親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
又打邊爐
生日會
今日媽媽打電話比班主任ms lee, ms lee話我乖左好多了, 每天返到學校會叫人, (叫ms lee做mi-lee), 會叫姨姨早晨(賢姐好鍚我), 入到課室第一時間打開書包, 拿功課出來, 放入功課籃. circle time和weather chart時間也很投入, (之前將2008年說成268年, 現在變成20088年), 做功課也很主動(在家不合作), 吃茶點拿杯碟也很自動自覺(當然, 有得食嘛!), 沒有再亂擲玩具了, 但有時興奮起來會走出座位, 例如今日音樂堂, 我知道有得唱歌了, 開心得大叫"好嘢!" 然後走出座位攬住ms lee, 又去攬下音樂老師ms leung, 又摸下個琴, 每當我失控, ms lee就會"啤"住我, "歐昭駿~~~!" 我就會乖乖地返埋位, 有時我唔乖, 激嬲ms lee, 我又會上前攬下佢, 想佢唔好嬲. ms lee又話我好叻, 事緣係有一日的茶點係雜菜粥, 我唔食青豆, 粟米, 紅蘿蔔果d雜菜, 我用匙羮將d雜豆"秘"走, 只食粥, ms lee話小朋友通常會吐返唔鍾意食的食物出來, 未見過有學生好似我咁做, 竟然大讚我呢個偏食細路好叻仔! 晚上和爸爸的同事打邊爐, 今年第一次hot pot, 感覺良好, 大班陌生面孔突然出現, 初時有d怕醜, 但一有野食就放鬆晒, 我食左好多烏冬, 魚片頭, 牛肉, 粉絲... 自從上次bbq學懂要坐定定後, 我的耐性好左, 想落地時都能自我克制, 媽媽今日在圖書館借左三本圖書, 都令我坐耐左些少, 我仲教爸爸的同事(一位姐姐)認thomas火車的成員呢!
我實在太頑皮, 每日放學落校車, 我都要喪跑一餐, 由樓下跑到返七座先安樂, obi會跟住我一齊跑, 但有時我跑得太快, 又唔肯等埋佢, 搞到obi好沮喪. obi睇唔過眼, 今日一落校車, 就叮囑我要"拖住呀!" 然後走過來拖到我實, 我fing都fing唔甩, 唯有跑慢d, 我地二人狂奔到七座, 例牌來個告別式, 先來一個熊抱, 再加錫錫(純粹係面掂面, 西式打招呼果種), 然後互說: "Bye bye! See you tomorrow!" 幾有禮貎! 晚上obi和cell姨姨突然造訪, 我地當然大玩thomas, 地方淺窄, 遊戲間當然有所推撞, obi常投訴我擋住佢, 每次玩到最後, 差不多眼訓了, 覺得人地唔順我意, 我就喊, 次次都用呢招.
三歲了, 今日試食4號美贊臣奶粉, 我好鍾意, 但媽媽唔鍾意, 因為太甜. 話時話我係咪應該戒奶樽呢? 我用緊的奶樽已經用足三年, 仲係avent牌子, 有雙酚A的! 唔用奶樽可以用杯, 但食奶梗係攬住個奶樽訓係度飲先夠嘆, 又方便, 呢個問題要再仔細考慮, 今日唔諗住. 呢幾日我發明一怪招, 就後從後爬上媽媽背脊, 以五秒高速騎上其膊頭, 然後展示出有如登上珠峰的勝利姿態, 仲有狂笑, 行為極度頑皮, 我和媽媽是在床上玩的, 跌到唔痛, 但媽媽膊頭就比我壓到好攰嘞!
