親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
光顧髮型屋
媽媽的私人時間
媽媽終於肯買牙刷比我了! 我的牙出得好慢, 上門牙四隻出齊, 但只有2次下門牙, 四隻大牙反而又出得好好, 四次犬齒是最近才稍為露面! 今早媽媽將一支好細的牙刷仔遞比我, 媽媽咁順攤比咁得意的東西我, 我反而有d懷疑, 我拿住牙刷研究了好一會, 然後望住mimi傻笑(最近愛稱呼媽媽做mimi), 媽媽叫我放入口, 我用刷毛在門牙上掂了一下, 然後好驚咁打了一個冷震! 好奇怪的感覺! 跟住媽媽幫我刷了幾下, 但我覺得不太自在, 於是媽媽比我自己拿住牙刷試下, 但我竟然當左佢係梳, 用來梳頭!我好喜歡自己的新牙刷
我家樓下的家品店要結業了, 今日係最後一天, 呢間家品店對我家來講係好特別的, 原因並唔係因為佢賣的產品平靚正(而且仲好貴吓), 而係因為呢間店的三位店員姐姐和姨姨都同我好熟, 我簡直當左呢度係我的私人遊樂場, 每晚食完飯都例牌入來玩下, 跑下, 但甚少買野. 記得我剛剛識行, 就開始在呢間店打滾, 那時我行得未係好穩, 有時仲會在地下爬爬下; 我最喜歡佢地賣的車, 每次見到都"car car car...", 我會爭取分秒玩晒所有車, 有時仲會走去筆架, 搬晒d箱頭筆出來, 又放返上去, 姨姨姐姐都唔會鬧我, 仲同我玩埋一份, 次次玩到癲晒! 有一次仲搞笑, 媽媽推住bb車和我在商場行過, 店員姐姐剛好路過, 姐姐話帶我去玩, 我即刻伸手要姐姐抱抱! 於是姐姐就將我抱走, 仲叫媽媽放心去食飯! 可見我地真係熟到燶! 呢幾日我迷上左佢地的收銀機, 每次收銀機櫃筒彈出, 一見到銀紙我就雙眼發光, 姨姨比一張十蚊和一張一百蚊我揀, 我兩張都要, 大家都讚我叻仔! 有一架迷你遙控車, 媽媽想買, 但太貴一直無買, 姨姨叫媽媽今日先買, 因為最後一天六折, 姨姨於是幫我留起! 今日下婆婆同我落街玩, 媽媽比六十蚊我去買車, 叫我見到姨姨就比佢, 我死抓住d錢唔放, 婆婆問我攞我都唔肯放手, 但一入到店就馬上遞比姨姨, 於是我順利以六折買到我比愛的綠色CAR! 今晚入到去, 店裡已經空空如也, 連貨架都有人買走了, 地方大了好多, 但我己經唔能夠再圍住貨架玩氹氹轉, 去藥房買完野返來, 店已經關門, 姨姨好忙碌地點數, 爸爸媽媽和我在櫥窗外看, 姨姨見到我, 隔住玻璃遞一張一百蚊紙比我, 我竟然伸手想去攞, 大家都覺得好好笑!
我係個極愛笑的細路, 少少野都笑一餐, 有時笑好誇張, 收唔到聲兼噴晒口水! 最近樓下商場有function, 逢星期六日可以免費打wii遊戲機, 婆婆帶我去睇, 我一睇見人地用球拍對住部電視打網球, 就笑到傻晒, 笑聲大到成個商場的人都望住我, 笑到聲到沙埋! 到六點鐘工作人員收工了, 將部電視機推返入貨倉, 我竟然想跟住入去!
