親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
Ivy
他的寶貝
他的興趣
文章分類
日期
#Tag
Hi~ 小寶真是可愛
資料載入中...
Lestari姐姐要走了，媽咪今日帶我去女傭中心揀過另一新工人。中心的姊姊好好人，又好笑，仲請我食百力支添。佢地好努力咁同我地介紹工人，睇啱咗仲可以視像傾計添。我地最後揀咗一個有四個take既姐姐，佢係新加坡做過兩年，依家在青衣做了四年，幾好咁啦，希望大家生活愉快！
我好鍾意計數架，但係都俾乘數有少少難倒，不過，經我努力之下，終於克服了，我可以由一背到九呀)))))))))))))))))))))
今日係新年，爸爸媽咪約咗班朋友上黎新屋開party呀，當然仲有D小朋友會黎。媽咪一早為我買咗波波池玩具，等我可以招呼下小朋友麻。 今日真係好熱鬧，爸爸同朋友打麻雀，媽咪和朋友傾計同準備火鍋食品，而我既任務當然係玩啦，我招呼咗D小朋友在我房玩波波池，真開心。
經過一輪辛勞，爸爸媽咪終於為天台買齊了組合屋、戶外枱椅和燒烤爐，可以趕及除夕夜bbq。 我第一次在天台bbq咋，當晚我、爸爸媽咪、公公婆婆、亞姨姨丈、表弟表妹同姐姐一齊圍住個燒烤爐bbq，真係好特別。我食了好多香腸，因為好好味。 差不多12時了，維港就快放煙花，我和表弟帶定哨子上天台，準備倒數完畢就吹。踏入12時了，2010年過去了，煙花除即發放，好靚呀，我地大呼大叫，真興奮，兩個工人姐姐係到狂影相，真好玩。 溢浠：依家係2011了, 但我鍾意2010呀!
今日係平安夜，又係我期待已久既日子，因為又可以去食我最鍾意既自助餐呀! 下午我一早沖好涼，帶住公公新買俾我地既聖誕帽，同表弟一齊出發去尖沙咀香格里拉酒店，會合爸爸媽咪同亞姨姨丈，一齊慶祝平安夜和大食一餐。今年係表妹第一次出席，不過佢都唔識食野，真可憐。 大吃一餐後，我和爸爸媽咪行了一陣尖東便坐巴士回家，在新屋過第一個平安夜。
今日係星期日，又係爸爸既生日。除咗慶祝爸爸生日，今日仲有一個任務，就係要幫天台添置一間組合屋。 上午我地去深水埗食完午餐，便揸車去到旺角一間專賣戶外傢俱既舖頭。因為之前我地都參觀過，所以sales姐姐都認得我地。爸爸媽咪好快便決定買之前睇中的一間組合屋，俾好錢後，原來時間唔早了，夠鐘去尖沙咀為爸爸慶祝生日呀!我最鍾意食buffet，真開心有得去半島酒店食半自助餐。 媽咪book了露台餐廳為爸爸慶祝生日，但未入餐廳之前，我們被門口既聖誕裝飾吸引住，特別係果列火車，火車行經既屋全部都係用蛋糕、餅乾和朱古力做架，真係好靚呀！不過肚仔餓了，都係入去食飽先。 餐廳的食物好好味，啲侍應哥哥同姐姐都好好人。都了上甜品時，佢地細心的在爸爸既小蛋糕上放上蠟燭和生日快樂既牌。爸爸許過願後，我和媽咪便立即唱生日歌，之後仲一齊吹蠟燭添。 半島酒店真係好靚，我地影咗好多相先捨得離開呀！
新屋裝修了兩個多月，雖然仲未完工，但因為雍澄軒既租約係24.11.2010屆滿，所以就算新屋仲未有大門、飾物櫃未有玻璃、書枱未到，爸爸媽咪都係今日入伙(除咗我)。
