facebook pixel code

粟米媽

粟米媽

他的寶貝

370貼文
0話題
0關注他

日期

#Tag

  1. 網誌
網誌區塊

早退

2016年09月12日
公開
45

照常送佢返學後,我就行一個圈捉下精靈去道場拎十蚊,就去麥記買杯野飲,搵個位坐低,等到差不多時間就去接放學!! 差不多2點,電話響,原來係學校打黎,話粟米狂流鼻水,問我係咪病,問我接唔接粟米走,仲話見佢個袋有包紙巾!!問我粟米究竟係鼻敏感定係病? 我話包紙巾只係佢見我收落袋,佢又要一包放袋啫,我之前唔見佢有流鼻水,可能係敏感,咁係咪依家可以返去學校接佢走? 老師話可以架,你可以黎學校接返佢先,佢都打乞次都打得好勁 咁我就執返D野,去接返粟米啦!!去到門口....!見到有兩個鐘,禁左啡色無人應,再禁上面白色,又無人應!! 結果,我打去學校問點樣接返個仔啦,佢叫我禁鐘,我話有兩喎,佢同我講話圓形個粒,兩個制都係圓型喎,佢先話高個粒制!!一.一" 禁左一下無反應,佢叫我再大力D禁多次,咁我再用力D禁,佢話聽到聲啦!! 收線後,見到校工出黎啦,問我咩事,我話接返學生走,佢問我拎接送證,我都俾佢睇~~ 等左陣,見到老師帶粟米出黎啦!!仲戴住口罩!!! 粟米一見到我就同我講話今日無野食既點解?我同佢講因為佢流鼻水,所以早走左咪無茶點食囉!! 粟米就同我講話要睇醫生!! 接完佢,唯有搭車返屋企,之後等醫生開門再帶佢睇醫生啦!!! 好彩醫生話佢係普通傷風,無發燒!!不過穩陣起見,聽日都係同佢請假啦!!!!!

開學了

2016年09月02日
公開
12

終於到開學既日子啦!! 一起身佢竟然望到我岩岩轉做9月既月曆,仲講話:"九月啦喎,咁快9月?開學啦" 估唔到佢咁都留意到個月曆!! 十一點幫佢換校服,幫佢影張相,見有時間我打下機先出門,點知俾粟米叫我唔好打機,仲話要返學夠鐘啦!! 細姨姨打黎話想送粟米返學,約姨姨11:30樓下等!! 最估唔到既係公公,佢竟然一早落返香港,話6點起左身,又見訓唔返,所以決定返香港公司,話驚我湊粟米返學趕唔切!!(不過都好彩,因為司機都真係遲左,又話10點到,點知12點半先到!!) 去搭車,食米線之後,係學校門口影張相先行返學校入面!! 我講左句,哇,小朋友排緊隊入學校,粟米就話要快D啦要返學啦!!(有冇咁鍾意返學呀?!) 係門口,因為無MARK體溫,所以俾老師話我知要順返日期MARK返,下次MARK返!!入到學校入面又額探,之後又拍卡,再行去106課室!! 呢一野真係估唔到,粟米去到課室門口,頭也不回想直入課室,老師拉住佢叫佢同我講拜拜,拜拜完再入課室!!真係估唔到唔係我同佢拜拜先!!睇黎佢都好急不及待下喎!! 細姨姨好唔捨得,仲問可唔可以望下粟米,老師話係門口望一陣好啦!!比我呢個做阿媽既更唔捨得!! 因為家長要去大堂聽野,細姨姨就走去返工,而我就坐係大堂等睇片!! 條片講點樣立恩威,意思係點樣令小朋友聽話!!講真,聽同做係兩件事,有幾多人真係做到丫!! 都未睇完條片,又話要去接放學,因為落雨,所以都早DD安排家長接走D小朋友!! 要去出面排隊,排隊時又煩,後面個阿嬸不斷貼住我黎行,我把遮係可以頂到佢個遮柄架囉!!佢仲要遮另一個家長!!我行一步佢地又行一步,結果我頂唔順,同佢地講,其實你地唔洗咁行得咁埋架!!我把遮會篤到個女人架!!唉!!我都唔明D人點解咁樣!!就算急湊小朋友放學都唔係咁囉!!! 老師指示唔清楚,我話D班,佢指左我排B,我見有D唔對路,因為前面係B同C,再望下好似要轉入去先係A同D,咁就走入去轉彎,又俾個主任叫住我,問我邊班,我話D FOR DOG,先叫我行最前個到!! 去到俾個接送證老師,老師叫粟米個名,粟米無反應,老師竟然問我係咪呢班!!張證我都俾左你睇啦有假既咩...!之後我見入面有位老師帶盧晉宇出黎!!條友行出黎個陣依然呆呆地,手就拎住包餅!!老師竟然講左句:"咦,係你呀,佢好好呀今日" 我唔明老師口中既好好係咩意思,不過無俾人投訴就得啦!! 就係咁無穿無爛咁就結束粟米既開學日!!!! 主任話星期一會有片同相俾我地睇返今日返學既情況,唔係個個小朋友都會影到,但係都會盡量影同拍!!叫D家長唔好問點解影唔到佢小朋友!! ************************************************ 人總係唔聽話,叫左唔洗帶書包,有幾個家長都係帶,結果咪變成佢地要拎住囉!! 返學時,有個家長見到粟米,之後同個仔講"哎呀,媽咪幫你著錯鞋添喎" 我接完粟米放學,行去搭巴士時,聽到有個家長竟然問"點呀?你今日有冇喊?" 之前老師講左唔好問,竟然都真係有人問!!

