facebook pixel code
緊急公告：因突發資料庫異常事件，故4/8～4/26資料損毀，如會員於上述區間曾於討論區發文回應，煩請重新發布，造成您的困擾敬請見諒

helen

helen

他的寶貝

1435貼文
0話題
0關注他

日期

#Tag

  1. 網誌
  2. 昭駿的世界
網誌區塊

築地市場

2010年04月08日
公開
40

昨日在富士急下起毛毛細雨, 氣温驟降, 黃昏返回東京都係濕濕凍凍, 晚上媽媽同我一齊禱告, 請天父俾我地好天氣, 嘩! 今早我五點鐘自動起床, 原來太陽伯伯已經準備開工, 晨光第一線射入酒店房間, 媽媽只係瞓得三四個鐘, 但見到咁好天氣, 都忍唔住起身睇睇, 真係雨過天清, 再開電視睇睇天氣報告, 東京今日將會全日天晴, 平均氣温13度, 真係感謝主! 我地住新宿太子23樓, 窗外望出去就係歌舞伎町全景, 同時亦見到超大型的新宿車站, 早上起來食支奶奶, 梳洗一下, 就睇下風景, 玩下玩具睇睇書, 俾爸爸瞓多一陣. 爸爸都瞓得好少, 但見到天氣好成咁亦唔捨得浪費, 寧願瞓少d, 起床梳洗後七點正全家ready出發! 前兩日都無搭過地鐵, 買左張suica今日先有機會用, 倒屎咁早去得邊? 梗係去築地市場啦. 住新宿勝於池袋就係搭車超方便, 地下鐵線如丸之內, 日比谷, 都營大江戶線, JR山手線等常用線都貫穿此站, 減少轉車次數, 方便得很. 去築地市場可以在銀座線的築地站落車, 或都營大江戶的築地市場站落車, 今次係爸爸媽媽第一次搭大江戶線在築地市場站出, 原來呢個站係較近場內市場和販賣新鮮水產的街市, 而築地站就較近場外市場, 即係有好多食肆和零售的地方, 主要做遊客生意. 上圖就係築地市場入口, 真係完全唔似入口, 見到好多貨車和運魚車閃來閃去, 揾食車唔會因為你係遊客而禮讓, 帶住小朋友真係要好小心, 橫過呢度爸爸全程抱住我呢. 一到步梗係揾野食先, 未食早餐吖嘛, 場內市場有四十幾間食店, 大部份係壽司, 其中兩三間特別多人排隊, 出來旅行時間最寶貴, 我地先唔會傻到花個幾兩個鐘去排隊. 我地揀左一間想入去, 但有個大嬸出來話:"No baby!" 示意唔歡迎帶住小朋友的人幫襯, 懶巴閉咁, 我地再去隔離一間. 壽司店得十幾個位, 已有一對日本情侶坐低左, 我地坐低後不久再有兩名日本男子入來食早餐. 伺應叔叔好好人, 見我係小朋友主動比杯水我, 爸爸媽媽就飲綠茶. 但唔知點解日本人特別鍾意飲冰水, 都未係天熱就飲冰水, 唔係好慣. 我地叫左一個三千幾yen十五件壽司set, 壽司師傅好嚴肅, 一臉認真地默默工作, 做好後將壽司三件三件咁放在我地面前, 燒玉子當然歸我, 我亦食左少少其他壽司和飲左d麵豉湯, 新鮮手握壽司真係好好味, 果種鮮味相信好難可以在香港可以食到! 食完就去參觀下啦, 媽媽見到d運魚車風馳電掣, 好驚, 但爸爸唔理, 想入街市睇睇, 最後我地誤打誤撞入左中央缷賣市場. 嘩~~! 原來呢度好多野睇, 好多奇型怪狀魚類, 海產, 手板咁大隻鮮帶子, 仲有平到笑o既海膽, 三文魚子.... 街市裡面遊客較少, 主要係本地人出入, 似乎來入貨居多, 好似我地一家三口入來好似去海洋公園睇魚魚的港燦家庭, 幾乎無. 街市裡面都幾繁忙, 但衛生良好, 亦無魚腥味, 唔似得香港街市d魚檔咁dirty. 爸爸媽媽都有幫襯, 買左一盒2000yen的海膽和一盒1000yen的三文魚子, 預備中午去賞櫻時野餐食. 我鍾意食蛋, 媽媽買一條細size的燒玉子俾我專享, 再買一盒士多啤梨(十幾粒又大又甜只售500yen), 然後再去便利店買飯團和飲品, 就出發去新宿御苑賞櫻去!

