親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
Baby Isaac
Ghost and Goblin, Ghost and Goblin, Witches too, Witches too, Halloween is coming, Halloween is coming, Boo to you! Boo to you! 以上是我校萬聖節的主題曲, 亦係我最近經常掛在口邊的歌仔, 旋律係Are you sleeping或"打開蚊帳", 相信無人唔識唱. 上星期老師派左一隻CD, 係學校的老師錄製送比我地的萬聖節禮物, 有故事, 兒歌, 我好鍾意聽, 一日聽十幾廿次, 好彩未聽爛碟. 呢幾日晏覺訓得太長, 三個鐘, 搞到好夜先訓, 好彩第朝都起到身, 不過始終唔太好, 香港小朋友太夜睡, 我就係其中一個!
返左學兩個幾月, 媽媽相信我對校園生活係充滿熱愛的, 但返學做過d乜, 食過d乜, 爸爸媽媽知道得好少, 因為我唔識講! 媽媽只能從obi口中得知我"成日行" (即經常離開座位)和"跩跩"(相對obi呢類咁守規矩的細路, 我確實係非常之跩), 有時和班主任傾電話, 也能略之一二, 但始終唔似得有d女同學, 返屋企會一五一十將學校發生的事講比媽咪聽, 又會提下同學的名字..等等. 今晚媽媽上網睇親子王國討論區, 從到"施德福英文幼稚園"討論區中睇到d好特别o既野, 原來我地蘋果組有一個女同學, 經常同媽咪提起我, 仲叫我做baby isaac (我班有兩個isaac, baby isaac仲唔係我?) 呢位女同學話baby isaac好可愛, 仲當我係弟弟, 佢係姐姐, 仲有上星期sports day, baby isaac跑第一, 老師請大家食薯片! 媽媽即時眼泛淚光, 人生中第一次運動會, 竟然攞第一, 仲有薯片作獎勵, 返屋企竟然唔同阿媽報喜! 莫非食左薯片, 唔敢同媽咪講, 所以提都唔提... .. 媽媽誠心希望我快快長大, 唔再比人叫baby isaac, 快d識講多d野, 賽跑繼續攞第一, 返屋企記得同爸爸媽媽報喜, 等媽媽請我食多包薯片!
課外活動
今日教師發展日, 唔洗返學, 我照常返婆婆家渡過我的星期五, 我喜歡吃婆婆的水餃, 媽媽特別鍾意我食水餃, 因為我平時唔肯食菜, 水餃裡面的菜我就通通吞晒落肚, 仲話"好味!" 媽媽會用剪刀剪碎比我自己食, 通常食四至五隻就夠, 今日食完五隻, 竟然仲比碗媽媽, 要求再食, 於是我就食左六隻水餃, 好飽飽!
媽媽通常在深夜寫昭駿的世界日記, 呢兩晚都太累, 早訓, 無寫的日記會盡量補返, 就算雞毛蒜皮一兩句, 得張相, 甚至得個標題都好, 唔寫的話會心情會忐忑不安, 若有所失, 事隔2日後已記唔起有咩好記, 形成空白記憶, 所以媽媽要記住!記住!記住! 寫日記!寫日記!寫日記!
今日學校運動會, 我唔知參與左乜, 但爸爸媽媽相信我如果無偏離賽道的話, 跑步應該唔會輸, 放學時胸前掛住一個人人有份的奬牌, 仲要係紅白藍絲帶, 幾有型, 但我唔肯戴住影相, 無得"型"比大家睇添. 晚上爸爸帶我去旺角攞波衫, 媽媽交帶爸爸帶我摘樹葉, 帶返學校做樹葉畫, 但我在公園跑來跑去, 又撩d姐姐, 摘樹葉任務交比爸爸, 然後約同媽媽在味千拉麵集合, 食麵麵, 仲有薯餅, 餐後去兆萬商場逛逛, 沿途我在街頭高歌abc song, 心情大佳, 媽媽重鎚出擊, 買齊thomas第三系列盒仔玩具一套十款, 但講明我要乖仔先比我玩, 每次只可以開一盒. 比錢時我好開心, 仲好有禮貌同收銀的叔叔講"唔該晒哥哥!" 返到屋企就出事了, 玩得太攰, 沖涼後大喊, 大扭眼訓, 搞左好耐先平服呢!
