親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
今日爸爸無假放, 婆婆又唔得閒, 媽媽要教少少琴, 又唔想唔教, 就帶埋我去上堂! 今日係教泳衡哥哥, 媽媽和周autie好熟, 佢又好鍾意小朋友, 好願意幫手照顧我! 我初初入屋有點怕, 呆滯了2分鐘, 好快我就唔知醜, 四圍爬! 周auntie又同我玩, 攞好多玩具比我, 好餵我食奶! 但我唔鍾意志衡哥哥, 見到佢我喊! 媽媽教完泳衡哥哥仲要教另一個學生, 於是我就留在泳衡哥哥屋企, 媽媽一小時後返來, 見我和auntie玩到卡卡笑, auntie話我好乖, 唔怕陌生人, 媽媽話我唔完全怕醜, 仲爬入人家的廁所. 夜晚約左爸爸在青衣城食飯, 媽媽先去盈翠揾一揾李太, 我在李太家玩左一陣, 見到金魚我好有興趣, 仲學人玩lego, 不過我倒到一地都係, 累人地執餐懵! 我唔怕醜, 係人都跟, 周auntie話呢個係非常好的現象, 好多人恨到恨唔到咁話! 媽媽都好高興, 因為萬一有事都可以將我暫託在朋友屋企!
有些小巴司機駕駛態度很差, 尤其是夜晚果d紅van, 今晚我地返爺爺嫲嫲屋企, 嫲嫲比左50大元我買燈籠, 然後我好眼訓, 就搭旺角小巴返去, 果個小巴司機片來片去, 到油麻地時爸爸和另一個乘客一齊叫落車, 停車時那名乘客先落, 爸爸攞住bb車, 媽媽抱住我準備落車, 誰知那司機連門都未關就開車, 爸爸媽媽即時喝止, 幸好無跌親. 那司機辯稱睇唔到我地要落, 但爸爸話佢根本心不在焉, 掛住爬頭, 媽媽就鬧那司機妄顧安全!其實媽媽一向唔鍾意搭夜晚的紅van, 覺得d司機好狂野, 今次之後媽媽話盡量都係搭返巴士好了!
今日我右手的中指受傷了, 唔知幾時刮甩左塊皮, 我想追tammy姨姨入廁所時突然大喊, 媽媽抱起我, 但隔左一陣想同我剪手甲時才發現我整親手指仔, 於是同我洗傷口, 手指現在腫左少少, 媽媽懷疑我在廁所門口爬行時唔知點樣整親, 好可憐! 夜晚表姐和姑媽來和我玩, 跟住我地去椰林閣食飯, 經理姐姐比左個餐飽我吃, 但我唔識自己食, 用來玩, 搣麵包好好玩! 但返到屋企, 媽媽就發現我部bb車有好多麵包碎嘞!
今日婆婆和寶儀姨姨和我玩, 我突然放手唔洗扶住野, 企左六,七秒, 之後慢慢自己坐返低! 大家拍手讚我叻仔! 其實每個bb發展唔同, 有d bb十個月已識通屋行來行去, 有d連爬都未係好好, 所以比較係無意思的! 不過在媽媽的眼中, 見到孩子學識一種新野, 確實係好振奮的!
就快轉季了, 我有好多衫都未著過, 已唔啱著, 媽媽從jshoppers.com訂左一大堆衫仔比我, 話咁快一箱好有型的衫仔已經由日本來到香港了, 今早郵差叔叔已送到我家! 等媽媽整理好, 天氣涼少少我就會著出來比大家睇嘞! 下午婆婆同我去會所玩, 我爬得好快, 好開心!今晚我突然叫左一聲:媽! 字正腔圓, 十分清楚大聲! 不過婆婆話呢d只係"撞口中", 我仲未有耐識得叫爸爸媽媽架!
今日太婆生日, 媽媽同我著得好靚仔, 仲著埋襪, 夜晚大舅父駕車來接我地去黃大仙富臨酒樓飲太婆的壽宴. 媽媽抱住我入去, 見到好多陌生的面孔, 我有少少驚, 想喊, 留左幾滴眼淚. 公公帶埋我的私家坐椅, 比我同大家一齊食飯坐, 坐坐下我習慣左, 無咁扭計了, 食下包包, 魚魚咁啦, 自己玩唔係玩具的玩具 (e.g.婆婆的手機, 紙巾, 銀包...) 飲完已經11點, 返到屋企已經好夜了, 過晒我的睡眠時間, 媽媽幫我洗面換衫時, 我成功爬上梳化, 呢個動作好似係前兩日開始做, 但今晚竟然在我疲倦的狀態下成功攀上去!