櫻花樹下的野餐

2010年04月08日
公開
34

逛完築地, 我地搭地下鐵去新宿御苑, 睇櫻花係今次旅程的重點節目, 因為爸爸媽媽做左幾十年人, 都未見過一片櫻花瓣, 媽媽為左呢次櫻花樹下的野餐心情振奮左兩個月, 爸爸買左新相機就更加要練習下, 連腳架都帶埋, 好鬼認真. 我在地鐵訓著左覺, 到站了仲未醒, 爸爸抱住我在月台坐下, 比我訓多陣, 訓醒先出站. 前後訓左半個鐘咁少, 但已差夠電再玩. 新宿御苑有兩個入口, 我地從大木戶門進入, 進場前不忘認下"門", "大", "木"字, 其實我唔只識英文字, 中文字我都認得好多架. 新宿御苑要買票入場, 但只係200yen咁平, 一入公園就見到淡粉紅色的櫻花滿開, 花瓣散落一地, 眼前就係一片粉紅色的夢! 我和媽媽發揮香港人本色, 不停哇~~哇~~叫, 爸爸就狂按快門, 是日下午天空是藍色的, 陽光温和而不猛列, 天氣好得令人感動流淚, 感謝主! 我地去到大草地, 地方大到令我興奮狂奔, 爸爸揾左個位來設置基地. 我帶左o係屋企玩野餐遊戲用的枱布來野餐, 出發前媽媽已和我在家練習過野餐, 所以我已經好熟悉程序, 我負責將枱布打開, 但發現原來好細張, 夠放食物但唔夠位坐, 人地日本人用的野餐墊都好大張呢, 我地唯有坐草地! 我地首先醫肚, 築地買來的海膽, 和香港食的海膽味到好唔同, 完全無腥味, 只有鮮味! 唔怪得未影相已忍唔住食左好多, 2000yen一板仲要係有兩層, 真係正正正正正! 三文魚子就差的, 水份不足, 有點腥. 燒玉子係我o既主糧, 好好味, 食埋個紫菜飯團, 飲包明治牛奶, 夠晒飽. 呢款明治牛奶超好飲, 好飲過香港買到的北海道3.6牛乳, 唔知香港有無得賣. 是日下午遊人不多, 因為唔係假期, 不過草地實在好大, 櫻花樹過千棵, 再多人都唔怕逼, 唔怕睇唔到櫻花! 日本人賞櫻真有雅興, 帶少少便當和飲品, 三五知己席地而坐有講有笑, 可以坐上兩三個鐘. 但我地香港人唔慣坐地下, 尤其是爸爸媽媽, 年紀大骨頭散, 食完快快起身, 四圍行下. 第一次見到咁多櫻花真係好興奮, 我唔識欣賞, 喜歡在大草地跑來跑去, 我特別想同小朋友玩, 遇到兩個比我細的小朋友, 同佢地一齊跑左一陣, 但好快佢地就唔肯跑. 後來又遇到兩兄弟, 我主動上前搭訕, 執石仔比佢地, 對方父母見我唔知講咩話, 覺得好奇, 媽媽於是就同佢地傾計, 我同兩兄弟仲玩左一陣, 一齊將石仔掉落坑渠. 櫻花美景實在美不勝收, 唔怪得日本人唔返工都要去賞花, 我地逗留左三個鐘頭, 行到腳軟先捨得走.