自稱BB
今日節目太豐富了, 媽媽一早帶我返青衣, 我未落車, 見到婆婆在車站等我, 已興奮大叫:"阿bor! 阿bor!" 一落車就撲向婆婆懷抱, 婆婆已安排好晒行程, 先去公園玩一陣sir滑梯, 然後例牌麥當勞無益早餐, 再去涌美村打個轉, 上次買左煮飯仔, 今日買左傢俬玩具, 有table, chair, TV, 仲有個girl, 我叫婆婆開個玩具tv, 婆婆詐啼幫我開, 問我想睇咩節目, 我話睇barney. 話時話, 婆婆的英文進步唔少, 可喜可賀. 可能我玩得粗魯, 個girl的手臂被我扭甩了一條, 真可憐. 午睡後爸爸來接我, 我地去旺角同媽媽會合, 去教協, 我第一次去教協, 原來有好多玩具, 好多thomas, 糾纏左好耐, 最好無買, 買左一套自製擦膠玩具, 其實我唔知係咩, 只係見到有漢保包, 薯條, 汽水, 我話係fast food restaurant, 好喜歡. 晚餐係delifrance bistro, 我第一次食洋葱圈(又係炸物), 狼吞虎嚥的樣子笑死人. 返到屋企, 媽媽叫我沖涼, 一提起沖涼我就笑晒, 仲話:"take a bath, 好舒服!" 我好少咁樂意沖涼, 梗係啦, 媽媽比我用盆浸浴, 我好似浸温泉咁, 不知幾嘆, 沖好耐先肯出來呢!
今日教師發展日假期, 我如常返婆婆家渡假, 上星期買的煮飯仔放在婆婆家, 等我返去有得玩, 今日婆婆切左d菜, 茄子比我玩, 仲有米, 仿真度很高呢! 星期五晚大家返齊來食飯, 我最開心, 今晚特別興奮, 不停唱怪歌呢, 最近識唱的歌增加了, 有"one two three four five", "we are shopping", "hickory dickory dock" 等等, 唱得唔清楚, 只有媽媽聽得明. 今晚媽媽比個大盆我沖涼, 好耐無用盆了, 浸完熱水浴特別好訓, 一上床就好快訓著了.
冬季校服
星期一晚同uncle zane在delifrance食晚餐, 真係好好味, 今晚我地全家又去食多次, 我依然唔鍾意焗薯, 唔要芝士薯仔批, 獨愛椰香雞雞焗飯, 我食得好開心呢! delifrance雖然好美味, 但係好貴, 份量唔多, 爸爸媽媽夜d就覺肚餓了, 不過我就好滿意, 份量啱啱好, 人少少, 環境好, 進食心情特別靚.
整理教材
媽媽實在太離譜了, 今朝竟然訓到9:05, 紥醒仲唔知今日係星期幾! 校車已經走左成個鐘頭了, 學校亦已經開始上堂, 依家先起身, 離唔離譜d? 昨晚較的鬧鐘, 放在房門對出的膠箱上面, 咁媽媽一定要起身行出來先可以關掉鬧鐘, 但今早鬧鐘離奇出現在床頭, 即已經被人關掉, 再攞入房, 媽媽竟然爛訓到關掉鬧鐘, 再訓過, 然後懞然不知已遲晒大到! 於是我地搭的士返學啦, 有得搭的士我好開心, 返到學校, 我馬上自動孭書包, 掛學生證, 狀甚緊張, 大門已經關上了, 媽媽按鐘叫老師開門, 老師出來, 劈頭就問: "唔知醒呀?" 真丟臉! 老師拖住我返入課室, 媽媽叫我:"同媽咪bye bye啦!" 我回頭望望媽媽, "拿口拿面"貎似想喊, 右手作出bye bye動作, 因為我好想快d入課室, 但又要同媽媽分別, 心情複雜, 難怪表情和動作都變得奇怪!
有很多哦, 點算中...
今日課外活動暫停, 媽媽帶我返青衣揾婆婆食早餐, 今日去翠怡麥當勞, 食飽之後去玩果d入錢機動馬馬, 我第一次玩"有入錢", "會郁"的機動馬馬, 笑得好開心呢, 玩完了, 婆婆認為我應該玩多次機動車車, 又um多四蚊比我玩多次, 媽媽話婆婆又縱壞我. 步出商場, 我就馬上同媽媽講bye bye! 因為我記得上幾個星期六都係咁, 媽媽同我食完早餐就去教琴, 我同婆婆去玩! 今日婆婆同我去公園玩, 又去涌美村買玩具, 我揀左套煮飯仔, 我想用doooo~比錢, 但姐姐話佢地無八通卡機, 無得dooo~~, 我就自己扮聲, doooooo~~~一聲比錢. 夜晚爸爸同我去香港仔探爺爺嫲嫲, 媽媽遲少少到, 入屋時見我已經食緊飯, 我同媽媽講我食緊"魚魚飯", 仲遞比媽媽睇, 仲話係"fish in rice"!