剪了新髮型, 手上的綠色野是婆婆買的新玩具 裝了門欄, 以後我就無得衝入廚房, 唔怪得扁嘴啦 我的頭髮生長速度很快, 額頭前面的頭髮已經長到吉到眼睛了, 今日媽媽叫june姨姨幫我修一修, 我地去左公園剪, 因為唔洗清理頭髮, 剪完回家沖涼就得! 裝左門欄, 我無得入廚房, 只得從罅隙裝下媽媽在廚房做緊乜, 好想入去又入唔到, 唯有企在門口抓住門欄, 搞到媽媽出唔到去, 哈哈!!!
我有無話你地聽我已經同大人一餐食飯? 每次媽媽煮飯(雖然不常發生), 去婆婆和嫲嫲屋企食飯, 媽媽都會比少少蒸魚.. 湯...幾粒飯我食, 我最鍾意食魚魚, 有次去酒樓食飯, 媽媽比魚我食, 食到無晒我大叫"魚魚~~~~"! 今日爸爸無假放, 媽媽要教琴, 就帶我返青衣, 婆婆煲蕃茄薯仔魚湯, 我飲左半碗, 仲食左兩舊薯仔, 媽媽話同我一餐食飯好好, 因為有得食我就乖, 不會扭計, 大家可以有啖好食, 當然婆婆又係三爬兩撥食飽, 然後又抱我去玩...
今日我地去搭渡海小輪! 首先坐地鐵去尖沙咀, 途經半島酒店, 見到好多free-walker遊客在噴泉前影相, 我又唔執輸影埋一份, 媽媽將我放上噴泉邊坐, 我見到水興奮到大笑和企圖跳下去! 跟住我地由天星碼頭登上渡海小輪, 平時爸爸媽媽多數坐上層, 但爸爸話今日要特別d, 坐下層, 比我睇多d風景咁話! 上到船天色已暗, 爸爸媽媽輪流抱我影相, 影影下, 咦? 原來已經埋岸, 唔通維港真係越來越窄? 一落船就見到富豪雪糕車, 媽媽細個果陣, 婆婆接佢放學有時會買比佢食, 但只係好間唔中一次, 因為貴! 媽媽叫爸爸買杯軟雪糕比我試下, 我lam左兩啖, 爸爸話軟雪糕含菌量高, 不宜多吃. 跟住去銅鑼灣時代廣場, 又係去元氣壽司, 今次我叻叻, 學人坐bar枱, 仲坐bb櫈! 睇住一碟碟壽司轉呀轉, 我好乖無扭計, 有得睇無得食, 媽媽就比d包包我頂住檔先. 食完dinner行一陣商場, 我個樣已經眼訓到不堪, 但點都唔肯訓, 回程坐地鐵都唔訓, 撐到返屋企, 然後大左個便! 我個人就係咁, 大便一定要在熟識的地方, 就算要疴, 我都要忍到返屋企先疴! 大鄉里出城, 半島酒店又豈能不留影?坐天星小輪過海, 話咁快船已埋岸了!富豪軟雪糕, 媽媽話以前個個細路都鍾意!有得睇, 無得食!
[right1]今日媽媽約左tammy姨姨和uncle zane開會, 商討concert事宜, tammy姨姨駕砵砵車來接我和媽媽, 我地先去油麻地攞門欄, 因為我成日衝入廚房, 所以媽媽就決定進行封鎖, 將廚房列為禁地! 去到tammy姨姨屋企, anson正在食粥粥, anson真係越來越靚女, 我見到tammy姨姨養的狗仔小白, 好好奇, 佢伏在uncle zane膝上, 我企在隔離望到實, 然後用手摸下小白的腳, 跟住小白通屋走, 可能我以為小白係玩具, 我係咁跟住佢, 佢行到邊, 我爬到邊, 一d都唔驚狗喎! 反而小白就驚左我, 走左入廁所避開我!小白被我嚇怕了, 跳上梳化避一避
今日好忙碌, 不過唔係我, 係我媽媽, 呢兩日我大部份時間都係同婆婆一齊, 媽媽忙到無乜時間陪我, 唯有收工返來同我玩一陣, 食支奶, 就換衫洗面訓覺! 雖然媽媽呢兩日唔得間陪我, 但媽媽時時都好掛住我!