Thomasland

2010年04月07日
公開
32

自由行的好處係唔洗趕鴨仔, 鍾意點玩就點玩, 鍾意訓到幾晏都得, 我地的行程設計係既輕鬆又充實, 務求滿足晒大人和小朋友的所有願望, 所以絕對不能訓得太晏! 較好鬧鐘六點多d起床, 昨晚我成十二點先訓著, 今早媽媽一叫, 飲支奶就醒晒, 我甚少賴床扭計, 態度合作, 出門旅行就順利得多. 昨晚新宿的氣温係16度, 涼涼地, 著件冷衫加外套都ok, 媽媽其實有帶埋羽絨, 但見唔太冷就未洗出動. 今早要去富士急, 7:00落街食早餐, 爸爸昨晚夜探歌舞伎町, 鎖定幾間適合食早餐的食肆, 據報爸爸在歌舞伎町被五名人士兜搭光顧懷疑娛樂服務, 爸爸報稱未有理會, 買了宵夜便直接返酒店. 清晨的歌舞伎町人影都無隻, 有人的話多數係住新宿太子的遊客, 或剛剛收工的娛樂場所工作者. 我地決定去松屋食早飯, 貪佢有日式牛肉飯+鮭魚定食, 又有西式早餐如腸仔蛋, 適合我. 值得一提係我最近接受了紫菜, 來到日本就更好, 因為可以食好多紫菜飯團(便利店的飯團好好味!) 食飽就拿拿淋去搭巴士, 媽媽預先在網上買左京王高速巴士去富士急, 大人一程1700yen, 網上用信用卡付款平少少. 媽媽check到每日有四班Thomas主題巴士, 第一班係上午08:10, 我地十五分鐘前到達高速巴士站, 遇到最少兩個香港家庭搭同一班車去富士急, 好明顯都係為仔仔去Thomasland. 我只知道有得去Thomasland, 但媽媽事先無同我講明會有Thomas巴士搭, 08:05好大架Thomas巴士駛埋巴士站, 在場三名香港男童, 包括我, 都興奮到目瞪口呆, 吸引我的唔係車身上咁多架小火車, 竟然係Boulder(大石頭, 只在一集出現過), 我對boulder情有獨鍾, 今日竟然在巴士車身上見到, 有點不可思議! 座位甚至窗簾都好thomas化, 大呼小叫一輪後我好快恢復冷靜, 靜靜地坐車去Thomasland, 車程要1.5小時, 我本來好精神, 但坐車途車好易訓著, 最後半小時我都訓著左了. 富士急樂園果d恐怖機動遊戲當然唔啱我, 媽媽預先登記左做富士急會員, 然後憑會員ID購買kids pass, 可以任玩Thomasland七種遊戲和其他部d設施, 我地當然主攻Thomasland, 爸爸媽媽陪我睇得太多Thomas小火車, 搞到都好有興趣, 平日的富士急遊人極少, 全部遊戲都幾乎唔洗排隊, 行入Thomasland就如到左索多島, 見到好大架Thomas和Percy, 我好開心同佢地合照. 我好鍾意坐小火車, 今早負責服務的係Lady, 司機姐姐好熱情投入, 教我地一齊叫"Go Go Lady"三次, 然後先開車, 坐住漂亮的lady沿途見到好多朋友, 有Bertie巴士, 有夾夾的Diesel 10, 躲在車庫的Edward, 直昇機Harold, 仲有Terence, 最令我興奮係穿過隧道時見到Henry和大象在鬥力! 每次落車都會穿過一間商店, 又係俾人搶錢的時間, 商店真係乜都有, 衣物, 玩具, 食品, 甚至Thomas廁紙都有, 媽媽都買左些少紀念品, 我最有興趣玩木造train set, 日本的小朋友一樣熱愛Thomas, 大家一齊玩, 但我有時好驚人地攞左我手上的火車. 會肉緊左d, 因為唔趕時間, 爸爸媽媽讓我玩到夠. 然後我地仲玩埋其他遊戲, 但最精彩的Percy chocolate crunch竟然維修, 無得玩. 午餐在Thomas Cafe, 我地叫左兩個餐, 唔難食和唔貴, 仲花左600幾yen買左一杯milk pudding, 食完可以攞走個杯, 幾靚. 飯後竟然見到姐姐換牌, 原來Lady放工了, Percy開工! 我最鍾意Percy, 我馬上前去排第一. 我地在富士急逗留到下午三四點, 其間有毛毛雨, 氣温驟降, 媽媽爸爸怕我凍, 將兩件風褸和著晒上我身, 搞到我好似個大冬瓜! 媽媽訂左4:18的回程車票, 離開時真係幾凍, 媽媽買左杯熱朱古力俾我飲. 回程時我地全家在車上睡著了, 六點幾返到新宿, 想去高島屋食築地玉壽司, 高島屋明明在南口, 但在西口轉來轉去都去唔到南口, 最後都係爸爸醒, 帶我地走出東口, 一出東口往後行十分鐘唔洗便到高島屋, 但呢間玉壽司實在太巴閉, 我地到達時已派晒籌! 惟有退而求其次食和幸炸豬扒(いなば　とんかつ）,無想像中咁好食. 飯後慢慢行返酒店, 見到夾公仔想入去玩, 但原來夜晚唔準六歲以下小孩入, 真掃興. 今日行程到此為止, 為酒店睇今日買的Thomas圖書, 早啲訓, 準備明早去築地食壽司, 然後去櫻花樹下野餐.