家長日

2016年08月28日
公開
14

終於到家長日,因為只限一個家長出席,粟米當然留係屋企啦!! 仲諗住早D出門,可以食埋早餐先去學校,可惜巴士遲,結果去到都差不多9:15,見D家長都仲行緊入學校,想話買枝水啦,點知士多都未開....嗚....!!唯有頂硬上啦!! 拎住之前俾既通告,去到門口,老師幫每位家長額探,再跟住指示入唔同課室,而我就係要去302課室!! 人總係改唔到遲既習慣,有D都真係十點幾先到,身為家長都做唔到準時,都真係可以想像到佢地第時仔女會點!! 入到課室搵個位坐,老師指住個位俾我坐,我唯有坐啦,又話只可以一個家長,唔知點解我隔離既個兩位父母會一齊入左黎!!又一證明依家D家長係唔聽人講!! 等到咁上下,9:25分,老師話等多陣就開始家長會!! 負責講既老師係班主任 梁老師!!老師話一陣有D野係要我地家長MARK低既,一陣播既片未洗MARK住,因為每年都會睇一次!! 一開始就俾我地睇段片,係一段校長,副校長同主任拍既片,講返學校既理念!! 以前我間學校係 德智體群美,依家多左個靈!! 條片都幾好笑,校長有D唔自然,副校長就好似D電視廣告咁,好生硬地介紹,主任其實都係見得個一陣,可能太少見到,所以無特別!! 睇完一條介紹學校同老師既片,就整段家教會既片,係一個男主席拍既片,我覺得有D似人地婚禮個D,不見其人,只聽到其聲,同大量佢地搞既活動相,重點係你要俾錢囉!! $60蚊FOR 3年!! 再黎就係POWERPOINT,老師講解返我地要注意既野,亦都俾紙同筆我地MARK低!!有準備既我,當然一早帶定簿同筆啦!! 老師講返我地帶小朋友返學要注意既事!! 首先一班係有三個老師既 都係負責上午同下午幼D班既!! 9月2,9月5,9月6同9月7 返1小時 (下午1:10至2:10) 9月7先要揹書包返學! 9月8,9月9,9月12同9月13 返2小時 (下午1:10-3:10) 9月14就係正常時間返學 (下午 1:10-4:25) 如果有野想問老師野既話,可以係 4:45之後打俾老師!! 9月2開課日,家長帶子入課室之後就可以離開,家長盲去大堂到睇有關育兒既片!! 老師話叫我地講一次拜拜好走啦,同小朋友講1個鐘後就接返佢,千其唔好唔講就走左去,咁樣佢地會覺得俾人遺棄!!又或者死唔斷氣咁不斷講拜拜,因為小朋友玩玩具3分鐘熱到,你不斷咁來回拜拜,佢地玩厭左個玩具就會想跟你返屋企!! 之後介紹個拉鏈袋!!! 入面有一堆野,有D係家長要填既有D就係用黎交錢既!! 首先係名牌方面: 要夾係衫領位,同唔好遮係到校章 有張改英文名既便條要填,個英文名係俾英文老師叫佢地個名用既!!叫家長細心地幫小朋友改名!!唔好求其改,又或者寫譯音!!個D咩 BB,CC個D就唔當英文名!!要改就要改返個真係英文名既名!!改完寫係張便條到,放落細拉鏈袋,到時老師會更改佢地個名牌架啦!! 接送證方面: 張證只得一張,如果係親人接都要有接送證,仲要加埋小朋友認得係邊位先得!!最少要有12歲以上!!如果真係無接送證,就要登記返身份證,同埋真係有事接唔到要搵人代接,最好提早打返去學校到同老師講聲!! 另外,要係放學之後15分鐘內接回小朋友,遲左就會當遲到,仲要請遲到既人寫返原因!!呢個我都覺得幾好,守時真係好重要!! 老師叫家長唔好遲,家長一遲,小朋友就會憂慮係咪俾父母遺忘,習慣遲,佢地又會以為返學時間係好長!! 老師又叫我地做家長既千萬唔好問小朋友返學有冇喊,佢地要適應環境,喊係在所難免,家長應該唔好強調係喊呢到,問返小朋友開唔開心,今日有冇笑,如果放學見佢地笑住出黎,就要讚下佢地,讚佢地叻,今日有笑!! 亦都唔好問有冇小朋友同你爭野玩,學校唔係一個爭野玩既地方,唔好俾小朋友有個唔好既訊息,學校係開心既,而唔係恐怖既地方!!唔好搞到佢地怕左返學!! 手冊方面: 當然要填學藉表啦,用藍色或者黑色原子筆填,要寫中文!!將唔要既唔岩用既就用筆劃左佢,最緊要簽名!!同埋要包書膠包好!! 每月既第三個星期會收手冊,到時唔見手冊唔洗打返去問,只係老師拎左去睇!! 功課套方面: 呢個係學校老師同家長既聯繫物品,有咩請假寫係手冊,再將手冊放係功課套! 回條: 簽返晒之後,放係拉鏈袋交返俾老師! 交錢袋: 有個細既拉鏈袋既,用交錢用既,有D便條呀錢呀,就放個到! 小朋友既功課: 因為小朋友手細未夠力,所以要買D粗既蠟筆俾小朋友用,功課連線或者填色就用粗蠟筆!!到大D先會改用三角鉛筆!! 書包: 因為小朋友未識認字,未識得認自己個名,所以放名個位,要放相,仲要同佢地講你放左邊張相,等佢地認得!! 手巾仔: 要準備乾手巾仔細細條既,放褲袋或裙袋 記住要寫名,小朋友跌手巾仔好常見!! 每日都要帶多套衫褲,內褲同襪放書包,唔洗係校服,便服就得,以防萬一要換衫! 每日都準備3個口罩! 除左手巾仔要寫名,校褸,外套,皮鞋同運動鞋都係要寫名!! 10度以下可以穿外套,應該係厚褸啦!! 逢星期二同四要萫運動衫 入面最好穿件白背心打底 學費每月 $477 , 叫家長到時記住1號入定錢!!因為多數2號都會扣錢!! 如果學校有D咩費用要交,要分開錢交,唔可以寫埋一條數同埋不設找續既!! 支票背後要寫返名同班別!! 另外有時老師會派D書仔返屋企,等小朋友同家長一齊睇,個D書仔唔洗拎返黎學校!! 大約10月起,會有圖書借俾小朋友返屋企俾家長一齊閱讀,到時有份報告要家長填!! 每月都會有個進度表俾家長,開頭唔會寫到表現好好,可能開頭老師都係TICK 1同2呢兩格多,叫家長唔洗擔心,家長都要填進度表,要誠實,例如自己食飯,明明要餵就唔好TICK話佢4做得到,咁老師就好難幫家長教小朋友!! 另外,教每一課書,每班都唔同,唔好打黎問老師點解人地班教左你做咩未教!!因為每珪教既時間表都有唔同,如果教左就會印已授,要小朋友真係識讀同明先會印落去!! 功課最多3個印仔,開頭老師唔會印太多,由一個開始,唔好打返黎問點解咁少印仔!!一開始一個,之後慢慢加,小朋友先會覺得自己真係有進步,會開心D!! 就係咁11:30就完左啦,其實比預期既快啦!!之前有媽媽問係咪3個鐘咁耐,講真你地少D無聊問題咪快囉!! 我地個班我見到之前愉快班勁曳既媽咪係到,唉...估唔到係同班,希望佢個女到時乖D啦!!!