嘻嘻! 自從我出世以來, 收到各方好友好多禮物, 做唔到已經十個月大的我, 竟然仲有禮物收喎! 今日阿童姐姐和佢媽媽來我家, 買左一大袋黃色小鴨比我, 有口水肩(生活不可少), 食飯圍兜, 餐具, 吸盤碗, 沐浴海棉...全部都係黃色小鴨產品!! 多謝晒, 多謝晒! 其實呢篇日記係遲左一日寫的, 因為媽媽今日實在太攰, 近來工作實在太多, 又要準備十月的學生考試和音樂會, 所以疲累到唔記得左寫日記! 其實今日我都玩到好攰, 九點半爸爸餵我食奶, 食完竟然在爸爸懷裡睡著了, 媽媽於是叫爸爸抱我入房熄燈訓, 睇下我能唔能夠訓到天光, 我醒左兩三次, 之後就一覺訓到天光, 今晚係咁呢幾個月來最早訓的一次嘞!
今早我又由大人床跌落地嘞! 事發係咁: 我食完早奶再訓過, 媽媽同我一齊訓, cell姨姨來找我媽媽, 當時我的樣子係熟睡, 所以媽媽就走去開門, 誰知2分鐘未夠, 懞懞鬆鬆的我就跌左落地了, 當然大喊一餐, 幸好無受傷! 媽媽第二次疏忽引致我墮地, 好唔開心, 又被爸爸微言幾句.... 下午去婆婆家, 婆婆話唔知有無跌傻左, 似乎就無, 因為我依然咁活躍, 咁多野講和咁搞事, 夜晚媽媽, 爸爸, 兩個舅父返齊來食飯, 我無端端不停boooo口水, 個樣既古怪又核突, 話極都唔聽, 大人食飯媽媽比少少我食, 我有食, 但吞左又booo過, 個個都無晒我乎, 婆婆話: "男噴乾, 女噴濕", 意思係男嬰boo口水, 明天無雨落, 女嬰boo口水, 明天有雨落! 睇下明天咩天氣啦!
今日媽媽有兩堂在屋企教, 每堂要一小時, 但今日係星期四, 只有我和媽媽在家, 所以媽媽好擔心我會扭計, 唔能夠專心上課, 不過我好乖, 媽媽放我入網床玩, 我就扶住床邊自己企住睇play along! 雖然間唔中會怪叫一兩聲, 但都能夠讓媽媽順利完成兩堂課, 所以媽媽和媽媽的學生都讚我好乖! 夜晚爸爸媽媽有事要一齊外出, 表姐來陪我, 表姐話我訓左半個鐘頭, 無扭計, 梗係啦, 表姐連食飯都抱住我, 我又點會有異議? 爸爸媽媽10點多返來, 餵我食支奶, 玩一陣, 我就乖乖地訓覺覺豬了...zz...zzz...
今日落大雨, 先後有黃雨和紅雨, 個天黑到似咩咁, 爸爸固然無得打波, 媽媽都無乜精神, 同d學生請假在家休息, 於是今日無端端就變左我地的家庭日. 下午爸爸媽媽同我落會所兒童室玩一陣, 無乜人, 得幾個bb, 又係我最細個, 我已經無晒恐懼, 玩得好自由奔放, 見到個會所職員在傾電話, 我仲走去攬住人地的腳企起身, 企圖搶佢電話. 兒童室有好多玩具食物, 爸爸比隻假雞脾我, 我竟然張口想食, 媽媽然後比其他玩具我, 我全部都想食, 因為我真係好餵食. 夜晚爸爸媽媽叫左元綠壽司外賣速遞, 佢地開餐我咁啱好眼瞓, 於是佢地又好愉快咁食野, 爸爸將食完的垃圾放入膠袋, 放在門邊, 呢袋廢物竟然成為左我的獵物, 我吼爸爸媽媽在細房睇電腦相的時候, 摷晒袋裡面的盒呀... 食剩的豉油呀... wasabi... 仲有果d拌碟的蘿蔔絲, 都比我fing到一地都係! 媽媽聽到怪聲出來睇, 嚇到大叫, 因為我搞到好污糟, 連口水肩都沾滿壽司豉油! 呢個咁經典的場面, 爸爸梗係拿拿聲攞相機和攝錄機拍低! 佢兩個反應咁大, 但我無理佢, 繼續攞住兩隻筷子玩! 媽媽抱走我去清理, 我即刻喊到we嘩鬼叫, 因為佢地破壞左我o既好事呀!雞脾我鍾意!叉燒包都啱!連碟都唔放過!食完野唔掉垃圾, 後果就係咁架嘞!