風箏和豆豆
今日係孫中山先生誕辰假期, 咁啱又係星期三, 爸爸放假, 我地一家約埋大舊表哥和uncle zane, 去元朗大棠荔枝山莊玩囉! 印象中我只去過幾次沙田, 從未踏足過元朗等新界地區, 正一係城市仔入鄉! 我地從美孚搭西鐵到朗屏站, 我愛搭火車, 沿途睇風景已經令我好high, 不停地問媽媽: Is it tree? Is it building? Is it track? Is it cloud? 最近喜歡講英文句子, 好多時文法唔啱, 媽媽會糾正我, 但勇於嘗試是好事, 值得鼓勵. 只係二十分鐘車程就到了, 我地搭綠色的士直達荔枝山莊, 平日入場費係$20, 我地幫襯燒烤, $70一位(我免費), 唔洗再比入場費了. 入園後第一件事, 係發現地下有好多沙石, 我向來有磨擦地下沙石的怪癖, 好彩媽媽醒, 比對舊鞋我著, 點磨都唔怕. 荔枝山莊現在無荔枝, 但有牛... 有駝鳥.... 有大樹菠蘿.... 仲有豬! 我特別鍾意呢隻大肥豬, 我話:"豬豬訓覺"! 地下有好多楊桃仔, 我初時不以為意, 後來媽媽教我執起d楊桃, 排在木櫈上, 練習數數目, 我覺得好有趣, 馬上愛上呢個遊戲, 我地大家一齊執呀執, 我負責幫d楊桃排排坐, 然後就要數下佢"一, 二, 三, 四..." 有時又轉去英文台"one, two, three..." 兩行木櫈被我排滿了, 我發現楊桃上有d小東西爬爬行, 聚精會神在看, 我問: "Is it bee?" 媽媽此時先發現我原來在看楊桃上的螞蟻! 從書本中學過picking fruits和A is for Ant, 今日投入大自然, 親身體會, 一定印象更深! BBQ時間到了, 燒烤係非常麻煩, 又耗時的活動, 幾難令我乖乖地坐定定, 但一諗起好味的燒雞翼和豬扒, 媽媽無論如何要令我合作, 原來方法好簡單, 就係"利誘+靠嚇+分散注意" 媽媽首先送我三塊餅和一個包, 用餐碟載住, 再比我一隻叉, 令我有了"呢碟食物係我o既"的心態, 然後同我講:"燒烤場係唔可以落地架, 有叔叔看住, 一落地叔叔就鬧鬧, 媽媽都唔落地, 所以昭駿都唔可以落地." 每當我身郁郁, 想落地去玩, 媽媽就話:"叔叔望住你嘞, 快d坐定!" 燒烤場的叔叔路過, 又幫忙講兩句:"好乖仔喎! 燒完野食先去玩啦!" 臨近尾聲, 我實在忍唔住, 好想走, 媽媽就用廁紙同我玩遊戲, 將紙碎塞入膠水樽, dum下時間, 順便訓練小肌肉. 唔覺唔覺已經食晒四份燒烤包, 我食左好多雞翼, 少少腸仔和豬扒, 足足坐左個半鐘有多, 大家都讚我乖仔, 媽媽獎我一杯雪糕, 以示鼓勵. 餐後我地去湖心亭餵魚, 我地買左飼料, 成千上萬錦鯉瘋狂搶食, 搞到我好開心, 我話:"魚魚食mum mum!"呢, 又問"Is it water?" 當然係water啦, 仲洗問? 吊橋行上去真係左搖右擺的, 但我無有怕, 來回行左好多次. 離開前一刻我地終於揾到馬房, 裡面有十幾隻馬馬, 隻隻都好強壯, 叔叔話騎馬已經係好普遍o既活動, 不過我仲細個, 大個少少就可以試下騎馬. 今日玩得好開心呢, 大舊表哥仲影左好多相, 明天再post上來!
