親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
我要紀錄下現在我的作息習慣先, 滿一歲後我的生活已經十分有規律, 每朝九點起床, 有時早少少, 有時晏少少, 通常在九點至九點半之間會醒晒, 醒左會企起身傻笑和怪叫, 食支奶奶, 就開始玩, 我最近迷上睇圖書, 媽媽將所有圖書放入一個膠箱, 我可以自己拿來看, 不過我只係鍾意揭, 有時都喜歡睇圖畫. 玩得兩個鐘左右就開始攰, 呢個時候有兩個選擇, 一係訓覺, 一係沖涼和食lunch, 如太攰就覺覺豬, 仲頂得順就沖個涼然後食埋粥, 之後先訓. 有好幾次我介乎想睡和想食之間, 媽媽餵我食粥粥時, 我食食下訓著左, 今日婆婆來湊我, 又係咁! 我一啖一啖粥仔吞落肚, 但眼仔攰到dup晒, 但嘴仔如常運作, 餵一啖吞一啖, 婆婆餵完一碗就比我訓, 仲有一碗等我訓醒再食, 嘻嘻, 呢種事其實已經發生過幾次, 其實只要趁我未攰時比我食就得, 不過時間就要控制得好好, 而且兩餐之間分量要適當先可以, 你話湊bb係咪好有學問呢!最近迷上揭書, 每日都揭到無停手爸爸的球拍, 終於搶到手了!球拍先生和我一樣高!
爸爸在吉之島十蚊店買了兩把較剪, 親自操刀幫我理髮, 爸爸話當年幫大舊表哥剪過頭髮喎, 所以好有信心, 媽媽怕搞到通屋頭髮碎, 帶左我去公園剪, 媽媽抱住我, 用泡泡槍噴肥皂泡波波比我睇, 爸爸就落手剪, 不過泡泡一出, 引來好多小朋友走晒過來追泡泡, 我都有d衝動想落地, 郁來郁去, 爸爸好艱難先剪好, 哈哈, 都唔算太難睇!
以前我有少少驚大舅父, 因為佢講粗聲粗氣, 我百厭的時候, 佢好大聲地"喂!!" 一聲, 我就驚, 現在同佢熟左, 唔驚佢囉! 現在我人人都唔驚, 媽媽話要搵一個人做奸角, 做壞人, 等我驚佢, 我就唔敢跩, 不過呢個人選好難搵, 因為我地家族個個都林bat bat, 而且個個都鍚到我燶! 今日在婆婆家渡過一日, 訓醒晏覺落街散步, 我睇到人地打籃球, 開心到彈彈下, 婆婆撞到一個師奶, 傾左一陣, 我又唔知醜係咁同人笑, 但婆婆傾得耐, 我唔鍾意, 發出怪聲叫婆婆快d走!
[left1]調琴師傅來調琴, 我睇左好耐!
已經一歲仔了, 我仲係好多口水, 人地話出牙特別多口水, 但我流口水已經流左好多個月, 牙仔依然只得兩隻, 看來我仲有排流! 一日要用口水肩七八條, 有時甚至不敷應用! 今日落會所玩, 有幾個哥哥姐姐在叠積木, 我又走過去八掛, 因為我鍾意同大過我的小朋友玩, 點知我d口水整到d積木濕晒, 佢地見我咁多口水都怕左我! 唉...我的口水已經開始影響我的社交生活了, 你話點算好呢?
[right1]今日約左爺爺嫲嫲飲茶, 我地去左times square的魚翅城, 果度d蛋散係最馳名的, 媽媽本來想比少少我試下, 不過我眼訓得滯, 未食完d粥已經要訓覺了! 下午落好大雨, 我地要冒雨在銅鑼灣穿梭, 因為我地的bb車無雨檔, 爸爸將bb車的篷拉下來, 但我好想睇雨, 係都要捐個頭出來, 又伸手想去摸雨點, 媽媽就負責打傘, 遮住我和架車仔, 哈哈, 都幾狼狽架, 不過我就覺得落雨好有趣! 今日終於買左combi磁力積木, 媽媽話我大個仔, 要玩思考性的玩具了, 但呢套野好貴, 媽媽捨得買, 今日適逢sogo做特價, 媽媽就一口氣買左三盒! 不過唔係爸爸媽媽比錢, 而係媽媽叫大舅父買比我做生日禮物! 大舅父一口就應承了, 真豪爽! 今日我食雙皮奶呀, 好味好味, 媽媽仲比左少少西多我試下添, 我真係好為食!去酒樓飲茶, 我佔一個位架!
