第三年的母親節，依然對呢個節日無感覺！
返左學當然老師就會教佢講\"母親節快樂"
但係佢其實都唔知邊日係，放學搭車既兩位k2姐姐都唔知邊日係，佢地只係知係星期日， 所以正常都未識咩係母親節！
由於無幫麻麻慶祝，所以我地同公公都係留返屋企打邊爐， 唔洗出街食貴餐！
開始食飯，我夾烏冬俾粟米，佢突然同我講"多謝你啊"
我問："多謝啲咩呢？"
粟米："多謝你囉"
我問："咁做咩事要多謝呢？"
粟米："因為你煮飯俾我食囉"
我問："係啊？ 咁你食多啲啦咁"
我又再問："邊個教你講多謝我架？"
粟米："無啊"
我問："老師教你？"
粟米："無啊，老師教整母親節禮物之嘛"
其實我應該開心，粟米識得多謝我，但係我聽完感覺又唔係好似人地啲媽媽講到咁感動！ 仲諗係咪有人叫或教佢講！哈哈我真衰！ 希望佢唔好激我就夠！
