facebook pixel code

粟米媽

粟米媽

他的寶貝

370貼文
0話題
0關注他

日期

#Tag

  1. 網誌
  2. 粟米的成長
網誌區塊

打針(健)

2014年05月19日
公開
56

又係時候要打6個月既針啦!! 今次要打三針,我好開心(冷血)!! 一早落大雨,打的去健康院!!今日都算幾多人!!可能我地又遲左DD啦!! 真係去健康院,一見人地個D初生,就好鬼羨慕,我都係鍾意初生BB多D,因為夠輕,又只係訓!!一對比粟米就變左好大舊!!哈哈! 拎籌等叫名,叫名入2號房,都係例牌啦!! 入到2號房,姑娘叫幫粟米除衫除剩乾片!!今次只係磅重咋!!(乜越搞越少野呀,連頭圍都唔洗度) 跟手著返衫就返出去等叫名啦又!!想度高都唔得,因為人多,驚阻到人,同埋望見今日度高個張檯好細...應該度唔到粟米身高!! 又叫入7號房!!今次姑娘問好多野,同埋要CHECK 粟米一D野!! 姑: 咩名? 我: 盧晉宇 姑: 邊個湊? 我: 我囉 姑: 你係佢媽咪? 我: 係丫 姑: 叫咩名 我: XXXX 姑: 好好喎今次DADDY都有陪埋一齊黎 (次次都有黎啦其實) 姑: 佢幾大 我: 6個月 姑: 係啦,佢都有6個幾月啦,有冇咩問題要問我? 我: 我想問糊仔餵完仲洗唔洗俾奶佢飲 姑: 咁佢食到幾多? 我: 星期六第一次食,食左3啖咋 姑: 岩岩開始係咁架啦,你俾D水佢飲,如果佢食到一碗就唔洗俾奶佢飲,如果佢食得半碗都唔洗俾佢飲,如果佢得少少,你就要俾啦,你可以煮D粥俾佢食啦,可以俾雞蛋既蛋黃佢食 我: 咁蛋黃係就咁俾佢食? 姑: 唔係,溝落D粥仔到俾佢食,你返去睇下本書仔,書仔會話你知點做 (其實都有望,但係唔詳細丫麻) 姑: 好啦,今次因為六個啦,我要同佢做D測試,我都會問你野,都會睇下佢既情況 姑: 佢識雙手拎野未? 我: 識 姑娘俾左舊野俾粟米拎,粟米識拎住 姑: 嗯,好好喎,識得雙手拎,同埋唔係即刻放入口,好多都好快就放入口,不過我都唔會俾你放入口啦 姑娘拎開舊玩具 姑: 嗯都幾乖喎,拎開舊玩具都唔會喊 姑: 識坐未? 我: 識,但係唔叻 姑: 抱佢上黎檯到啦 我放粟米上檯,同埋想整好個D粟米既坐姿 姑: 我唔洗佢坐得好正,我只係要求佢識得用手撑到就得啦,佢都好叻喎,撐得到 之後姑娘抱直粟米,要佢企 姑: 佢都好叻喎,扶住佢,佢都企到 粟米開始WARM UP左有D聲 姑: 哇,掂啦,我以為佢會喊添,又無喊到,仲講野,第時見學校一定得啦 (咁快丫乜講到咁遠) 之後姑娘同我地講今日要打三枝針,開定張收據,等打完針落去拎退燒藥! 出到去,粟米爸就第一時間放張藥紙去樓下拎籌先再上黎啦!! 上返黎粟米都未入得去打針!! 到入得去打針,姑娘又問野,問知唔知打咩針,頂,我真係無記性架其實,空白一篇!! 姑娘問打幾多枝針,我仲答左4枝哈哈!!!粟米爸補講3枝!! 問我地知唔知打咩針, 我:ER........ 肺炎 姑: 仲有呢 我: 唔記得.... 姑: 頭先姑娘無同你地講既咩? 我: 有,但係唔記得啦 姑娘俾返張針卡我地睇,要我地對返打咩針!! (肺炎,乙肝同白喉個堆,一共三枝) 答完,就開始幫粟米打針!! 先打右邊兩枝,再打左邊一枝!! 睇住D針有D長有D短咁吉落佢大脾,真係有D痛既感覺丫呢次!!可能粟米佢係清醒啦,睇住佢都幾慘哈哈,因為第一枝都未痛完,正想喊同收聲之際,就黎第二枝!! 痛緊第二枝喊緊個陣,就轉身打第三枝!!真係唔喊就假了!! 雖然好快收聲,仲訓埋,不過呢次真係睇見都痛過上幾次!!@@哈哈!! 打完著返條褲,等左陣,粟米爸去BOOK期,下次一歲先去再黎打針LU!!! 坐左陣,就落去拎退燒藥!! 好彩係拎定籌啫,因為落到去其實先排到97,我地張籌係87,都唔算過左好多個!而且今日仲好多人睇醫生添BOR!! 拎完就去食早餐!!HEHE!! ******************************** 返到屋企,成日都唔係話發燒既,只係比平時熱左D,37.5!!穩陣起見,我就幫佢貼左退熱貼,等佢舒服D!!都好彩無發燒,唔洗食退燒藥!! 唔知係咪打針關係,D屎特別臭哈哈!!