今日既目的地係高主教。因為佢係山上面，沒有車位可以泊車，所以我地先揸車到灣仔，次後再轉的士上山。我地坐了一陣，三位老師入到我地等候既課室叫名，我同爸爸媽咪便跟一位老師過隔離班房傾計。老師一坐下就話我乖，仲問我有什麼活動，當佢知道我有游水，便話唔怪之得我咁黑啦！不過當佢問我喜歡那一樣，我就如實答數學，仲話俾佢知我學緊乘數添。爸爸媽咪就講唔夠五分鐘便要離開，剩下我和單獨老師傾計，之後和另外兩位小朋友玩咗併圖遊戲便可以走了。 午餐之後我地去了黃埔shopping，因為Jusco大減價，爸爸媽咪好開心，幫新屋買咗好多野。我行到好攰了，佢地仍然興奮，臨走時仲話明天要再黎血併，唉！
今日媽咪收到浸小給我的信件，原來浸小取錄咗我，好野！唔駛咁徬徨了，至少有一間幾理想既小學收咗我。
今日再接再厲，爸爸媽咪和我一起去將軍澳既播道小學面試。個日又係人山人海，唔只學校門口出面泊滿車，連禮堂亦擠得水洩不通。 我和爸爸媽咪分開之後，和7-8個小朋友被老師帶到一間班房玩玩具，吓!仲撞到姚學禮添。之後就逐個小朋友同老師用英文和普通話傾計，傾完又可以匯合爸爸媽咪離開。好野，又完成一個任務。
今日雖然係星期五，但都係唔駛返學呀, 因為要去DPS面試呀! 我同媽咪早咗去學校，但已經見到條人龍了，我地便乖乖地一齊排隊。不出15分鐘，條龍已經好長，真係人山人海呀! 好快，我地可以入去了，行過一條長長既上山樓梯之後，終於到達學校門口，不過都係仍然要排隊等多一陣才可以入去禮堂，媽咪將我交給老師後便要離開。我和小朋友一齊去睇電視，係史力加黎架，之後又有lego玩，同老師傾完計便可以到樓下見媽咪。離開果陣仲見到區浩堯同佢爸爸係到排緊隊等上山。 我地之後去了旺角東個商場食早餐和行街，但因為太早了，所以好多shops都未開，我地唯有行下書局便返屋企。
今日雖然係星期四，但唔駛返學呀, 因為今朝又要去港同進行Part 2 面試。我同媽咪準時9:30到達，之後老師叫名就帶本書去排隊，一行7-8個小朋友入去玩遊戲。遊戲一係畫圖畫送給爸爸媽咪，遊戲二係同老師傾計，遊戲三係所有小朋友跟黃校長指示做動作(英文、普通話及廣東話)，之後就可以離開，都好好玩呀!
本來我經常係最早起身既一個，但今朝我竟然係最後一個起身，仲要媽咪叫我才起身。急急的食過早餐及梳洗後，我地向西環出發，目的地為St paul boy，今日既任務係去果到玩遊戲。我同其他小朋友暫別家長後，便排隊上班。我地先分組玩積木，啲積目我都未見過，好難切的，我只係切到兩舊。之後就聽老師講故事，聽完就到小朋友輪流睇住8張咭市講故事俾各位聽。最後每人獲派一張小咭便可以離開了。 距離第二場遊戲仲有時間，時間尚早，爸爸車我地去鯉景灣食個早餐先，跟住去了參觀電影資料館，再行下海濱公園，隔岸望下我地既新居麗港城，真是寫意。 之後，我地開車往柴灣出發。好似今朝咁，我同其他小朋友一齊排隊上班房，跟住聽下老師講故事同問下問題，玩一陣玩具便可以離開。落到樓下，好快就見到媽咪再等我，匯合爸爸後便去深水埗食米線。 完來媽咪任務未完，佢之後去了一間小學排隊交表，交完表之後我地才返屋企。今日真係攰了，連游水班都沒有上呀………
