親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
http://www.hku.hk/facmed/healthedu/issue259/issue259.pdf
今日放後回家, 我有點悶悶不樂, 媽媽在廚房準備午餐, 我突然走去同佢講:"無事喇, 依家校車無事架喇!" 貎甚緊張. 細問之下我說在校車跌親, 肚子位置痛, 媽媽問校車姨姨有無幫我, 我話"無呀!" 檢查身體沒有發現受傷, 但媽媽唔放心, 打比學校馮主任. 馮主任好人又細心, 聯絡校車公司了解, 但如所料那校車姨姨稱我無跌親. 如果有都講左比我聽! 見唔到唔代表無, 只係代表你無留意到, 雖然我未能完整表達到事件的經過, 但小朋友唔會講大話, 根據我的口供和動作+聲音示範, 爸爸媽媽相信可靠度達100%. 我上學和放學係兩架唔同校車, 兩個唔同保姆姨姨, 返學的保姆李太很好, 那個態度很有問題, 禮貎奇差, 對小朋友亦欠愛心! 媽媽曾向校長公司反映, 校車公司話呢位姨姨係替工, 是暫時性的, 媽媽順道向校方反映, 以表示擔憂, 希望李太暫快跟返放學車, 等父母唔洗咁擔心!
今日第二次返兒童主日學, 媽媽比左一件熊仔t侐我著, 貪佢有個袋仔可以放錢, 我叫媽媽比兩蚊我奉獻, 我好開心! 今日開始唔洗爸爸媽媽陪了, 放學後媽媽問我玩左d乜, 我話玩左奉獻, 其他就講唔出, 只係話玩得好開心! 我仲未明白奉獻的意義, 但我好enjoy奉獻, 以為係一個遊戲, 等我大個d就會明白!
今日返完little gym爸爸帶我返嫲嫲屋企, 我地由尖沙咀搭船過海, 再坐巴士, 小巴到香港仔, 回家時仲搭電車和地鐵! 今日搭左好多交通工具, 好犀利呀! 媽媽問我在爺爺嫲嫲屋企食左乜, 我和有魚, 雞蛋同埋happy face. 媽媽唔知happy face係咩食物, 經爸爸解畫後, 原來係蒸水蛋上面的豉油, 好似一個開心笑的樣子! 我經常對身邊的事物產生想像, 小朋友眼裡看的東西和大人不同, 多幻想係好現象!
今日又有課外活動, 一放學回家就同媽媽講:"玩得好開心, 食左好多野呀!" 原來今日整三文治! 食譜如下: Ingredients: sandwich bread, ham, cheese, margarine Tools: Some different shape moulds Methods: 1. Spread the bread with margarine. 2. Place ham and cheese between two pieces of bread. 3. Use a mould to make different shapes of sandwich. 我的運動衫有顏料污跡, 我話玩painting呀, 媽媽問我畫左咩, 我唔肯講, 直到晚上媽媽再問我先肯講, 係畫左happy face! 放學後曾經一度聲稱眼訓, 但碌來碌去都訓唔著, 走出廳玩又無厘精神, 媽媽就神速煮好晚餐, 6:45開餐, 係煎三文魚扒! 我即刻醒晒, 食飽竟然仲玩到九點幾先訓, 真係鐵人!
最近看evi兒童資訊網學識整壽司, 常常要媽媽比我睇"卷卷壽司卷" (烹飪動畫), 媽媽話不如真係試下整壽司啦, 我舉腳贊成, 但媽媽話一定要食埋紫菜先得, 我很煩惱, 因為我唔食紫菜, 黑炆炆唔鍾意, 於是就話:"媽媽, 我唔整壽司喇.." 上校車前都係話唔整, 但懷疑又受唔住雞蛋壽司的吸引, 最後細細聲同爸爸講:"我想整雞蛋壽司呀.." 放學一落校車就同媽媽講:"返屋企整壽司喇!" 媽媽早有準備, 預備左雞蛋, 青瓜, 蟹柳, 我好興奮, 媽媽教我卷卷壽司卷, 然後切切切, 做好了, 但我堅持唔食紫菜! 只食蛋和飯, 每舊壽司都食剩一pat紫菜! 仲不停講:"真係好味呀!" 我又提議"不如唔要紫菜", 但媽媽話唔得, 卷唔到. 媽媽問我下次仲整唔整壽司, 我話:"唔洗喇!" 媽媽話我唔食紫菜, 浪費食物, 唔洗旨意再有得整壽司呢!
