又到左私家產檢日，我地2：30去到，早一個鐘到，預左有排等，三點醫生由醫生房走出去，著住件醫生袍，到佢返黎已經4：06，估計應該係去食飯啦，返黎個陣換左西裝。
之後就開始睇，入左第一個之後，阿嬸推左兩個病人係房門等， 一個後生女，一個大少少但是好似暈暈地咁係輪椅，第一個出返黎之後，姑娘推個暈暈地既入房，無幾耐突然跑左兩個著晒保護衫既姑娘入醫生房問咩情況，跟手有個姑娘仲叫出面另一位姑娘幫手，唔洗一陣就成架床推入去醫生房，好似好危急咁，到推病床出黎，我見個女化心之前更面青，成堆人連醫生都一齊唔知去邊，唔知係咪小產呢？因為之前登記都見個女人個肚係有左bb，只係唔太大啫，希望佢平安無事啦！
以為咁突發既事有排等啦，15分鐘後，醫生又返黎，繼續睇症。
睇左三個先到我，都差不多5點，入去都係問同樣問題，有冇流血有有肚痛，跟手醫生拎左一疊文件，話瑪嘉烈寄左報告俾佢了，醫生就續張睇，我以為淨係驗血報告，點知有埋最近check既B鏈球報告，唐氏，德國，血型，結構，血糖，血色素，地貧，加上B鏈，所有報告都正常！
醫生俾返份報告我keep，叫我到時要生就帶埋呢份野！
之後上床照粟米，醫生先照頭，頭圍正常，肚都係細，醫生話個b應該唔係肥b，睇到心跳，大脾骨正常，我問醫生照唔照到樣，醫生話依家粟米已經捲埋一舊，睇唔到樣lu，今次醫生照臍帶，我仲以為醫生係聽緊心跳添，原來醫生係聽緊臍帶輸送頻率，佢唔講真係完全唔知醫生搞緊乜！當時粟米咁岩又打緊egg，連醫生都感覺到粟米郁左一下，我答”係啊，佢打緊egg”，聽完正常就落返床！
醫生話粟米個頭比之前低左，落左少少，有機會39週到出世，粟米size唔太大，應該順產無問題，醫生又問我隻戒指除唔除得甩，佢話有孕婦順產唔到，到時要開刀，用儀器，儀器既電如果去到金屬有機會燒傷，為安全到時就會要除戒指，如果除唔到就要幫你剪爛隻戒指，((((；ﾟДﾟ)))))))，好彩我仲除到！
醫生今次俾埋封入院信我，佢話有見紅穿水陣痛苦，是但一樣就帶埋入院信同資料去新院3樓產房！
我問醫生如果過左預產期，要幾耐返黎催生？ 醫生話一星期，到時會打電話call你返醫院催生！
體重：66.9kg
心跳：97
血壓：79/119
體溫：36.9
小便：有少少蛋白尿（應該係食完飯所以有）
醫生叫我唔好食太甜既野。
粟米依家有 2853g 即使6lb5oz!
跟住就下週38週再見醫生了。
下次約期為：2013.11.8 下午3：30
37W2D 臍帶流動
37W2D 大脾骨
37W2D 頭圍
