親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
[left1]今早我如常爬來爬去, 如常搞搞震唔比媽媽訓, 如常趴趴下大左個便, 媽媽同我沖完涼就落超級市場買豬潤, 試下煲豬潤粥, 今日兩點婷婷姐姐來補課, moon姨姨錫到我燶, 同我一齊玩玩具, 又抱住我抱到我訓著左! 我現在已經認得一d經常見面又同我玩的人, 我見到佢地會好大反應咁笑, 唔認得果d就啤到佢實, 但唔會喊. 天氣太熱, 我家幾乎冷氣長開, 下午媽媽同我在房一齊訓左個冷氣晏覺, 我自己一個人唔訓得耐, 最多半個鐘就醒, 媽媽同我一齊我就訓耐d, 通常超過一個鐘, 所以媽媽好鍾意暗我訓晏覺, 因為佢都可以訓埋一份! 閱讀樂趣多!表姐今日六點幾先來到, 我見到佢都大笑, 表姐成日見點會唔認得? 跟住思云姐姐上來我就無笑, 因為我唔認得佢! 思云姐姐應媽媽的要求, 攞左好多扭蛋殼比我, 媽媽話想用扭蛋殼做一d玩具比我玩. 晚餐係豬潤粥, 媽媽將豬潤攪爛放入粥, 不過我唔喜歡, 食左半碗未夠就唔願食, 又掩面又伸手入口, 整古做怪, 媽媽見迫我唔嚟就放棄, 夜d再比奶我食就算. 今日爸爸去探朋友的新生bb女, 返到屋企我已經訓左, 最近真係好多bb出世, 媽媽的一個學生好快就會生一個bb仔, 到時我又多一個新朋友嘞!天氣咁熱梗係著背心啦
[right1]昨晚爸爸去左睇波, 天光先返屋企! 訓到十點幾就比我摷醒, 要幫我沖涼, 真係慘! 我地本來想去新世紀廣場同世儀姐姐飲茶, 點知落大雨, 唯有改去附近的酒樓. 我今天著左婆婆買的熊仔工人褲和tammy姨姨送的I love my daddy口水肩, 一身粉藍色打扮, 好可愛, 在酒樓不停被人撩. 之後見天氣好d, 我地就去新世紀行下, 媽媽在一間兒童圖書店幫我揀圖書, 呢間野出名平, 最後買左六本, 都唔洗八十蚊! 行到六點幾我地搭巴士返屋企, 媽媽要教少少琴, 於是爸爸同我返去先. 我以前玩的gym, 現在已經唔係好吼, 原因係我已經識翻身, 唔再甘心訓係地下做gym, 媽媽於是將個gym改裝成隧道, 然後將少少玩具放入去, 不過我一直無理會呢條隧道, 今日爸爸終於發現我以倒後方式進入左條隧道, 自己在裡面玩玩具, 其實媽媽早兩日已見到我坐在隧道門口, 伸手攞裡面的玩具出來玩, 今日我自動捐左入去, 但我仲未學識爬返出來呢!媽媽唔比我捐梳化底, 我就捐下呢條隧道啦!
傳說中功效神奇的幼兒英語教材-"迪士尼美語世界", 全套買齊要四萬幾蚊, 我媽媽和佢識得的朋友都話絕對唔會買! 不過果d sales周不時會打電話來騷擾我媽媽, 媽媽好後悔舊年去bb展要左佢d贈品, 仲留埋電話號碼比果d人, 家陣每隔幾個禮拜就有人打來搵我媽媽傾計, 我媽媽會毫不留情咁收佢線. 比錢買就咪搞, 不過最近有朋友借左套dvd比我地, 媽媽播左一隻play along我睇, 我都好留心咁睇, 睇左三, 四首歌就開始唔耐煩, 搞呢樣搞果樣, 又呀呀大叫, 相反我心愛的砵砵巴士就睇極唔厭, 一條氣睇晒四集, 睇到郁都唔郁, 仲會睇到微微嘴笑! 不過電視睇得多始終唔好, 尤其是我呢種鍾意捐梳化底先睇得舒服的細路, 睇得多對眼睛唔係幾好, 所以媽媽打算逐漸cut短比我睇電視的時間, 不過cut還cut, 砵砵巴士絕對唔cut得!
今天爸爸返12點放夜晚9點, 今朝同我打個招呼就出門了, 夜晚十點幾趕返來, 想同我玩一陣,但我因為太攰媽媽比我早d訓, 今日就無同爸爸玩過了, 真可惜! 今日媽媽有兩個學生來補課, 我自己在地下玩玩具, 點知媽媽突然發現我坐左起身, 兩隻手係咁拍電視櫃塊玻璃, 呢個行為係第二次發生, 但自己由趴住再坐起身, 仲坐得好穩陣, 應該係第一次, 媽媽見狀即刻將我抱走, 因為電視櫃裡面有好多唔適宜嬰兒碰的東西!
