親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
搽麵包
今日竟然刮起三號風球, 電視新聞話今年係戰後最早打風, 仲有紅雨黑雨, 呢隻浣熊都幾惡死. 但爸爸都要出去踼足球, 婆婆於是來了陪我, 打緊風都要落街行下, 買下包包, 今日買左黑芝麻方包, 我食左一大塊. 題外話, 昨天媽媽去青衣教一個男仔, 佢一見到媽媽, 就伏在鋼琴上喊, 喊得好可憐, 媽媽於是問佢咩事, 佢唔肯講, 媽媽再問佢: "係唔係同彈琴有關架?" 佢話係, 但唔肯講咩事, 只係不停流淚. 媽媽再問: "係咪無練琴, 驚我鬧呀?" 佢又話唔係, 最後媽媽答應唔鬧佢, 叫佢講出咩事, 仲應承會幫佢解決呢個問題. 大家估吓呢位男孩子因咩事喊得咁淒涼呢? 答案竟然係: "你次次來到要我學琴, 我就無得睇電視, 我想睇呀!" 爆丸?? 醬爆牛丸嗎? 原來呢位同學好期待逢星期四和五下午5:15-5:45無綫翡翠台的卡通片, 但學琴時間撞到正, "累"佢次次都無得睇! 佢又話:"我唔係唔想學琴呀, 我想6:00先學!" 媽媽見佢傷心得很, 就話: "我知道你好想睇電視, 但老師已經到左, 你現在要認真上堂, 最多下星期開始我4:30來, 等你學完琴有得睇嘞!" 於是呢位同學破涕為笑, 認認真真上完45分鐘的課, 然後熱切期待下星期的醬爆牛丸...
昨晚和爸爸玩騎牛牛, 爸爸扮牛, 在地下四腳爬爬, 媽媽抱我騎上去, 我失平衡從爸爸背上跌左落地, 左手被自己的身體壓住, 我係一個流血不流淚的幼兒, 但今次可能真係痛, 喊左足足一分鐘. 然後我一直都只係用右手, 玩玩具, 沖涼玩水, 都只用右手, 偶爾會自己摸摸隻左手, 似乎有點痛, 爸爸媽媽好擔心, 想帶我去急症室, 但我又無再喊和扭計, 爸爸媽媽於是決定觀察一晚, 再作決定. 今早起床我如常運作, 但依然不用左手, 爸爸開始擔心, 中午時份專程返屋企, 想和媽媽一齊帶我去急症室, 當時梓延哥哥來學琴, 佢爸爸(即我的舅公)憑經驗認為我無大礙, 睇真d似乎又無咩事, 媽媽於是如常帶我返婆婆家, 直到晚上我都係主要用右手, 左手前臂輕微腫起, 但一切運作正常, 心情亦十分好! 受傷後我對爸爸非常抗拒, 爸爸認為我嬲佢, 覺得係佢整傷我, 於是爸爸好唔開心, 好彩到晚飯回家後我已經無大礙, 用返兩雙手玩玩具, 對爸爸的態度亦好轉, 爸爸心情先好返!
我從來只會在自己屋企大便, 有時會在婆婆家, 試過一次在嫲嫲家, 從未試過在街外大便. 今日ms hazel發現我好靜, 同平日好唔同, 調查下發現我大了便, 就叫ann姨姨幫我處理, ann姨姨事後向媽媽報告稱, 我當時樣子尷尷尬尬, 扭來扭去, 最後總算肯乖乖地訓低, 比姨姨換片片. 媽媽對於我在屋企以外地方大便一事十分驚訝, 可能前兩日我去左澳門旅行, 食得太多又無輸出, 儲埋一大堆在肚子, 忍唔住疴左出來! 講開又講, 大舊表哥同我去旅行兩日, 終於見識到我食量驚人, 剛剛食完麵包, 午餐可以食一整碗伊麵, 再試下木糠布甸做甜品, 飲完奶又食麵包, 游完水再食餅, 晚餐食大半碟茄汁燴意粉, 燒沙甸魚, 羊扒, 然後又再試另一家木糠布甸...第二日又係不停食,, 午餐的牛尾湯通粉, 下午茶在義順食雙皮奶, 連鉅記的杏仁餅都試食了兩塊, 返到香港又在kfc食了大半碟雞皇飯和雜菜湯, 兩歲人仔個胃有幾大呢, 咁食法, 唔肚疴真係奇蹟!