交回條,學生相

2016年06月22日
公開
14

擒日仲諗緊好似有D野要做,但係唔記得係咩,後來記起啦,就係交通告回條學生相...! 雖然我想一早去交,但係都係要等粟米起左身先! 結果出得門口都12點,搭車去到12:30! 出門之前仲驚自己影既學生相唔知岩唔岩,我都特登帶定上身校服以防萬一,如果真係唔岩就跑去附近影,影完再去交過!! 去到學校,校工叫我直上一層,上到去有個人交緊,有位老師叫我係後面排凳坐一陣!! 輪到我時,個位老師(其實應該係主任)叫我埋去,先對我張申請自動轉帳表,拎我張副本去對,車...早知影印啦,我以為要收添,結果佢對完俾我返,我仲帶埋正本去!! 之前聽到個男家長同佢既對話,講自動轉帳既限額,我望一望自己個張,我其實係無填到囉.....!!但係見佢無出聲,我又無問住!! 當佢CHECK相時,我有D緊張,唔知岩唔岩規格!!好彩佢望完晒都無講D咩!!只係俾返個裝相ZIP袋我,叫我留返黎裝另外個兩張相...(ER...其實D相我自己PRINT,就算有多都有野裝好左囉)!! 佢CHECK完就同我講無問題架啦,記得8月28有個家長會,到時記住出席!! 我就問返佢個自動轉帳限額係咪唔洗填,佢話唔洗填架啦,因為遲D有D書簿費都係會自動轉帳扣除,所以唔洗填!!好彩我無係手多!! 搞掂晒就叫粟米同老師講拜拜!! 最好笑係,粟米以為交晒野就可以返學!! 我: 我地走得啦,落樓梯啦! 粟: 唔係咁,我要返學先得架! 我: 返學要著校服同埋要揹書包架,你都無點返學呀? 粟: 我要書包呀! 我: 你個書包係屋企喎,同埋你係九月先返學架!! 粟米諗左一陣,都乖乖地走!! YEAH,順順利利交齊晒野!!最開心係學生相唔洗影過哈哈!!

