今日係學期最後一日, 學校好有心思, 安排左Junk food專家麥當勞餐廳搞Party, 每個小朋友都有一份兒童餐, 跟據我返來報告, 有一個漢堡包, 兩舊麥雞(麥樂雞), 好多薯條, 橙汁, 媽媽問我有無麥樂雞醬, 我話無, 但有茄汁. 禮物係一個史力加玩具, 但我無興趣. 媽媽問可唔可以請佢食, 我好招積咁話:"食晒囉, 係我個肚DUM度, 無得食!" 真可惡.
食完junk food真係無胃口食飯, 炒米粉食左好少就話夠, 媽媽叫我去眠一眠, 訓醒去玩. 訓到三點食奶彈起身, 就出發去迪士尼. 媽媽的annual pass就快到期, 要爭取機會去多一次.
今日好曬好熱, 但不減我的興致, 人唔算太多, 但已有點暑假FEEL, 我地成功玩左巴斯光年兩次, 小熊維尼, 史迪仔, 太空船, 小小世界, 但馳車天地太多人, 最後都放棄. 今日突然想睇煙花, 最後睇晒成場先走.
出到葵芳已9:00, 晚飯都食得唔多, 可能唔啱胃口, 之後竟然撞到蘇姑娘, 我一見到佢就"摷"佢個手袋揾玩具! 講開又講, 蘇姑娘大學時期原來同媽媽住同一間宿舍, 即利希慎堂, 仲住過媽媽Yr 1時住過的906號房, 蘇姑娘同行的兩名朋友都係希慎人, 見到媽媽呢位大大大仙, 幾乎要下跪!
飯後去葵涌廣場食十蚊三球好味雪糕, 我揀左曲奇, 朱古力和綠茶, 返到屋企已經11點!! 沖涼後仍堅持要睇下書, 最近媽媽在淘寶買左一套國內版Oxford reading tree, 係正版仲連CD, 我愛不釋手, 一口氣睇左十七個故事, 睇到眼垂晒先肯訓.