今早10:00醒來, 我係第一個瞓醒, 發現仲係酒店房, 我開心到兩眼發光, 怪笑怪叫一輪, 跳落床又再搞搞陣. 我地的酒店房係無包早餐的, 威尼斯人的早餐太貴, 我地去官也街食牛尾湯通粉, 一樣好有特色, 爸爸仲叫多兩個豬扒包, 食飽d再去玩.
爸爸的朋友marco叔叔在澳門威尼斯人工作, 於是我地可以用特價去住一晚, 酒店房好大, 我地約埋大舊表哥一齊去玩, 爸爸話現在的澳門消費實在高左好多, 就算我地有特價酒店, 食野買野都好貴! 出得來玩就預左洗錢, 唔理得咁多, 一到步首先醫肚, 威尼斯人在氹仔, 我地順理成章在氹仔觀也街刷我地的第一餐, 行行吓就去左食水蟹粥和炸鯪魚球果間餐館(忘記了名字), 爸爸專登叫一碟乾燒伊麵比我, 我食左好多, 同時都好喜歡蟹粥, 媽媽比左少少炸鯪魚球和炸墨魚丸我試下, 我用牙簽吉住食, 媽媽話炸墨魚丸好好味! 飯後馬上去試下木糠布甸, 九蚊只得細細盒, 又唔好味, 媽媽自己整的好好多! 我知道呢個雪櫃裡面有好多雪糕, 想自己去開呢! 酒店房果然架勢, 房間有七百幾呎, 仲有兩部大電視, 我似足鄉下仔出城, 未除鞋就跳上床彈下彈下, o係咁高尚的酒店房睇下午4:00明珠台的芝麻街, 豈不是兩歲幼兒的至高享受? 爸爸話威尼斯人咁犀利的酒店, 設施實係無得頂, 一定要享用吓個泳池, 於是我地安頓好, 飲支奶奶, 就馬上出發去游水! 誰知泳池真係泳池, 連更衣室都未裝修好! 我同媽媽要逼在狹小的廁格內換衫, 連儲物櫃都未用得, 一袋二袋帶晒出泳池邊, 好老土. 原來兒童池和其他犀利野要下個月先啟用, 我地來得唔合時, 但有水玩我己經好開心, 但媽媽覺得我太狼死, 成日想自己落水, 睇少半眼都唔得! 游完水食少少零食, 補充體力, 然後同媽媽返上房沖涼, 已經到七點了, 我終於累到要瞓一瞓, 呢個時候爸爸媽媽表哥就出發去揾食, 我在bb車上小休, 醒來時已經身在木偶餐廳, 媽媽叫了好多野食, 咖喱羊扒, 燒沙甸魚..媽媽叫左一碟茄汁燴意粉比我, 我一個人食到半碟, 我同時仲食左唔少沙甸魚, 少少羊扒, 仲有飲湯, 食量嚇餐表哥呢! marco叔叔放工後同我地會合, 佢駕車帶我地四圍參觀, 爸爸提議夜探黑沙灣, 黑沙灣本來已經黑, 夜晚更黑, 烏蠅都無隻, 毫無參觀價值, 唔知爸爸為乜要來, 然後我地又飛車上松山燈塔睇夜景, 我見到新葡京五顏六色, 話係"rainbow", marco叔叔讚我叻仔. 然後再去食甜品, 我對凍品不太喜愛, 無食到, 只係搞搞陣. 返到酒店已經11點, 媽媽估計我已無晒電, 可以快快就寢, 誰知發夢無咁早, 一返到酒店房我仿如突然叉滿電, 在房內走來走去, 搞東搞西, 最開心係有兩三級樓梯, 可以比我up up down down玩餐飽, 最後搞到1:00, 爸爸將全部燈熄晒, 我先肯乖乖地上床, 夾在爸爸媽媽中間, 一覺瞓到天光.
