今日好早去到,因為book左8:45am,我地8:34am到,但係其實健康院都未開門既!!一.一車!!
之後 8:50am先開門,開門前阿嬸問我地有冇接觸過生水痘既病人,無就入得啦!!
又係例行公事,拎籌,磅重,量血壓,驗小便!!!
體重: 64kg
血壓: 70/104
小便: 正常
之後倒左小便,好快就入1號房了,又係阿嬸摸肚,問我幾時預產期,摸肚同聽心跳,咁就落返床出返去等啦!!
唔知係咪早,所以又好快叫左我去8號房,姑娘我認得係上次個位,佢話我體重輕左,問我係咪病過黎,我答係,早幾日係病過下!!姑娘就叫我試下慢慢行返出去,之後再去磅過,磅完又再行返黎話佢知幾重!!(磅多次會重d咩?)
咁我唯有去磅下啦,磅完正走返出去個陣,2號房個兩個姑娘好奇怪咁問"咦你唔黎登記既?",我微笑回答,"因為姑娘叫我磅多次,所以我走黎磅下"(其實都預左會俾人問,俾我都會啦,邊有人咁奇怪,無啦啦走黎磅完又走架)
好啦,又返去同姑娘講,都係64kg,姑娘問我,有冇穿水,有冇咩唔舒服?我答無呀,姑娘就話,咁不如都係見下醫生check下啦!!我答"好"!又出返去等!!
我依家先知原來呢間健康院係有醫生哈哈,第一次有機會見到健康院既醫生,聽到叫名去18號房,見到門口真係有寫名架bor哈哈,女醫生黎既,入到去醫生叫我訓上床!!
張床....有d奇怪,首先佢係一張以前寫字樓舊式既鐵檯咁,細張但係上面係床,話雖右邊有個腳踏位,但係睇黎似一踏上去會反咁,好唔穩陣feel,再加上近尾係有兩枝鐵架掠腳架,再加一盞燈,咁窄既位,我如何上床呢??結果都係試一試啦,慢慢踩上去再訓,張野果然係細小!!
好啦,醫生幫我檢查,我仲以為醫生會照下d野咁,結果係重覆阿嬸做既野,摸肚,係肚上面用軟尺度size,再聽bb心跳 (完)!!
醫生就話bb都係正常,無問題,落返床,仲話輕左少少唔怕既!!一.一 下?見醫生原來就係這麼一回事......
之後又返出去等叫名,又去返8號房搵姑娘,姑娘就同我講,唔可以輕架,記住食多d野,其實我都唔知自己輕左幾多哈哈,之後姑娘又記得上次我問驗血報告既事bor,佢仲話原來近幾次既產檢都係佢,話我同佢有緣,仲問我申請驗血報告個到點,我答返佢細節,佢就話"嗯,咁我下次識同d病人講啦"又問我咩係G3,我LOAD左陣,因為我真係唔太明,諗左陣先醒起,係G座3樓,係瑪嘉烈既醫療紀錄部,姑娘問"洗唔洗錢架?"我答"唔洗,仲話會幫我寄俾醫生添"閒聊完大堆野!!!
跟手就拎返份野走,同約下次既期!!姑娘仲加多句"下次見紅,穿水,陣痛唔洗返黎啦,直接拎埋份野去醫院啦"
預約期 2013-11-07 8:45AM