我婆婆真係好錫我架, 有幾鍚呢, 當爸爸媽媽話我跩, 扭計到不得了時, 婆婆都會話我好乖, 乖到不得了, 當我扭計咋喊無人抱我時, 婆婆會搶住抱, 去酒樓食飯我唔肯坐bb車時, 婆婆會抱住我食, 當媽媽由得我坐係地下跌來跌去, 婆婆會搶住過來扶我, 你話婆婆係咪真係好錫我, 錫到我燶呢? 媽媽話, 好彩婆婆每星期只係湊我其中三至四日, 否則我一定變成一個超扭計壞細路! 今晚爺爺嫲嫲姑姐等等過來我地呢頭, 去酒樓食飯, 目的係慶祝父親節, 係咪好奇怪呢, 其實五六月份有好多飯要食, 爺爺生日, 爸爸生日, 母親節, 父親節, 媽媽和爸爸兩邊又要各自食一餐, 你話唔分開幾個禮拜食點得呀!?
我地的頭飾係咪好型呢? 媽媽扶住我玩呢個大波波練習平衡 嘩, 今日爸爸放假, 幫我安排左好多行程, 忙到不可開交, 首先爸爸的朋友anka姨姨遠道從美國返來探我地, 佢囡囡megan都有一齊返來, 我地去飲茶, 秋盈一家一齊來聚聚舊, 我雖然係第一次見anka姨姨, 但我好鍾意佢地, megan姐姐又好好人, 媽媽話佢好乖女, 佢地仲送左一隻紅色dinosaur比我, 不過佢地好快就要返美國, 下次見面我同姐姐都已經大個左囉! 踢波時間又到, 好刺激!飲完茶返屋企食糊仔, 然後媽媽拿拿聲捉我入房瞓一陣, 我最近好乖, 媽媽唱歌暗我就好快訓著! 跟住就係playgroup時間, 今次我地有四個bb, obi, jacko和我, 仲有anson妹妹呀! 不過秋盈無來, 真可惜! 今日我地又有好多遊戲, 唱兒歌, 吹汽球, 推車仔, 平衡波波, 捉雞仔, 踢波, 當然唔少得好刺激的打鞦韆! 嘩... 一次過玩咁多野真係未試過, 連爸爸都話今日好好玩, 我地仲影左好多好多相! 我好期待下一次playgroup, 希望d大人夾到時間就好! 要全部嬰兒望鏡頭難度極高玩完返屋企媽媽又拿拿聲暗我訓多一餐, 食埋支奶, 爸爸約左Susanna姨姨去火間土食日本野, marco哥哥和maggie姐姐同我玩, 不過我地坐的位好熱, 我出晒汗扭計, 其實次次出街食飯都係差唔多, 上半場我自己玩, 下半場我就瘋狂扭計, 爸爸媽媽幾乎無一次有啖好食!
由於我成日笑, 爸爸叫我做開心兒童, 今日媽媽如常播砵砵巴士我睇, 我一見到片頭果條彩虹已經裂嘴而笑, 之後奏起主題曲我忍唔住"呀....!"大叫和大笑起來, 仲手舞足蹈咁, 笑到媽媽趴係度, 媽媽話, 砵砵巴士日日都睇架啦, 睇到隻碟都爛, 點解仲會笑到咁大反應? 今日婆婆兩點幾鐘來到, 佢一入門口我諗左5秒, 跟住就笑起來, 婆婆越行越近, 我笑到卡一聲, 見牙肉唔見眼! 婆婆餵我食粥仔, 媽媽要出去教琴, 到夜晚公公舅父佢地過來一齊去酒樓食飯, 因為我地今日先食父親節飯, 正所謂有心唔怕遲, 無謂同人迫, 食貴野嘛!
俯臥在媽媽身上我已能微微抬起頭來我個頭係咪大咗好多呢? 今日爸爸忽發奇想, 叫媽媽和我影一張面貼面的大頭相, 就好似我未滿月果陣在梳化影果張一樣, 作一個比較, 哈哈, 未滿月的我個頭好細, 媽媽的頭好大, 我的額頭好多皺紋, 樣子好傻, 趴在媽媽身上似條毛毛蟲! 七個月大的我個頭大左好多了, 媽媽的頭就無變大, 我無晒皺紋, 爸爸不能再叫我尤達大師了, 但我的樣子依然好傻! 自從今個星期一我坐得穩陣之後, 呢幾日媽媽都比我自己在地下玩, 我心情好的時候真係會自己玩玩具, 隨左真正的玩具之外, 媽媽會比d垃圾我玩, 所謂垃圾其實係d無用的紙巾盒呀, 包禮物的花紙呀, 過年放全盒無人吼的瑞士糖呀, 呢d無喱頭廢物我都玩得一大餐, 真係環保小先鋒, 其實我好少放野入口, 所以媽媽先放心比野我玩, 唔知係咪我有食奶咀的習慣, 正值口腔期的我麻麻地鍾意放野入口, 我比較喜歡用手去摸, 乜都摸一餐, 仲會大力用手去拍東西. 可以自己坐住玩媽媽當然開心, 因為唔駛招呼我, 可以蛇下王嘛, 不過唔好開心住, 呢種自得其樂時間唔係咁多, 通常只係維持到15至20分鐘, 玩悶左我就要人理下我架嘞!