神童莫札特在剛學會走路時, 常常爬上琴櫈彈琴, 尤其喜歡摸著三度和弦, 莫爸爸放棄自己的事業, 全心栽培兒子走上音樂道路, 終於出了一位驚世音樂奇才! 據聞嬰兒莫札特當時唔夠高, 將爸爸的書本叠高高, 當腳踏爬上琴櫈彈琴, 我同莫扎特一樣, 都有搞琴呢鋪癮, 但我唔洗用書本叠高高, 一個鯉魚翻身已經跳上琴櫈, 我唔曉彈三度和弦, 但我會隨手攞一本琴書(通常係小奏鳴曲, 可能喜歡綠色封面), 放在譜架揭來揭去, 裝模作樣亂彈一通, 音域橫跨幾個八度, 強弱對比強烈, 無調性, 無拍子, 像極戰後的新派甚麼xx主義作品, 今晚媽媽在廁所解手時我便彈奏一曲, 幫佢解悶, 隨意發揮的聲音都有其可聽性, 彈奏完畢不忙走到廁所門口接受fans歡呼拍掌呢!
今日爸爸同我去荔枝角公園玩, 遇到obi一家, 我最怕見到obi爸爸, 一見到佢我就瞇晒眼, 望都唔敢望佢, 郁都唔郁, 好驚好驚. 驚得好緊要! 夜晚媽媽本來想用芝士炒蛋比我食, 無端端靈機一觸, 變成蛋包通粉, 人地日式蛋包飯, 媽媽竟然用蛋包住通粉, 芝士溶晒入d通粉表面, 好好味, 我食到一粒碎都無剩!
自己著褲
錯過了午餐
今日真係值得高興的日子, 媽媽的皮膚敏感好轉, 天氣還算不錯, 豬姨又送我地兩張海洋公園贈券, 一家三口遊ocean park, 你話唔係非常美好的日子嗎? 爸爸先去打網球, 媽媽同我食左飯之後帶我去銅鑼灣和爸爸會合, 然後坐香港仔小巴在隧道口落車, 原來話咁快就到海洋公園! 我地當然先去睇熊貓, 自從上次在長隆近距離見過五隻大熊貓之後, 我對佢地已有一定認識, 今次雖然隔住玻璃離遠望, 但我都好興奮, 媽媽又教我叫佢地的名字, 我跟住叫"佳佳..盈盈..樂樂.." 睇到唔肯走, 直到爸爸話帶我睇其他animals我先肯離開熊貓館. 吊車好多人等, 我地先去兒童王國, 玩小火車, 我又第一次玩充氣彈床, 初初唔肯玩, 爸爸叫我勇敢嘗試, 陪我一齊, 我馬上玩上癮, 然後我又掛住玩公園都有的普通滑梯, 爸爸費了好大氣力先捉到我. 然後我地坐吊車, 我太累訓著左, 爸爸媽媽就趁呢段時間坐扶手電梯落返山, 去大樹灣入口睇魔鬼魚, 爸爸穿上一件賣魚佬的塑膠衣服落水摸魔鬼魚, 媽媽因為唔想著果件衫, 無落水, 抱我在池邊睇魔鬼魚, 我的手唔夠長, 摸唔到魚魚, 但已經睇到眼定定, 大呼小叫. 大樹灣果邊有幾間屋仔比小朋友玩, 我喜歡搬積木, 將一舊舊大積木排得井井有條, 然後我地坐扶手梯上返山, 爸爸教我自己上落扶手梯, 我已經好穩陣了, 但媽媽仲係唔放心, 每次坐扶手梯都好緊張. 然後我地再參觀埋鯊魚館和海洋館, 我對shark好有興趣, 時間緊逼, 今次無去水母館. 晚飯在金鐘元氣壽司, 爸爸媽媽好喜歡, 我第一次食壽司, 我食玉子壽司和豆腐皮壽司, 食左兩碟, 我見到媽媽食粉紅色的薑, 又要食, 點知好辣, 吐返出來!