想玩電腦
今日媽媽再嘗試比我自己一個人上playgroup, 首先, 媽媽帶我到課室門口, 就請姨姨帶我入去, 媽媽自己唔入, 間唔中又裝個頭睇下我做緊乜, 見我好忙咁玩玩具, 就暫時離開一陣, 本來想落街行下, 但又唔放心, 於是在外面坐住等, 每隔10至15分鐘又忍唔住裝下我, 見我無異樣就出返去坐. 到了最後五分鐘, 媽媽想入課室接我, 但ms hazel示意叫媽媽在外面等, 最後ms hazel帶我出來, 我見到媽媽無特別反應, 全無半點思念! ms hazel報告比媽媽聽話我做得好好, 和同學爭車都馬上放手, 但做美勞時一塌糊塗, 要ms hazel幫我完成條蛇蛇! ms hazel話我無媽媽在場時表現很好, 之前好明顯係嗲媽媽, 今日第一次成功自己上課, 媽媽雖然好開心, 但忽然間放低我, 好唔習慣! 想我學會獨立和聽老師教導, 以後上幼稚園可以順利d, 但又想知道我上堂學左乜, 食左乜, 表現點樣, 乖唔乖... 好矛盾, 做父母真係難!
媽媽喜歡去青衣一間兒童圖書公司買圖書比我, 貪佢又平又靚, 平均一個月上去一次, 又介紹好多朋友去買, 整整下就同公司的人混熟了, 最近佢地擴充營業, 媽媽今日上去參觀, 地方大左好多好多! 就係呢間嘞, 大家得閒記住去睇睇喎, 真係好值得推介! http://www.hk-nano.com/ 咁今日媽媽又買左咩比我呢? 就係好多本新圖書! 媽媽出去其間爸爸照顧我, 帶我落會所玩, 每次都好多趣事報告返比媽媽聽!
今日係好特別的一日, 因為我在playgroup開始唔需要媽媽陪了! 事情係咁, 今日的story time之後, 我和其他小朋友一齊排隊入playroom玩, 今日我排第一, 媽媽在隊尾, 媽媽見我一入房就忙於玩單車, 索性唔跟入去, Ms Hazel叫媽媽唔好比我見到, 因為一見到媽媽我就會撒嬌, 於是媽媽在門外等, 間唔中透過玻璃偷偷地裝下我做緊乜, 只見我好忙咁玩緊單車, Ms Hazel同媽媽豎起手指公示意一切順利! 玩完之後我地排隊去洗手, Ms Hazel示意叫媽媽躲起, 但媽媽唔醒目唔明白, 於是叫Ms Jane同媽媽再講一次, 媽媽即刻躲入廁所! 媽媽離遠望到Ms Hazel拖住我, 洗完手出來又抱住我, 然後再帶我返入課室, 食茶點, 做美勞...我都可以自己一個人, 完全無找媽媽. 到最後5分鐘, 我見到同學的媽媽在門外裝裝下, 我諗起自己媽媽, 就怪叫起來, 媽媽於是入來課室, 我一見媽媽即刻撲過去要抱抱, 死都唔肯落地! Ms Hazel話我今日very good, 比佢想像中表現好好多, 媽媽好開心, 大讚我今日好叻仔! Ms Hazel話小朋友的表現係反覆的, 今日好, 明天未必好, 所以我仲要繼續努力! 題外話, 我實在太喜歡綠色了, 今日的填色係一隻mouse, 我竟然填了一隻全身綠色斑點的老鼠, Ms Hazel話係我自己揀綠色蠟筆的!
爸爸媽媽剛結婚時開始用的JVC DVD機, 呢部申請信用卡的迎新禮品, 大大話話已用了5年有多, 估唔到都幾襟用喎! 不過自從我愛上按掣和換碟, 呢部機真係好唔得閒, 碟盤每天不停伸出伸入, 想唔提早退休都唔得, 終於在今日佢正式宣佈失去所有讀碟功能, 放任何碟入去, 佢都話\"NO DISC", 唔知係真壞, 還是抗議我每天不停整鬼佢, 所以罷工! 無DVD機的家怎能算是家? 媽媽馬上打電話比爸爸求救, 爸爸亦察覺到嚴重性, 放工馬上去買一部新的, 今次買甚麼機好呢? 買一部二千蚊可以錄影的, 還是買部四百蚊齌睇的? 和媽媽商量後, 爸爸買了一部四百幾蚊的國產步步高! 有小魔怪的家庭怎能用貴野? 買部平平地, 壞左都無咁肉赤, 邊個話平野無好? 新dvd機先生的質素真係非常唔錯呢!