今日雖然係星期五，但係唔駛返學喎，原因係我要去英華小學多一次，去果到見一見Snoopy校長。 我地一如上次咁，先坐地鐵去深水埗，之後轉的士去英華，嘩！一去到已經見到好多小朋友在等候中。我地等咗一陣，突然爸爸都黎咗，好野，多謝支持，離開唔駛膽心有冇的士。好快叫我個名了，我地一行四人，每人拿著一中一英圖書向校長室出發。入到去，我只記得她同我們玩遊戲，之後我就讀了兩版英文書，跟住叫我地摸摸Snoopy個鼻就可以走了。 離開英華後，爸爸媽咪又馬不停蹄揸車去St Paul入表，由於不熟路，搵好耐至交到表，真係多謝爸爸媽咪既苦心同努力。我會加油的，請放心，希望唔會令你地失望好了。
今日第一個節目係去深水埗既英華小學玩遊戲。由於地點冇車到，我同媽咪先坐地鐵去深水埗，跟住再轉的士，咁就唔駛大汗疊細汗了。 我地早咗45分鐘到達，好彩學校開放有冷氣既canteen俾我地去休息。媽咪俾咗10元我去買野飲，我自己去冰櫃拿了一支水，之後去櫃面俾錢叔叔，叔叔找回6元給我，呀，原來支水要4元。 時間到了，我地一齊排隊上禮堂，但我地小朋友坐一邊，家長坐另一邊。拿了名牌後，我地一個跟一個好似火車咁去課室玩遊戲，而家長就係禮堂聽講座。 我只記得老師要我們畫圖畫，我就畫咗個禮堂。接著老師要我去看圖書，我看了一本中文書及一本英文書，老師要我讀給佢聽。雖然有些字唔識讀，但可以跳過去。之後，老師又問我問題，有中文又有英文的，所有小朋友完成後都有一個禮物袋，跟住就排隊離開。 原來只係玩咗一半，個多星期後要再去玩埋另一半，真忙。
今日一早起身，爸爸媽咪同我忙於梳洗，因為我地要趕去浸小玩遊戲呀。爸爸車車好快就到浸小，媽咪先帶我上演講廳，爸爸就去泊車。 個演講廳好凍，爸爸幫我著外套，剛剛著完校長就叫我個名去排隊。嘩！我係第一個被叫名架，不過我唔驚，好鎮定咁行出去。齊人後，我地去了另一個班房玩遊戲。首先，我地要畫圖，我畫了學校。之後，兩個老師一中一英咁問我問題，問完之後就同小朋友分組去切合作積木，要鬥高的，真係好好玩。 爸爸事後問我鍾意這間學校嗎? 我鍾意呀！
今朝食緊早餐buffer時，外面落好大雨呀，媽咪話不知去唔去到海洋公園，但爸爸話唔緊要照去，好彩食完早餐後天晴。 昨日因為太多人所以沒有坐吊車，今日一到步就立即去坐吊車上山，連熱氣球都唔坐了，因為又要排一個鐘，仲要可能因大風而暫停。坐吊車真舒服，又涼又爽。我地參觀了海洋世界，睇到好多大魚。跟住就去了威威樂園，玩咗火車、摩天輪、跳樓機等。最近，我和爸爸玩拋波遊戲，仲羸咗一隻粟米同一隻八爪魚公仔添。 兩日既海洋公園之旅已到尾聲，真係有啲唔捨得，希望快啲有下一次就好了。