第一次剃光頭

2014年05月17日
公開
61

半歲啦,第二擊就係剃光晒佢D頭髮!! 一直都想剃,但係之前因為冬天凍,早幾日都有凍返,真係好少有!! 原本只係想搵人剃光佢,等佢由頭生過D頭髮,唔洗一忽忽同一長一短咁古怪!! 見蛇媽會有人話有個專業幫BB剃頭髮同整埋胎毛筆,價錢都唔貴338蚊,包剃包毛筆一枝,之前見成千蚊整一枝胎毛筆,真係咪搞!! BOOK 12-13:00黎剃!! 大約12點半到就黎左!! 先擺好個D工具,我見佢都有消毒一下個剃髮器!! 之後鋪地下,開個IPAD MINI定係NOTE咁既物體,放短片用既!! 我就抱住粟米,佢幫粟米圍條紅巾,叫粟米睇條兒歌片,就開始剃!! 開始剃時仲講"BB第一次剃頭,健健康康聰明伶俐呀! 當粟米望一望個哥哥時,哥哥會同粟米講"你望住拎到啦,好得意架D公仔",之後就繼續剃!! 果然個真係好好既剃頭幫手哈哈,成個頭剃晒,粟米都不知不覺,雖然有D歌仔佢唔LIKE聽會扭一陣,但係就無為左人地搞佢個頭而扭!! 剃完,哥哥話D頭髮可以整到兩枝毛筆,我話一枝夠了!! 哥哥拎晒所有既筆竿我揀,當然有平有貴啦,我都係揀返正常價338個D毛筆竿!! 其實我都係志在有人幫粟米剃頭髮架咋,毛筆都係其次!! 見到有枝細細地既毛筆竿,點知哥哥話係女仔架,因為係眉筆黎架,結果就揀左枝蛇仔型係頂既毛筆竿!! 揀完筆竿就要揀語句!!我揀左"乳筆相伴,才智相隨"!! 哥哥幫我MARK低呢句同粟米既生日,就完成了!! 另外,仲有一包多左既頭髮,哥哥話D老人家講,BB第一次剃頭,驚少器,所以就俾D我俾粟米放枕頭壓住訓!! 其實...粟米都無枕頭....哈哈,不過就將個包頭髮放係床墊下面!! 就係咁一個月後至有得拎毛筆!! 剃光頭既粟米...真係唔同晒樣哈哈,粟米爸話佢個樣曳左!!

BB展-babymo

2014年05月10日
公開
30

baby mo雜誌有入場券送,迫粟米爸陪我去! 原來同一星期有兩個bb展同期進行,一個係會展,一個係機場博覽!babymo個展覽就係機場個邊!! 聽講會展個邊個百家寶bb展係無咩野睇,得保險個d比較多!!所以我都只係去機場個bb展算了! 今日有少少雨,好彩粟米爸都肯出門!! 可能落雨啦,都唔算太多人,3點半去到,感覺無我上年大肚個陣咁多人!! 行行下粟米爸話我跌左飛,我無跌飛喎,兩張飛係我手,無啦啦多一張飛,之後去到counter又換多左兩張...oh!!兩條友5張券...@@!! 入到去,眼見無上年咁多參展商!!最長龍都係babymo了!!因為有免費福袋!! 送場時有兩份野送,係d優惠券同贈券!! 排下隊拎下贈品!!排雅培個陣,遇到個發癲媽媽!!呢d人真係好恐怖!!! 雅培安排如果同隻bear影相upload上fb,咁就有個bear bear頭型背包一個!!有個發癲媽媽同個女影完,工作人員俾一個佢,佢就話要兩個,因為佢地有兩個人,工作人員已經講每次都係送一個,個媽媽就好大聲咁喝人,強調自己有兩個人!!之後仲好大聲咁發癲講"咁我地依家係有兩個人丫麻",工作人員唔理佢啦當然,個媽媽竟然自己走去拎個背包,拖住個女走人!! 哇...睇見咁樣,真係希望佢個女唔好學佢阿媽,咁樣搶人野人係犯法架!!當然人地唔會同你計較報警,但係真係有咁既需要咩?發晒癲人地唔so你,你竟然用搶!!好可怕既人!!仲要係百分百香港人!! 收獲係,訂左一年既baby mo,拎左好多贈品,買左兩個kitty手模,仲有一套咸蛋超人衫同口水肩!!! 之後去青衣城食埋飯先返屋企!!