[right1]今日我要介紹我的另一個神奇朋友, 佢個名係梁雅雯, 佢早我一個禮拜出世, 但佢的行為舉止已經一早超出晒我地咁多個同齡bb! 今日媽媽和我, june姨姨和雅雯一齊去會所玩, june姨姨叫雅雯食奶, 佢唔食, 不過玩左一陣, 雅雯突然自己從june姨姨的袋攞出奶樽, 自己打開個奶樽蓋, 然後舉起支奶自顧自地豪飲, 就好似d男人落club吹喇叭飲啤酒咁, 好豪氣! 一條氣就飲晒五安士奶奶, 我媽媽睇到呆左! 我呢個朋友仲有好多奇人奇事, 其實我地都見怪不怪了! 今日tammy姨姨來探我, 仲買左一個火箭玩具比我做生日禮物! 呢個玩具我好鍾意呀, 我好快就識玩了, 但當然未係好純熟, 今晚仲玩過唔停添! 多謝晒tammy姨姨!Tammy姨姨送的火箭, 我好鍾意玩!
今日爸爸陪我睇賽車, 可能係男仔都鍾意睇車, 我見到d車車呼呼聲, 好鍾意睇, 平時落街見到車車都好興奮, 有次行過泓景台天橋, 聽到d車車風馳電掣, 我開心到大叫左出來! 下午落會所玩左好耐, 星期日好多細路, 我專走埋去最跩的細路果度, 佢地跑來跑去, 我咁細粒真係好易比人踢親, 所以爸爸媽媽都要睇到實, 小心唔好比人整親!
[right1]爸爸去上海玩左四日, 今日終於返來嘞, 佢一入屋, 我就呆晒, 好似唔認得佢咁喎! 爸爸話無見幾日, 我又唔同左樣, 聽講爸爸去上海除左masters cup之外, 仲學人上館子食左隻$180的大閘蟹!!! 媽媽都係去富臨食$28隻果d蟹毛仔咋, 爸爸真係奢侈呀, 有圖為證! 識玩糖果波波機了!呢幾日我學識左好多新技能, 今日婆婆教我打波波, 媽媽返來見我玩到興高采烈, 原來我正追住個小皮球玩拋波, 我又學識玩糖果波波機, 呢個玩具其實已經買左一段時間, 但我唔識玩, 只識按掣放晒d波波出來, 唔識放返入去, 今日婆婆叫我"放返入去啦", 我就突然間識放, 媽媽回到見到, 既開心又感動! 因為呢個玩具我一直唔曉玩, 教左好耐都唔識, 媽媽都算數了, 點知今日我突然識晒, 初時放得唔準, 波波跌晒出去, 到爸爸回來時我已經好熟練了, 爸爸都讚我叻仔! https://bb5.babyhome.com.tw/UPLOAD7/117460/122525.22184819.98081.wmv爸爸食巨型大閘蟹, 好奢侈啊!
今早9:30食完奶就開始活動, 昇悅居三寶又在會所會合, 我如常掉低媽媽, 自己一個人走到老遠去玩, 媽媽唯有同cell姨姨, june姨姨傾計, 玩玩下之際我無端端笑口噬噬爬向媽媽身邊, 媽媽以為我玩夠, 返來要媽媽抱, 點知我掂行掂過, 又爬到遠處黐埋d姐姐玩煮飯仔, 激到媽媽紥紥跳. 玩完返屋企沖涼食粥, 點知太攰, 粥食到一半就訓著左, 訓左唔夠半個鐘就醒了, 因為我地要趕住返婆婆屋企, 媽媽要用孭帶孭我, 所以我就醒左, 不過出門前有阻滯, 媽媽的鎖匙不見了! 無左鎖匙又點出街呢? 媽媽肯定是我收埋, 拿電筒左照右照, 終於在鞋架一隻拖鞋上面發現, 當然是我的好事. 後來婆婆話我是有前科的, 早排我又收埋婆婆的鎖匙, 搵左好耐, 原來被我掉左入玩具箱. 另外, 電視遙控器又不見了, 媽媽都搵左好耐, 今次是在圖書箱. 看來我家會繼續發生失竊事件, 相信爸爸媽媽好快會習慣. 爸爸明晚會從上海回來, 爸爸不在家, 我似乎無乜影響, 我好似一d都唔掛住佢喎! 哈哈! 不過明晚爸爸就回來, 到時睇下我有咩反應先.
