親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
爸爸要參加足球比賽, 連續三個星期六會由媽媽帶我返little gym, 之後坐june姨姨車返宇晴軒飲茶. 食完野已經十二點幾, 我開始發炆憎, 媽媽叫我快d訓覺, 訓醒可以同爸爸一齊去公園玩. 訓醒已經三點, 媽媽整左個下午茶比我食, 有鮮榨橙汁(根據公公指示, 一大橙一細橙, 榨出一大杯橙汁), 餅乾條和兩塊旺旺雪餅, 係學校生日會的禮物. 食飽乖乖地做功課, 由於我星期四無返學, 今日要做兩本功課, Shapes(B)只係填下顏色, 中文要學個"腳"字, 做功課都無乜難度, 幾分鐘搞掂, 主要問題係我唔太喜歡填色, 要媽媽幫下手. 功課完成就可以去玩, 媽媽今日比較閒, 提議去遠d的公園玩, 諗起圓方商場上蓋有個兒童遊樂場, 好似好好玩, 爸爸唔知做乜, 要我地搭港鐵到美孚轉西鐵到南昌再轉東涌線到九龍(搭港鐵去荔景轉東涌線咪得囉), 幾經轉折先到圓方, 嘩!!! 原來個兒童遊樂場真係好好玩, 最大型的sir滑梯, 要爬上去有點難度, 初時我怕難, 要人幫, 但試多兩次就掌握到了, 真係好好玩, 運動量大, 協調性訓練十足, 真係非常健康的活動, 仲要免費. 另外有要用腳踏的氹氹轉, 好犀利的搖搖板, 會郁的平衡木..全部都好精采, 玩足一個鐘都未夠喉, 下次必定再來, 玩返夠本. 晚飯在尖沙咀厚福街一間少少高級的日本餐廳, 厚福街人山人海, 但唯獨呢間日本料理只得幾枱客, 不過我地一致認為食物有水準, 尤其是剌身沙律, 燒羊架, 軟殼蟹炒飯(第一次食軟殼蟹, 好喜歡), 明太子雞翼, 全部都好美味, 爸爸仲order左一碟玉子壽司走紫菜比我私人享用, 可能位處地庫, 價錢略貴, 所以拍烏蠅, 希望佢努力撐下去, 如果唔係我地下次好可能無機會再食!
仙人掌
Mickey電腦
Banana cake
今日無得返主日學, 無節目但不能無聊在家, 媽媽要爸爸無論如何都要帶我出去活動下, 爸爸就帶我去荔枝角公園跑下跳下, 公園兒童遊樂設施十分充足, 仲加添左一隻搖搖海盜船, 非常好玩. 公園有好多小朋友同我一齊癲, 令我十分盡興. 晚上和媽媽在新都會廣場會合, 我提議食元氣壽司(例牌), 之前發現板前仲好食, 已經有一段時間無幫襯元氣, 今日再食我熱情不減, 先來一碟甜蛋壽司走紫菜, 再來少少烏冬同埋炸蝦天婦羅(粉太厚), 見到豆腐板壽司在我面前行過, 大叫:"呢個好食架!" 又再鯨吞一碟, 成口壽司都未吞, 見到朱古力蛋糕又話想食, 媽媽反對, 要我休息一陣先, 我耐心忍耐了幾分鐘, 媽媽受唔住我的糾纏, 准我食少少蛋糕... 見到有雪糕賣, 又扮作無知問:"咦, 點解有雪糕o既?"
打邊爐
今早得十一度, 返學著衫不可掉以輕心, 上身有展充哥哥送我的羽絨褸, 下身著條校服褲真係唔夠暖, 媽媽比條fleece補我著返學, 應該頂得下寒氣. 話時話去年媽媽在jshoppers買左兩條fleece褲, 十分禦寒, 今年長高了, 去年買的好快唔啱著, 媽媽趕緊再訂購兩條110碼, 希望快d送到.
外籍老師Mr Dennis係典型金髮藍眼的洋人, 高大英俊, 相信贏得不少媽媽的歡心, 可惜佢因為家庭原因要返加拿大, 上星期五已經last day了. 今日放學回家, 媽媽好自然問起Mr Dennis走左之後咩環境, 我話:"Mr Dennis生個BB, 要食奶奶呀!" 原來如此! 原來Mr Dennis生左個bb, 要返加拿大, 至於食奶奶的問題, 唔知佢以後仲會唔會返香港揾奶粉錢. 媽媽為證實我所講的真確性, 直接至電馮主任, 原來Mr Dennis個bb仲未生的, 不過bb在加拿大出世會有好多福利, 所以就決定離任返去生仔, 真係恭喜晒Mr Dennis. 新老師Ms Bernie今日都來左了, 馮主任話Mr Bernie係三,四十歲的女士, 好有經驗, 媽媽仲未有機會同佢見面, 所以只可以從我口中略知一二, 媽媽問我係咪有Ms Bernie來左呢? 我話"係呀, 仲有show and tell呀"! 希望呢位新老師有愛心有耐性, 可以同小朋友打成一片.