[left1]期待已久的下水禮今日舉行了! 訓醒晏覺, 兩點鐘落泳池, 雖然風和日麗, 但有雷暴警告, 室外池暫時關閉, 我地只可以在室內池玩住先, 我戴上嬰兒圍頸水泡, 爸爸好謹慎咁抱我落水, 我未見過咁多水, 好緊張, 落到水好驚咁叫左出來, 爸爸即刻抱返起我, 然後帶我去一個好淺水的平台玩一陣, 雖然我好鍾意玩水, 但第一次去到泳池, 難免有d大鄉里出城, 緊張到梗晒軚! 爸爸抱實d我呀!好快室外池重開, 我地向bb池出發, bb池水深只有一呎多d, 爸爸放手比我自己玩, 我開頭都好緊張, 手腳縮埋一堆, 抓實個水泡, 後來開始放鬆手去撥下水, 但腳都唔肯幾夠膽放鬆, 同我在屋企泳池果種輕鬆姿態簡直天淵之別! 玩左一陣我又驚驚, 媽媽抱我上水用毛巾包住, 飲果汁休息下. BB池比較適合我多d之後我地去室內暖水按摩池玩一陣, 我知道係暖水就無咁驚, 但果度好大浪, 我用水泡浮左一陣, 就唔耐煩呀呀叫, 然後喊, 喊到收唔到聲, 爸爸媽媽就拿拿聲離場, 帶我返屋企食奶奶, 我心情平伏返就若無其事嘞! 雖然第一次下水表現麻麻地, 但媽媽話唔可以怕困難, 要勇敢克服! 所以我地下個月會再去游水, 媽媽話買件浴袍仔比我, 等我著住唔怕凍! 好緊張呀, 淺水地帶玩下先https://bb5.babyhome.com.tw/UPLOAD7/117460/122525.15793505.81107.wmv
[left1]今日媽媽幫我安排左好豐富的行程, 首先我九點幾瞓醒, 在床上爬來爬去一個鐘頭, 之後媽媽幫我沖涼, 食奶, 然後去盈暉台同寶儀姨和豬姨佢地飲特價茶, 然後去百佳超級廣場買餸煲粥仔, 今日媽媽買左條25蚊的大眼雞來煲粥, 原來大眼雞又名木棉魚, 英文名叫Big Eye! 飲完茶返屋企, 陪媽媽睇陳奕迅演唱會DVD, 睇左一陣竟然坐住訓著左, 跟住無耐表姐就來我家學琴, Nicky哥哥上來陪佢, 佢地走左無耐, cell姨姨和obi就上來探我地, 仲買左我鍾意食的嬰兒乳酪和想試好耐的QBB芝士! 媽媽話Obi今日好可愛, 佢依然彈彈下, 好搞笑, 我地玩左好多玩具, 我又介紹佢睇砵砵巴士, 無幾耐爸爸放工回家, 我見到佢好好好開心, kaka笑好大反應! JO JO係西人, 佢識講好多英文架!食完粥仔爸爸媽媽落街食飯, 我同平時一樣, 唔鍾意一個人坐bb車, 爸爸媽媽又係拿拿聲爬兩啖飯就算! 返到屋企我再係地下玩左一陣, 我玩到無野玩, 竟然連kobie姨姨買衫比我的花紙都玩左好耐, 媽媽睇書話可以比多d唔同質地的紙嬰兒玩, 唔一定要用錢買的玩具先至玩得開心架!呢個係我老友JO JO, 我地好熟架!
今日都算係一個值得記念的日子, 話說我約一個月前可以用手撐住坐一陣, 漸漸可以越坐越耐, 唔用手扶住就唔坐得耐, 仲隨時有失平衡, 向兩邊或向後跌倒的可能, 記得有一次媽媽比我自己坐住玩蜜蜂波波機, 我向後"中"後尾枕撻落地, 當堂喊到劏豬咁呢! 坐得穩陣坐就可以自己玩啦!今日媽媽又同我玩左好多益智遊戲, 遊戲當中我已經可以自己唔扶住咁坐, 仲坐得好耐下添, 事關呢幾日我跌倒媽媽都唔即刻扶起我, 咁我跌跌下就唔怕跌, 跌左自己起返身, 今日就成功坐住啦! 其實有d小朋友好似秋盈咁一早就識坐得好穩, 不過我體重比較輕, 平衡方面要花多d功夫先得, 好彩今日開始我都坐得好好嘞! 媽媽買左隻發條雞比我, 教我玩"things don't disappear"遊戲, 我已經好快又好有意識咁將藏在手巾下面的發條雞找出來, 然後一手將佢生擒, 連爸爸都嘆為觀止, 讚我叻仔! 媽媽又同我玩水和玩lotion, 我鍾意成手都係lotion滑潺潺的感覺, 我玩到唔捨得停, 媽媽幫我抹手我竟然大喊, 因為我想繼續玩呀!