爸爸不在家, 媽媽唯有自找節目, 今晚約了cell姨姨和obi大少去uno uno食晚餐, 媽媽帶埋粥仔比我食, 食左兩碗粥, 媽媽獎我食少少甜品, 有木糠布甸和麵包布甸, 我仲lam左少少朱古力漿! cell姨姨成日話obi好惡湊, 今晚我和媽媽真正見識到了, 完來佢真係可以完全唔食野, 要玩, 和要人抱, 仲要抱住行, 唔準坐! cell姨姨話佢已經幾日無正經食野, 只係濛濛鬆鬆想訓覺的時候才可灌佢飲幾安士奶, 我媽媽試過強行餵佢食奶, 但徹底失敗, 因為obi大少就好似一條鱔咁, 無論你抱住佢, 攬實佢, 或強行箍住佢, 佢都好輕易地溜走, 想塞個奶咀入佢個口? 簡直發春秋大夢, 佢個口就好似拉埋左拉鍊, 撬到撬唔開! 不過我和媽媽真係好奇怪, 點解呢名男嬰可以食咁少, 又活躍到咩咁? 睇住cell姨姨和工人姐姐同佢搏鬥, 我突然覺得自己都幾乖. 我在之前的日記提過, obi大少成日追我和搞我, 今晚佢又來嘞, 佢竟然鍚我呀! 我地兩個在餐廳的梳化椅企住玩, 佢無端端走過來哄我, 面貼面頭頂頭, 態度親暱, 我唔知佢搞乜鬼, 但我都無避開佢, 可能佢向我表示友好, 又或者係為前幾日佢搞我腳板底, 扯我頭髮, 篤我面珠和伸手入我口...等等事情表示歉意! cell姨姨和媽媽見我地兩個攬頭攬頸, 好鬼趣緻, 最衰爸爸拿了相機走, 無得拍底呢個咁可愛的鏡頭!
爸爸今日出發去上海, 清晨六點準備出門口之際, 我突然大喊, 爸爸抱起我發現我疴了臭臭, 原來我疴了幾粒子彈, 真奇怪, 我未試過訓覺大便, 爸爸和媽媽合力幫我換片片, 之後爸爸就出門口了, 要四日後先見到佢, 祝佢旅途愉快, 唔洗掛住我和媽媽架! 今日婆婆和媽媽帶我去健康院打一歲針, 今次磅重體重係9.03kg, 姑娘話我重得好少, 我本來係在50%條線上, 今次竟然跌落到25%! 媽媽大受打擊, 姑娘叫媽媽再比多些奶我飲, 不過大家都覺得健康院姑娘講的說話唔需要太介意, 只要精靈健康, 體重輕少少唔算問題! 今次打針都幾叻仔, 只喊了一聲, 今次媽媽特別留意我的面部表情, 支針入左肉兩秒我先有反應, 然後大喊, 不過好快就收晒聲!