今日班上只得一個女仔, 新來的, 唱bye bye song時佢唔唱, 我走去從後攬住佢, 想捉佢出來唱, ms hazel話我好喜歡同佢玩, 但呢個熱情舉動嚇親呢位女同學, 媽媽問佢叫咩名, 佢唔出聲, 我竟然幫佢答左, 叫佢做BB. 媽媽今日買左一隻會講英文的大barney返屋企, 我當佢係老友, 攬到佢實一實, 又請佢食野, 餵佢飲水, 其實今日放學後我地係返左婆婆屋企, 因為媽媽同豬姨做facial, 然後媽媽教完琴後返來接返我啦, 爸爸話唔帶barney返屋企, 但我唔制, 婆婆都唔制, 因為佢話barney好阻地方, 叫我快d攞走.
繼上次因為買雪糕事件和媽媽大戰一役後, 家裡無雪糕時媽媽唔敢提雪糕二字, 今日表姐送了兩個像真度極高的鎖匙扣玩具比我, 一個係拉麵(但我說是啫喱), 另一個係雪糕! 我不停叫住ice-cream! ice-cream! 然後當然係忍唔住放入口! 表姐見我連假雪糕都唔放過, 好可憐, 就話帶我去買雪糕, 今次表姐慢慢耐心解釋比我聽雪糕係要落街買, 先有得食, 而唔係一講就即刻有得食. 表姐成功說服到我去門口著鞋, 開門(不忘同媽媽講bye bye), 落樓, 入便利店, 打開雪櫃, 揀雪糕, 比錢, 然後即場食食食... 今日我揀左香芋雪糕, 係初嘗試, 食到成口紫色, 表姐話我未食之前好多野講, 連鬼佬都撩, 一有得食就乜都唔講, 梗係啦, 掛住食邊得閒講野呢.
為左捕足成長的片段, 我出世前爸爸買左一部攝錄機, 但爸爸實在有點職業病, 一點一滴一分一秒都唔放過, 拍好的dv帶越來越多, 媽媽會將影帶用電腦轉成dvd, 可以在電視播放, 呢d生活片段我地稱之為"歐昭駿家庭影院", 從來無正式統計過, 但估計現時已有超過10隻dvd, 仲有好幾盒帶因harddisk唔夠位, 未能輯成光碟. 我好鍾意睇返自己的片段, 有時悶,扭計唔乖, 婆婆就會問我: 睇唔睇"影院"呀? 一見到自己上電視, 我就定晒, 尤其是睇返協康會和ms hazel的playgroup, 去沙灘玩, 去運動場跑步, 和爺爺嫲嫲在酒樓食飯, 去科學館玩... 特別興奮雀躍. 今日婆婆找到一隻舊d的家庭影院, 當時我應該只有七, 八個月大, 同秋盈, obi, jacko幾個在一齊玩我地幾家人的自組playgroup, 但我可能唔認得果個爬爬下的嬰兒係自己, 見到媽媽抱住個bb, 又餵佢飲奶, 以為媽媽照顧緊另一個bb. 我唔開心, 樣子很失落. 然後婆婆再放另一隻近期d的影院比我睇, 我認得自己了, 說:"阿駿! 阿駿哦!" 似乎向婆婆和媽媽宣示我歐昭駿先係媽媽的bb呢!
探爺爺嫲嫲
食軟雪糕
呢兩日媽媽成日好痕, 懷疑皮膚敏感, 尤其是夜晚沖完涼後, 痕到飛起, 所以好唔開心, 無心情寫日記, bye!