琴+umbre
圖書館+影證件相
原來天文台已經三年無掛八號風球了, 上一次係04年, 咦? 原來我係第一次經歷八號風球! 不過對我來講, 八號風球只係代表唔可以出街玩! 好彩今早媽媽已帶我返joyful上左一堂playgroup補堂, 今日係返9:30, 比平時早左個半鐘, 呢個鐘數好好呀, 放左學可以慢慢返屋企, 玩一陣, 食飯, 再玩一陣, 先訓覺! 而且我現在日日好早起床, 所以媽媽想申請以後上9:30的堂, 不過Joyful實在太多人讀了, 唔知有無位比我轉班呢! 八號風球的下午係有d特別的, 首先媽媽唔洗出去教琴, 爸爸提早返屋企, 我地無端端多左半日family day, 爸爸學人去超市搶購餸菜, 夜晚媽媽入廚(好耐無煮飯了!), 然後obi和cell姨姨來我家玩, 大家好輕鬆愉快咁渡過颱風帕布帶比我地的半日假期!
我向來以食野乖見稱, 最近唔同了, 我唔肯食媽媽煮給我的飯, 有時只食幾啖就完全唔要, 令媽媽又勞氣又擔心, 不過諗深一層, 我日日食住差唔多的飯餸, 自然會厭, 媽媽於是要諗下新花款, 首先, 前日婆婆專登為我整左一盒薯蓉, 我好喜歡, 好合作咁食左三份二, 之後媽媽有樣學樣, 在薯蓉加了牛肉碎, 仲有用燉的方法煮肉餅, 在飯裡面加娃娃菜等等, 尤其是蕃茄炒蛋免治牛肉飯, 我超級喜歡喎, 仲好乖食晒大半碗飯, 雖然煮的過程功夫多左, 不過我肯食, 媽媽就好安樂了! 不過我真係越難越服侍!
今日本來要返joyful playgroup補堂, 但唔知點解, 我未夠八點就起左身玩, 十點未夠又訓返! 通常每日都係我叫醒媽媽的, 但今日我訓返, 媽媽10:30突然扎醒, 拿拿林梳洗換衫, 但我訓到一隻小豬咁, 媽媽唔忍心叫醒我, 唯有打電話返joyful, 好彩jenny姨姨好人, 比我星期五補返一堂, joyful就係呢樣好, 有得補堂, 試問邊間playgroup會咁好? 唔怪得排晒長龍, 都有大把人要爭住參加! 話說上星期爸爸帶我去我老友Obi屋企, 見到obi爸在場, 我好驚咁伏在爸爸膊頭, 又掩埋眼唔望佢, 可能因為我見過obi爸欺負朱一樂, 我驚到想揾窿捐. 點知, 今晚我地一家和obi一家在平台相遇, obi爸二話不說上前大力卒我塊面, 爸爸媽媽慌忙制止, 我即時嚇到"哇~~~~~~~~~~~~~~!"一聲嚎哭, 喊聲響遍整個屋苑, 爸爸馬上抱起我定驚, 好唔容易先幫我止哭! 爸爸話, obi爸的粗魯行為嚇怕晒所有bb (obi例外), 建議我地bb界組織大行動, 要將呢個兒童剋星改邪歸正!