今日接近放學時間, 媽媽接到miss lee的電話, 說我在學校嘔了, 原因係今日的茶點係雞絲燒餅, 我食左兩塊, 懷疑飽得滯, 搞到嘔! 媽媽一聽見就覺得好笑, 因為我出名大食, 遇到好食的野就搏晒命, 估計我實係太鍾意食, 姨姨就比我食多一塊, 點知太喉擒, 結果嘔到成身都係, 要換衫. 最近又學會幾首新歌, 但有d媽媽跟本聽唔明我唱乜, 我唱歌是講心情的, 開心會大聲唱, 唔想唱時就連媽媽唱都唔比, 好惡死. 我又喜歡扮老師, 喜歡拿住支棍指指下:"二六八年(2008年), 十月, 星期二, 今天是晴天" 我認為日期和天氣都唔會變的, 每次都係咁, 最搞笑係2008年講唔到, 時光倒流變成公元268年中世紀時期.
今日返york上課外活動, 我已經習慣左stafford以外另一間學校了, 爸爸媽媽陪我等校車, 星期六的校車係黃色的, 媽媽叫佢做yellow school bus, 見到架車我就開心, 指住話the school bus is coming! 小朋友適應能力強, 唔洗兩個禮拜已經熟晒架步, 又一次證明媽媽當初的憂慮係多餘. 放學時老師帶左我出校車隊, 但又帶返入課室, 原來我今日唔搭校車, 爸爸媽媽逐間課室揾我, 終於在體操班的課室見到我, 拿住畫袋坐係度, 頭dup dup, 樣子怪可憐的, 見到爸爸媽媽, 我有d唔相信咁樣, 確認我無眼花之後, 就笑口犀犀叫"媽咪~~~" 離開時我停一停步, 返轉頭同老師講再見呢! 係學校我真係好乖喎, 同係屋企簡直兩個人, 爸爸媽媽今日見到了! 放學後去又一城食飯, 沿途見到火車, 我企圖衝入火車站, 印像中上次爸爸媽媽接我放學, 都係搭火車走的, 今日當然被制止, 我發晒癲. 午餐食麥當勞, 成個food court都係人, 到處都無位, 唯有食麥記, 益左我. 餐後爸爸媽媽帶我去另一間學校, 有玩具, 有老師同我玩, 入到陌生環境我竟然非常循規蹈矩, 拖實媽媽, 好聽老師話, 但我有點緊張, 對住未見過面的老師我好怕醜, 唔敢講野, 後來同另一位老師見面, 我先放鬆少少. 訓醒晏覺食埋昨天的生日蛋糕, 好開心呢!
我今日好唔乖, 令媽媽好唔開心. 主要係因為我經常扭計, 亂衝亂撞, 不受控制, 唔去廁所, 唔做功課... 由放學一刻開始, 直至晚上訓覺, 我都無乖過. 媽媽身比疲累極了, 幾乎精神崩潰, 媽媽覺得我的性格差極了, 脾氣大, 扭計, 我行我素, 唔聽話... 苦惱極了, 希望有天我會改變, 跑厭了, 玩夠了, 就乖乖靜下來, 聽教聽話...
爸爸實在太迷戀我的超人造型, 今晚去葵芳食壽司, 又將我打扮成超人, 我好樂意著超人衫, 因為上次著住爸爸帶我返香港仔, 有得搭地鐵, 所以我每次著, 都以為有得搭train! 今晚元氣壽司頗多人, 媽媽先去排隊, 明知要排隊等候, 但我好心急, 企圖硬闖, 於是媽媽帶我去扭蛋, 留底爸爸一個人等. 我食左兩碟甜蛋和一碟腐皮, 三文魚頭湯, 食得好喉擒, 媽媽幾驚我又嘔, 食飽飽了, 想食雪糕, 媽媽教我講"綠茶雪糕", 鼓勵我自己叫, 點知侍應哥哥來了, 我又怕醜, 唔夠擔講. 上次在金鐘我好勇敢, 大聲叫"唔該, 綠茶雪糕!" 可能上次的侍應生係姐姐的關係, 同性相拒, 異性相吸. 媽媽在ok便利店換左一支percy牙刷, 實在太靚, 於是我刷牙特別落力, 愛牙之道, 由好的牙刷開始, YEAH!