150日

2014年04月14日
公開
52

150日啦,真係不知不覺!!粟米都長大左好多!!麻煩左好多!! 5個月大,佢都係時候轉返去床仔到訓,唔好再訓BB籃,因為佢已經唔再係BB!!BB籃都俾佢訓到有D迫,唔可以申開手訓!! 執好張床,放粟米入去訓,佢竟然係到轉身,不過唔太成功,因為右手壓住!!哈哈! 佢都係時候開始習慣下訓床仔,而我都要習慣下佢唔係隔離訓,希望佢唔好玩野,佢半夜通常都會扭一扭,每次我都係塞個奶咀俾佢就收聲繼續訓,依家佢訓隔離房,要我半夜起身行去幫佢執奶咀都幾慘!!希望唔好咁密啦!! 掛左個床鈴,佢始乎都幾鍾意望住,識用手捉,唔知係咪新野,所以咁開心!! 真係不知不覺就5個月,時間過得真係快!!上年呢個時候都只係岩岩去完沖繩返黎,CHECK完私家,仲要去政府到排期!! ********************************** 緊張 或者應該講係不安!!我發現我一養野就會係咁,之前MELODY係到,我每晚都好怕佢無啦啦斷左氣,所以每晚半夜都醒一醒睇一睇佢摸下佢有冇呼吸!!依家有粟米,我都係咁,半夜會CHECK下佢有冇局襯,有冇呼吸!! 唔知係咪細時成日都覺得屋企既野養唔長,好多時第日訓醒就死左,當然D寵物唔係我買返黎養,多數都係細佬買,雀,魚,兔仔,倉鼠,雞仔,鴨仔,狗...@@真係好多下!!當然都有試過有D好長命,但係最後送左俾人養!!不過死既佔多哈哈! 就係咁,潛意識覺得生命好短,隨時唔見!! 我諗到粟米要幾歲我先會放心,唔洗半夜走去望佢有冇事!!

影相 - myfamily studio

2014年04月05日
公開
44

今日係粟米爸既生日又係粟米仔140日(都係睇返紀錄先知)!! 早兩個月前因為蛇媽會見到有免費攝影套餐,所以走去BOOK,仲要發現自己蠢左,其實可以係粟米仔100日個陣BOOK影相,不過影相成日都可以影既!! BOOK左3點影,2點50分去到!!去到要等攝影師埋位!! 咁岩有個家庭影完出黎,等揀相!!係一PAIR父母+5個月大既B女!!個BB女好肥,好搞笑!!佢地仲將個B女拎黎同粟米打招呼,可能粟米少見呢D,所以佢見到個肥B女反應唔係太大!!!只係申手摸下手仔,人地個B女就四萬咁口,仲食手指食到成手都係!!講真我有D怕左佢D口水...!! 負責個女仔先帶我地去睇下有咩景,揀咩景影,我揀左白色同LOVE字,好似岩影D!!其實我都好想影下愛麗絲同南瓜車景架!!等下次有機會再影呢D!! 到攝影師到左,就入去開始影,開頭粟米都仲會笑下,但係影影下就開始扭LU!!有機會係因為熱,D燈多,都唔好話唔熱呀!!好彩既係攝影師都好NICE,唔知係佢真心定假意,佢KEEP住話粟米仔得意!!希望係真啦,但係對住個扭緊計既粟米,一.一比著我應該係覺得有D煩!!! 影完晒之後,就等攝影師整相入電腦,我地又要等下,因為要揀相!! 免費既野梗係有條件啦,就係要揀一張相俾佢地放FB俾人投票!! 免費套餐包 15個檔案, 9張5R, 1張8R! 如果買晒所有相,都只係俾$360蚊!! 買晒還買晒,都要先揀 5R 同 8R 既相!! 揀完就個半月後等拎相同CD!!! *PS: 其實如果影BB既話,佢地真係唔太專業!!因為佢地唔太識令BB笑,同埋掌握唔到時間,BB精神既時間其實好短!! 佢地場地靚,但係起碼要BB識坐或者企先好影D!! 希望下次我生日又可以BOOK到哈哈!!

輪狀3(診)

