首先我想同姐姐講句sorry!! 因為尋晚我每一個鐘頭醒一次, 朝早五點就起身, 搞到姐姐冇覺好瞓.
我估媽咪就快黎, 於是企向門口等佢, 終於媽咪八點半就黎咗, 仲買咗支蘋果茶俾我飲添, 我一口氣飲哂佢, 媽咪讚我叻叻呀. 其實佢未黎之前我仲乖呀, 我飲咗兩支維他奶同食咗一碗粥粥, 仲大大小小一齊黎, 片片都唔夠用添.
之後醫生夠鐘巡房, 我見到佢地就心都震埋, 即刻伏落媽咪到喊. 佢睇完我喉嚨之後, 就話我仲有痱子, 不過已經冇咁紅了. 而且因為我肯食野同飲水, 有尿尿痾, 又冇發燒, 可以返屋企休息了. 當我聽到可以返屋企, 我即刻收聲冇喊, 仲應媽咪要求, 同醫生哥哥講咗兩次多謝, 為表誠意, 講多謝時仲冇鞠躬添......
姐姐同媽咪立即收拾細軟, 而姑娘姐姐就幫我除去左手既針豆. 因為佢地尋日用咗好多膠紙包住我隻手, 所以除既時候好困難, 仲連D毛毛都滅埋, 真係痛入心架, 我忍唔住又喊咗出黎........
卒之返到屋企, 白白豬完攰到終於瞓著咗, 不過都係瞓咗兩個字就醒了, heheheheheh......
呢兩日真係令人發惡夢, 希望浠浠身體健康, 冇病冇痛, 同醫院講bye bye, 不過冇再見!!!