東京我來了

2010年04月06日
公開
38

二月尾臨急臨忙買機票訂酒店, 籌備了個多月, 今日終於出發了, 不得不讚美現代科技先進, 揾資料簡單過乜, 上網一click乜都揾到, 參考人地的blog輕鬆規劃行程, 話雖如此媽媽還是好細心安排今次旅遊, 短短四日精華遊, 大前提係食得出色住得舒適玩得招積, 食乜住乜我唔介意, 最開心係有得去Thomasland, 可以活生生咁同我d老友見面! 媽媽在淘寶網買左個Thomasland手拖旅行袋比我, 係兒童尺寸, 啱晒我, 拉住行仲唔型到咩咁, 我在機場去廁所小便, 媽媽幫我拖住個Thomas袋, 一名西人以欣賞的目光對媽媽說"Nice!" 媽媽回應說:"It's my son's!" 但原來呢個袋都幾多人用, 同機一名男童又帶住佢, Thomas果然無處不在. 早上10:45起飛, 下午四點前己到成田, 但排隊過海關用左半小時有多, 七年無去日本, 原來現在大人過海關要影相和打手指紋. 出機場後馬上去買機鐵車票, 媽媽已做好晒功課, 知道有一種遊客專用套票N'EX+Suica, N'EX即Narita Express, 即機鐵, 出新宿係最快, 但都要1.5小時, Suica係八達通, 可在市內搭JR, 私鐵, 都營等等地下鐵. 套餐價只售3500yen, 好抵用, 順帶一提六歲以上小童在日本搭車係免費的, 當然不佔坐位計. 以前去東京幾次都係住池袋, 今次試下住新宿, 新宿駅堪稱全東京最複雜, 最難搞, 到步第一日到離開那日, 都仲未搞清東南西北, 爸爸認路比媽媽好一點, 但初到步拉住行李喼, 盲中中都幾狼狽, 我地住新宿太子近歌舞伎町, 揾到東口出到地面就得, 搞左十分鐘左右終於locate到位置, 朝住似一塊巨型朱古力的太子酒店前進. 新宿太子最為港人熟悉, 貪其位置方便, 毗鄰歌舞伎町, 有得食有野買, 要乜有乜, 酒店去年翻新過, 房間好靚好新潮, 我地訂左間大雙人房, 有一張king size床, 一部旋轉LCD電視, 打開個喼後仲有好多地方走動, 東京酒店來講算好唔錯. 晚餐去食歌舞伎町入面的金太郎海膽飯, 呢碗野鋪滿海膽, 爸爸媽媽開心到不得了, 承惠1500yen/碗, 我就食便利店買的關東煮雞蛋, 媽媽再比d飯我食. 飯後四圍行下, 在唔等洗商店"激安之殿堂"買左份唔等洗玩具, 然後隨處逛熟習街道, 仲要去車站西口那邊揾定回程的機場巴士站和高速巴士站, 好容易就揾到了, 原來就在京王百貨對面, 搞定了就返酒店休息, 準備明天早起床去富士急Thomasland. 爸爸怕我唔夠飽, 買多個朱古力冬甩比我當宵夜, 沖完涼就覺覺豬了, 第一晚有點唔慣, 碌碌下到十二點先訓得著, 張床都好舒服, size夠大, 全家都訓得好好.