2014年03月27日
公開
42

時間過得好快,又係時候食輪狀,今日我忙到飛起,返公司整完野,突然老豆又話整完牙食唔到野,我要返去煮粥,但係又要我寄貨返大陸!! 我拿拿聲等十二點速遞收完野,再返去餵粟米,再去煲粥,煲完搵個壺裝起,拎返公司俾老豆!!點知落到街又話唔返公司了,咁我唯有將壺粥放係細妹屋企,之後再返公司搞埋老豆吩咐既野!! 仲諗緊不如聽日先帶粟米去食輪狀啦!!!好彩5點前都搞好晒,咁都試下打去book食輪狀,我怕聽日又一大堆野要搞又食唔到!! 好彩打去姑娘話唔係太多人,叫我依家去!!我同姑娘講我最快要5:30後先到!!姑娘就幫我book左5:30-6:00!! 去到5:30多d,果然唔係太多人,等左兩個就到我地!! 入到去醫生又黎料!! 醫: 咩病呀? 我: 無呀,食輪狀第三劑 醫:(望一望張卡)係喎,咁快又食第三劑啦? 我拎張針卡出黎俾醫生!! 醫: 咁快又3月27!!咁好啦,姑娘食輪狀啊!! 係準備期間,我又再問粟米仔粒野!! 我: 醫生佢粒野好似大左 醫: 我望下先,(望一望)我見佢粒野就無大到,你想點? 我: 係咪真係有佢? 醫: 由得佢先囉,如果要整要同佢做冷凍,到時要麻醉,對咁細既bb唔係咁好 醫: 望一望張針卡,咁張memo我幫你掉左佢啦,都食晒,黎晒啦,無用啦!!我幫你mark低晒啦!!上次佢打針無耐,d退燒藥仲係唔係到呀? 我: 係到呀! 醫: 咁岩啦,咁我唔俾退燒藥你啦,因為只係隔左十日到啫,你食返個隻得啦! 我: 即係都一樣嗎? 醫: 係呀!如果發燒就食個枝啦!!上次個d你就掉晒佢啦,無用架啦!! 我: ok!! 醫: 應該就無咩針要打,睇下黎緊水痘針啦,如果政府有就健康院打,如果無就黎呢到打啦! 我: (明知故問) 係咪一定要打水痘針呀?? 醫: 打好d,其實外國好多國家都有得打架啦,係香港遲咋! 我: 哦!! 醫: 仲有冇野問? 我: 無啦!! 醫: 好啦,拜拜! 就係咁三次輪狀食晒啦!! 食完輪狀,我又順便去買埋奶粉同洗衣液!!再返屋企拎粥過去俾老豆食!!好忙既一天!! 粟米開始大了,今次食藥有d反抗!

打針(健)