今個暑假，媽咪book咗南灣海景酒店既海洋公園套票等我玩反下。原本媽咪只係想同我去海洋公園，但俾佢發現南灣海景酒店有個海洋公園套票，一晚酒店+海洋公園套票兩日門卷(兩大一小)都只係$1288, 加多$500仲可以食埋buffer添。於是，我地今日就出發了。 因為爸爸唔熟路，我地揸車兜咗好耐先搵到間酒店。Check-in 完，我地立即去排隊坐穿梭巴士去海洋公園。原來架巴士只有28個位，好彩我地係第25至27個啫。 嘩！今日天氣好熱，但係又好大風喎，搞到我地冇得坐熱氣球，於是我地去咗睇熊貓，之後就坐新既海洋列車上山。落車後，我地去咗餐廳醫肚，食完碟百多元又難食既肉醬意粉後，就去咗水母館參觀。雖然啲水母好得意，不過我冇影相，因為我………驚呀。 之後，我地去咗排摩天輪，卒之排咗45分鐘才有得玩。雖然排得耐，但我好開心，仲想玩多一次，不過爸爸話海洋劇場快開始，我地要去擺位呀。於是，我地又去海洋劇場等海豚和海獅表演。睇完之後都好攰了，我地就坐車返去酒店休息下，梳洗後就去餐廳食buffer。明日我會再去過，海洋公園等我呀。
望咗好耐，終於等到今日我五歲生日啦。 今日媽咪放咗工便去餅店攞我地一早揀好既生日蛋糕返黎，仲買埋我最鍾意既”5”字蠟燭添。 食完飯，吹完蠟燭後，終於可以開爸爸媽咪和tari姐姐個兩份禮物了。兩份禮物都係我最鍾意既玩具，爸爸仲即刻同我一齊玩添，生日真係開心！
上星期日，我地行荷里活廣場，路經戲院時，我發現1/7有史力加睇呀。我第一時間問媽咪可唔可以帶我去睇，佢應承咗我呀。於是，今日我地去咗黃埔，行街蒹去戲院睇3D史力加。 入場前，媽咪先去買汽水同爆谷，而爸爸就負責攞飛同3D眼鏡，我就真係又緊張又開心。好快個半鐘過去，完場了！原來去戲院睇戲係咁得意既！
今日星期六，又可以去小學玩遊戲，但係媽咪今日要返工，所以我係婆婆屋企等爸爸帶我去小學。 今日既遊戲有： 和老師互相拋豆袋 做工課 ~ 要寫中、英文名，圈圖畫，畫蘋果 老師沒有問我問題，不過好好玩，希望下次既小學遊戲日快啲到就好了。
平時，第一個起床的永遠是我，但今日一朝早，爸爸媽咪已經起了床，疏洗好。原來，今日有個重要節目，就係去旺角區既優才小學玩遊戲。 去對面茶餐廳，用極快速度食過早餐後，爸爸車車一支箭咁往旺角進發。到了學校門口後，我和媽咪先落車，爸爸把車泊好後同我們匯合。我地入到禮堂後，校長叔叔請我們小朋友出來去玩遊戲。我們排隊扮火車，入完炭後便起行去玩遊戲。以下係以我謹餘既記憶講出之後所發生既事： 老師會同我們小朋友遂個傾計，老師首先指著我既名牌問，你識唔識讀這個字呀? 其實佢想問我識唔識讀”林溢浠同學”個”學”字，我就答佢係”學”字，老師接著送我一粒糖。之後，老師攞了一本中文書及一本英文書請我讀，雖然都有啲字唔識讀，但都盡力讀完，老師再給我一粒糖。重頭戲來了，我們一起跟Mr. David去操場玩遊戲。玩完之後，Mr. David亦送我們每人一粒糖，但條件係每人要同佢講”thank you very much, Mr. David.” 不過，我就講成”thank you very much, Mr. Baby.” Mr. David即刻笑死咗. 媽咪之後接我走，我即刻同佢報告呢到好好玩。哎，估唔到臨走，學校送我一個上鍊機械人，真係開心。 我地回家小休後，又出發去睇樓，今次睇既單位得一個咁多，不過爸爸媽咪好似好鍾意咁。由於今日係父親節，睇完樓後便立即去酒樓食飯慶祝一下。 今日節目真豐富!!
