親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
開心上校車
媽媽向來遲睡遲起, 直接令我變得同佢一樣咁唔健康, 本來打算開始前一個開始調整作息時間, 但最後無左件事, 好彩返學幾日後我自行作出調整, 昨晚食飽晚飯, 九點多我就自行入房訓覺, 到今早六點半訓醒, 我醒左但媽媽仲未訓夠, 我仲陪住佢訓, 睇下dvd, 玩玩具, 半步不離媽媽身邊. 六點半撐到下午兩點幾先訓晏覺, 爸爸放工後同我去游水, 令我喜出望外! 但晚飯時可能食得太急, 嘔晒出來, 然後對媽媽買返來的KFC虎視眈眈, 我食左成碗磨菇飯和少少雞, 食飽又話要入房囉, 唔到十點鐘已經進入夢鄉. 早睡早起的確唔錯, 明天返學希望可以自動起床, 媽媽就可以輕鬆d, 有多d時間陪我玩, 煮飯比我食, 仲要留返d時間睇日劇!
五點半起床
無得返學!
搭校車唔喊
今日校車遲大到, 我地唔等了, 同obi一齊搭的士, 準時九點前到校, 爸爸放假, 今日同媽媽一齊接我放學, 去又一城食飯, 媽媽話等我開心吓! 最重要係媽媽想同班主任Miss Lee傾下我的情況, Miss Lee話我熟左環境後開始跩跩了, 經常整蠱obi, 將食過的包包放落佢的碟, 倒瀉水(故意的), 推玩具, 搞百頁簾, 玩完sir滑梯唔肯返入課室...等等平時在屋企普遍發生的引人注意百厭行為, Miss Lee話我比較活躍, 但思想仲好BB, 以為咁做好好玩, 罰我鬧我起唔到作用, 唯有比d時間, 等我長大, 腦筋成熟d, 就會好! 第五日返學就現形了, 媽媽唔再擔心我怕陌生, 唔適應, 日日喊.. 而開始擔心我唔守秩序, 搞搞震, 唔聽書, 跟唔到進度...學費好貴架! 又一城食飯後去toysrus打個轉, 我想買percy火車, 但媽媽覺得太貴, 又無乜用, 最後扭左隻蛋, 我已經好開心! 搭地鐵返屋企, 我同爸爸荔枝角落車先, 媽媽要去教琴, 分離一刻令我情緒激動, 上左地面都衝返落地鐵站, 要揾媽咪! 最後爸爸費盡九牛二虎之力, 勉強將我制服, 再加雪糕, 先平安返到屋企!
媽媽唔慣早起身, 昨晨和今晨都幾乎唔知醒, 今早7:30係我叫醒媽媽的, 因為怕我喊到嘔, 媽媽呢幾日早上都唔比奶我飲, 今日先恢復飲奶. 我訓醒要求睇thomas, 媽媽在我飲奶時比我睇一陣thomas大冒險, 同時幫我換衫, 抺面, 差唔多夠鐘了, 媽媽就同找講:"要返學囉!" 我望一望媽媽, 然後起來遞手, 要媽媽抱抱, 媽媽於是抱我出廳, 幫我著鞋襪, 然後我自動伸手要媽媽幫我"咩"書包, 似乎對返學唔抗拒, 仲好合作, 令媽媽既驚訝又感動!