今日爸爸媽媽帶我返恩福堂的兒童主日學, 我被編入K1A班, 一班有二十幾個小朋友, 我一d都無唔適應, 好乖好聽話, 因為有玩具玩, 老師一叫收玩具就幫手, 好合作, 但可能係第一堂, 仲未運作得好好, 流程有點混亂, 我仲參與左第一次奉獻, 奉獻左一蚊! 然後仲好開心同媽媽講:"奉獻左嘞!" 媽媽問我下次想奉獻多少, 我話兩蚊. 中午洭龍哥哥和展充哥哥都來同我玩, 我地三個男生大中細碼玩到好嘈, 玩具摷晒出來, 打仗咁亂. 爸爸又同我去游水, 室內泳池要維修, 但唔緊要, 我地重點係玩室外池, 爸爸話我學用水泡踢水比較耗力, 所以快d攰, 返到屋企好快就訓著了! 訓醒媽媽剛好回來, 買左新鮮桂花魚蒸比我食, 仲有蕃茄炒蛋!
今日係第二日參加課後活動, 媽媽準備了飯盒, 係炒蛋肉碎飯, 仲有菜菜, 我唔肯食菜, 要切碎變成菜飯先肯食, 菜肉水餃都肯食, 但唔肯食一條條的菜. ms ngai又係四點半準時打電話比媽媽, 話我今日食飯食得急, 食到嘔(又係咁!) 姨姨幫我換衫清潔, 放學返到屋企仲懶叻同媽媽講食晒d飯! 今日的節目係cooking和story telling, 煮食係我最喜愛的活動之一, 第一堂烹飪係泡製Banana boat! 材料係banana, custard和sweet dollar-5(唔知咩嚟). 回家後依然唔肯訓覺, 唯有早d食晚餐, 十點未夠就訓左了, 媽媽因為又要杜牙根心情欠佳, 一齊早訓, 點知我清晨五點天未光醒左, 叫醒媽媽 (媽媽無論訓到幾林都會聽到我叫!), 我要媽媽讀Baby prayers比我聽, 然後就一直玩到八點返學為止!
媽媽以為最快小學先會為我預備飯盒, 估唔到才K1的我已經要帶飯返學校食! 我參加了幼稚園的課外活動, 逢星期二, 四放學後留在學校, 媽媽要預備午餐飯盒一個, 由老師照顧我地食飯, 飯後可以休息一陣, 然後有不同的活動比我地玩, 包括Jolly phonics, 普通話, cooking, art and craft. 中間仲有一次茶點時間. 第一次帶飯媽媽份外緊張, 7:15起身預備我最鍾意的蕃茄炒蛋加龍脷柳, 然後放入新買的THOMAS飯盒. 媽媽昨天已同我briefing過, 我大約知道今日要留校食飯, 一起身就話:"返學嘞!" 又自言自語:"蕃茄放飯盒度, 比姨姨放入oven度..." 我帶住飯盒好開心跳上校車, 無得訓晏覺, 媽媽有少少擔心我會扭眼訓. 活動4:30完, miss ngai打電話來, 話我在學校食飯好乖, 第一個食晒, 自動自覺唔洗人幫, 好難得! 校車未夠五點返到屋企, 落車時仍然龍精虎猛, 毫無睡意, 似乎玩得好開心, 媽媽唯有早d比晚餐我食, 沖埋涼, 9:30上床, 即刻訓到隻豬仔咁, 非常好!
洭龍哥哥是媽媽的學生, 差不多比我大十年, 佢係少有喜歡和幼兒玩的男生, 每次出現我都好開心, 不停叫著:"洭龍哥哥, 一齊玩玩具!" "洭龍哥哥, 一齊玩thomas!" 但我知道洭龍哥哥上來是學琴的, 所以我都好合作, 等哥哥學完琴先叫佢同我玩. 哥哥今年升中一了, 但同我呢個幼稚園生十分投契, 仲照顧有加, 我地有時會一齊去會所玩, 哥哥一次出現, 媽媽倍感輕鬆, 好似多左個臨時保姆, 可以完完整整睇晒成份蘋果日報. 哥哥曾跟爸爸學網球, 同爸爸都好熟, 今日爸爸約埋哥哥, 同我一齊玩氣墊球, 我打波好茅, 但哥哥都好有心機同我玩. 媽媽收工返來, 提議一齊去pizza hut食晚餐, 邀請哥哥一齊, 我第一次同哥哥一齊進餐, 心情大佳, 餐後去玩夾公仔, 哥哥經常自誇夾公仔好叻, 一蚊可夾三隻! 媽媽請佢大顯身手, 最後用左$4夾左一隻波兒比我! 我開心到不得了, 返到屋企馬上同波兒玩, 煮飯比佢食, 教佢砌puzzle, 仲讀書比佢聽!