喊到嘔
婆婆好多個星期日都無同我落街玩了, 原因係我跑得太快, 又失控, 媽媽怕婆婆追我辛苦, 叫婆婆唔好同我落街的, 不過今日婆婆終於都帶左我去海麗村玩, 海麗村有非常完善的兒童遊樂設施, 同時又有好多兒童(尤其是假日), 大家玩得比較粗野, 但秩序井然, 仲會禮讓年幼小孩, 這一點令印象深刻. 在唔算太熱的天氣下, 我竟然玩到標晒汗, 成個頭濕到淋, 有個哥哥大叫同伴的名字, 我竟然同大家融為一體, 呼應著大喊:"梁耀雄!" 梁耀雄莫名其妙的望著我. 同婆婆去玩係非常愉快的事, 因為多數會得到一杯雪糕, 今日係維記的豆腐味糕, 好味到不得了. 晚餐媽媽煮梅菜肉餅比我食, 我好鍾意, 食到一粒飯都無剩.
今日返課外活動, 我好乖上校車去約克幼稚園, 我參加的係美術和體操班, 放學返到屋企, 爸爸來接我, 因為媽媽仲未收工, 爸爸煮飯我食, 媽媽不在我就好黐爸爸, 食飯仲好乖. 今日我做左一隻小白兔, 媽媽問我係咩黎架, 我話"rabbit!" 細細隻好得意, 媽媽已第一時間影相留念, 遲d放上來比大家睇! 今日我終於肯唱茶點歌比媽媽聽, 歌詞如下: Are you hungry? Are you hungry? Yes, I am! Yes, I am, XXXXXX, XXXXXX, la la la, la la la! 第三四句基本上媽媽係聽唔明我唱乜, 識唱的朋友請提供歌詞! 唱歌已成為我的嗜好, 最近又學識baa baa black sheep, 唱得唔似, 但勇於嚐試, 仲唱得好大聲. 晚上玩煮飯仔, 我攞左兩個膠樽仔, 指住一個話係milk, 媽媽話另一個都係milk, 我話係water, 媽媽話:"係咩?" 原來樽上寫住"Spring Water" 媽媽話: 係喎, 真係water!
過去兩個月我的校內表現評估都很普通, 只有"開心玩耍"呢一項得到圓圈(表示通常做到), 其他都是三角形(表示間中做到). 今個月唔同了, 有四個圓圈呢! 老師話我熱愛學習, 表現投入, 與同學相處好...之類, 從老師口中都知道我近來表現好左d, 比以前守規矩, 上英文堂尤其好反應, 但上廁所, 做功課都仲有待改善. 希望我的圓圈有增無減!
訓得太多
為配合"秋天"學習主題, 今天係我地N班第一次外出活動, 就係去學校附近的律倫街公園玩, 老師提我著返條長褲, 怕比蚊咬, 媽媽仲貼多返蚊貼, 雙重保障. 今日星期三, 理應由爸爸湊我, 但爸爸要去看牙醫, 媽媽就帶我返青衣婆婆屋企, 飯後阿公食橙, 我最鍾意走埋去睇切橙, 我自從歲幾肯食橙之後, 就無再食過, 原因係我唔乖, 樣樣生果都唔肯食, 只食香蕉, 醫生話肯食香蕉都好, 好過無, 今日阿公比左一塊橙我, 我拿住lam lam下, 然後啜啜下, 最後啜晒d橙汁, 食埋d渣, 婆婆都讚我乖, 可能學校早前教"美味的蔬果", 令我對水果有了興趣! 晚飯後趕返屋企做功課, 今日中文的主題係"木", 要用鉛筆削貼成花花, 有點難度, 爸爸媽媽一齊幫手, 我負責貼白膠漿, 然後沖涼時要做實驗, 媽媽準備了積木, 木片, 木棍, 硬幣, 電芯等...比我在水中做浮沉實驗, 我覺得好有趣, 玩得好投入, 但後來演變成數數目遊戲. 沖涼前爸爸幫我剪頭髮, 媽媽要求不要太短, 要可愛, 我很合作, 所以今次的髮型剪得好好!