追蹤校車
普通話
我的幼稚園在九龍塘, 距離荔枝角話遠唔遠, 話近唔近, 搭地鐵都算方便, 但要媽媽每朝帶住我逼地鐵, 管接管送, 時間, 車錢, 精力.. 計落不如搭校車化算. 要我一個人搭校車, 媽媽實在有點於心不忍, 忐忑不安內心交戰了好幾個月, 其間參考了多名有經驗家長的意見, 衡量我的適應能力, 最後作出了重大的決定 - 開學第二日起, 搭校車! 為免我喊得犀利會嘔, 今早依然唔食奶, 食我最愛的花生醬搽麵包, 但一訓醒胃口麻麻, 只食左幾啖, 爸爸媽媽一齊陪我落樓, 等車位置已經有幾位小朋友到了, 上車一刻媽媽的心情最為痛苦, 因為分別的時候到了, 保姆姨姨扶我上車, 但媽媽竟然唔同我一齊, 我馬上喊出來, 媽媽難受到唔敢望我, 又怕被我望到, 喊得更犀利, 爸爸最勇敢, 攞住攝錄機係咁對住我拍, 拍低我個喊樣比媽媽睇! 校車走了, 家長散去, 媽媽仿如被切去一忽肉, 心情沉重, 爸爸提議去大家樂食早餐, 食之無味. 好唔容易等到放學, 爸爸媽媽又急急腳落樓, 校車到達前15分鐘已緊守在校車站, 校車到了, 我一見到媽媽, 就起身走出來, 一落車馬上叫聲"媽咪~!" 然後來個big hug, 安然無恙放到屋企, 我仲同媽咪講我"返學"呢! 媽媽帶我同obi去便利店買雪糕, 以示獎勵, 我地一人一杯豆腐味雪糕, 十蚊三杯, 細細杯, 啱晒我地的份量! 我的第一張學生相
開學了! 今日起我就係幼稚園學生了! 爸爸為隆重其事, 請左兩日假, 今早7:10媽媽已起身準備(唔知幾多年未試過咁早起身), 我在睡夢中被媽媽換上校服, 換好校服, 我就醒了, 醒左心情幾好呢! 媽媽怕我嘔, 今早唔比奶奶我飲, 改食麵包, 出門口時頭髮蓬鬆呢! 我地學校係完全唔比家長陪上課的, 第一日返學都無得陪, 我一到學校門口就想衝入去, 想玩車車, 但被老師攔截, 一手將我抱走, 我大吵大叫, 之後入到課室發生咩事, 就不得而知. 爸爸媽媽和obi的工人姐姐(obi同我做同學呢)去又一城食野, 打發時間. 11:00湊放學了, 老師拖住我出來, 媽媽見到著住校服的我,幾乎唔認得呢, 好似突然大個左好多! 老師話我開頭喊, 斷斷續續喊左15-20分鐘, 其間又玩下玩具, 但好快就收聲了, 食茶點好開心, 食左好多動物餅, 連續飲左三四杯水. 爸爸媽媽見到我放學實在太開心了, 放學有得玩車車, 我仲開心, 返到屋企食飯, 玩一陣, 就眼訓了, 爸爸媽媽想我今晚早d訓, 訓醒晏覺同我去游水, 想我攰d, 點知我有無窮精力, 可能心情太興奮了, 最後竟然十二點先訓著! 今日一切尚算順利, 聽日先到戲肉--搭校車!
Bye Bye Ms Hazel
星期四要開學了, 媽媽今日拿拿聲同豬姨去做多一次facial和按摩, 今日由婆婆來湊我, 因為唔知開學後咩環境, 媽媽呢幾日開始為我開學做準備, 洗校服, 貼名字貼紙在衣服和杯碟用具上..等等. 我唔怕同大家講, 到現在為止我都未戒片, 原因係我對坐廁便器等仍然極度抗拒, 打死都唔肯疴, 媽媽今晚再嘗試唔比片片我著, 我竟然一個鐘頭內賴左三次尿, 每次我都哈哈大笑, 仲通屋跑來跑去, 一臉自豪咁同媽媽講我"疴臭臭" (其實係疴尿尿). 戒片徹底失敗, 唯有寄望返學後有改變!
今日本來係playgroup的最後一堂, 點知今朝我同媽媽都唔知醒, 醒來已經10:40, 遲晒大到, 唯有放棄, 平日我好少訓到咁晏, 又無開冷氣, 可能發左個美夢, 唔願起身. 流流長一日點過呢, 下午去雅雯屋企玩, 消磨時間, 雅雯似乎好開心, 好鍾意同我玩, 但我成日整鬼佢, 又爭玩具, 搞到佢呱呱叫, 但我地係好朋友, 每次去佢屋企玩我都好開心呢!