2014年03月17日
公開
24

4個月又係要打針既時候啦!! 今次打十三價肺炎同白喉個堆,又係要打兩枝!! 打針唔係我最關心既野,我想知既係粟米依家既 身高體重同頭圍! 今早去到健康院,人流唔算多,拎籌後等叫名!!! 又係指家動作,除衫磅重!!6.43KG!!跟住姑娘就幫佢度頭圍 41.2CM!! 度完就話叫我幫粟米著返衫!!我問"下?唔洗度高架?" 姑娘話"佢4個月唔洗度架" 好失望地無人幫佢度高,不過見唔多人我都自己走去放低粟米度下!!62CM高! 之後就出去等叫名,去17號房見姑娘,姑娘問返上次粟米打左針有冇咩野? 姑: 嗯,叫咩名? 我: 盧晉宇 姑: 我地睇返佢既體重同頭圍,佢都好好喎 我: 點解唔洗度高既? 姑: 我地係比較著重體重同頭圍,上次度左身高唔係太大問題,我地多數都唔會度,體重我地唔希望BB體重太重或者太輕,仲有頭圍我地都唔希望頭圍太大,所以身高如果唔係太高或者太矮,我地係唔會度既! 我: 哦...(咁個表要黎做乜鬼野喎) 姑: 上次打針有冇咩唔舒服? 我: 有呀,發燒囉 姑: 咁幾多度? 我: 38度 姑: 好好呀,38度即係岩岩開始燒,唔係好高燒,無去到40度,咁即係佢都好叻好好架啦 我: 我見佢38度就俾佢食退燒藥,所以無再燒囉 (可憎呢句已被姑娘漠視) 姑: 今次我地都繼續要打肺炎同白喉既針,雖然上次你睇過,不過今次都循例俾返你下啦,睇下佢有冇以上既徵狀 我: 無 姑: BB有冇咩特別野? 我: 無 姑: 好啦,咁BB依家食幾多餐呀? 我: 5餐 姑: 每次幾多安? 我: 5-6安 姑: 咁知唔知幾時先開始食糊仔呀? 我: 6個月 姑: 係啦,咁知唔知點解要俾糊仔佢地食呀? 我: 係咪因為腸胃開始變,所以食糊仔過渡期 姑: 嗯,咁呢BB慢慢開始就轉食米糊,因為係為左佢學識吞野作準備,之後慢慢就可以好似大人咁食野,就可以戒奶唔洗食架啦 之後拎左本小冊子我睇同解釋 姑: 奶粉呢其實出面個D 2,3,4,5號無意思既,其實都無必要轉食其他號數既奶粉,當BB去到一歲,其實就可以飲我地大人飲既全脂奶!!而米糊我地就會由每一日餐開始俾,呢到本書會教你點樣做!!視乎返BB吞野叻唔叻啦!!叻既就可以俾多餐佢食!! 岩岩開始,你就可以每日揀一餐唔餵奶轉做食米糊俾BB食!! BB依家係用十隻手指去拎野,之後就三隻手指,之後就兩隻手指!!! 俾唔俾零食佢其實唔重要,要視乎返BB識唔識拎,BB餅你地唔洗膽心,其實都係俾佢地學習自己拎住野食放入口,都係一種訓練,訓練佢地自己拎野食同訓練下D手指!! 講完一輪!! 姑: 你有冇咩問題?? 我: 我想話呢,佢個鼻下面有粒野,個半月都仲未好 姑: 咁你有冇帶佢去睇醫生? 我: 有 姑: 醫生點講? 我: 醫生話暫時唔好理佢,入面無細菌,可能再過多排會自己甩左 姑: 嗯,我都覺得係咁,我都信你睇個位醫生講既野,咁你洗唔洗見下醫生問下意見? 我: 好 姑: 咁我幫你安排見完醫生先打針啦,俾定張紙你,打完針去拎退燒藥,如果有燒就俾佢食,無燒唔洗食,上次個枝藥水就唔要架啦!! 我: 哦 姑: 咁返出去等叫名 之後叫左去14號房,係一位後生既女醫生!!講佢知咩事,佢用手摸完,就講粒野就時就無咩特別,如果唔係太大或者有菌,暫時我地都唔會郁佢住,你睇定D先,如果再有咩事變大左又或者咩,再返黎睇過!!其實都好多不明因素點解佢地會起呢D粒粒,同埋有機會佢地自己會好返,所以唔洗特別擔心!!佢仲咁細我地暫時都唔會同佢做D乜野!!你再睇下先啦! 就係咁睇完又出返黎!!等打針!! 今次粟米係清醒狀態,我仲諗會唔會因為清醒打針會痛D呢? 入到去姑娘問我知唔知今日打咩針,我答完之後,姑娘話先打左再打右!! 當姑娘拎住枝針講野個陣,粟米仲笑得出,以為人地同佢講野!!哈哈!!好搞笑!! 我同粟米講"哇,你唔知死呀你,仲係到笑,一陣你就笑唔出啦" 姑娘都話"好多都係第一枝唔知死" 之後開始打第一針,竟然無反應,無喊喎!! 我:"咦,無事喎竟然" 姑娘:"第一枝通常都無事,第二枝就痛D" 真係,當打第二枝既時候就黎料啦,可能枝針比之前粗同埋多又耐,粟米即痛到面紅同喊!!好彩既係佢喊左一分鐘就收左聲!!都算叻仔!!哈!! 清醒時打針,原來都唔係我想像中咁,佢都OK喎!!! 打完針要出去抖,粟米爸拎本野去約下次個期,好彩之前叫定粟米爸係等打針前落去拎定籌,打完就可以落去拎藥,唔洗好似上次咁等!! 下一次就係六個月先打針啦!!到時要打3枝!!好期待佢俾人打三枝針會點!!有D變態哈哈!! 5/19 再返黎!!! ************************** 其實健康院本小冊子有好多野要MARK!!一.一 但係原來有好多野都唔會MARK!!好似身高咁!!係上次度過一次,其他都無度過!!但係又有個圖表俾人,咁即係點呢?或者呢D只係家長想知ONLY,健康院並唔想知,只係做佢地應做既野!! 我以為個D表係每次去健康院都會幫我地MARK,原來唔係!!原來好多都係我地以為...事實並唔係咁!!! 我以為係我間懶,原來其他媽媽都係一樣!!要度就唯有自己黎度LU!仲要襯人少個陣,唔阻其他人個陣度!! 竟然係咁,唯有自己郁手!!哈哈!! ****************************************** 是日打完針,都驚粟米好似上次咁會發燒!!點知又無事喎,夜晚我仲帶埋佢出去同FD食飯,為左萬一,我連探熱針,退熱貼同退燒藥連針筒都帶埋係身,以防萬一!! 無發燒,不過胃口就麻麻,同埋有D扭,應該係打左針唔舒服所以扭!!今日就俾你扭一日啦!!