[right1]今日媽媽不用教琴, 全日陪住我, 我地玩左好多遊戲呀, 媽媽又比我著eco嬸在日本買的和服仔我著, 好可愛! 其實呢件和服仔係一至兩歲的, 仲有條褲, 但我未著得住, 淨係著件上衣就好啱身! 鬍鬚佬爸爸生日, 我悉心打扮為佢慶祝!鬍鬚佬爸爸生日, 又係父親節, 對於第一年做爸爸的佢就有雙重意義嘞, 爸爸book左枱食飯, 仲約埋kobie姨姨, winnie姐姐和marco叔叔, kobie姨姨仲送左好靚的芝麻街衫仔比我做爸爸的生日禮物添, 真係神奇! 原來kobie姨姨係忠實fans, 我的一舉一動和我家的大小事務, 只要有記載在昭駿的世界日記裡面的, 佢完全暸如指掌, 真係令我既驚訝又感動! kobie姨姨送的芝麻街靚衫, 竟然係我爸爸的生日禮物!唔知點解我對爆炸頭的winnie姐姐特別有好感, 無論佢講野又好, 唔出聲又好, 我都成日望住佢騎騎笑! 佢抱住我我就乖乖地無扭計, 不過媽媽發現我不停咁抽winnie姐姐的水, 爸爸話係正常的, 因為證明我真係一個男仔!著左Eco嬸送的和服, 好可愛啊!
我出世之前爸爸買左部攝錄機, 用來拍低我的一舉一動, 因為成長的每一個片段都好珍貴架! 爸爸就成日用部機來攝我, 攝好一盒帶媽媽就用電腦燒落dvd保存, 今日媽媽將我四, 五個月的片段播比婆婆睇, 佢地一邊食lunch一邊睇, 我就趴在地下玩, 玩玩下我發現電視機裡面有個細路好似我, 連d叫聲和喊聲都一樣, 我睇到入晒神, 睇到某d片段我仲偷偷地笑添! 本來在旁邊睇緊dvd的媽媽和婆婆, 轉移視線睇我睇自己! 佢地仲笑到碌地添! 今日媽媽用三文魚煲粥比我食, 三文魚含omega 3, 營養豐富, 不過脂肪含量亦高, 媽媽整好d粥之後發現個煲呀, 碟呀, 攪拌機呀, 全部都係油, 所以都不能多吃, 我對三文魚粥反應一般, 不過都成功食晒一碗. 夜晚爸爸媽媽去五十嵐食飯, 上次去過媽媽覺得麻麻地, 今次叫套餐竟然幾好, 上次我架私家車唔比入, 今日竟然有個卡位比我泊車, 我坐車仔坐到扭計, 媽媽抱我一齊坐卡位, 我好開心咁自己玩, 爸爸媽媽就好安落咁食晒個餐! 食完晚飯我地去obi屋企坐一陣, obi佢大隻左, 佢成日彈彈下, 好似彈弓人, 十分搞笑!
今朝清晨四點幾, 天都未光, 爸爸發現我醒坐, 靜雞雞在床仔做運動, 後來我不斷翻身, 媽媽幫我翻返轉好多次, 點知搞到我越來越清醒, 完全唔肯瞓, 後來仲大喊, 氹左好耐都收唔到聲, 果種喊法係肚餓的喊, 媽媽唯有開左五安奶比我飲, 點知個奶樽一塞入口我就收晒聲, 食完支奶就乖乖地, 但都係扭來扭去, 最後媽媽抱我去大人床, 夾我在中間一齊瞓, 先至訓到天光! 自從我未夠一個月, 好似廿幾日大, 就自動戒左夜奶, 兩個月左右開始建立坐固定睡眠習慣, 可以一覺訓到大天光, 食夜奶呢件事媽媽都已經無乜印象, 今朝竟然會發生d咁o既事, 真係令人費解! 媽媽認為可能性有兩個: (1) 睡前最後一餐奶係夜晚8:15, 瞓到半夜餓醒, 不過呢個可能性較低, 事關我好多時都係八點幾食last一餐奶 (2) 天氣熱, 媽媽手多多熄左冷氣! 媽媽自己覺得唔熱, 就以為我唔熱, 竟然熄左冷氣, 所以今晚媽媽都唔敢唔開冷氣了!