無瀨尿的一天

2016年06月22日
公開
17

如常咁起身,當然都係我早起,粟米仲係訓緊,直到粟米起身,突然同我講,佢要小便,當然幫佢除褲除片啦! 咦!!尿片竟然無濕到既?咁神奇?咁快大個仔戒到夜片? 其實由5月開始都間中俾佢嘗試自己去廁所大小便,由開頭唔係好肯去同怕去,變左慢慢都識得要大小便係要去廁所! 當然都有失手時候,有瀨濕過兩三次!! 最近我都開始俾佢要試下著底褲同埋唔著片出街,如果就咁落街食飯既話,就唔幫佢著片,去得遠同夜晚訓覺,當然都仲要著啦!! 今日都因為要去幼稚園交野,話遠唔遠話近唔近,時間長又唔定,都掙扎俾唔俾佢著片!! 我問粟米"不如著尿片先出街啦啦隊" 粟米:"唔洗啦,唔要尿片" 充滿疑惑既我再問一次"真係得?坐巴士無廁所架喎,真係唔洗著返尿片?唔好瀨尿喎" 粟米依然講"得,著底褲得啦,唔要尿片" 我唯有同佢講\"咁我信你架啦,你要忍住架,到時要小便要同媽媽講喎,知唔知?巴士無廁所架知唔知?" 粟米好肯定咁答我知~~ 唯有信佢啦,當然都係帶定一條底褲同褲出去啦,以防萬一啦都係!! 交完表,食完米線,去麥當勞買杯冰雪新地,但係買之前都去個廁所先,以防萬一粟米要去!! 入到廁所,問佢去唔去,佢話無,我都照兜佢去,因為廁所污糟,好難俾佢坐係到!! 結果無,就由佢先,去買野飲,飲完行去搭車,岩岩走左架巴士,見有時間入去小食店睇有咩零食!! 見粟米腳不停踏步,問佢係咪急,佢話係,咁我唯有帶返佢去麥記,結果入到廁所,粟米佢只係......放左個屁!! 之後搭巴士都驚驚地,因為佢訓著左,好彩到站都無瀨!!直到返到屋企!!哈哈!! 佢先去廁所!! 今日真係一個開心既一天,因為佢竟然全人無瀨濕!唔知佢保持到幾耐?哈哈!!

學習班 - 5

2016年05月07日
公開
17

今堂黃老師有返，進入課室時無上次咁黑暗啦！ 越來越少人返，一堂比一堂少，這堂得11位小朋友！最曳個小妹妹依然無返！ 可能上堂黃老師請假係鄭老師負責，所以今堂到返黃老師負責！ 程序表： 1）樓下唱遊室 2）茶點 3）故事 4）美勞 5）放學 首先排隊去唱遊室，鄭老師負責，熱身玩返上次扮駕車，粟米記得喎，識得做返個手勢！之後老師請佢地出中間行來行去駕車！粟米可能有啲驚，玩一陣又返黎，我叫佢跟住老師行來行去，好彩都肯再出去玩！ 之後，到第二個遊戲，扮老鼠行來行走搵野食！鄭老師扮老鼠，對住啲圖扮食，而黃老師就扮貓，播歌玩，去到某個時段，貓就去捉老鼠仔，老鼠仔要企入呼拉圈到先唔會俾貓捉到！ 粟米實在太膽小啦，我諗佢係怕俾人捉，佢完全唔敢出去，仲要驚到坐係我大脾，講極都唔肯出去扮老鼠！到第二轉，老師俾啲老鼠牌小朋友，佢雖然肯出去坐低等老師掛牌，一聽到播歌，佢就跑返黎我到坐！洗唔洗咁驚啊？ 玩完要交牌，佢先行返出去交俾老師！大家一齊唱首goodbye song先離開唱遊室！粟米今次都識跟住唱喎！ 又排隊去洗手間洗手，洗完返課室拎書包入面既水杯出黎，粟米比上次飲多左水，多兩三啖啦，雖然都係我飲埋剩低個啲，不過都算好好啦！ 放好杯同書包，就開始點名，今次雖然叫做聽到老師叫佢個名，但係都係未識得舉手，都係要提，好笑既係提佢就舉晒兩隻手！俾老師笑！ 故事時間，老師今次講“自己去廁所“，粟米有留心聽，我希望佢聽完之後都真係慢慢學識去廁所啦，因為最近都教緊佢去廁所！ 故事教小朋友去廁所，去完要洗手，又教點樣洗手，突然變左教洗手方法，講到拎手巾抹手，當然有啲媽媽身上有手巾仔，可以即時拎出黎，而粟米個條係書包，老師又無叫大家拎出黎，所以我都無拎到！ 老師讚有手巾仔既小朋友乖，記得帶手巾仔，但係事實我地都有，但係放書包點拎出黎！粟米都好留心聽同學洗手！ 聽完故事又係時候美勞一下！我無諗過係關我事有我份囉！今日竟然係教佢地做條鏈送俾媽媽！估唔到第一份既母親節禮物係呢個班整既頸鏈！用老師剪好既飲管穿埋作做成一條鏈！真係有啲唔識欣賞呢份母親節禮物！或者係我根本對母親節無咩特別感覺！我只會覺得又多一樣...唔知點處理既美勞！ 做美勞之前，粟米走左去玩玩具，今次有衣夾玩，對返卡上既顏色，同色就用返同色夾夾去個格！其實粟米對呢個遊戲一般，係我夾硬捉佢去玩呢個先，佢其實想玩後面ABC拚拼板多啲！ 所以佢玩衣夾先，再去玩ABC拼板，見有個小朋友想玩，我同粟米講俾小朋友玩左先，我地穿完鏈先再返黎玩！好彩都肯去穿鏈，不過耐性就爭啲，因為佢穿一陣就想去玩玩具，係我要佢穿多幾粒先俾佢玩玩具！ 穿完就好快咁走去後面玩返佢最鍾意既ABC拼板！我拎左另一個拼板俾佢，係星星月亮太陽同雲，特別在呢份野其實都仲有幾塊係一至4個洞既木塊，可砌上去！玩左三次，見老師中間鋪墊，放啲大積木出黎俾小朋友玩，原先玩衣夾張?既變左做類似lego既砌積木，見到無咩人玩就叫左粟米去！玩左一陣就夠鐘啦，粟米又乖喎，聽到老師講夠鐘，佢竟然執返晒積木放返入籃！真係估佢唔到喎！ 今日放學老師竟然派兩份小食俾小朋友，粟米拎到粟米條同一粒kinder！一見到kinder就即刻叫我開俾佢食！出到校門再開俾佢食啦唯有！ 至於條鏈呢，我掛左係粟米到哈哈！ 下堂係最後一堂，老師話校長會黎派證書，叫我地盡量出席！而手機咁岩有媽媽問“如果無返1�2堂有冇證書派“，我有幫佢問老師，老師話無返一兩堂都一樣有證書既！ 話時話，老師之前講明個名牌要交還，第一堂講明唔可以貼貼紙上去，今日我竟然真係見到有人貼左貼紙喎，所以老師又講一次，下次返黎要還名牌，叫啲貼左貼紙既記得要清理返！ 下星期放假，要再下星期六先返學！真係話咁快就最後一堂啦！