呢幾日突然鬧米荒, 爸爸媽媽無去搶米, 原因有三: (1)加價咪加價囉, 食得幾多啫 (2)屋企已經成為我的玩具倉, 騰不出地方作米倉 (3)媽媽後知後覺, 傳出倉米消息後兩天先去超市視察, 當然已被搶購一空 不過唔搶唔得, 屋企真係無米了, 於是爸爸今早加入搶米行列, 成功搶得一包不知名的五公斤"玉意牌中國絲苗", 好唔好食唔理得咁多, 總之有米填塞米缸, 真係打仗都無咁驚. 晚上媽媽去聽音樂講座, 爸爸帶我返婆婆家食飯, 返到屋企爸爸又在媽媽面前懶得戚, 話我不知幾聽爸爸話, 食飯又乖, 出到街又拖到爸爸實, 唔似得媽媽同我出街時四圍走, 又扭計... 言下之意是媽媽緃壞我, 管教無方, 慈無多敗兒等等, 於是媽媽提議以後由爸爸全職湊我, 咁媽媽就可以教好多學生, 揾好多錢錢, 然後爸爸又唔洗返工受氣, 專心湊仔和嘆世界, 我又變成一個好孩子, 聽教聽話...咁係咪好理想呢!
我鍾意食魚, 媽媽今日買左舊鯇魚比我做晚餐, 舊魚都幾大舊, 我一個人幾乎食得晒, 加碗白飯, 好快就食晒餐飯, 我食野都幾揀擇, 唔鍾意食的會含住啖飯唔吞, 甚至唔食, 好彩呢種情況唔係經常出現, 媽媽都唔洗好勞氣. 今日無節目, 傍晚媽媽帶我去會所, 遊戲室得我一個, 比我玩晒, 但我唔覺孤單寂寞, 一個人都玩得好開心. 我在會所無端端數數目, 由一數到十三, 清楚大聲, 而且係用中文的, 媽媽第一次聽見, 好開心!
爸爸今個星期又返夜, 晚上只有我同媽媽一齊, 媽媽煮左比我食, 自己就叫外賣, 今晚叫左碟乾炒牛河, 我同送外賣的姨姨好熟, 姨姨由我爬爬下的bb睇到我現在識行識走, 我每次見到姨姨都熱情打招呼, 又hi又bye. 媽媽食牛河, 我本能地以為自己都有份食, 竟然拿拿聲將自己的食飯餐椅推到飯枱(餐椅很重, 但我非常大力), 然後跳上餐椅, 端端正正地坐在媽媽隔離, 等候食"麵麵"! 此舉令正在和婆婆在電話對話的媽媽笑到扒地, 由於今日我食左好多雜食, 奇華的蜂蜜蛋糕三份二個, 再加表姐買的芝士蛋糕, 和正餐的蕃茄牛肉飯, 媽媽唔敢再比野我食, 最後只分了三條幼河粉比我, 過下癮就算! 媽媽找到海棉小鴨比我沖涼玩, 我好喜歡呢隻鴨鴨, 叫佢做quack quack, 媽媽又教我squeeze佢的肚仔, 就會有水出來, 我用盆仔裝水, 不停將鴨鴨浸濕然後又squeeze...squeeze...好愉快的洗澡.
踼足球
好幫手
雪糕事件
今日媽媽去左探eco姨姨的baby, 爸爸負責照顧我, 陪我去會所玩, 有架新到的大巴士, 我玩到唔肯走. 爸爸又煮飯我食, 然後我又陪爸爸出去食, 食日本麵, 媽媽返來已經10點, 我不停叫媽咪媽咪, 但今晚我好精神, 11點半先肯入房訓. 以下係大舊表哥的攝影作品, 媽媽取名為"B豬暴走城門河~by Ken Lee", 大舊表哥真係好有心思, 但我對佢的態度始終忽冷忽熱, 冷多於熱, 令表哥十分無奈!
最近表姐表哥放假, 多左帶我出去玩, 昨天去左大埔好多地方, 玩得盡興, 玩到個心"創"晒, 今日返完playgroup搭車返屋企, 落車後竟然唔肯行, 坐係地上發難渣, 似乎想再去街, 媽媽夾硬將我抱走, 我繼續反抗, 我雖然細粒, 但力大如牛, 但媽媽亦唔弱, 我地兩母子在荔枝角道街頭展開角力, 媽媽同時嚴厲喝斥我, 像潑婦, 也像癲婆, 我就似青山醫院唔肯被人綁手綁腳的院友, 到入屋一刻都還在奮力搏鬥. 最後我還是乖乖地回家, 但搏鬥實在太費力了, 我未吃飯就自行入房想訓覺, 媽媽已經煮好飯了, 但我已經累得唔肯落床, 於是我就勉強食左幾口, 然後呼呼入睡, 媽媽就可以稍事休息, 因為我醒來可能又再要和我鬥智鬥力!