[left2]我媽媽有三個癖好: (1)買兒童書, (2)買口水肩, (3)買尿片, 今日爸爸放工返屋企, 發現門口又有兩大袋尿片, 就取笑媽媽近來好鍾意買尿片! 媽媽點解買咁多尿片呢, 其實係藥房的哥哥留比我地的平價輕鬆穿褲仔, 你要知道我地呢d咁活躍的嬰兒, 一日要換好多條片片, 以我現時20磅的身型已經要穿大碼, pampers超薄乾爽大碼片片平均一條都要$1.78, 而輕鬆穿褲仔仲貴, 平均超過$2一條, 係咪好貴呢? 現在媽媽狂掃的只要$1.25一條, 而且著褲仔容易過尿片好多嘛, 咁梗係有咁多掃咁多啦! 哥哥留左21包共168條褲仔比我, 我同雅雯分左佢, 於是我地屋企有好多, 好多片片啦! 我真係有好多輕鬆穿架, 等我攞比你睇....今日天氣都幾涼, 我和雅雯又去左公園玩泡泡, 泡泡隨風飄盪, 我見到泡泡滿天飛, 笑得好開心!坐姿好醜樣!
呢兩日天氣清涼, 很舒服, 冷氣固然唔需要開, 就連風扇都可免, 媽媽發現我有好多夏天衫都未著過, 出年夏天唔會啱著, 於是盡量比搵來比我著一兩次都好. 今日搵左件白色polo恤, 一次都未著過, 係婆婆買的, 寫住3~6 months, 雖然短左些少, 都算著得落, 非常型仔, 不過呢件野質地厚, 雖然天氣涼爽, 但我係個大汗嬰兒, 加上精力旺盛, 爬完幾個圈返來已經成頭成頸汗, 唔換衫唔得, 最後呢件polo恤只係著左半個鐘唔夠就被換掉! 下午同媽媽一齊訓左個靚覺, 訓醒食下午茶, 係牛油果! 夜晚媽媽煮飯, 爸爸九點幾先返, 搞到差唔多十點先有飯食, 我習慣左同爸爸媽媽一餐食飯, 每餐媽媽都會夾少少餸比我食, 如果無野啱我食, 媽媽就會比幾粒飯我"妹下妹下", 咁我就會好安靜嘞!
今日星期日, 媽媽好多好多堂, 我就跟婆婆嘞, 今日的粥仔係蕃茄魚柳粥, 寶儀姨姨同我玩, 婆婆去煲粥, 點知煲好我已經好眼訓, 食左一碗仔就唔肯再食, 竟然大喊, 婆婆一抱我就訓著! 訓左半個鐘醒返, 食埋第二碗, 就好開心! 夜晚有人請食飯, 就係肥妹表姐嘞! 佢已經成功投身幼兒教育界, 仲出左第一份人工, 所以要請我地去酒樓食飯! 肥妹表姐終於能夠自食其力, 真係令人感動囉! 不過唔知點解係姑丈埋單呢? 乜唔係表姐請食飯咩?
今日我十個月大了, 我己經由一個小bb變左一個大bb了! 呢個月我變化又好大, 婆婆和嫲嫲都話我高左, 講野多左好多, 仲成日企起身, 飲食方面同上個月差唔多, 但依然一隻牙仔都未有, 哈哈哈~~~~~~! 今日爸爸放假, 但佢要去踢足球, 所以婆婆都有來湊我, 媽媽5:00收工, 本來我地想去尖沙咀天星碼頭坐渡海小輪, 然後去香港仔探爺爺嫲嫲, 因為爸爸話中環天星碼頭就快拆喎, 不過今日真係太大雨了, 先後有黃雨和紅雨, 最後我同媽媽無去, 爸爸自己一個返香港仔囉!