因為上次我地係浸幼十週年晚會表演既牛仔舞非常受歡迎，所以我地再一次被邀請在香港浸會大學國際學院的籌款節目中再次表演。為咗今次表演，我地幾乎每一日放學都要留在學校一小時去排練。雖然辛苦，因為沒有校車坐了，不過都是值得的，因機會難得，而我都好喜歡跳拉丁舞。 今次既舞與上次有少少不同，加入咗部份cha cha和 ramba，而且仲轉埋partner，今次我既partner係陸悠悠。節目係下午進行，爸爸媽咪一早帶咗我去大學會堂進行採排。可能因為啲觀眾甚少睇啲咁細既小朋友表演，我地一出場佢地就非常興奮，有些在笑，有些會拍手掌打拍子，總之看得非投入和開心。 表演完後，園長送我地每位小朋友一份禮物，仲影埋大合照留念，真係開心。希望好快會再有機會去表演就好了。
媽咪話帶我去將軍澳跟林sir學游水好，因為好快會學識，仲會好叻添。今日，媽咪就帶咗我去上第一堂了。 將軍澳個游泳池好靚，又有幾條滑梯俾人玩，仲有一個掛在半空既大水桶，裝滿水會淋落水池，好好玩。 我地一去到就見到有兩個同係4歲既小朋友用自由式游緊水，林sir叫我帶好泳鏡就落水。 林sir問我識唔識游, 我答識, 佢叫我游俾佢睇, 跟住我便用腳踏水, 全場人在笑..... 突然間, 個兩個女仔游埋林sir到, 林sir話佢地手勢不對, 每人打了幾下手板, 好大聱, 好驚啞..... 之後, 林sir要我不停踏水, 又打我隻腳, 我喊, 但他鬧我, 叫我收聲, 我話我好驚佢, 佢唔理, 仲話數三聲後要我收聲, 我唯有收聲..... 接著, 我覺得凍, 於是媽咪叫姐姐俾我著保暖衣, 但林sir唔俾, 佢話如果真係游緊水係唔會凍既, 仲叫個兩個女仔過黎問佢地凍唔凍, 佢地緊係話唔凍啦... 個日回家後, 我好唔開心, 我叫媽咪唔好再帶我去, 我真係好驚. 好彩, 爸爸肯聽我講, 俾我退出....如果唔係.....
昨晚表演完牛仔舞，因為太攰，係間餐廳到睡著了。今朝一覺醒來，啊!原來我身在葵涌新屋。(爸爸媽咪係4月27日已經搬到雍澄軒) 間屋好靚，坐在廳中的大窗台可以望見樓下的泳池，媽咪仲話我乖的話，會帶我落去泳池游水添。 我都好鍾意呢間屋，不過媽咪話我地只係暫住6個月。當爸爸買番間大啲既屋時，我地就會搬走了。
今日係香港浸會大學附屬幼稚園成立十週年的晚會，為了慶祝幼稚園十歲生日，我地全校既小朋友都參與慶祝十週年晚會的表演。由於我之前在堂上學拉丁舞既表現唔錯，所以被老師揀選去表演跳牛仔舞，而partner係黃卓瑤。 經過多月來的訓練和採排，表演既時刻終於來臨。今日下午三時，公公已準時帶我到大學會堂集合，預備為今晚表演採排。雖然辛苦，但好好玩，好開心。食過晚餐(三文治)後，我們便緊張地等候表演。 晚會開始後，我們看了多個表演節目，約個多小時後，我們被安排上台了。我們出場冇耐，便聽到台下的歡笑聲。但我沒有理會，只努力的投入跳舞。完成一刻，台下傳來熱烈掌聲，真係好開心。不過，最失望是找不到爸爸媽咪在那裡！ 散場後，爸爸媽咪好快搵到我，我地便坐車去食消夜慶功。但由於太攰關係，一入餐廳便倒頭睡了……
今日下午唔需要去學畫畫了, 因為今日係定期牙科檢查, 媽咪同姐姐帶咗我去深水埗睇牙醫. 因為婆婆唔見咗我既身份証同針咭, 媽咪好唔開心, 所以我都好乖, 一路上都冇紐計. 去到診所坐咗一陣, 我就聽到有人叫我個名, 仲叫我去28號房添, 於是我地就起身去搵28號房嗱. 入到去, 我就二話不說坐上去八爪魚椅, 姑娘幫我較低張椅. 我即刻有啲緊張. 醫生叔叔就俾咗塊鏡我照, 於是我未自己張大口照牙囉. 之後, 醫生叔叔話幫我數數牙齒, 看看齊唔齊二十隻, 我就好合作咁張開口給他數. 但醫生叔叔發現我有啲牙比較污穢, 他立即用工具幫我清潔, 又用風咀吹吹我既牙齒, 其間他不停同我講”唔會痛”, 佢冇講大話, 又真係唔痛喎. 終於檢查完畢, 醫生吩咐30分鐘後才可以飲食, 臨走時佢仲讚我”合作”同”叻叻”添. 由於30分鐘後才可飲食, 我地唯有返回藍田才可食雪糕lu. (**原來我係有爛牙, 醫生幫我補咗上面兩隻門牙和下面一隻大牙. 好彩醫生話兩隻門牙會係5歲換, 不會影響恆齒生長, 而下面個隻就會9歲至換, 但因為已經補咗, 所以都冇影響. 俾人補咗咁多隻牙我都唔知喎!!)