Cell姨姨送左一盒嬰兒乳酪比我, 今日媽媽終於比我食, 當然媽媽自己先試食啦, 媽媽話嬰兒乳酪無咁酸, 好似幾好味咁, 我食第一啖個表情好古怪, 皺晒眉, 因為我第一次食凍野, 媽媽細細啖咁餵我食, 食幾啖就比少少水我飲, 慢慢我就越食越想食, 媽媽就大啖大啖咁餵, 後來連水都唔肯飲, boo返晒d水出來, 只肯食乳酪! 食左半杯媽媽就停手唔再比我食, 幫我抹嘴, 我知道無得食即刻we嘩鬼叫, 好可憐咁o既樣! 今日媽媽放我在餐椅睇砵砵巴士, 睇左唔夠十分鐘我就怪叫, 我咁鍾意砵砵巴士, 從來未試過扭計, 媽媽於是放我出嚟比我在地上玩, 我玩左一陣唔夠就咋咋帝捐左入梳化底, 然後昂高頭繼續睇砵砵巴士, 原來我唔鍾意坐住睇, 要捐入梳化底咁睇! 激到媽媽紥紥跳!
[left2]昨晚爸爸睇世界杯睇到天光先返屋企, 早上想訓耐d, 不過被我搞醒, 我偷偷地摸佢d鬍鬚, 又踢佢心口, 搞到佢唔起身唔得. 爸爸媽媽話帶我去游水, 講左好耐都未帶, 事關時機未成熟, 話說我朋友仔秋盈已經用圍頸水泡在浴缸舉行左下水禮, 我都唔執輸, 今日爸爸放左半缸暖水比我玩, 順便沖涼, 媽媽小心翼翼咁將我放入浴缸, 我一落到水就唔係人咁品, 成隻青蛙咁撐呀撐, 好暢快! 我又迅雷不及掩耳咁來個鯉魚翻身, 大膽程度令爸爸媽媽為之一"震"!我玩到忘晒形, 上水之後唔高興, 扭左一陣計, 因為唔夠喉呀! 浴缸游水真係暢快嘞! (重要部位已被遮掩)夜晚爸爸帶我返婆婆屋企, 事關佢又想睇波, 媽媽教完琴返來食左晚飯就先同我回家, 我一返到去就好眼瞓, 換好衫一上床就瞓著了!個水泡大到睇唔到我個樣添https://bb5.babyhome.com.tw/UPLOAD7/117460/122525.15554919.50291.wmv
[left1]長沙灣廣場的富臨漁港我去過兩次, 第一次係太婆佢地來飲茶, 第二次係爸爸的朋友來食晚飯, 兩次我都扭計到不得了, 搞到爸爸媽媽無啖好食, 今晚爸爸約左同事去食晚飯, 因為果度d燒鵝最馳名, 爸爸媽媽覺得我可能會再發神威, 於是帶定好多架生去standby, 有我成日玩果部chicco電子琴啦, 搖鈴啦, 一抽鎖匙啦, 仲有我部生滋電話都帶埋去, 爸爸好醒目咁將部電子琴fix係我的BB車, 咁我就好忙咁掛住玩, 食完奶心情大佳, 仲成日笑添. 仲有兩個小朋友同我玩左一陣, 十點過後我開始扭眼瞓, 要爸爸抱住我, 媽媽先可以拿拿聲爬埋兩啖, 之後媽媽就帶我返屋企覺覺豬先, 不過總括來說今晚我的表現係有進步的!有兩個姐姐哥哥同我玩, 我就唔會悶啦!
現在我每日的飲食程序係咁, 一日食四餐, 三奶一粥, 餐與餐之間仲有水果和果汁, 媽媽話得閒的話盡量每日都煲粥, 好唔得閒先至食糊仔, 為左要有多元化和均衡o既飲食, 現在媽媽每日都為我的膳食而傷腦筋, 我已經試過好多唔同的蔬果, 肉類就食過魚, 雞和豬肉, 基本上我對所有食物係照單全收, 因為我真係好為食, 只要食得落肚的我都喜歡, 有時甚至唔食得的都想食. 今日媽媽又煲紅衫魚粥, 我先後食過鯇魚, 倉魚, 紅衫和烏頭, 反應最好的都係紅衫魚, 不過紅衫魚多細骨, 揀骨就要好小心, 通常媽媽忙於煲粥時都會比我睇砵砵巴士, 咁我就可以乖乖地唔搞搞震, 媽媽就可以專心揀骨! 昨天無大便, 今天大了兩次, 兩次都幾順利!