我有無話你地知我已經識講好多嘢? 唔知幾時開始, 我識講: "跩跩跩跩跩...", "爺爺爺爺爺..." 和"爹爹爹爹爹", 呢幾日我又發明左幾個音, 就係"咩咩咩咩咩..." 和 "奶奶奶奶奶...", 今日又演化成 "啦啦啦啦啦...", 仲有一d多音組合語言, 係外星人都聽唔明的, 例如: "阿爹爹爹咩阿嘩" 和 "吔吔咕~~~~~", 有d人聽到我講野, 會問媽媽我講乜, 但媽媽又點會知我講乜, 就算日日對住我都唔會知, 因為連我自己都唔知自己講乜. 今日返到婆婆屋企, 甫入門口阿公好熱情咁過來同我打招呼, 霎時間認佢唔到, 我竟然嚇到喊! 呢次係我第三次唔認得阿公而喊, 等我settle down阿公再過來同我玩, 我就破涕為笑, 仲搶佢眼鏡和摸佢鼻鼻. 今日婆婆煲的湯係紅蘿蔔粟米, 佢地大人食飯我都食埋一份, 我食左一舊紅蘿蔔和少少湯, 婆婆話我好乖, 因為我肯坐住櫈仔超過30分鐘, 之後我唔肯坐, 婆婆食完飯就抱我玩, 我同大舅父已經好熟, 一見佢我就笑, 大舅父仲教我駕車, 抱住我坐司機位玩軚盤. 今日爸爸將我的bb床降低了, 唔知係唔係唔習慣, 我夜晚訓著醒左幾次和大喊, 搞左幾耐先訓得返.
今早10:00起身, tammy姨姨驅車來接我和雅雯去佢地屋企玩, 我地先去食個lunch, 餐廳有嬰兒高櫈, 我和雅雯面對面坐, 佢咆哮大叫又嚇到我喊, 食完我地上anson屋企, 但anson好快就訓著左, 我同雅雯就不停玩佢d玩具, 又食佢d粥仔, 媽媽同我換片時我又懶尿, tammy姨姨借左一件anson的衫比我換, 真係失禮. 我好鍾意anson的鋼片琴仔, 玩到唔肯走, tammy姨姨叫我借返去玩, 我當然唔客氣! 肥妹表姐今日來, 要我玩bubble maker比佢睇, 媽媽就在洗手盆比我玩, 我見到咁多泡太興奮, 搞到成個浴室都係水和泡, 好似打完水戰. 夜晚cell姨姨和obi來玩, 我一見到cell姨姨就爬過去攬住佢對腳要企起身, 又講左好多太空話, 我同obi無見一輪, 好似好掛住咁, 我摸下佢, 佢又摸下我, 好得意!Anson訓左覺, 我同雅雯偷玩佢d玩具!表姐買的泡泡機, 玩到我成手泡!
今日爸爸例假, 上午打完波回家, 媽媽今日要出去教, 爸爸就負責招呼我, 我在爸爸的臂彎訓著了, 訓左一個兩個鐘頭的晏覺! 然後爸爸突然想煮飯, 就抱埋我落街買餸, 買之前我地去公園玩, 爸爸話平台有一個位好好風, 次次都帶我去吹吹風. 去惠康購物我又有得坐車, 爸爸話我初時唔肯坐, 可能我以為佢唔肯抱我, 死都唔坐, 搞左好耐先得. 爸爸煮飯, 我在網床玩, 間唔中呱呱大叫, 媽媽8點幾回來, 比左d包包我食, 但爸爸話我七點幾先食左包, 媽媽好似唔為意爸爸講乜野, 比左好多包我食, 我全部食晒. 9:45媽媽食飽飯就開奶比我, 我唔洗5分鐘又成支食晒, 食完媽媽見我神色有異, 果然不出所料, 我巴啦巴啦嘔晒d奶出來!!!!!!!!!! 原來我食得太多野了, 嘔出來的除左奶..麵包...仲有提子乾.... 好dirty! 清理現場後, 爸爸同我沖多次涼, 媽媽以後都唔敢搏命比"質"我食野了!