今天婆婆帶我去海麗村食雪糕, 買玩具, 買了叮噹飛碟, 我地在公園玩, 好好玩哦, 公園有好多小朋友跑來跑去, 我叫佢地:"唔好跑!" 但無人理我. 玩左一個鐘有多先返屋企, 又熱又晒, 婆婆幾十歲, 追到氣咳, 真係辛苦婆婆了! 媽媽逢星期日都好多堂, 今日難得三點收工, 陪我玩, 我地一齊攤在床, 睇砵砵巴士, 玩火車, 睇圖書, 輕鬆愉快過了一個下午, 仲訓左個靚覺!
我實在太"活潑"了, 連爸爸都開始頂我唔順, 首先係今早落會所玩, 搞到爸爸幾乎散晒, 然後夜晚返爺爺嫲嫲屋企食飯, 又係四圍搞搞陣, 衝入廚房, 走入衣櫃... 百厭事數唔晒, 爸爸話, 希望下星期返左學, 會學乖d, 希望!!!
爸爸參加公司的五人足球賽, 做隊長, 在幾乎沒有練習, 唔夠人, 隊員之間零默契的情況下, 竟然得了殿軍! 今晚仲攬埋隻盃返屋企比我睇, 我一見到, 以為係玩具, 攞上手玩左一陣, 搞下條絲帶, 摸下摸下, 無乜特別, 未夠分半鐘就失晒興趣, 影返張相算數. 比賽和獎盃對我來說仲未有任何意義, 今晚北京奧運開幕, 儀式令人嘆為觀止, 燃點聖火一刻尤其令人驚嘆, 感動! 可惜呢一刻我竟然在玩toy train, 見到電視裡聖火點起, 我只係講左句:"好熱!" 無錯, 相信聖火真係好熱!
媽媽的野蠻兒子, 正是我, 今日放playgroup, 我強行拖著媽媽入商場, 朝千色店玩具部方向前進, 我實在太大力了, 媽媽幾乎係被我拖著行的, 但媽媽唔就範, 我倆在天橋展開肉搏, 場面尷尬, 雖然我力大無窮, 畢竟我只得兩歲八個月, 始終敵不過媽媽, 媽媽是強行將我抱走的, 洗出九牛二虎之力, 先能將我制服!
北冕襲港
昨晚爸爸唔係屋企, 媽媽同我一齊訓, 今早七點幾醒, 馬上踢醒媽媽, 要飲奶奶, 然後唔知過左幾耐, 我又訓返, 因為媽媽開左冷氣, 一有冷氣我就訓得好冧, 訓到十一點先醒! 無所事事在家, 成日要睇thomas, 媽媽的朋友阿be姨姨帶埋囝囝來揾我地食tea, 消磨左少少時間.
暑假開始了, joyful english centre的暑期班爆晒棚, 我地呢班toddler group本來在大房上堂, 現在被逼遷到尾房, 地方細, 連playg room都變埋課室, "sir"吓滑梯都無埋! 算吧, 返多幾堂就告一段落, 但今日媽媽發現我地的班竟然擠了10個小朋友, 房仔咁細, 十個小朋友真係轉身都撞到人, 媽媽有點不滿, 又怕ms hazel一個人照顧唔到, 食完早餐咋咋帝走返上來, 睇下咩環境, 見我同其他小朋友乖乖地整齊坐著, 在聽ms hazel講故事, 仲唱緊mary had a little lamb! 我見到媽媽在門外裝裝下, 我都無理佢, 繼續聽故事, 媽媽見場面控制得好好, 相信ms hazel有能力處理, 證明擔心係多餘的, 不過玩的地方實在太細, 但係唔晒怕, 返左學就有好多地方比我玩了.
媽媽昨天發現我原來識講icecream cone, 十分驚訝, 唔知係邊度學返來? 今晚在惠康買左一盒迷你朱古力甜筒, 好細杯, 啱晒小朋友食! 我話咁快就成支食晒, 食到成隻花面貓咁呢!