[right1]昇悅居三寶: 梁雅雯, 勞逸, 和本人歐昭駿, 今日又齊齊出動了, 我先和勞大少在會所碰頭, 下午雅雯再來我家, 之後我地又在會所齊集, 一齊搞搞震! 我和大少今日發生左些少磨擦, 過程係點我媽媽都唔多清楚, 只見我地兩隻野爭玩cell姨姨的相機套, 唔知點解obi成日鍾意跟住我, 我爬到邊佢跟到邊, 佢爬起上來屁股離地, 速度又出奇地快, 媽媽話佢似侏羅紀公園的速龍. 平時我成日比人搶玩具, 我都唔出聲, 今日竟然同佢嘈交, 可能因為佢尋日整鬼我, 我睇電視時佢係咁搞我腳板底, 整到我嬲嬲地, 所以今日我要同佢死過! 雅雯又係咁, 我攞住邊個玩具佢就搶, 於是佢比june姨姨鬧! 我地跟住在會所波波池玩, 唱兒歌, 但我地比較喜歡走來走去. 夜晚eco和bonnie嬸來了, 一齊去富臨食大閘蟹, 媽媽舊年懷孕無得食, 今次一口氣食兩隻, 好暢快!同obi齊齊玩滑梯
https://bb5.babyhome.com.tw/UPLOAD7/117460/122525.45609134.74695.wmv 嘻嘻, 媽媽其實想在我一歲生日那天將呢個"一年前的我"片段放上來, 但那天去左迪士尼玩, 之後又懶懶散散, 到今日先完成, 有心唔怕遲, 終於都放左上網比大家睇, 一年前的我係咪好唔同呢? 那時我是個大喊包, 成日喊, 搞到爸爸媽媽好騰雞呢! 我以前好鍾意講"阿咕", 呢輪的口頭蟬係"噢", 我會根據不同場合, 不同氣氛和本人不同的情緒, 發出唔同音調和長短的"噢", 例如, 行超市見到魚魚在魚缸游來游去, 我會突然在bb車彈起坐直, 瞪大眼睛說一聲短短的"噢!", 玩玩具發現奇怪的事物, 我會發出很長的"噢~~~~", 音調是向上的, 之後又會發出另一個長長的"噢!!!!", 不過今次是向下的, 似乎想通了甚麼! 媽媽話我"噢"得古怪, 成日扮我"噢". 今日又學識一個新技能, 就係拜拜了, 今日媽媽開門同我街街, 我就fing右手, 動作有點似拜拜, 但媽媽唔肯定係唔係, 之後媽媽再叫我拜拜, 我都fing手, 哈哈, 叫十次都有3-4次肯做, 都算做識拜拜了!
https://bb5.babyhome.com.tw/UPLOAD7/117460/122525.21774203.15963.wmv 中環天星碼頭要拆了, 爸爸話碼頭要拆好可惜, 一定要帶我睇下, 早排我地去坐過一次渡海小輪, 但天色已晚, 沒有在碼頭影相, 於是今日我地又學人去碼頭懷緬一番, 同行的有肥妹表姐, 阿華華哥哥和姑媽! 媽媽突然又不用上堂, 到中環會合我地! 影完相媽媽想搵個地方比我食支奶, 但大會堂竟然連櫈都無張, 我地唯有在公園野餐! 噢? 第二次來天星碼頭, 咁快就要拆啦?食完奶好快訓著左, 我地坐巴士入香港仔, 全程我都在覺覺豬, 點知巴士一到站我就彈起身, 到酒樓和爺爺, 嫲嫲, 姑丈和大舊表哥會合, 我大個仔自己有櫈坐, 好型, 我好快手搶左對筷子來玩, 玩到興起之際媽媽竟然攞走左, 話驚我整親眼睛喎, 我當然好唔高興, 扁晒嘴鬧人, 笑到大家碌地, 詳情請看影片啦!
今日媽媽買左三文魚煲粥比我食, 今次媽媽用薑來蒸熟d魚, 所以唔腥, 我食左兩碗, 婆婆同我落clubhouse玩, 呢排少左落去, 婆婆話今日唔係太多小朋友, 但個個都識行了, 唯讀是我一個爬來爬去, 跟住婆婆抱住我去惠康買瘦肉, 準備今晚煲ABC字母粉, 我負責拿住包瘦肉, 到收銀處都唔肯交比個收銀員姐姐, 最後婆婆用張單和我交換包瘦肉, 我先肯放手, 之後婆婆叫我拿住個惠康袋返上樓, 我被委派拿住個袋, 覺得身負重任, 拿得好實好穩陣, 但我的心情又好興奮,不停將個袋fing來fing去, 回家媽媽見我拿住個惠康袋, 笑到趴地! 婆婆話我有眼屎, 媽媽就買開奶茶煲比我飲, 今次係我第二次飲開奶茶, 我五個幾六個月時初食粥仔便秘, 都係要飲開奶茶先疴得出, 今次飲無乜異樣, 清下熱氣咁喎.