今日係公眾假期, 媽媽難得星期日唔洗開工, 爸爸都在家, 我地悠閒地在家休息, 下午落公園和會所玩, 會所多左一隻barney玩具, 我當係寶攬到實. 我好想入玩具屋玩煮飯仔, 但有兩個姐姐玩緊, 佢地唔比我入去, 就連在門口望下都唔比, 我等左好耐, 佢地都唔比我玩, 於是我就喊起上來, 兩個姐姐點都唔肯讓步, 連佢地媽媽叫極都唔肯, 我傷心地喊左好耐, 最後佢地先肯離開, 讓比我玩, 我馬上煮野比barney食, 我真係好鍾意煮飯仔. 晚飯和姑媽一家在旺角的酒樓食, 食飽我又坐唔定, 表姐帶我落街行, 行西洋菜街行人專用區和女人街, 表姐話我好奸, 平時唔肯叫人, 有利用價值果陣就乜都肯講, 表姐又送我六杯朱古力欣欣杯, 我馬上say thank you, 多謝, 表姐, 唔該...乜都出齊, 我又當係寶咁, 自已拿住個膠袋一直返到屋企. 媽媽的老友eco姨姨今晚順產生左個bb女了! 媽媽既開心又感動, henry叔叔打電話來報喜時, 感動到想喊呢! 想起05年11月9日傍晚, 媽媽好艱難將我生出來, 爸爸都係感動到流淚呢! 祝小寶寶精靈活潑, 快高長大!
今早起床, 突然叫了一聲: THOMAS, 之前我只能講Toms, 昨晚唔知係唔係又夢見Thomas, 一起身又掛住佢, 字正腔圓, 是標準的BBC英語. 近日講的單字發音突然變得正確, 隧道tunnel, 之前只能講"吞", finished只能講fish, flower, carrot等等, 突然都自我糾正過來, 動詞亦多左好多, 食野時講eat, 睇書講read, 洗手講wash, 大虎駕車講drive, 坐豬仔車講ride, 鍚鍚媽媽講kiss... 最令媽媽意外的, 係尾音都兼顧到, up, top, tap, sleep, sheep等p字尾的字, 都不忘發出"p"聲, 中文也進步了些少, 麵包, 沙律, 壽司, 香腸..(食物特別記得!) 詞彙豐富, 但未能完整組織句子, 有人話我講野慢, 確實係比同齡的小朋友慢, 不過爸爸媽媽唔擔心, 每個孩子發展唔同, 只要身體健康智力正常, 講野遲早唔係問題.
大家有無去過沙田禾輋村的陳根記大牌檔食野呢? 陳根記三個字婆婆成日掛在口邊, 話好好食, 好馳名, 非去不可! 於是今晚大虎就駕架砵砵車載我地去試一試. 媽媽今晚7:30收工, 我地先去青衣接媽媽, 其間婆婆去翠怡商場借廁所一用, 帶埋我去, 一出廁所就見到麥當奴, 我去過5次麥當奴, 記得有好味薯條, 我拖住婆婆的手, 係都要入去, 不停講:"阿條! 阿條!" 婆婆心軟買左一包細薯條比我, 事後當然被大家指責, 婆婆真係矛盾, 又話縱壞我, 又話間中都要縱下喎! 不過錯有錯著, 陳根記的食物唔太啱我食, 我只係食左少少蛋和飯, 手絲雞, 墨魚餅我都唔多喜歡, 包薯條可以頂下肚餓. 呢間陳根記真係馳名, 坐無虛席, 仲見到無線藝員. 飯後大虎經今日啟用的新隧道, 名叫"尖山隧道"由沙田返長沙灣, 果然好快!