睇醫生

2014年03月12日
公開
13

今日第一次帶粟米睇醫生!! BOOK左4:30-5:00 我去到其實都就快5:00,仲要前兩個女人唔知搞乜鬼登記,搞左好耐,好驚姑娘話我過時,又要我重新排過,好彩無咋!! 好快就叫粟米啦! 入到去,我都未講咩事,醫生自己就開口講"又黎食輪狀呀?丫唔係喎,未夠時間喎,黎睇病呢" 我答"係丫,上次你話佢個粒野唔好,要再黎睇丫麻" 醫:"粒野有冇大左或者細左?" 我:"無大無細,都係咁" 醫: 你有冇幫佢搽? 我: 有呀 醫: 一日搽幾多次? 我: 個到寫兩次,我咪搽兩次囉!! 醫: 咁就睇下粒野咩情況先! 醫生拎放大鏡睇粟米粒野!! 醫: 嗯,粒野就暫時未見到係有咩菌,唔係椰菜花個D,我再用電筒照下個鼻先!! 跟手就換個尖咀形電筒,仲篤下粟米塊面講:"拿,BB,呢個係電筒黎架" 照完之後就話無咩特別!! 醫: 你放心,粒野暫時都無咩野特別,就唔好搞佢住,暫時都唔介紹專科俾你,因為如果轉去專科,要做手術切走佢,到時要麻醉!!咁細既BB就唔係太好,所以都係睇定D先,如果粒野無大到就可以唔理佢住,等佢慢慢消失!!我睇過就唔係咩病菌係入面!!可以放心!! 拿!呢次就唔收你錢啦!!到時粒野有咩事先再返黎睇!!咁我地下次食輪狀見啦喎!! 醫生仲叫我幫粟米搽多D CREAM,因為塊面好乾,仲話用凡士林添,佢話佢地細個都凡士林!! 結果就係咁,唔洗錢就走人!!!見完醫生唔洗俾錢真係第一次....!!

輪狀2(診)

2014年02月27日
公開
37

話咁快又要食第二劑既輪狀口服液,同上次一樣,當日打電話去預約!! BOOK個時明明聽到話11:30-12:00!唔知點解我11:45去到,佢話我過左時間,要重新排過!! 診所唔太多病人,都係等左一陣就到我地!! 入到去醫生就搞爛GAG!!一.一 醫: 又係時候食第二劑啦喎,我都想食下輪狀!!! 我: 下??唔係麻....!! 醫: 又睇下點樣餵BB食先!!BB要唔要加糖呀?? 我: 唔係甜既咩? 醫: 政府減左糖麻,無咁甜架啦依家!! 我: ......(=.=) 兩個姑娘開始餵緊,粟米有D掙扎...同扭計!! 醫: 係咪唔夠甜呀??政府減左糖呀,所以無咁甜架啦!財政報告減左糖丫BB!! 我: ......(=.=) 醫: 做咩咁忟呀? 我: 梗係啦,俾人禁住佢唔郁得丫,佢梗係忟啦!! 醫: 等我又禁埋佢對腳先 我: ......(=.=) 醫: 上次俾你個枝退燒藥你可以掉左佢未,因為我地每次個D退燒藥都唔同架 我: 掉左了 醫: 今次又再俾過枝退燒藥你啦,有燒就食,無燒唔洗食 我: 醫生,佢個鼻到有粒野生左係到,好耐唔退 醫: 生左幾耐呀? 我: 都有三個星期了 醫: 咁我送枝藥膏俾你返去搽,類固醇黎既,如果兩星期都唔好再返黎睇啦! 我: 哦 醫: 唔好既話可能要做手術整走佢! 我: 哦 醫: 我幫你MARK低左今次食輪狀既紀錄啦,下次就3月27再食第三劑啦!! 我: 好,唔該醫生! 多謝560蚊!!不過今次有藥膏送!!@@一日搽兩次,薄薄地搽!!希望搽左會好得返啦!!!

