今朝姐姐幫我量體溫, 有成101度. 婆婆又帶咗我去見醫生, 醫生二話不說就寫咗封信叫我地去聯合醫院睇急政. 婆婆一方面打電話叫媽咪去醫院, 一方面同公公抱住我去醫院.
去到醫院, 醫生即刻同我照X光, 照完冇耐就見返媽咪. 媽咪見我唔肯飲水, 就去便利店買咗包維他奶俾我飲, 可能我真係好口渴, 我好快就飲完一包. 公公見我肯飲野, 又去買多一包俾我, 我都一樣飲哂. 不過, 當公公再買第三包時, 有人叫我個名呀. 跟住我就冇飲到, 一行人跟咗個姨姨行. 我好驚呀, 我估都冇好野嘞, 未係咁叫走啦 走啦)))))) 但係都冇人理我!!!!!
去到一個叫做4E既房, 婆婆唔入得, 只係公公, 媽咪同我入去. 個度好得人驚架, 個個帶哂口罩, 連公公同媽咪都要帶. 跟住有人問媽咪好多問題, 我就去度高,磅重同量血壓, 我好驚, 不停叫走啦走啦, 大聲到連房外既婆婆都聽到!!!!! 之後有兩個姑娘抱咗我入另一間房抽鼻水, 真嚇人. 掂知好戲在後頭, 有成四五個姑娘抱咗我去一張床到, 要抽血同種豆準備有需要時吊鹽水, 死未!! 我可以做既係併命的唉 "走 走 走啦 走啦......"
之後公公走咗, 媽咪抱我入咗一間房到睇電視. 個間房好得意, 要經兩度門先可以入到房. 冇耐, 又有一個姐姐入黎, 完來佢係我同房, 不過佢大我好多, 有成五六歲架. 過咗一陣, 爸爸又來了陪我, 咁我都冇咁驚. 雖然有個護士姐姐請我食雪糕, 但我都冇胃口, 如果係平時我一早食哂嗱.
之後, 姐姐又黎咗陪我, 仲帶咗D書書俾我, 但我冇心機, 只係伏係佢博頭上, 想瞓又瞓唔到.....而爸爸同媽咪食完野走咗, 媽咪之後就返黎陪我.
因為我在第二次探熱有燒, 所以要食藥. 姑娘姐姐用針筒餵我, 我好叻呀, 全部同佢吞哂, 不過就係唔肯食粥粥同奶奶, 媽咪好擔心我因為缺水而要吊鹽水, 好彩醫生見我有眼淚, 即係仲未缺水, 可以再觀察下至決定需唔需要吊喎.
跟住有個姑娘同我地講, 我同隔離床既姐姐D化驗報告正常, 原本可以轉去普通病房, 但因為普通病房爆滿關係, 我地只可以轉去對面房, 對面房既分別係少了兩度門, 會方便出入D.
到咗夜晚, 當我瞓咗之後, 媽咪就返屋企了, 只有姐姐陪我, 因為醫院只准一個人陪我咋.
驚嚇既一天暫且終結......