會所重開
婆婆帶我畫畫
婆婆家的雪櫃好巨型, 冰箱在下格, 裡面常有朱古力脆皮雪條, 我常常打開冰箱將雪條拿出來看:"呢個係云呢拿味!" "呢個係香芋味!" 婆婆唔會輕易比我食, 通常訓醒晏覺先有, 但今日婆婆竟然未食午飯就請我食, 原因係我唱左一首歌: "打開雪櫃 打開雪櫃 有雪條 有雪條 快d攞佢出嚟 快d擺佢出嚟 食左佢! 食左佢!" 氹得婆婆好開心, 於是我就得呈了, 食左幾啖云呢拿雪條! 媽媽知道又話婆婆縱壞我! 我睇多啦A夢, 知道日本的男孩子會有鯉魚旗, 媽媽今日竟然買到鯉魚旗比我, 仲係兩大一小三條鯉魚, 象徵一家三口, 我話:"The big one is daddy. The big one is mami. The small one is Isaac!" 媽媽提議我帶返幼稚園和小朋友分享, 我反對, 於是媽媽提議我和Mr Dennis分享, 我話好, 明天會帶返去準備英文堂的"Show and tell"環節用, 希望到時我識得用英文present!
星期六係"爸爸與我日", 媽媽係唔需要亦唔歡迎陪同, (媽媽要彈琴揾錢錢買禮物比我哦!) 今早叫我起床無難度, 仲自己去鞋櫃攞波鞋和我的足球仔, 出門時快快樂樂和媽媽bye bye, 紥紥跳和爸爸出發去. 首先9:00爸爸帶我返little gym, 跟住食麥當奴早餐, 然後搭火車去九龍塘踢football, 我喜歡跟爸爸去踢波, 因為我喜歡在球場搞搞震, 偶爾也會踢幾下, 但爸爸最怕人地開緊波時我衝出球場, 一來好危險, 二來阻住人地搏老命, 輸波實懶晒我! 最近我注重皮膚護理, 戶外活動要求"搽太陽" (太陽油), 運動後要補充水份, 我喜歡飲爸爸的寶礦力, 500毫升我搶飲了至少250ml, 回家仲好開心話比媽媽聽"我飲左礦力!" 中午爸爸帶我去馳名的譚仔記食米線, 我竟然懶尿, 梗係啦, 飲左咁多"礦力", 爸爸又唔準時帶我去廁所, 我急尿又唔出聲, 咪搞成咁. 回家後精神抗奮, 唔訓晏覺, 等媽媽收工後出發去香港仔和爺爺嫲嫲食飯, 幸好搭車時訓左一小覺, 嫲嫲比$100我買玩具, 我好唔客氣收下, 飯後有得去紅蘿蔔睇小動物, 仲有得行下玩具反斗城, 買左個marble race玩具, $99.9, 當係嫲嫲送的, 多謝晒嫲嫲!
每日放學我都好老實地向媽媽報告當日的茶點, 除麵包, 蛋糕, 餅乾呢d普通野外, 上星期有蜜糖星星, 粟米, 今個星期有燒賣, macaroni... 食物多樣化, 氹得小朋友好歡喜. 除報告食物外, 我完全無提起學校發生的事, 媽媽問我我才敷衍一兩句, 例如: 媽:"今日Mr Dennis有無來?" 我:"有." 媽:"咁佢講乜野呀?" 我:"Good morning students" 媽:"跟住呢?" 我:"Good morning Mr Dennis." 媽:"......." 今日媽媽用雪糕利誘我, 要我講出Mr Dennis教了甚麼, 我在cookies & cream雪糕的誘惑下, 爆出一句:"An apple a day keeps the doctor away!" 左氹右氹下我終於唱出全首apple song: An apple a day keeps the doctor away! (重覆三次) A-P-P-L-E apple! 無甜頭的話我係唔會講任何野你聽的! 問你怕未!
金巴倫的老師真係好, 成日都打電話來, 今日Miss Ngai放學時間又來電, 原來我的手唔知點解刮損左, 無大礙, 又話我上堂好留心, 好投入, 尤其是英文堂, 今日普通話堂表現亦佳, 食茶點亦好乖, 食完晒會收好杯碟, 然後伏低休息. 但miss ngai又話我同小朋友相處麻麻地, 排隊去廁所時, 前面的小朋友唔郁, 我推佢, 今日去廁所, 有小朋友用緊我用慣果格, 我又推人! 真係莫名奇妙, 老師話每日提醒我唔好推小朋友, 為免我一時衝動推人, 排隊會安排我排第一! miss ngai話我今日有進步, 拖住灝灝的手, 說:"好朋友, 要拖住手!"