[left1]今日有一個嬰兒聚會, 係媽媽和另外三位媽媽搞的, 出席嬰兒有秋盈, Obi和今日第一次見面的Jacko, 我地四個都係七個月咁上下年紀, 我地玩左好多遊戲, 唱兒歌, 踢沙灘波, 吹汽球, 仲有十分刺激的打韆鞦! 雖然過程都幾混亂, 不過今日我地四個都幾乖, 無扭計, 我特別喜愛踢沙灘波, 踢到我卡卡笑, 不過秋盈唔鍾意, 好似有d驚, 但佢竟然鍾意打韆鞦, obi就鍾意玩汽球, 佢鍾意到想食左佢, jacko就好喜歡攬住藍色果條長汽球, 真係人人唔同喜好! 用毛巾打鞦韆, 好刺激架!雖然我地唔似得出面的playgroup有導師, 不過我地都玩得好開心, 媽媽話, 我地幾個bb多數時間都係各有各玩, 但留意到有時我地會互相注視, 就好似Obi今日臨散場時趴係度望左我好耐, 仲用主動摸我! 仲有秋盈, 今日我地見面兩個都無喊,佢仲識講好多無人識聽的bb話, 可見我地大家都在進步! 趴住影多張!玩完遊戲返屋企, 秋盈上來坐多一陣, 我在餐椅玩緊轉轉輪時, 佢竟然反客為主, 玩左個心愛的轉轉輪, 我無奈到只有默默凝視住佢! 媽媽話, 身為男士應該有風度, 正所謂好男不與女鬥, 佢喜歡玩就攞去啦, 不過玩完記得還返比我. 秋盈你玩左我最心愛的玩具!夜晚我地去酒樓食飯, 慶祝爺爺生日, 叫左好多好多餸, 仲有蛋糕! 今日行程豐富, 一放落床就攰到瞓著左囉!我瞓醒覺先來玩, 好精神!
今日婆婆來湊我, 我都幾乖, 無乜特別事發生, 不過媽媽就夠晒特別了, 今日佢教教下琴, 突然感到d牙一陣特如其來的劇痛, 有如行雷閃電或轟炸機襲擊一樣, 連飲水都痛! 媽媽忍痛教完果堂課, 就拿拿聲搭車返屋企, 好彩係最後一堂課. 媽媽本來想去青衣街市買條大眼雞魚我煲粥仔, 但突然牙痛唯有作罷, 正所為牙痛慘過大病呀嘛, 我媽媽最怕牙痛, 之前智慧齒牙肉發炎已經痛到求生不得, 求死不能, 果種痛係令人乜到做唔到, 無晒人生樂趣的痛. 媽媽毫不猶豫去搵醫生睇, 媽媽聽過楊幽幽醫生個名, 就去搵佢, 好彩今日星期六仲有得睇, 楊醫生話媽媽的一隻牙已經蛀到死了, 要杜牙根! 其實媽媽一早知道d牙有問題, 不過太驚睇牙醫所以一拖再拖, 仲以為係牙敏感, 點知原來蛀牙入心都唔知! 聽講杜牙根係好痛好痛, 媽媽已經做好最壞打算, 佢同醫生講生仔咁痛都試過, 整牙算得咩野, 醫生話: 係囉! 之後就開始鑽呀...鑽呀...整左唔夠十分鐘, 姑娘就叫媽媽漱口, 媽媽好奇怪問: 搞掂喇? 醫生話: 搞掂喇! 媽媽話: 完全唔痛o既? 醫生話: 咁咪好囉! 完全唔痛啊, 真係太好了! 哈哈, 好彩及早治療, 下星期再覆診, 埋單承惠二千大元! 好肉赤啊! 真係赤到牙痛咁聲! 媽媽話, 當你的牙痛到想死時, 你會幾多錢都願意比!
又到左9號, 今日我七個月大了! 不過今日好大雨, 黃色..紅色..黑色暴雨警告都出齊, 不過下午無乜雨, 媽媽最後都係同我返左婆婆屋企, 因為之前買的加拿蘋果和啤梨仔都唔多好, 媽媽今日試下比皇帝蕉我食, 人地話皇帝蕉無普通香蕉咁寒涼, 我食左一整隻, 不過份量好少, 好似媽媽的食指咁大隻, 我好鍾意食, 不過婆婆話我咁為食, 乜都啱食啦. 今日婆婆煲左d湯, 係冬瓜准山薏米瘦肉....湯, 婆婆話啱我飲, 落鹽之前比左一小碗我, 我飲晒, 不過今日無大便, 真掃興. 婆婆話我今日好乖, 無扭計, 仲氹氹轉得好快好快, 我最鍾意在床上的竹蓆玩, 因為d竹片一格格, 我好鍾意摸. 夜晚10點先返到屋企, 今晚舅父有駕車, 所以好快返到, cell姨姨和obi會上來坐, 我玩住等左一陣, 不過太攰入房瞓先, 唔好意思啊, obi我地下次先再玩過!
[right1]今日表姐來學琴, 由於我好鍾意彈琴 (應該係拍琴先啱), 表姐於是抱我坐鋼琴前面玩, 點知我突然嘔左一啖奶, 表姐今日要去見工, 著左條黑色西裙, 即時被我嘔出來的奶染左d圖案, 激到佢生蝦咁跳, 好彩即刻用水洗都洗得甩! 今日我又做怪事, 繼前日我倒後爬捐左入梳化底之後, 今日我又成功了! 不過前晚媽媽已放左d好重的盒入梳化底, 點知我大力到踼晒d盒入去, 今次媽媽唔救我出來, 誰知我整整下自己轉返出來! 媽媽笑到趴係度! 你睇我捐左入梳化底個樣幾得戚!最近爸爸媽媽成日同我玩躲貓貓遊戲, 初時我唔知佢地搞乜鬼, 成日揾條手巾遮住塊面, 現在我識玩了, 仲自己扯走條手巾, 通常我都會笑一笑, 心情好就會大笑, 心情大佳時就會卡卡卡大笑! 夜晚我又搞鬼, 將一個膠袋裡面的東西全部摷晒出來, 袋裡面有好多汽球, 全部比我攞晒出來, 搞到成地都係, 媽媽見我咁靜過來睇下我做乜, 原來我一手攞住一個汽球在研究! 之後我瞓左媽媽就執餐懵了.睇人彈得多, 我都搶住彈下先!