100日

2014年02月23日
公開
42

今日係粟米既100日啦!!我地BOOK左食自助餐慶祝!!!目的係希望真心登自己開心既屋企人可以食餐開心既飯,唔洗請同等埋D無謂人先食得!!!於是訂左THE MARKET呢間到食,仲BOOK左間大房,可以坐到16個人的!! 訂蛋糕時諗好唔好跟酒店訂一個,但係又驚唔岩心水,又諗會唔會食唔到,不如唔好訂啦!!諗諗下都係訂返一個好,唔係成餐飯都唔知係為100日而食,有D無意思!!所以走左去CAKE SQUARE訂蛋糕!!揀左一個立體蛋糕!! 6:30PM 去到酒店,叫左姨姨們幫我去附近鋪到拎蛋糕!! 上到去,發現間大房真係好大,張圓檯好大,間值係間PARTY房咁!!大姑媽一家仲早過我地到添!! 酒店預先安排好BB凳俾小朋友,但係粟米仲未坐到,唯有請WAITER幫我搬走!!WAITER唔知粟米有幾細,佢耐心地同我講,張BB凳好實正架,貪玩既我想試下,但係俾大姑丈打斷....!佢同WAITER講粟米好細,坐唔到!!為免WAITER難做人,我就同WAITER講粟米得3個月大,所以未識坐,WAITER就幫我將BB凳拎走,仲收走埋餐具同禮物!!事後我問返WAITER可唔可以俾份禮物我,WAITER都照拎俾我,仲提醒我入面有細小既骰仔,俾小朋友玩個陣要小心!!!^^ 坐低個時,大姑媽叫我唔好坐近門口位,話D人行來行去,好易撞到BB,叫我地坐過去佢地個邊!!我話佢知唔洗了,呢到D路好闊撞唔到,唔怕!!(係你自己緊張啫,再講我堅唔想坐係佢地個邊,如果真係咁為我地設想,佢地就唔洗一早就揀左個好位坐啦唔該!!! 坐低左之後,D人真係好意思未齊就人開餐,無錯自助餐都應該係唔洗等人既,但係都唔洗一黎就食啦,仲用個女做籍口,唔好唔記得仲有成半圍既人未到架!!!仲好意思同公公講個女餓要食先!!公公回應,咁小朋友係緊要D既!!! 之後,D人開始到了,細姑媽個男友仲巡左圈添!!!咁岩返黎,撞正我同粟米爸想出去巡一圈!!佢男友好細聲咁同我講"呢到真係好多野食呀,好靚添喎,仲多野食過帝苑", 好彩當時大姑丈不在哈哈!! 大姑媽又問點解我地咁叻識揀呢間酒店,我地無應佢,覺得佢呢條問題好無聊!!!之後佢兩公婆係到問幾多錢,呢個我答佢,628 加一,上年平D 5百幾加一,大姑媽就話"係啦我都上網CHECK過要6百幾",真係想打巴佢地,你地自己CHECK左,就唔好問啦,咩意思先,覺得我地會食CHEAP野??食壞你地個肚??點解D人咁賤格既呢!!!!! 到姨姨們拎蛋糕返到黎,經理就走黎問我地個蛋糕既野,可能蛋糕分左兩盒啦,佢以為我地有兩個蛋糕,佢問我地洗唔洗幫我地切,我話我想影左相先,佢話如果要佢地幫手切蛋糕就要每個100蚊,大家呢個時候都嚇一跳,以為係講每個人收100,我當然問清楚啦,係咪一個蛋糕收100,經理答係,我都同經理講,其實呢個蛋糕係一個黎既,想砌黎影相,未知食唔食!!之後經理都好好人,話幫我拎去廚房砌,搵個人跟佢去廚房教佢地點樣砌返就可以了!! 細姨跟左去廚房,仲話入到去好搞笑,係真係廚房,廚師仲問洗唔洗幫個蛋糕加D咩,細姨話唔洗,但係佢地都照樣加左D金薄落去,真係好搞笑!!! 又好奇怪唔知點解D人咁得意,無啦啦同自己老公交代話抱粟米同佢個女影相,就轉頭走黎抱走佢,就自顧自影相,之後成村人就要等佢地影完先影到大合照!!佢地真係好思意啦!!!完全唔覺得有問題,影完大合照,我就放粟米係蛋糕旁影相,之後換粟米爸幫我托住粟米,大姑丈又出聲啦,叫粟米爸小心佢條頸!!!佢做老豆既唔通會唔知佢個仔咩料??要唔要你提??? 因為D人自私,所以粟米有同咁多人影,我就無叫佢地三件一齊影,因為人地自私地影左,所以我唔俾面,唔叫佢地影!!呵呵!! 我地BOOK大房,係有MIN CHARGE,因為唔夠數,所以WAITER要搵人問下可以加D乜!!揀左加汽水同橙汁!!!D人又黎料啦!! WAITER見人地隻豬小朋友,只係關心問,洗唔洗俾杯橙汁佢飲,唔計佢錢,點知人地個賤老豆一開口就話"唔啦,你地都唔係鮮榨橙汁!!!點樣呀又?!難道帝苑就會有鮮榨?帝苑咪一Q樣無!!!人地只係好心問句啫,洗唔洗咁黎寸人地!!!只可以講句"無品" 不過好彩無搞事,唔係我地一定唔放過佢,以後咪見!!! 之後到8點半人家就話要走了!!係呢個時候大家都開心地講拜拜!!!因為佢地三個人走左,大家都無咁緊張,成日都驚講錯D乜人地會唔高興!! 當佢地走左之後,大家開始有講有笑,讚下呢到既美食,抱下粟米玩下!!仲有就係變成數臭大會,麻麻不斷向公公講返大姑丈既不是之處!! 仲要突然有個廚師拎住新鮮出爐既榴槤撻問我地要唔要,真係食自助餐會有人拎野食埋你地到問要唔要都係第一次!!!我叫佢幫我地放低半打!!新鮮出爐果然好味D!! 呢一餐真係好食,因為間酒店既擺設靚,好吸引,仲有刺身都好正,有三交魚刺身呢D例牌,仲有帶子刺身添喎,好大舊下架!!! 有魚子醬+三文魚子+吞拿魚沙律,佢地就話好好味,我就一般啦,因為好鬼咸!! 呢到出名有榴槤雪糕,平時呢D製品野我唔食,不過今次都試下!!! 榴槤雪糕 : 好重榴槤味 榴槤撻 : 超甜 炸榴槤 : 都OK,其實只係多層粉 可能我食左榴槤撻先食榴槤雪糕啦!!我覺得個雪糕無咩味,個撻就甜到爆!! 有鵝肝食!!都幾好味架!!! 不過呢到無生蠔,粟米爸就有D失落啦!! 有個雲南氣煱雞湯,都幾好飲架喎!!! 100DAYS 100DAYS 100DAYS 100DAYS