今日爸爸放假, 媽媽約左豬姨去做facial, 煲定粥仔叫爸爸餵我食, 但我中午已經好眼訓, 食到一半已經中眼訓, 爸爸拿拿聲餵我食埋佢, 最後都食唔晒, 爸爸就暗我訓覺覺. 媽媽話我地最近好少拍video, 於是爸爸今日開始幫我拍返多d我的生活實況, 爸爸又捕捉到我擒上餐椅, 然後論論盡盡咁爬返落去的情形. 媽媽今日終於去渣打銀行幫我搞掂個My Dream Account, 我有自己的互口嘞, 仲有$5000存款! 跟住我地一齊去金鐘, 爸爸去british council搞d野, 搞完我地去香港公園遊一遊, 不過天色已暗, 我地決定夜遊公園, 我對瀑布亭好有興趣, 爸爸企圖抱我衝入去玩下, 不過太多水, 爸爸驚我變落湯雞, 於是算數. 行完公園我地去Island Shangri-La換尿片, 我第一次去五星級酒店換片, 但我無因為置身高級場所而斯文, 反而不停鬧人, 因為我扭眼訓, 連在出面等候的爸爸都聽到我呱呱叫! 之後媽媽同我去wise kids睇玩具, 買左一個玩具比我, 然後我地去元氣壽司dinner, 我訓著左, 爸爸媽媽終於有啖好食, 食到尾聲我先訓醒, 爸爸媽媽比少少雪糕我食, 媽媽問爸爸: 點解今晚餐飯好似特別好食? 爸爸分析認為原因有三: (1)卡位夠闊落, 坐得舒服 (2)食飯前我已訓著, 有啖好食 (3)訓醒無扭計, 好乖仔. 其實我地今日本來要去銅鑼灣ikea睇櫃, 不過已經好夜, 所以無左呢個行程囉, 不過我地都好enjoy!中銀大廈前的傻父子嘩~~~~! 好多水呀!
今早媽媽的朋友會來我家開會, 為準備下個月的音樂會做準備, 我10:30自動起床, 拿拿聲沖個涼, 食少少麥包, 就乖乖地在網床玩, 其實我係企在床裡面睇佢地開會, 基本上我都幾乖, 可以比媽媽順利做晒野, 然後就落街食飯. tammy姨姨抱我睇泳池, 我竟然尿尿整濕左姨姨的衫, 原來媽媽同我著"輕鬆穿"著得唔係幾好, 搞到漏尿! 夜晚爸爸約左朋友食飯, 我和媽媽在家, 媽媽練琴, 我扶住琴櫈企在隔離睇, 然後我又在琴底捐來捐去, 又拆甩左pedal套, 在媽媽腳下轉左一個圈去到琴的另一邊, 然後扶住抽濕機企圖在琴底站起來, 但我無留意自己已經生高左, 差點撼頭! 媽媽又抱我一齊練琴, 佢有佢彈, 我有我彈, 好開心! 轉奶粉已經順利完成, 最後一罐安嬰兒1號奶粉今日已經比我食晒, 明天開始全部食2號安嬰寶嘞! 轉奶粉代表我大個仔, 進入另一個階段嘞! 安嬰兒係我來到呢個世界第一口的食物, 食足九個月, 真係有d唔捨得, 媽媽話要留返個奶粉罐做紀念, 不過媽媽又話轉2號有個好處, 就係2號比1號平好多呀, 加上我現在食粥仔, 可以慳返好多奶粉錢!
今日婆婆買在東海堂買左一個大提子麥包比我, 下午的粥係西蘭花瘦肉粥, 我如常食一碗滿, 寶儀姨姨話我食野好乖, 又食得多, 呢一點係真的, 我食野從來唔扭計, 無得食就勢係假. 媽媽早幾日買左藍莓比我食, 話對眼睛好喎, 但係我未有牙, 要搣皮先食得, 但藍莓咁細粒, 真係好難搣皮, 今晚媽媽好辛苦先搣左四粒比我, 但我跌左一粒落地! 今日媽媽搵返我兩至三個月大時拍的video來睇, 我無乜反應, 但婆婆和媽媽就睇到唔眨眼, 因為我變左好多喎, 婆婆話兩個月的我成個牛王仔咁, 現在好似女仔! 媽媽就覺得我以前好肥, 尤其是塊面, 好似個包, 現在瘦d, 因為個身拉長晒! 食完晚飯媽媽想去惠康買野, 但被我糾纏, 於是抱埋我落去, 我又有得坐車, 我坐住架超市手推車一幅好凝重, 好自豪的樣子, 捉到實個手柄, 仲搖下搖下, 以為自已可以推得郁部車, 個樣真係好好笑!