人地話出牙的嬰兒特別多口水, 不過呢個情況在我身上唔係幾講得通, 事關我自從兩個多月起已經好多口水, 但呢段時間口水係白流的, 因為我根本未出牙, 到現在只有三隻牙, 口水依然未停過, 有如瀑布, 一日用十條口水肩不足為奇, 口水流得實在太誇張了, 爸爸開始有點擔心, 成一歲仔仲係咁流口水, 真係要想想辦法先得! (其實媽媽覺得不是大問題, 不過既然爸爸擔心, 媽媽就在此提出一下) 今日在婆婆家渡過了一日, 婆婆帶我去球場睇人地打排球, 有個五個月的肥bb由印傭帶著, 婆婆同佢傾計, 叫我同bb玩, 我無理佢, 梗係啦, 我都唔鍾意同細過我或同齡的細路玩的, 我淨係鍾意同靚的大姐姐玩架咋!
今日是我的一歲生日, 我地一家好熱切期待今日的來臨, 第一個生日的意義十分重大, 一年前的一團麵粉, 今日己經變成一個小男孩! 已經不再是bb了, 媽媽好懷念我bb的樣子啊! 今日我地的慶祝節目就係去迪士尼樂園! HK disneyland開左成年, 爸爸媽媽都無去過, 原因就係要等我一歲生日呢一日一齊去玩! 大眼仔哥哥係員工, 帶我地一家, tammy姨姨一家和uncle zane免費入去玩, 媽媽話唔洗錢特別好玩. 我地下午先入場, 玩左唔係好多遊戲, 只係玩左巴斯光年, 小熊維尼, 3d立體電影和金像米奇show, 但我玩巴斯光年和小熊維尼有點驚, 因為好黑, 好彩只係驚左一陣, 無喊. 由於今日係我生日, 我有一個生日襟章, 好多哥哥姐姐同我講生日快樂, mickey仲攬住我鍚, 又吱我, 我就搞佢個鼻鼻! 我又睇parade和煙花, 中途在豪華的嬰兒室食左支奶, 換左2次片, 仲訓左兩次覺! 好多人話香港迪士尼好細, 無乜野玩, 但我地今次人多行得慢, 玩得少, 所以仲有好多野未玩, 希望下月媽媽生日可以再去一次就好了!玩雙槓迪士尼姐姐給我生日襟章!好大隻米奇呀!米奇先生知我生日, 竟然吱我!
我有一個興趣, 就係伸手入人地的口, 搞人地的牙, 媽媽就係最常被我搞的人, 爸爸, 婆婆有時都成為受害者. 今早我又重施故技, 好大力搣開媽媽的口, 然後插隻手入去抓媽媽的牙, 媽媽通常都比我搞, 但今日我實在太大力和搞得太多次, 激嬲了媽媽, 媽媽好惡鬧我, 又打我手仔, 我竟然ka ka笑, 以為佢同我玩! 黃昏時份去了eco姨姨家, 佢屋企好大, 好多地方比我爬, 佢全屋都比我爬過晒, 留低唔少口水跡, 之後我地去酒樓打邊爐, bonnie姨姨和eco姨姨送了生日禮物比我, 係好靚的Hallmark Babies冬季工人褲! 仲有Italian Tomato黑森林蛋糕, 我第一次有生日蛋糕, 媽媽代我吹蠟燭, 我都食左少少!我的第一個生日蛋糕唔識吹蠟燭, 蠟燭上的火反而吸引到我!
[right1]今日收到一份好有心思的禮物, 係雅怡媽媽ivy姨姨親手設計的"歐昭駿T恤"! 哈哈, ivy姨姨竟然用左我12張相, 由初生到一歲, 砌成一個 "1" 字, 然後印在件T恤仔正面, 背面仲係爸爸媽媽和我的相! 媽媽都有一件呢! 哈哈, 媽媽話呢份係30年來收到最有心思的禮物呢! 連爸爸都話好! 多謝晒, 多謝晒! 近日常做怪動作, 呢款凌空倒樹葱真係太危險了!去年今日係我的預產期, 媽媽已經準備就緒等我出來, 不過當日我無動靜, 搞到媽媽坐立不安, 去街又唔係, 留在家又悶到發霉, 哈哈, 真係諗起都好笑! 今日我又發明左個怪動作, 爸爸稱之為"朝拜", 動作就如回教徒朝拜一樣, 跪在地下然後舉高雙手再向前一"拜"! 哈哈...婆婆話我成日整鬼做怪, 又咁大動作, 好易整親, 叫媽媽唔好比我咁做喎!Ivy姨姨精心製作的1歲T恤, 係咪好有心思呢?