BB車

2014年02月12日
公開
48

終於捨得去開架BB車黎用,因為今早要返公司整野同收貨,抱住粟米返去工!! 打開大紙箱,拎架車仔出黎,感覺架BB車比想像中輕,拎出黎見到車轆係有D紫銀色,覺得好靚(發瘟中),之後慢慢研究點樣打開架BB車!! 此時粟米訓左係油壓凳上面!!! 係開BB車個陣,真係覺得好好玩,又開又合,哈哈!!(痴左) 之後放粟米上BB車訓,扣好安全帶!! 又試下連粟米帶車咁拎起睇下有幾重,又OK喎,我都叫做拎得起!!! 講真,買BB車個時,我都係上網睇到個款好鍾意就決定買,至於功能/重量...等等我其實買個陣無試過!!我諗應該無咩人會好似我咁痴線,因為睇圖LIKE而去買掛....!! BB車對我黎講架架都一樣,我唯一知既分別係重D同輕D!! 就係咁終於都開左架BB車黎用!!仲用得好開心!!粟米應該唔知我開心D乜哈哈!!! 又試下帶粟米出去深水步買野,又去葵芳!! BB車當然係好,唔洗揹住咁重,但係諗到有D地方係用唔到BB車,所以出街前就要諗定要去既地方應該揹丫定係BB車!!! 我成日去既地方都只係旺角同深水步比較多!!! 淨係旺角,信和已經唔容許我用BB車!!尤其係繁忙時間!!!再講深水步既黃金都係唔容許我用BB車,因為地方窄同樓梯上落!!諗諗下其實都有好多地鐵站無LIFT上落,呢D都係揹帶方便D!!! 我都有試過上巴士,連車帶粟米,我諗都只限唔多人上車個陣可以,仲要架巴士係闊門先OK!! 當一個人帶BB出街都係揹帶方便!!! 不過我實在太愛架BB車,覺得好靚好靚哈哈!!!用得好開心!!!

輪狀（診）

2014年01月27日
公開
51

打完針過左一星期，係時候帶粟米去食輪狀，因為政府唔包，所以自己去兒科醫生到俾錢食！ 早排仲諗邊到先有得食，咁岩見到粟米爸睇開既醫生原來都係兒科，所以打左去問，好彩都有得食，同埋行去就得，唔洗搭車！食3劑，每劑$560！剛好係我想要既！仲諗如果係2劑點好！ 3點打去book（因為之前問，姑娘話係即日book就得），姑娘問4：30-5：00到唔到，當然無問題啦！ 去到登記完，唔洗等好耐，就入醫生房！入到去都幾搞笑！ 醫：你係睇醫生，唔係食輪狀架？ 我：下？係食輪狀喎 醫： bb幾大？ 我： 2個月多d啦！ 醫： 你係邊間醫院生？ 我： 法國醫院 醫： 順產定開刀啊？ 我： 順產 醫： 順產咁好啊？ 我： 好咩？ 醫： bb係咪可以就咁除揹帶？係到食？ 我： 可以除•••（咩意思呢？） 醫： 丫，睇下有冇奶粉先，依家都好少人黎宣傳。 我： 咁好？ 搵左一陣••• 醫：哎呀，得2號，有排你都未食得 我： 唔緊要！ 之後睇針卡 醫： 丫，依家有寫13價喎，之前無寫架，我地靠估架咋，都唔知10價定13價•• 我： 係？ 醫：輪狀呢就唔同打針，分開既，我幫你mark架啦喎 我： 哦••• 跟住有兩姑娘黎，原來係餵粟米食輪狀！一個拎住水同膠羮，一個拎住枝透明物體（輪狀口服液） 醫：啊，我都睇下點餵先，未見過！ 我：係？ 醫： 你知唔知輪狀幾多錢一劑啊？ 我： $560蚊一劑丫嘛（驚我唔知價？） 醫： 哇，乜起左價啊？ 我： 咦，醫生你唔知價既咩？你唔好嚇我喎！ 兩位姑娘都係到笑！ 醫： 我淨係知舊價咋！ 醫：你依家呢個時間黎好，你咁多人，朝早好多人好忙，晏d又係好多人！ 我：係？d人放工所以又忙！ 食完，醫生俾我睇返針卡察左既野，再用memo幫我mark返幾時再食第二同三劑！ 今次都俾定退燒藥我，有燒先食，無就唔洗食，下次會有另一枝退燒藥，今次個枝就唔岩用，到時可以掉得架啦！