今日我地會去天水圍慶祝姨婆既生日, 不過未去之前, 我地先去麗港城參觀下姨姨既新屋企. 爸爸揸車車去到麗港城, 我以為又係去睇樓, 原來係去姨姨既新屋企. 因為姨姨已賣出九龍灣間屋, 佢地要盡快搬屋, 所以暫時租咗麗港城黎住. 間屋好似婆婆屋企架, 不過少了一間房, 但由廳望出去, 可以搖遠望到婆婆屋企, 真得意. 希望爸爸快啲買大屋俾我地就好嗱. 參觀完麗港城, 我地陪姨姨姨丈去買衣柜, 之後我地再返匯景車婆婆和表妹佢地入天水圍酒樓食火鍋慶祝姨婆既生日. 今日真係忙呀!
今日係2010年既第一日, 我同媽咪食過早餐後, 便坐地鐵去彩虹轉小巴去曉暉花園, 我地要去Phyllis姨姨屋企呀. 其實我地上年都黎過, 今年再黎, 見到其他小朋友已經大個咗好多, 我地一齊玩, 已經再冇爭玩具既情況了. 而晴晴同凱欣已經考到小學, 凱欣仲考到女拔萃添, 真叻. 下一年到我考小學了, 希望我都有咁既運氣, 考到心儀既小學啦.
婆婆話今日係打針日, 今日我, 霖霖, 表妹同公公都要打針呀! 今朝我同公公婆婆去美心飲茶, 飲到中段, 公公帶我去李醫生到打流感針. 我好叻呀, 我冇驚. 醫生首先用綿花糖係我手臂上揸, 之後咭針, 跟住再用綿花糖按住, 如果沖涼可以徐咗佢, 唔小心掉了污了都唔要. 我打完之後, 醫生送咗粒啫喱糖俾我, 之後就到公公打針了. 我地打完返去美心繼續飲茶, 冇耐霖霖到了, 他又去李醫生到打針. 佢都好叻, 因為佢冇喊呀. 而表妹呢, 佢就要等到下午才到健康院打針. 婆婆講得冇錯, 今日係打針日, 我地四個今日同日打針喎. 晚飯後, 今晚只得我同媽咪一齊瞓覺, 因為爸爸要做野呀. 媽咪話今晚過了12點就係2010年了, 所以當11:59pm時, 大家會一齊倒數, “10 9 8 7……0 Happy New Year”咁喎. 我同媽咪講我要一齊倒數, 如果我瞓咗, 要叫醒我. 結果, 我當然睡著了, 好在媽咪係11:59pm叫醒我, 我地可以一齊倒數, 今次係我第一次既新年倒數, 仲睇埋煙花添! 媽咪問我既新年願望是什麼, 我就話希望新年之後會乖, 媽咪聽到好開心. 希望我真係做得到啦.