學習班 - 4

2016年04月30日
公開
18

又係粟米最期待既時間 - 返學！ 今日遲左啲出門，咁岩落車就撞見我小學班主任，打聲招呼閒聊兩三句！ 雖然遲出門，但係時間就岩岩好，米線太多人等，唯有去粥鋪食！ 食完都仲有啲時間，去我小時候成日幫襯既鞋鋪望下鞋！見到返學黑鞋，粟米爸問遲啲係咪係到買粟米返學鞋，我答“梗係啦，唔洗周圍搵，買完校服，再係到買埋鞋就快靚正啦！ 講起鞋，粟米爸望啲小朋友既運動鞋，當然啲牌子要幾悠久有幾悠久！yasaki,kamachi...等等！我細時就成日著yasaki!粟米爸就話細時被阿媽騙，話add in同adidas係一樣，所以只會買addin俾佢著，直到大先知係被騙！ 粟米爸望住個埋舊牌子運動鞋，講晒啲牌子名出黎，我就突然問佢，咁你買咩俾粟米著? 粟米爸好快地答我“Adidas!" 實在係忍唔住笑，好明顯童年陰影，唔想個仔著雜牌！ 粟米爸問返我會買乜牌，我答佢“我會揀對平既，因為小朋友腳大得快，無整對貴既，好快唔岩著！（百幾蚊同幾百蚊既分別）,當然都唔可以著壞腳啦！我無呢啲童年陰影架哈哈“ 笑完都係行去學校排隊啦，唔係等左好耐就入得，粟米帶住期待心情進入校門！ 入課室時感覺有啲暗，播緊迪士尼套愛麗絲，不過有啲難睇，可能係因為投影既關係啦，粟米都無咩心機睇！ 原來今日黃老師請左假，由李老師頂佢位！今堂鄭老師做主！夠鐘先開返晒課室既燈，唔怪之覺得暗左啦，原來係未開晒！ 是日程序表： 1）大堂 2）茶點 3）故事 4）美勞 5）放學 先去大堂，係粟米最鍾意玩，因為第一堂玩時，佢好鍾意首歌同最鍾意玩！佢次次返學都想聽返同玩！可惜連續都無，今日有啦！ 雖然係大堂都有聽返佢首做運動既歌，但係同之前玩既野唔同左！今次係爬過帳幕，踩高低膠墊，跨磚運豆袋同頭頂八瓜魚！ 呢野粟米最like係跨磚運豆袋，起碼玩左4�5次！爬帳幕都爬左3�4次，踩高低墊兩次，八瓜魚玩一次就唔玩! 玩完，鄭老師拎左張大帳幕出黎，大家一齊搾住，一齊轉下左又轉下右行，之後，老師放左三隻蘋果公仔上去，等大家一齊拋，粟米好似唔太鍾意咁玩，佢話唔要蘋果，當然只有我聽到啦！ 之後收返啲蘋果，老師叫啲家長負責拎住塊帳幕，拎高之後又拎低，小朋友就係帳幕下掂下帳幕！唔知係咪拎高拎低時，會令到氣流郁好大風，粟米佢好驚，好快走出黎，就算老師同佢玩一陣，佢都好快話唔好，走黎搵我！佢話佢好驚！唯有陪佢睇人玩！ 玩完就去洗手間，之後返課室拎書包隻杯出黎等老師斟水！粟米其實就唔係飲得太多水！有啲小朋友就飲好多！粟米通常飲一啖就算！其餘既我飲晒！ 飲完，又到點名既時候，今次最曳個位小妹妹無返，而有位大住肚既媽媽竟然無幫個仔帶牌，結果老師點名想睇名牌都無得睇，靠媽媽出口講先知！ 粟米都未係好識一聽到自己個名就即刻舉手叫到，不過當然在場既都係得一兩位識！ 到故事時間，今次係講“過馬路“,唔知係咪我成日教佢睇燈教佢過緊馬路要望，佢今次又幾留心喎！ 美勞就係做紅綠燈（不過老師教係人像燈）！都係一樣啦，因為美勞位有限，粟米玩住其他野先，先玩夾毛毛球，唔知點解夾夾下又變左唔識夾！跟手去玩印水布！ 見美勞有位都拿拿聲捉粟米整左先，一埋?發現無畫紙係?，原來要等李老師派囉，之前老師係放定晒係?方便好多，真係唔係幾慣等佢派！填色加剪貼做好就去玩另一?玩具！ 其實好似好快玩完，今次仲有啲亂添喎，可能鄭老師同黃老師夾開，同李老師無咩夾開既關係，前幾次都會叫啲小朋友聽一聽先，再排隊拎書包走，今次話收玩具就算，等我仲反好張凳添... 鄭老師好急咁講，李老師直頭趕收工既格，搞到個個都趕住走咁，有啲亂囉！ 今日送米通，不過粟米無食到！拎返屋企放埋一邊！ 仲剩返2堂了！真心覺得有啲悶哈哈，佩服啲帶小朋友去playgroup既家長！好彩一星期一次，唔係我就悶死！美勞有時都唔算粟米自己做既，佢只係做少少，最有心機係第一堂個張印顏色！ 今日係大堂玩時，無意中見到高班畢業相係迪士尼影，背景似係迪士尼酒店樓梯！估唔到德貞都會玩呢隻！ 我以前係學校禮堂咋！