藝趣嘉年華
Little Gym好跩
換季了
今日食完中午飯如常落去畫室畫畫, 途經ok便利店, 見到oreo新出的朱古力軟蛋糕, 一睇就知好野, 好想買, 媽媽話如果我今日畫畫乖就可以買一盒. 有物質利誘果然唔同d, 陳老師話我今日表現好好, 畫得不錯. 媽媽買我畫左乜野, 我話:"小魚." 小魚? 好細條的魚嗎? "唔係呀, 係水魚!" 水魚? 用來燉果d嗎? 其實媽媽剛才在畫室見到同我一齊學晝的哥哥, 畫左一隻水母, 媽媽是知道今日的主題, 故意問我, 但我竟然唔記得左該隻生物叫做水母! 我帶住輕快的步伐離開畫室:"去買蛋糕囉!" 我跳下彈下向前走, 愉快地唱起歌來: (旋律是We are happy) We are shopping, we are shopping, we are shopping in the shop We buy chocolate, we buy cake, we buy everything in the shop! (加一個屋仔的動作) 媽媽話我唱得好聽, 問是否mr dennis教的, 我話唔係, 係歐昭駿教的! 去到便利店, 媽媽容許我買一盒, 又唔記得比錢企圖高買, 比媽媽捉返轉頭. 我心滿意足地攬住盒蛋糕, 發現盒上有英文字, 緊張地告訴媽媽:"媽咪, 係有寫住soft cake呀!" 返到屋企第一時間食一塊先, 好唔好食媽媽唔知, 因為見到已覺得好甜, 只有小朋友先會喜歡.
今日係幼稚園的旅行日, 昨天我已經密羅緊鼓地做準備, 我預備左一包卡樂B低鹽薯條, 一包蕃茄味甘大枝, 媽媽仲容許我帶三包熊仔餅和小朋友分享, 我的準備工夫係咁多, 其他交由媽媽負責. 旅行地點係鳳坑家樂徑和大埔海濱公園, 午餐仲有龍華酒店食乳鴿. 感謝天父, 今日天氣好好. 爸爸影左大量靚相, 等我用圖片向大家介紹下今日的行程. 劉老師係我校的普通話老師, 簡直係鎮校之寶, 教學生動活潑不特止, 仲多才多藝有愛心, 我的普通話進步不少, 全憑劉老師悉心教導! 下午有親子寫生比賽, 要自備一盒蠟筆, 媽媽昨天送我呢盒24色新蠟筆, 我如獲至寶, 去到邊拎到邊. 氣温適中, 一套夏季運動服已足夠, 用埋thomas小背包放零食就夠晒輕便. 上午行程係行山, 沿住石級上山唔算難行, 小朋友都可以應付. 行畢全程要一小時, 導遊姐姐叫大家自行決定行唔行, 大部份人都有行, 出得來玩預左要行, 通留o係旅遊車上嗎? 石級唔算太多, 我和媽媽都應付得來. 全體師生估計超過200人, 人山人海. 秋天到, 黃葉落, 一地都是枯葉, 爸爸沿途向我講解呢! 氣温適中, 但山上無風, 都幾悶熱. 校方送的一把扇子, 大派用場. 上到山頂我馬上提議食零食, 野餐嘛, 梗係食為先, 小朋友個個都咁為食. 我帶備卡樂B雜菜薯條(減鹽配方), 似乎大家都好喜歡. 風景不錯, 但我唔識欣賞, 掛住食. 小休時間當然要同老師影下相, 呢位就係我的班主任Ms Ngai. 呢位就係英文老師Mr Dennis, 平日上堂我好多野講, 今日見到佢我竟然好怕醜, 縮埋一舊, 可能係在學校以外地方見到老師, 就會係咁. 漂亮的蝴蝶, 係爸爸影到的! 仲有一隻呀! 由於是家樂徑, 山路唔難行, 但對三, 四歲的幼稚園生來講就略為太長, 步履穩健如我都有點攰, 要爸爸抱左一陣. 落山後見到海, 原來係鹹淡水交界處, 有生於紅樹林的植物, 但我唔知咩係咩東東, 反而對爬爬下的小蟹和水螅有點興趣. 午餐在沙田龍華酒店, 團體餐唔敢有咩要求, 但求有隻乳鴿咬下就滿足. 午餐唔好食唔緊要, 有得玩補返數. 我最鍾意玩sir滑梯, 幾十個細路迫埋一堆, 成班倉鼠咁, 媽媽睇見就皺眉頭, 怕我跌親又怕我推到人, 但我一於好少理. 和K2, K3的哥哥姐姐相比我size細少少, 但我身手敏捷無有怕, 攝下攝下都玩左四至五次. 大人的兒時玩意吹波膠, 是在龍華酒店門口的檔仔買的, 以前賣幾毫子, 媽媽竟花了十五蚊(一包五支), 爸爸話媽媽比人呃, 但媽媽自我安慰說是台灣製造, 質素好d, 雖然貴但幫襯的家長好多, 大人們都想將自己細個玩過的介紹比兒女. 初次接觸這玩兒我覺得好古怪, 牙膏狀的物體竟然變成波波, 我唔敢玩, 話:"我好驚呀!". 越驚越想玩, 之後媽媽教我吹一次, 我好快接受左, 風一吹波波飛走了, 有2個高班哥哥將我的波波拍來拍去, 拍穿左比返我, 我傷心得喊起來, 好淒涼地喊住叫"媽咪呀~~~媽咪~~~" 媽媽呵返我, 然後再吹一個新的, 原來仲有好多個波波.