媽媽自訂星期一為佢o既例假, 因為星期五六日好多堂, 星期一再唔抖下, 會好攰架, 所以今日媽媽不用工作, 全日同我一齊, 不過想訓晝d都唔得架, 因為我一早起身嘈醒媽媽, 食完奶就好精神, 媽媽就會放我出廳玩, 玩兩個鐘左右又會再眼訓, 再訓1-2個鐘就醒晒! 以前我晨早食完支早奶就會即刻訓返, 媽媽可以乘機再訓過, 現在我大個仔, 活動能力強左, 鍾意玩多個覺覺豬嘞! 不過今日都幾無聊, 好多日無去會所玩, 今日想去, 點知媽媽記錯時間, 會所兒童室關門清潔, 無得入去, 我地唯有去公園, 但我未識行, 又唔肯試行, 一落地就要爬, 所以媽媽都唔敢放我出來, 唯有坐住bb車睇媽媽玩肥皂泡比我睇!
今日寶儀姨姨和豬姨送左架mothercare士的車比我做生日禮物, 十分名貴, 似乎係嬰兒車中的benz, 架車仲有個好大的籃, 可以比媽媽去惠康買好多檸檬茶! 呢兩三日我成日拍手仔, 之前係無端端傻更更地拍, 但現在不同了, 當媽媽說: "昭駿, 拍手仔!" 我就會伸到兩隻手直一直, 然後係咁拍拍拍, 其實唔係d咩了不起的事, 不過大家都話我叻叻, 今日仲搞笑, 婆婆話我睇兒童節目, 我見到d小朋友玩問答遊戲答對左, 我就拍手! 今日肥妹表姐要去明愛賣物會幫手做義工, 佢買左好多平靚玩具比我, 有一架大消防車, 一架靚靚泥頭車, 沙灘玩具等等...一大堆, 都係我的生日禮物喎, 夜晚佢同姑媽姑丈, 表哥來找我和媽媽去食飯, 我地仲去日本城搶購添, 哈哈!
今日媽媽好忙, 一早出左去教, 下午三點先返來食lunch, 媽媽一返來我好開心, 好熱情地歡迎佢回來! 匆匆忙忙食完飯又要教了, 星期六真係辛苦! 梓延表舅父和他媽媽, 即又後生又靚的舅婆, 送了一份禮物給我, 預祝我下週一歲生日, 係les campaign des petit冬裝一套, 真係好靚架, 等天冷著比大家睇!
自從裝了門欄, 無得入廚房, 我都好少在廚房外徘徊, 呢兩日當媽媽在廚房整野的時候, 我會透過門欄的罅隙"裝"下媽媽在做甚麼, 啊! 原來媽媽在整粥仔比我食! 我即刻講: 媽媽mum mum mum mum....媽媽就話: 係呀, 媽媽整mum mum bb食呀!!! 咁我就好期待我的粥粥, 但我無耐性等, 就呱呱叫, 媽媽比d磁石我玩, 我竟然故意穿過門欄掉入廚房, 然後伸長隻手入條隙執返, 執唔到又大叫, 我覺得呢個遊戲好好玩, 玩左兩日. 今日食完早奶, 11點眼訓再訓過, 1點先醒, 媽媽以極高速在一小時內煲好粥仔, 執野, 同我沖涼, 餵粥, 然後準時2點出發去婆婆屋企, 媽媽真係好快手! 今晚婆婆煲紅蘿蔔粟米南瓜湯, 我食左紅蘿蔔, 南瓜, 少少飯和豆腐. 大舅父又叫我學駕車, 比個軚盤我玩, 爸爸媽媽咋啼唔理我, 留底我在大舅父的車, 我一於好少理, 有車駕我就阿媽都唔認得!
今日媽媽帶我去郵局, 我第一次去郵局, 要等媽媽辦好寄件手續, 我不耐煩在郵局大叫! 今日天氣涼, 我著左cell姨姨送的$5長袖t-shirt和婆婆買的老積牛仔褲, 突然間大個左好多,差d連媽媽都唔認得! cell姨姨和obi下午約我地去玩, 但媽媽上緊堂, 但落左堂obi又訓左, obi醒左我又訓左! 最後到夜晚七點幾我地先再約到對方, 原來obi已玩左一輪, 等埋我又再玩一大餐!