學習班 -3

2016年04月23日
公開
24

又到左粟米最期待既返學時間！照常去食飯行陣再返學，今日落左陣雨！ 當可以入學校時，粟米好開心，差啲連同粟米爸拜拜都無哈哈！ 粟米開始記得老師個樣，見黃老師企左係樓梯迎接小朋友，佢望住黃老師，想黃老師一齊入課室！我同粟米講，黃老師一陣先入課室，我地課室等啦！黃老師都叫佢返入課室先,一陣見！ 今次又輪返鄭老師教！ 今日既程序： 1）小肌肉訓練區 2）茶點 3）故事 4）美勞 5）放學 原來之前放學經過成日見到啲小朋友同家長玩既地方就係所謂既小肌肉訓練區！有啲哈哈鏡，有啲磁石玩具，有啲開門鎖...，都幾多野玩！ 玩完就排隊洗手，返課室,拎書包入面個水杯出黎！等老師倒水，飲水！飲完又放返好書包！ 跟住又係點名時間啦！其實佢地都仲未係好識聽到自己個名之後叫到！都係啲老師家長提佢地舉手！ 聽故事，今日講愛護花，可能啲小朋友都無咩耐性，又走來走去，令粟米都唔係好留心！不過粟米依然記得入面既小狗唔見左個波，最後都無講搵唔搵得返個波！只係不斷叫小狗唔好咬啲花！ 講完故事就叫小朋友扮花，老師扮蜜蜂採花蜜，之後又叫小朋友採花蜜，家長扮花！ 到勞作時間，今堂係蝴蝶，要將老師準備好既不同形狀紙碎或者粒粒，貼上畫紙上既蝴蝶上面！粟米第一次玩膠水！唔算太鍾意，不過都會貼下！ 貼完玩玩具，有啲扮蔬菜既拉鏈玩具 粟米，橙同青豆，我諗可能唔太吸引啦，好多小朋友都第一時間去左玩另外啲玩具同做勞作先！粟米都有玩，但係好快就唔玩! 之後走去玩其他玩具，見到佢最愛既數字拼板，佢都砌左好耐！直到放學！哈哈！ 今次有粟米條送俾小朋友！ PS ： 原來仲有3堂咋！唔知完左之後粟米會點呢?到目前為止都好鍾意返學！