今早婆婆10:00幾來了, 我仲未訓醒, 媽媽出去教琴, 我訓醒婆婆就同我沖涼, 現在同我沖涼又增添左難度, 因為我成日要企起身, 就算有沖涼玩具, 我只會玩一兩下, 然後又扶住浴缸想企, 媽媽話我咁鍾意企住沖, 不如以後唔好用盆, 索性沖花灑囉! 下午姨婆和姨公到訪, 婆婆抱我落去接佢地, 我初初見到佢地好緊張, 唔出聲, 玩一陣熟落左就輕鬆晒, 肯比人抱, 媽媽今日4:00就收工, 我地一齊訓左個大晏覺, 訓醒和媽媽share一個提子麥包, 媽媽肯比提子我食了, 我食到唔停得口, 我真係好鍾意食包包, 一邊食一邊笑, 媽媽話我為食的樣子好可愛!
今日在婆婆家玩, 逢星期五都在婆婆家渡過, 今早由好早起身, 食左奶就無再訓, 所以婆婆一抱我好快就訓著, 訓醒婆婆同我去惠康, 然後返去食奶, 睇砵砵巴士, 哈! 在婆婆屋企我好乖咁睇晒全套砵砵巴士, 在自己屋企我又坐唔定喎! 婆婆食餅我又吼實晒, 明知無得食都要睇, 仲企圖攞走個罐, 當然唔成功啦! 由於今日晏覺訓得少, 加埋都係得一個鐘頭, 所以夜晚好快訓著, 媽媽都好攰, 陪我一齊訓, 我訓著左媽媽就抱我返自己的床仔.
今朝10點鐘醒左, 自己在窗台玩, 以前6,7點左右我會餓醒要食奶, 食完會再訓過, 唔知點解呢個禮拜開始無左呢個習慣, 10點食左奶我就唔會再訓, 媽媽就同我玩一陣, 然後落超市買餸煲粥仔, 沖涼, 食埋粥就差唔多要訓晏覺! 今日多左一個行程, 就係早上落會所兒童室同obi玩左一陣. 媽媽買左泡泡槍, 下午約埋雅雯去公園玩, 原來樓下公園好多bb和小朋友, 平時我地好少去, 因為怕熱! june姨姨負責吹泡泡, 媽媽影相, 我地坐住bb車睇泡泡, 覺得好得意, 仲用手企圖去捉泡泡! 雅雯好叻叻, 佢識講:"波波!" 表姐第一次出糧, 買左個玩具比我, 咁啱又係一個bubble maker! 係沖涼時用來製造泡泡的, 好搞鬼!同雅雯玩吹泡泡, 好浪漫喎!
今日媽媽要去青衣教, 收工約爸爸在地鐵站出口等, 一齊返香港仔探爺爺嫲嫲, 長途拔涉, 梗係要帶bb車, 今日早左少少, 有時間去sogo行一陣, 嫲嫲話我又高左, 就快高過張飯枱! 我不停咁Oh Oh Oh...似乎對樣樣事物都感好奇, 我又食左好多魚魚, 同大人一齊食飯我好乖, 肯食晒先走. 我成日想入廚房, 一落地就直衝入去, 爸爸擋住我都想強行入去, 不過當然事敗! 強攻多次無果, 其中一次比我突圍, 我加速爬行企圖搶灘, 快到似隻曱甴, 不過最後又被爸爸攔截, 真係唔忿氣! 回家途中累到訓著, 返到屋企都乖乖地換衫洗面, 好快就訓著了!
今日我食左三支奶, 兩碗蕃茄瘦肉粥, 一支蘋果汁, 十幾二十粒麵包, 少少皇帝蕉, 夜晚爸爸媽媽食飯, 又比左d蒸魚我食, 算唔算好多呢? 可能真係多左少少, 所以大左一個好大的便. 雖然我食量都幾多, 但我一d都唔肥, 仲好標準添, 健康院姑娘話我排50%, 唔肥唔瘦, 十分理想! 不過爸爸就嫌我太奀. 食咁多野都唔肥, 似足我爸爸, 餵食的性格就似足媽媽, 家陣我一見人食野就虎視眈眈, 就算明知唔會得到手, 都會走過去睇住人食, 望到實一實, 無得食, 睇下都好. 下午落會所玩一陣, 雅雯又扮恐龍大叫, 我有點眼訓, 比雅雯咁嚇一嚇, 又嚇到喊!