聽講我朋友仔秋盈已經坐都好穩陣, 不過我仲係東歪西倒, 今日我坐住玩蜜蜂波波機, 媽媽比我自己試坐, 但我失平衡向後跌, 即時大喊, 媽媽就呵返我. 爸爸好多鬍鬚啊!今日爸爸例假, 下午媽媽餵我食粟米魚粥之後, 就落街食飯, 媽媽要教琴, 爸爸與我在家, 我瞓左一個長覺, 超過一個鐘, 爸爸話我幾乖, 爸爸最近學人留鬚, 好醜樣, 我唔怕佢的鬚鬚, 仲伸手去摸, 媽媽話我大膽, 吉手都唔怕! 今期Baby雜誌又有我的相登左出來, 爸爸媽媽都好開心!
[left1]今日我晨早5:30醒左, 趴左係床, 六點鐘就呱呱叫, 媽媽唯有比支奶我食, 食完我又瞓返, 醒下瞓下, 10點鐘媽媽決定同我沖涼, 爸爸都放假, 佢幫我沖, 今日媽咪要去做facial, 唔得閒煲粥, 我就食糊仔, 然後媽媽就出左會合豬姨, 我就跟住爸爸去超級市場. 唔識向前爬, 出唔返嚟添...爸爸話我都幾乖, 媽媽下午返來時, 我瞓得好冧, 醒左之後我落地玩, 由於我爬行功夫未到家, 通常係自轉和向後爬, 今日我向後退下退下, 竟然將成個人退左入梳化底, 得返個頭o係出面, 媽媽在廚房行出來見到嚇左一跳! 但我還是一臉自豪咁樣, 好百厭! 今晚我地返香港仔探爺爺嫲嫲, 今日我都幾合作, 無乜扭計, 但天氣好熱, 都有少少唔耐煩, 返到屋企又要沖多次涼!唔覺意捐左入梳化底添...
唔知係唔係開左冷氣瞓的關係, 我呢幾日都瞓到九點先醒, 然後叫肚餓, 食完奶同媽媽玩左一個鐘頭有多, 又眼瞓, 其實我係未瞓夠的, 再瞓多兩個小時就夠, 我每日的生活習慣大致係咁, 婆婆來湊我的時候就唔比我早上瞓咁多, 不過我通常玩一兩個鐘又扭眼瞓! 下午平均瞓兩次, 每次平均30分鐘, 開左冷氣會瞓耐少少. 過去兩星期媽媽每日都刨新鮮蘋果蓉比我做下午茶小食, 今日轉口味食牛油果, 書本話牛油果營養價值好豐富, 係好好的嬰兒食品, 媽媽驚我唔慣d味, 將牛油果壓蓉後溝左少少奶糊, 我食到唔停得口, 不過媽媽話牛油果係好貴的, 差唔多要成十蚊一個! 陳太和兩個姐姐又來同我玩, 玩到攰我瞓著左, 但口up up咁有野講, 好似發開口夢, 夜晚爸爸一返來就發現我條尿片漏尿, 搞到張椅套濕晒, 今晚媽媽買條黃立鎗煲粥仔, 加d菠菜, 不過d魚肉有點硬, 喜愛程度只屬一般.
今早婆婆11點半來到, 唔比我瞓, 抱左我出廳玩, 呢兩日我都係瞓醒之後, 趴低氹氹轉一輪就大左便, 今天的大便仲有甘筍的殘骸, 很有趣! 媽媽大慒忘記浸米, 下午無得食粥, 要食奶, 夜晚先至食粥, 不過都一樣, 食量都係一碗仔, 媽媽在屋企教完兩個學生又要出去青衣教, 今日心血來潮去葵芳新都會廣場行一陣, 百佳隔離果間兒童圖書店要執笠了, 媽媽趁低吸納, 買左一本ABC兒歌書+vcd, 仲用三十蚊買左兩個好靚的嬰兒玩具, 再用十蚊買左三大包汽球, 咁多禮物我一下子玩唔晒, 媽媽先播vcd我睇, 但我唔知扭肚餓還是扭眼瞓, 睇左唔夠10分鐘就唔耐煩, 由於媽媽煲緊粥仔唔得閒招呼我, 迫於無奈唯有播返砵砵巴士我睇, 我竟然好文靜咁睇到媽媽煲完粥, 激到媽媽紮紮跳! 媽媽話我太沉迷睇巴士, 婆婆話媽媽逼我學ABC所以唔高興, 但媽媽不同意, 因為果隻所謂教學vcd其實只係一d兒歌卡通片, 不過畫面唔夠砵砵巴咁吸引, 所以我無咁喜歡咁啦!
