第二間面試既學校,又係無咩特別準備,不過粟米今早起身有少少鬧脾氣!!
去麥記食個早餐,就行去太陽島啦!!
行到去唔算好多人,有一位老師企園內迎接,叫我地行經鐵框路行,但似粟米打斜行,行左遊樂場個邊,結果變左我地都打斜行,行去樓梯到!!
上樓梯時竟然有位老師無啦啦好熱心咁扶粟米行樓梯,粟米爸已經講叫老師可以唔洗扶,但係老師依然扶粟米行到頂!!真係有咁緊張咩??老師太熱心啦!!
入到門口,見到校長企左係一個位,負責MARK入黎面試既人!!校長見到我地入到去,佢就大聲問:"係咪面試?" 我答"係呀" 校長問:"小朋友咩名?" 我邊行去校長個到邊答"盧晉宇"!!
之後,交返上次漏左交既地址證明副本,校長俾左一張野我,MARK低陪粟米面試既有爸爸同媽媽!!張野一陣要交俾面試既老師!!
因為未到我地,叫我地坐係到玩住玩具先,粟米都好ENJOY玩檯上既玩具---> 砌圖形!
當時都只見到有一位小朋友等緊面試,我以為等齊人先可以GROUP IN,原來估錯左!!
坐係到玩時,我見有小朋友入緊黎,我同粟米講話有小朋友,佢突然走出去同小朋友HELLO!!校長笑住同我講話粟米走左去迎接小朋友!!
見到一位小朋友面完試出黎同校長講拜拜,就到另一位上去班房面試,今日既面試係單對單!!
突然聽到叫盧晉宇,玩得好開心既粟米當然唔願走啦,我地同佢講上面玩第二D玩具,佢先肯走,仲想砌返D野先走,但係老師催促,話唔洗執,有人會幫我地執,上去面試先!!
咁就唯有拉粟米走,上去樓上班房面試!!粟米自己行樓梯上去,老師叫佢拖住我地,但係粟米呢期鍾意自己上落樓梯呢...唉!!
上到去粟米唔識路,當然就拖住老師行入班房啦!!我聽到老師同佢講:"早晨啊,我係韓老師!!!" 佢就講"早晨"!!
老師叫佢講\"早晨,韓老師",粟米都有做到!!老師問佢叫咩名!!今次粟米有答喎!!
我地坐低,粟米坐係我地中間,老師坐對面!!
老師坐低就自己介紹一次,之後就介紹一個公仔(男仔樣)叫豆豆!!叫粟米同豆豆講早晨!! 呢個粟米有做到!!
老師叫佢同豆豆握手,粟米開始坐唔定,仲望到後面有D數字就成日想轉身去後面講數字....唉...!!當然都有做到握手既!!
老師問粟米邊到係鼻,叫佢指豆豆個鼻?? --- 有做到
邊到係咀? --- 指左個鼻
老師問粟米自己個耳仔係邊?? --- 有指岩
邊到眼晴? --- 有指岩
老師問佢隔離個位係邊個(指住粟米爸) --- DADDY
老師問呢個係邊個(指住我) --- 媽媽
老師問咁你叫咩名? --- B豬 (屋企有時我地會叫佢呢個名)
聽到佢咁講,我就話"唉,又係到玩野",老師就話唔緊要,佢之前都有講自己個名既!!
粟米面試期間不斷轉去後面睇數字讀數字....直到另一個考驗,砌圖形!!
老師首先叫佢雙手拎塊玩具出黎,粟米拎左出黎之後就好急不及待咁開始拎起一舊舊既野出黎,俾老師叫停,等老師拎左一塊,話可以先叫佢幫手拎!!老師仲叫我地唔好幫佢,等佢自己做!!(我無打算幫囉哈哈)
拎晒出黎之後,老師叫粟米幫手砌返好,凌型就有亂砌,可能少見啦!!佢當左正方形咁砌!!不過係老師引導之後,佢都砌返岩!!砌完之後,老師問佢顏色,粟米都答到,但係我諗老師唔預粟米係講英文!!!
老師:"你件衫係咩色呀?" 粟米:"RED"
老師:"咁媽媽個袋咩色呀?" 粟米:"BLUE"
老師:"咁呢個呢?(指住公仔上面個塊布) 粟米:"YELLOW"
又黎啦,我都估到啦....老師問我平時教佢係咪用英文,我話唔係,係佢睇片自己學左,有時我都唔知佢幾時學左!! 老師話粟米偏向英文多D喎,咁媽媽你要同佢講多D中文!!(我由頭到尾都無同佢講英文架大佬)
老師要粟米幫手放好玩具,叫佢放返入膠籃!! 粟米都好乖做到!!
老師拎左張野出黎,就同我地講,其實個面試就完左架啦,咁呢到有張野俾你地返去睇,係學校個D註冊費啊書簿費既資料俾我地返去睇,收生既結果就12月頭會寄信通知!!到時如果無收到信就可以打返黎問!!
就係咁完成左面試,走個陣我叫粟米同老師講拜拜,粟米當然係就咁講拜拜,老師要佢講\"拜拜韓老師",講左3次先肯講!!
走時經過,又同校長拜拜!!走返出去見到滑梯又想玩,問左可唔可以玩,老師答話可以,不過岩岩洗過黎叫粟米小心!!
結果粟米爸俾佢玩左一次,我地就走了!!
我以為依家D學校都係GROUP IN添,原來唔係,都仲會有單對單既!!
單對單有單對單既好既,起碼粟米會講自己個名,會專注D雖然條友都係坐唔定!!成日想轉身周圍望!!!
粟米爸就話呢間肯定收粟米!!見佢都唔太多學生面試!!多唔多就唔知了反正我地都睇唔到既!!等消息我就知哈哈!!今早見佢有D鬧脾氣仲以為佢面試會麻煩添,點知又無咩影響到佢BOR!!好彩!!
依家仲有一間未面試,12月先會面試!!唔知到時粟米又會點了!!