逢星期四有烹飪班, 前一晚已好興奮, 媽媽叫我估下ms puja今日會教我地整乜野食呢? 會唔會係蛋糕呢? 哈哈, 原來真係呀! 今日放學我好開心話比媽媽聽, 整左蛋糕呀, 然後馬上從書包攞出食譜比媽媽睇, 原來係chocolate chip muffins, 最近的食品都有用到焗爐, 上星期整曲奇餅都係用焗的, 全部都係我鍾意的美食, 真係好開心呀!
今日返完little gym, 爸爸如常同我食早餐, 以前多數去大家樂食蘿蔔糕雞扒通粉, 但最近堅持要到麥當勞, 爸爸話一份精選早餐幾乎比我一個人食晒, 連以前唔食的豬柳扒都食埋, 同埋我自從一星期兩天在學校食飯後, 食飯亦叻左好多, 爸爸連脆薯餅的碎都唔夠我搶. 今日爸爸要返工, 中午把我帶到青衣比婆婆, 晚上婆婆將我送返荔枝角, 因為媽媽今日好忙, 要夜晚先得閒陪我. 晚上媽媽煮個簡單的晚餐, 係蕃茄牛肉燴意粉, 我特別喜歡加芝士粉, 仲會幫媽媽加少少, 但有時不小心會加得太多. 餐後落會所玩一陣, 媽媽提議我帶埋南瓜籃派糖果比小朋友, 我好鍾意派糖, 搭升降機時見到小朋友, 我都願意比糖果佢地, 但我無出聲, 因為唔知講咩好. 我終於刻服左對保齡球場的恐懼. 事情係咁樣的, 會所有一個小型保齡球場, 我bb仔時媽媽抱我入去睇過一次, 可能被巨響嚇親, 之後都唔肯再入, 每次經過都要提下:"媽咪呀, 我唔洗入保齡球場嘞!" 直到早兩個星期洭龍哥哥陪住我, 我先夠膽再踏足保齡球場. 我常常在家玩塑膠保齡球, 原來真正的bowling係好精彩架, 我唔怕醜企係d大人中間觀戰, 拍晒手又吶喊助威, 非常好的免費娛樂!
整曲奇
萬聖節就到, 幼稚園都有應節活動, 我知道pumpkin, jack-o-lantern, ghost, trick-or-treat, big bad witch....等和萬聖節有關, 同埋萬聖節係"好驚"的, 仲有糖果, 我所知的大約係咁多. 上星期爸爸媽媽去黑色迪士尼玩鬼屋, 爸爸本來想帶埋我去, 但被媽媽強烈禁止. 今日媽媽在教會聽到有個媽媽的女兒, 就係去完迪士尼之後晚晚發惡夢, 呢位女童連鬼屋都無入, 只係見到園內作鬼怪打扮的人, 已經好驚. 兒童心理學家話, 四至五歲幼童對呢d鬼鬼怪怪特別敏感, 未能分辦真假, 驚嚇的陰影會長留心裡, 輕則夜晚訓唔著, 要媽咪陪住, 嚴重者會導致行為倒退, 賴尿..食手指..需要心理輔導先得, 所以父母千祈唔好比呢個年紀的小朋友接觸鬼鬼怪怪造型人物, 電視廣告亦應避免, 處理不當後果可以好嚴重!
今日媽媽同馮主任傾左一陣電話, 馮主任讚我有進步, 上堂專心, 做功課都好乖(但每日返屋企都要媽媽幫我刷掉一些重做), 英文理解都唔錯. 課外活動時我特別喜歡煮野食, 但由於我比較偏食, 所以唔係每次都enjoy自己做的美食. 另外馮主任留意到我特別鍾意閱讀, 自由活動時間我喜歡睇圖書, 可以專心睇好耐. 有一次我無端端同miss ngai講:"miss ngai呀, 昭駿好鍾意睇書架!" 我真係好鍾意睇書架, 屋企有好多好多圖書, 大部份都睇完了, 最新買的青田"我會讀"和"我會讀"係中文書, 仲未睇晒, 但媽媽覺得要再添些英文書了, 因為英文書我睇得快少少.