今早9:15先醒, 遲左食奶, 食完在大人床玩自轉, 轉轉下無聲無色咁大左個便! 婆婆10點鐘來湊我, 同我沖涼, 媽媽買左d甘筍仔煲粥仔我食, 我又食晒一碗, 婆婆話我食完個肚仔好大, 成個波咁. 下午雅怡姐姐和雅怡媽媽上來學琴, 點解會咁呢, 原因係星期五雅怡姐姐去左睇牙醫, 所以佢地今日來補堂, 仲買埋老婆餅, yeah! 夜晚爸爸回來我地去米堂食中式套餐, 88蚊有兩餸一菜, 再加湯飯飲品, 十分抵, 仲幾好食, d餐廳阿姐又圍住我撩, 爸爸媽媽好高興因為有人同我玩, 可以慢慢嘆. 夜晚媽媽同我換完衫抱我入房瞓覺, 誰知我突然吐左d奶, 整污糟晒自己和媽媽的衫, 爸爸入來幫手抹, 我被放在大人床, 點知我好快咁翻身, 快到一秒都無, 我差d跌左落地, 好彩及時捉得住, 但個頭就撼左落床, 少少紅左, 我痛痛喊左一陣, 爸爸媽媽呵返好快就無事, 不過就嚇到媽媽鼻哥窿無肉!
今日好大好大雨呀, 紅色暴雨警告! 原本我地係要返青衣婆婆屋企的, 不過太大雨取消了行程, 但後來又無乜雨喎, 於是我食完lunch, 沖埋涼, 瞓醒晏覺就出發, 今日搭的士, 十分鐘就到! 媽媽今日煲節瓜粥, 加入d雞肉蓉, 我食左一細碗, 不過呢兩日只疴了幾次份量好少而且幾硬的大便, 好彩夜晚疴多一次, 不過都幾吃力. 婆婆買左兩個玩具比我, 一個係哈姆太郎不倒翁, 一個係扑扑鎚, 婆婆成日話唔好買咁多野, 不過佢就成日買衫和玩具比我!
今日表姐又來, 我地去茶餐廳食飯, 搭升降機撞到一個同是坐bb車的bb女, 佢十個月大, 我地你眼望我眼, 點知佢無端端大喊, 我呆望佢數秒, 跟住一齊喊! 兩個b在升降機內大喊, 好奇情! 不過我只喊了幾下就收聲, 原來佢地都係去茶餐廳, 食飽飯我地在商場又碰面, 不過今次好冷靜, 大家都無喊嘞! 今日的飲食唔係幾理想, 媽媽煲節瓜瘦肉, 但d瘦肉好鞋, 唔好食, 新買的蘋果又唔夠熟, 磨蓉都唔好食, 可能食物影響心情, 夜晚爸爸媽媽帶我去富臨同一班朋友食飯, 我全餐飯都不停扭計, 又唔肯瞓覺, 搞到爸爸媽媽要輪流抱我, 無啖好食, 好唔乖!
今日端陽節, 爸爸開電視比我感受賽龍奪錦的氣氛, 佢覺得我鍾意睇喎! 媽媽要教兩堂, 整定d西蘭花薯雞蓉叫爸爸餵, 爸爸今日算叻仔, 獨力幫我沖涼和餵食, 之後推埋bb車同我搭地鐵, 會合左媽媽之後返婆婆屋企, 真係犀利! 爸爸話沿途好多人撩我, 佢今朝成個帶子洪郎咁, 梗係多人望, 連靚女空姐都望多兩眼, 可惜只係望我, 唔係望佢. 返到婆婆家, 爸爸媽媽食隻糉就去青衣城睇da vinci code, 放低我比婆婆湊, 我出世之前, 爸爸媽媽好鍾意睇戲, 自從半年有多前, 爸爸和腹大便便的媽媽去奧海城睇果套三級片之後就一直無踏入過戲院半步, 今日佢地終於可以偷雞兩個半鐘去睇戲嘞, 不過佢地睇完返來都話套戲麻麻地, 甚至有d九唔搭八, 雷聲大雨點小云云...媽媽從來未試過放低我自己去娛樂, 今次係第一次, 都有d心卦卦, 不過係婆婆湊就放心好多! 睇完戲爸爸媽媽拿拿聲趕返來接我去香港仔, 好耐無返去探爺爺嫲嫲, 今日返到去有d扭計, 可能太熱, 我身黐立立, 好dirty, 返到屋企已經十一點, 我沿途瞓左一小覺, 返屋企又要沖個涼, 11:45先有得瞓, 從來未試過咁夜, 所以好快就呼呼入睡了!