唔經唔覺, 我已經在協康會返左八個月playgroup了, 今日係第三學期playgroup的最後一堂, 之後我就唔會再返協康會了,媽媽覺得我大個仔, 係時候見識下其他野, 同時要將位置讓比其他較細的小朋友! 我在協康會的八個月真係過得好開心啊, 舊年12月, 我同其他bb仲未識行, 見到一個個大波波, 只係識得發呆傻笑, 今日我20個月大, 已經識得自己撲上個大波波玩, 仲追住個波來踢踢踢! 由初初唔肯用手拿食物, 到現在己經用餐具食得好好, 仲學識用杯飲水水, 仲學識要有耐性等候, 仲要幫手收拾玩具! 令人最近欣賞的係Angel姐姐每次都好有心思準備遊戲, 又比d古靈精怪野我地玩, 例如有一次我地要體唔同質感的物件, 佢比左一盤粗鹽我地玩, 搞到個個人成身都係鹽, 但我地個個都好鍾意! 我又鍾意珍姐為我地準備的茶點, 八個月以來未有一次重覆過, 真係犀利! Angel姐姐要離開playgroup的崗位了, 因為佢要幫助其他有特殊需要的小朋友, 協康會的playgroup搞得咁出色, 我B豬大爺強烈推薦比各位小朋友參加, 不過最好早d打電話排定隊啊! 最後我要多謝珍姐, 因為我到畢業的今日依然流好多口水, 多謝珍姐每次在我流口水落地下後, 馬上飛撲過來清理! 多謝晒!我最愛玩大波波我識得自己騎木馬了!呢個鞦韆可以承托四千磅重量!一轉眼, 我在協康會已經參加了8個月playgroup了!
今日係Kinermusik的最後一堂, 不過今日唔係Ms Mary, 改左另一位新老師叫做Ms Megha, Ms Megha係印巴藉女士, 初時媽媽擔心我地唔習慣, 但我地完全無種族歧視喎, 仲玩得好開心添! 今日我地每人可以得到一張畢業證書和一份畢業禮物, 全部都係零食啊! 今日堂上發生了一件趣事, Anson和我在跑來跑去, 點知我地兩個撞個正著, 頭撞頭, Anson當場大喊, 我伏在地上咋喊(但媽媽見到我在笑), Anson話: "石(指我)跩跩!" 點知後來佢再跌一交, 又話我跩跩!? 後來聽warti姨姨講, anson在家也會話我跩跩, 原來我在佢眼中永遠是跩跩的, 好冤枉啊!
媽媽是一咳不可收拾的人, 上次一咳前後睇左5次醫生, 中西合壁先好, 今次竟然有奇蹟出現, 食了一日藥, 第二日已經好了八成, 連爸爸都話估唔到! 不過媽媽記住聽醫生話, 要按時食晒d抗生素喎!
媽媽又患了傷風咳了, 整天戴著口罩, 好似一個懞面超人, 我見到媽媽怪怪地, 成日用手去搞佢的口罩, 覺得好好玩! 媽媽的氣管唔好, 容易咳嗽, 今日睇左西醫, 食左完當然眼瞓, 但有好多工作在身, 最後唯有取消其中一堂來瞓覺, 我和婆婆在廳玩, 偶然會走入房"裝"下媽媽瞓醒未, 媽媽瞓醒見到我在門口裝裝下, 繼續扮瞓, 然後突然彈起身, 嚇得我卡卡大笑! 呢幾日唔肯正經食飯, 媽媽唯有諗d新主意, 知我鍾意食麵麵, 於是媽媽今晚食炒烏冬, 有新食物果然係唔同d, 不過我的食量始終同以前有d分別, 明顯食少左, 媽媽要再諗諗計嘞.
我的星期五
有一日, 媽媽同協康會的Angel姐姐傾計, 講起養育孩子係人生最高深的學問, 深過晒以前所學的任學野! 真係的, 小朋友係日日在變, 明明每次都好好地返playgroup, 點知今日婆婆在場就喊過不停; 不嬲食野好乖, 呢兩日偏偏唔肯食飯... 同小朋友爭車, 大力掉玩具落地...種種唔乖的行為, 都令媽媽好煩惱, 連婆婆, 爸爸都指責媽媽: "都係你縱壞佢!" 救命啊, 原來所有責任都在媽媽身上? 早前有人同媽媽講, 1歲10個月的男孩子係最惡教的, 看來呢個將會維持一年的可怕階段已開始左了, 媽媽要繼續撑落去啊, 就算爸爸偷懶, 乜都唔做, 媽媽都要頂梗上啊!
