婆婆係中秋節生日架, 我地預早同婆婆去食飯慶祝. 一如以往, 未開席前佢地又打雀雀, 但姐姐放咗假, 好彩仲有媽咪陪我. 媽咪知我鐘意食雪糕, 所以帶咗我去便利店買雪糕返酒樓食. 但食完之後, 我又覺得悶, 未又要媽咪帶我去多一次街街囉.
今次我一出商場, 就見到M記呀. 我唔理三七廿一, 一於拉媽咪去M記. 經過一條又一條既馬路, 爬過長長既樓梯, 終於到了. 我一馬當先去搵位, 雖然當時好多人, 但我好叻呀, 搵到一張近窗的枱俾媽咪坐. 我本來又想食雪糕架, 不過媽咪話啱啱食完唔可以再食, 咁惟有order薯條啦!!
終於等到食生日蛋糕嘞, 食完冇耐就開席, 我order咗可樂, 但唔知係未唔夠可樂呢, 我只分得1/3杯!! 唔理了, 我一叫乾杯便真係飲乾咗個杯. 唉! 冇汽水就冇得同婆婆乾杯了, 於是我叫樓面姨姨添可樂, 佢見我乖, 未又倒咗1/3可樂俾我囉. 前前後後, 我諗我都飲咗6,7杯, 真暢快......
