇,話我知個條線係中間,即係正常,但係要睇埋驗血報告先,仲話栗米你係中碼B!!姑娘仲幫我BOOK埋結構期!! 預約照結構期:2013-07-04 2:00PM 跟手就走得了!!! YEAH!!!可以叫粟米爸買BB籃俾你啦!!^^