早陣子爸爸放幾日假, 同我一齊的時間多左, 之後爸爸就話我唔多睬佢, 放工回家我又無爬出去迎接, 搞到佢好傷心! 今日星期三, 又係"爸爸與我日", 整個下午爸爸都和我一起, 帶我去公園sir滑梯, 又同我去會所玩, 玩得好盡興! 爸爸咁鍚我, 我又點會唔鍚爸爸呢? 今日開始媽媽比我食多餐粥仔做晚餐, 大家會唔會覺得好奇怪呢? 無錯呀, 咁耐以來我都係中午食一餐粥, 其餘三餐都係食奶和其他小食, 事關我一餐粥已經要食兩碗, 食唔夠會喊, 所以媽媽唔敢比我再食咁多, 但現在我大個仔左, 又標高左好多, 搞到成個人瘦晒, 所以媽媽話可以比多少少我食, 於是夜晚就有多一餐固體食物了, 我好開心呀!
https://bb5.babyhome.com.tw/UPLOAD7/117460/122525.21280428.90342.wmv好多人都以為我係一個乖bb, 其實事實並非如此, 你咪睇我個樣一臉天真可愛, 成日傻笑, 食野又快, 就以為我好好湊, 其實我野蠻起上來唔係人咁品, 連媽媽都怕左我! 我的感冒已好得七七八八, 仲有幾聲咳, 生活大致回復正常, 不過病後我變得好黐身, 成日都想人抱, 今日camay姨姨來坐, 我發忟憎大吵大鬧, 要媽媽抱, 非常黐身 抱到媽媽手軟. 我發明的撻梳化遊戲, 現在我每日都會玩最少一次, 玩法好簡單, 只需要爬上梳化, 然後向後一撻, 就係咁嘞, 想刺激d可以企在梳化用力向後撻, 好似撻生魚咁就得, 看看影片示範就明白嘞! 不過婆婆話我呢個行為好危險, 唔比我發癲喎!
今日係重陽節, 肥妹表姐放假, 來學琴+同我玩, 媽媽買左支超級泡泡槍, 我地去公園玩, 但我好眼訓, 唔係好熱情, 媽媽話遲下再玩過, 由於太眼訓又唔肯訓, 食粥時竟然坐著訓著左, 粥仔食到一半, 訓左1.5個鐘, 訓醒又食過! 咳咳已經好左d, 但仲未清, 落會所又玩左一大餐, 當然有戴埋小魔怪的角, 原來會所的職員哥哥姐姐人人都有一對角, 真係應節! 夜晚爸爸返左爺爺嫲嫲度, bonnie嬸又突然出現, 今日媽媽有時間練琴, 我企在佢後面睇左一陣, 忍唔住好想彈埋一份, 於是左攝右攝, 成功攝左入去偷彈, 幫媽媽加左少少不規則的即興伴奏!
[left1]昨晚訓著都有咳, 仲咳多左添, 於是今早媽媽再同我睇多次醫生, 醫生話盡量唔比抗生素我食, 叫媽媽比我同病菌打多兩日仗先, 真係唔得先出動抗生素! 於是今日我繼續同病菌打仗啦, 仲流鼻水添! 打仗之餘都要娛樂, 我如常搞搞震和做左好多怪事, 包括在梳化撻來撻去, 然後瘋狂傻笑, 婆婆話呢個古怪行為太危險, 驚我樂極忘形整親頸骨, 嚴禁我在梳化發傻喎! 為左準備我的第一個萬聖節, 媽媽買左一條halloween口水肩, 一個紅色閃令令珠片牛角頭箍和一個南瓜桶比我應節! 哈哈哈!呢個小魔怪造型夠唔夠應節呢?
今日無發燒了, 但d咳未好返, 明天可能要睇多次醫生添! Cell姨姨又成功在$5檔搶購左d好野, 婆婆都話佢叻! 今晚bonnie姨姨無端端出現, 我地去左clubhouse玩, 洭龍哥哥又跟埋來, 佢真係超級鍾意bb, 成日都要同我一齊, 跟住我地去食飯, 但我扭計, 係都要人抱, 跟住我地又去左edison屋企八左一陣, 媽媽話佢又唔同左樣嘞, 初生嬰兒真係日日不同呀!