媽媽買了迪士尼特惠annual pass, 又被爸爸屈買多一張送比佢, 誓言要去足10次, 底返夠本. 今日放學後訓個靚覺, 四點幾先出發, 天氣不錯, 無之前咁翳熱, 玩左船船, 巴斯光年, 飛船, winnie the pooh同埋小小世界五個遊戲, 臨走仲睇左幾下煙花. 仲趕得切返婆婆屋企食晚餐, 坐埋大虎架silver car返屋企, 沖完涼即睡, 好攰! 媽媽說我凡事都要感恩, 感謝天父讓我從疾病中康復過來, 賜我健康, 可以和爸爸媽媽開開心心生生猛猛地去玩, 我每天還要為很多事情感恩, 例如"感謝天父賜我雪糕", "感謝天父賜我停車場玩具", "感謝天父賜我好天氣"... 等等!
婆婆又買玩具
今日係正式開學第二日, Miss Ngai放學後打電話同媽媽傾計, 老師話我表現很好, 上英文堂時特別投入, 課室規矩, 秩序, 食茶點, 上廁所等一般自理都沒有問題, 媽媽問及我有無大聲講說話, 老師話有, 但都懂得自我提醒, 叫自己:"Shhhh~~~ be quiet!" 新校適應似乎很順利, 十分好, 要比心機讀書呀, 歐昭駿!
今日正式開學, 返兩個鐘, 今日開始有校車了, 昇悅居站有六個小朋友, 五月四日闊別校車後無再搭過了, 今日坐返校車, 一切都好自然, 當然第一次搭校車的小朋友會喊, 有一個女孩子仲喊到跳返落車, 保姆姨姨要捉實佢先得! 回想去年我第一日搭校車都喊左一陣, 現在梗係唔會啦, 大個仔了. 放學媽媽去學校接我, 好大雨唔行得住, 媽媽陪我在課室玩車, 和劉老師聊天, 老師話我很乖很醒, 有規有矩, 馮主任和班主任Miss Ngai都讚我表現好, 媽媽開心又放心. 飯後和obi去little gym玩體操, 今日又有air mat, 我地在氣墊上連打三個關斗, 非常好玩!
The Little Gym每一堂都有唔同主題, 今堂係Dinosaurs and dragons. 小朋友要用想像力幻想有好多恐龍出左嚟!!!
今日係最後一天適應週, 即下星期開始就唔比父母陪上課, 基本上我無乜問題, 但仍有小朋友無法和父母分離. 今日茶點係蜜糖星星, 仲有維他奶, 我一見到就兩眼發光, 說:"昭駿可以食喎!" miss ngai話要等叫名, 叫左名的小朋友先可以返埋位坐, 我好心急想食, Miss Ngai又遲遲未叫我個名, 我忍唔住企左起身叫:"跟住到駿駿嘞!" 最後返埋位坐, 我小心翼翼拿出茶杯碟, 抹乾淨手仔等食, 食之前仲要唱茶點歌架! 話時話, 金巴倫的茶點歌好複雜, 仲要配合好多動作, 不過我都基本上識唱, 動作就仲未掌握得好, 等我學識晒, 再教大家. 我實在太鍾意火車, 懂得分辦港鐵, 西鐵, 東鐵, 機場快線, 東涌線和迪士尼線, 今個星期上學適應週, 媽媽每日管接送, 我會乘機要求搭下東鐵, 今日我又苦苦哀求, 媽媽就答應我, 陪我遊下東鐵河, 由九龍塘搭到沙田, 再搭返去九龍塘, 然後轉返港鐵返婆婆屋企, 得償所願我好開心!
今日係適應周第四日, 馮主任叫晒d家長出去, 試下比小朋友自己上課, 班上的小朋友大部份都好ok, 只有一兩個成日喊和要黐實媽咪. 上課, 排隊去廁所, 食茶點我都無問題了, 媽媽希望我可以專心學習, 做個好學生! 今晚爸爸媽媽約了bonnie姨姨食飯eco姨姨, 去左一個好特別的地方, 係長沙灣道一間私房菜館, 是一位恩福堂的姊妹主理, 我地食左最馳名的醬鴨, 印尼甜排骨, 薯蓉帶子, 炒雜菌, 仲有超美味的海螺雞湯, 甜品係自家製乳酪, 姨姨仲私人醒我雜果蛋糕! 採用有機蔬菜, 不加味精, 少油, 非常好味! 連我咁挑剔的細路都食唔停口. 不過只得姨姨一個煮, 等候的時間會長一些, 適合三五知己講飲講食傾吓計, 趕頭趕命唔等得的人請到大家樂或美心mx. 價錢豐儉由人, 你只需要話比姨姨聽你的budget, 姨姨就會幫你諗掂佢, 今晚我地的豐富晚餐是每位$150, 大家都覺得很ok!