婆婆話大虎和舅母(最近唔叫阿妗了)今晚唔返來食飯, 原因係砵砵車壞左, 要修理, 爸爸又話要踢足球比賽, 得我和媽媽返青衣食飯, 婆婆提議去翠怡太興燒味食飯, 特別d, 媽媽舉腳贊成! 點知媽媽收工返來, 爸爸, 大虎和舅母先後出現! 原來爸爸的足球比賽係下星期五(媽媽記錯了), 大虎的車車已修理好! 大家返齊晒來食飯, 好熱鬧呢, 搞到我情緒高漲! 大家未返來的時候, 我乖乖地一個人玩玩具, 睇迪士尼dvd, 但後來就好頑皮, 故意大叫, 做怪事, 明顯係引人注意啦! 今晚我食左好多飯和餸, 蕃茄魚, 南瓜, 雞翼, 仲有雞蛋, 仲飲左菜乾湯, 好飽! 訓覺前媽媽無比奶我飲, 怕我嘔, 我一食得多就嘔, 喊得犀利又嘔, 睡房床邊放左個盆仔, 緊急時發揮偉大作用, 有時我嘔左出來, 舒服晒, 會講"得咗!" 或"搞掂!" 然後由爸爸媽媽慢慢處理善後!
暑假其間playgroup果度好多人, 我地本來在大房, 被迫遷到細房, 連play room都被霸佔埋, 媽媽都懶得理了, 因為我再返到幾堂就結束, 返幼稚園了! 在ms hazel的playgroup返足一年, 差唔多係時候講bye bye, ms hazel真係好, 媽媽話要好好多謝佢呢! 放學後同uncle zane到樓下的五月花餐廳食飯, 我依舊後滑蛋豬扒定食(兒童首選!), 我已經唔認得uncle zane了, 同枱食飯如陌路人, 媽媽話將來叫uncle zane教我彈琴呢, 到時再重新認識吧. 飯後我地逛一下千色店, 媽媽話可以揀一個玩具, 今日竟然有得賣henry, 我馬上選定了, 想去比錢, 我到處揾收銀處, 揾唔到, 竟然揾到一個踎低正在理貨的女職員, 將henry遞比佢, 呢位姨姨話:"唔係呀, 你去果邊啦!" 然後指示我去收銀處, 我竟然走入收銀櫃枱, 將henry親手交比收銀姨姨, 完成整個付款過程後, 我非常滿意, 將henry交比媽媽保管, 然後返屋企. 返到屋企好攰嘞, 直接入房訓, 突然醒起henry! 媽媽比我帶住henry入房一齊訓覺, 我特別喜歡車卡的三條木頭, 我叫佢做log. 晚上爸爸回來, 我馬上話比爸爸聽有henry, 媽媽話henry和percy差唔多樣, 我馬上從大堆火車中找出percy, 與henry一同在路軌奔馳, 順帶一提, 我最近已經夠高打開鞋櫃的櫃筒, 知道裡面有電芯, 車車無電我會自己去攞, 被媽媽鬧, 開櫃筒好危險, 會夾手手! 校車的may姨姨今日打電話比媽媽, 通知坐校車事宜, 距離返學日子越來越近, 媽媽心情越來越緊張, 希望適應上學一切順利!
新電視到了
媽咪彈琴呀?
買了新電視
我家的sony大牛龜電視已經用左6年多, 現在家家戶戶換高清薄電視, 我地堅持用到壞為止, 以為sony襟用, 換電視之日遙遙無期, 點知人算不如天算, 今日午飯其間, 我擺好晒位, 坐在我的私家餐椅, 等著電視送飯, 豈料電視突然熄左, 媽媽以為唔小心按到遙控器, oh..原來電視真係壞了, 點開都開唔返! 呢部電視忠心耿耿服務左六年多, 從無壞過, 今次第一次壞, 但我地決定讓佢退休, 在新電視未來到之前, 我地要經歷幾日無電視的日子, 記得"家有喜事"中李香琴和關海山一日到黑睇電視, 電視壞左就如世界末日! 今日下午婆婆就不停開music比我聽, 同我玩遊戲, 直到晚上爸爸返來, 將房的14吋電視機仔搬出廳用, 總算有得頂住檔, 但好唔習慣呢! 希望新電視快d到, 仲要同舊電視講聲bye bye, 你已完成任務, 辛苦你了, 多謝晒!
逛書展