學習班 - 2

2016年04月16日
公開
18

粟米對返學非常期待！開開心心揹住書包！搭車去食個午餐！ 食完見仲有時間，行去睇下玩具店，粟米聽到唔係返學就係咁講要返學！我地話佢知未夠鐘，無小朋友排隊，一陣先再帶佢返學，佢帶住半信半疑既態度陪我地行去睇玩具！ 見到有麵包超人扭蛋，問佢要唔要，佢全個腦都係返學，最後仲叫粟米爸唔好睇野，要返學！真係咁鍾意返學?? 唯有行人返去學校排隊啦！都開始有小朋友排緊！ 拎返個學生證出黎掛返係身先！等無將耐就入得啦，同粟米爸講拜拜，我地就入課室啦！ 入到課室叫粟米放好書包係櫃到，再去洗手揀個位坐！ 原來兩個miss 會輪流負責既，上次鄭老師負責講，今次係黃老師負責講！ 上次個坐唔定既妹妹，今次由爸爸陪，唔係媽媽陪，依然都係坐唔定！ 今日既程序係： 1）唱遊室 2）茶點 3）故事 4）勞作 5）放學 先去唱遊室，唔陪粟米都唔知個間房係唱遊室，講真除左課室，依家對幼稚園其他地方都無印象！唱遊室我諗我都係第一次黎！今次玩扮渣車！粟米見老師派圈，無自己份，就講話我無喎！我同佢講等一陣老師就會俾你，唔洗急！ 粟米都有跟住老師教既黎做動作，真係幾得意架！跟住加埋家長一齊玩！算係親子活動啦！ 玩完渣車，又唱有隻雀仔跌落水，再加埋呼拉圈，當歌停左就要跳入圈到！玩完要去洗手啦！ 老師帶我地去洗手，入返班房就去拎書包，拎返水杯出黎，等老師斟水！ 粟米飲少少就唔飲，啲水我飲晒！ 今日都有點名，今次派既係peppa pig貼紙！ 之後，又放返好個書包！坐返好聽故事！今日主題係“交朋友“! 講完故事又係做勞作既時候，今次係手帕，用印仔印返啲公仔係手帕上！粟米最鍾意啦！係公司都好恨印！今日任印啦！ 印完放畫紙係美勞櫃，就去玩串珠，第一次玩串珠，雖然好大粒，但是粟米未玩過，驚佢唔識，不過佢都好努力去試，老師就教打直串，粟米唔係好得，我教佢放係?打橫穿！結果打橫佢穿得順利啲！穿晒又再重新穿過！玩左兩次,就轉戰玩玩具！ 佢都叫做玩左3樣玩具架！有一個原來係要用鎚仔既，佢又勁喎，一拎起就知係要黎打落去圓柱積木！未玩過呢個玩具都識玩，又真係叻喎！ 玩到咁上下都放學了，今次老師派朱古力卷！ 係門口開俾佢食，可能佢大力得濟啦，下面個啲碎晒，我拎唔出黎，粟米好想食，我唯有帶佢去買啦，因為搭車個站有暗零食店，估計個到應該有！ 粟米帶住懷疑既心情同我行入零食店，結果真係搵到有，仲好平添，一盒10.9,好似有廿條！ 買完就搭車返屋企lu!

學習班 - 1

2016年04月09日
公開
22

時間過得咁快,又到左之前報名既新生愉快學習班,每星期六上個半鐘!! 2點10去排隊,好快就有得入學校啦!!通告寫要帶書包同杯,等佢地知道第時返學要揹書包既!!仲擔心粟米會抗拒,細時俾佢揹野,佢好快就除低話唔要!!好彩今日佢又肯揹喎!! 仲以為會好似上次咁,一入門口就派名牌添,今次只係門口額探,就行去通告上指定課室,係課室門口派名牌,之後放低書包係書包櫃,再排隊洗手搵位坐低!! 估唔到一班都有17個小朋友BOR!!都算幾多!! 粟米比我想像中定,反而有個妹妹唔聽阿媽話,不斷係課室走來走去,個阿媽一尾得個叫字!!有時真係覺得好嘈,我都聽唔到老師講D乜!! 原來每次既程序都係咁: 1.大堂做運動 2.茶點 3.講故事 4.勞作 5.放學 老師講解左一輪就開始學習班了!! 先係大堂做運動,老師會先教小朋友熱左身先,之後俾D遊戲佢地玩!! 每次遊戲都要返轉頭同下一個小朋友擊掌!! 最多人揀既應該係推波波,之後就係平衡木豆袋,其他既有踩膠,推木公仔!! 因為唔俾影相,所以唯有文字MARK啦!!(想偷影但係又怕俾人話,無偷影到) 做完運動就去排隊去廁所,粟米仲未識去廁所,我問佢想去廁所定係洗手,佢話洗手,洗完又去排返隊!! 入返課室,拎書包出黎,老師要佢地拎隻水杯出黎,斟水俾佢地飲!! (其實有陣時都唔明,通告上寫既野,D家長係咪盲既呢?都會有家長唔幫小朋友預備書包同水杯!!所謂身教,你大人都唔聽老師講野,小朋友又點會聽) 飲完水之後,老師同小朋友點名,聽到自己個名就講"到"及舉手,老師就會貼張貼紙俾佢地!! 點完名就唱下歌,講下返學既故事!!唱下歌同小朋友握下手!! 跟手就係教佢地做勞作,今次係書包填色!! 亦都係位置有限,未有位做勞作個陣就玩住玩具或者玩用羹搬珠仔!! 老師分配左粟米玩珠仔先,粟米搬得好快,玩左三次,我見勞作有位,就問老師可唔可以去整勞作,因為粟米玩厭左珠仔開始亂玩,為免佢搞事,就搵其他野做!!哈哈!! 做完勞作,又去左玩玩具,又係因為見有位啦!!因為地方細,我企係到望佢玩,唔迫入去入面!!! 玩到咁上下老師會講仲有幾多分鐘,到夠鐘老師同小朋友講校長準備左D棉花糖俾小朋友,要小朋友揹好書包拎埋勞作同老師講拜拜就有粒棉花糖,拎到棉花糖要講多謝,同埋要返屋企先食得!! 當然食呢樣野,好多出左學校門口,D家長就俾佢地食!! 就係咁完成左學習班既第一堂!!一班有2個老師,鄭老師同黃老師!!! 睇黎粟米咁定,我應該唔洗擔心佢第時正式返學會坐唔定!!