今日爸爸媽媽同我去九龍灣新開的商場megabox行下, 爸爸媽媽以前都係在九龍灣工作的, 現在九龍灣唔同晒囉, 變左商業區, 仲有大商場! 我地要在德福坐穿梭巴士先來到的! 不過商場唔係咁多野行, 其中一層係兒童天地, 有sir滑梯和跳跳琴比小朋友玩, 我當然唔執輸, 玩埋一份. 題外話, 最近我十分喜歡逛惠康, 因為我好喜歡坐超市的手推車, 我係唔肯坐車後面的兒童專用位的, 因為我要坐入車裡面, 管理媽媽要買的貨品, 當媽媽推車到收銀處時, 我已經準備好, 將車裡面的東西逐一攞比收銀姐姐, 最緊張的時刻就係用八達通卡比錢, dooo~~~一聲的時候, 我會將自己的手放在卡位, 自行扮dooo~~, 但媽媽仍然會比張卡我幫手dooo~~~, 每次完成呢項壯舉我都好滿意, 但收銀姐姐每次將收據比我時, 我都忘記攞返張八達通卡走...
今日婆婆和媽媽一齊陪我返Joyful playgroup, 唔知係唔係因為婆婆在場, 我非常扭計, 又同小朋友爭車, 不停喊... 呢種情況係從來未發生過的, 媽媽一心諗住帶婆婆睇下我上課時的叻仔情況, 點知... 扭計和喊持續到茶點後, 最後我早退了15分鐘, Ms Hazel話: Don't worry. 於是媽媽帶住我, 同婆婆去大家樂食午飯, 一出街就鬼打咁精神, 真係....吹到啤啤聲!
今日協康會playgroup又有好多新奇好玩的遊戲, 果d犀利韆鞦, 我已經玩到熟晒, 於是我改變玩法, 要企係度玩, 係咪好犀利呢! 臨走時, 媽媽見到枱底有隻膠碟, 相信係小朋友食完茶點唔小心掉左落地, 媽媽見珍姐正在收拾, 懶得去執, 但比我見到了, 我毫不考慮踎底去將呢隻碟執起, 媽媽以為我執隻碟來玩, 叫我放低, 但我竟然上前親手遞比珍姐, 原來我係想幫珍姐手收拾, 珍姐讚我好乖, 媽媽見我平時搞搞陣, 破壞多建設少, 估唔到我都喜歡幫人, 心裡面好高興!
今日婆婆如常來湊我, 本來打算訓醒晏覺帶我一齊去太婆屋企, 但我訓醒已經5:00, 太晏了, 於是我地無出去, 改為去樓下行公園和行商場, 媽媽在星期五六日是教琴黃金時間, 每日都教過不停, 有婆婆照顧我媽媽是最放心的, 反而爸爸湊我媽媽仲無咁放心! 爸爸放工返來, 婆婆就返屋企了, 但今日我唔比婆婆走, 喊得好慘, 婆婆臨走時我仲要餵佢食一粒麵包(最近我愛上餵人食野), 於是爸爸抱我落商場, 咁啱媽媽從惠康買完野出來, 工作完一日, 媽媽見到我開心到不得了, 搶住要抱我, 我就好爹咁伏在媽媽的膊頭, 扮覺覺豬... 晚飯後媽媽提議去運動場玩, 行左一圈, 大家身水身汗, 爸爸話放晒d電, 就會訓得好, 果然真係, 今晚我訓覺好乖, 媽媽播住kindermusik的搖籃曲, 唔洗一陣我就訓了...
和爸爸游水
無訓晏覺
表姐陪我返學
https://bb5.babyhome.com.tw/UPLOAD7/117460/122525.63756560.16474.wmv哈哈, 爸爸用沙埋住我的腳第一次浸鹹水索性剝光豬, 旁若無人四圍行
Hot Cross Bun