新生體驗日

2016年03月12日
公開
30

今日係新生體驗日,粟米爸因為要返工,所以無得陪,不過點都係無得陪,因為只限一位家長陪入學校!! 原本諗住同粟米食米線,但係見好多人,想食粥咩?又好多人,最後唯有食最快而又無益既麥記!! 食完就行去學校到排隊岩岩好時間,張通告話最好 2:10至2:25分係出面排定隊!! 去到都算多人排,不過都KEEP住行,又唔算等左好耐!! 嗯,排隊期間,我好開心粟米唔洗我抱會跟住排隊,睇見其他要抱既小朋友有D咁既感覺!!可惜都有俾人影響既時候!! 後面有個小妹妹扭DADDY抱,係多次扭,結果粟米見人扭抱,佢又想抱,我當然唔會俾佢得承,即刻轉移佢視線,叫佢望前好快到,幫我拎張通告俾老師!!好彩轉移到!! 去到門口,先額探,無事就拎LABEL同班號,之後排隊等入課室!! 因為係 201室,所以要行樓梯,樓梯上有數字,粟米最鍾意,一路數一路行!! 入課室前要先洗手,男仔去男廁,女仔去女廁!!洗完就入課室坐!! 小朋友坐前,家長坐後,家長張凳好細張囉,真係有D坐唔到既感覺...!!因為D凳仔原本就係俾小朋友坐既!! 坐定定之後,老師先講重要野,8/28有個新生家長日係早上既,到時會有通告通知!! 另外,報名體驗學習班既就記得帶背包同杯!!其實呢D通告都有寫!! 開始先黎講故事,講一個伯伯種蘿蔔,之後蘿蔔因為太大舊拔唔出黎,所以要搵好多幫手先得!! 人物: 老伯伯,老婆婆,小朋友,狗仔,公雞同母雞 老師一路講故事,一路教小朋友做動作,講完晒,就請小朋友出黎戴上帽,依次序咁出黎扮拔蘿蔔!! 粟米見小朋友有帽戴(佢不嬲都唔LIKE既),竟然想要!!仲諗佢會唔會出去玩時會走佬,佢係最後一個出去,扮母雞既,原來佢都OK喎,都乖乖地坐係出面,但係動作人地"前後"郁,佢就變"左右"咁囉! 期間都有D小朋友怕醜同喊既,老師都好好唔勉強!! 之後唱歌做手勢,唱"太陽伯伯"同"有隻雀仔跌落水" 唱完,老師就教點樣做勞作,個勞作係蘿蔔!! 因為地方有限得8個位係整蘿蔔既!!未排到既就玩住玩具先!! 粟米走左去玩玩具先,玩砌數字,係一個鐘黎既,跟返D圖形砌返D數字上去!!都玩左好耐下!! 見有位,就叫粟米去整左蘿蔔先,整完有時間又去玩返佢頭先既玩具!! 直到老師話夠鐘 3:30要落去遊戲室到玩啦!! 落到去粟米都會周圍玩下摸下,到最後佢只係停留係射籃個到玩!!雖然未夠拎射到,但係佢都玩得好開心!! 係玩緊期間,有個老師同我傾左幾句啦,佢話粟米好專心,話多數小朋友都係玩一陣就轉第二樣,同埋掉個波掉得咁遠,證明佢D小肌肉都發展得好好!!話粟米掉波既力度同K2個D都係差不多!!老師仲話粟米一D都唔似細B!! 的確眼見呢班小朋友,粟米唔知點解好似大過佢地咁,講緊唔係高度係行為!! 到左3:50分老師話夠鐘要走了!!拎返個蘿蔔同老師講拜拜就走了!! 出左校門,我問粟米野!! 我: 你鍾唔鍾意學校呀? 粟: 鍾意 我: 咁你鍾唔鍾意老師呀? 粟: 鍾意 我: 咁下次媽媽再帶你返學好唔好呀? 粟: 好 暫時佢都對學校好有興趣哈哈!! ********************************************** 搭地鐵個陣,粟米拎左個蘿蔔當掃把咁幫地鐵車廂掃地,搞到有兩位外籍女士不停笑!! 可憐既蘿蔔!!哈哈!!