我校功課算多, 已有三本(pre-writing, shapes, chinese), 幾乎每日都有功課派返來, 最近的pre-writing不停要我連線, 我最憎, 基本上從來無喜歡過, 媽媽亦唔想強迫我, 好多小朋友都喜歡連線, 媽媽細個時都唔例外, 唔知點解我一d興趣都無, 反而有次媽媽見到我拿住筆玩迷宮, 口裡唸唸有詞:one, two, three, four... 所以暫時無興趣拿筆畫線, 就算了, 迫都無謂. 今日放學返來, 食飯都幾乖, 食飽就去訓, 訓醒等媽媽教完琴, 就落會所同雅雯玩, 我鍾意自己玩多d, 有時又會同雅雯爭執, 好正常, 臨走時又呱呱叫, 唔願走, 發晒爛渣, 最後咪又係要屈服, 都唔明點解我成日都咁硬頸, 又惡死.
https://bb5.babyhome.com.tw/UPLOAD7/117460/122525.102808850.19815.wmv
今日實在太忙, 一早同媽媽返青衣, 婆婆已經在巴士站等我, 上兩個星期六我都係返青衣玩, 我已經習慣了, 知道媽媽去彈琴, 分別時都無糾纏, 馬上同媽媽講拜拜, 然後拖住婆婆去玩了. 婆婆先同我去麥當勞食早餐, 我又食無益的薯餅, 然後去街市買餸, 途經剛才同媽媽分別的地方, 我跑過去, 婆婆問我去邊呀, 我話去"揾媽咪!" 婆婆真厲害, 買完餸拖住我行大斜路返屋企, 成身大汗, 飯後午睡, 然後由爸爸接走, 去美孚嘉華叔叔的新居參觀. 嘉華叔叔搬了新屋, 我地買左雪糕上去, 當然第一時間品嘗, 去到人地屋企我依然咁"活潑", 當正自己屋企, 仲玩到唔願走, 賴死到九點幾, 最後爸爸媽媽唯有強行將我抱走, 鞋都無著, 我淚流滿面, 哭聲陣天地離開, 我淒涼地喊住要求"我著鞋!" 著返對鞋之後我又若無其事, 回復紮紮跳了!
爸媽遊深圳
爸爸成功接放學
三隻野
最近好鍾意睇書, 睡房窗台, 床邊都放滿書, 隨手可以攞黎睇, 臨訓前15-30分鐘尤其特別, 媽媽會陪我睇下書, 唱下怪歌, 伴我入睡, 鍾意睇的某幾本書會睇上幾百次, 媽媽會趁睡前呢段時間, 乘機引入新書籍, 表姐提供的K2, K3英文reader現在可以睇了, 特别喜歡The double decker bus和Baby Ben. 上月買左sight word kids 2和互動字卡, sight word kids 2太深, 字卡設計麻麻, 有點得物無所用, 今日媽媽又忍痛買了phonic kids 1 和"跟小小孩說英文", discount後承惠六百大元. 我本來已有一套GC phonics kingdom, 但phonics kids的歌仔很好聽, rap得好開心, 實在忍唔住唔買! "跟小小孩說英文"用漫畫故事形式教導小朋友日常生活的好習慣, 故事中有2個細路成日比媽媽鬧, 表姐話個樣好似我同obi, 都幾搞笑架!
媽媽得閒了
今日婆婆陪我睇電視, 睇甄文達煮餸, 我向來喜歡烹飪節目, 但今日睇yan can cook特別興奮, 可能係英文節目關係, 我未睇過中國人用英文煮餸喎, 好新鮮呢!
近日天氣轉涼, 尤其是清早, 落街等校車特別涼, 個個小朋友都穿上校服外套, 唯獨我一人著住單薄短袖校服, 我唔係扮強壯, 只係我死都唔肯穿上外套, 今早媽媽靜雞雞將外套套在校服上, 一拼幫我穿上, 以為神不知鬼不覺, 點知一出屋企門口, 我在電梯鏡子見到自己著住外套, 馬上要除, 爸爸媽媽都無晒我符. 落到校車站, 有點涼, 媽媽堅持幫我著上外套, 和爸爸合力將我制服, 勉強穿上, 我反抗不成, 校車又到了, 就哭著上車, 眼淚汪汪, 狀甚淒涼. 放學時太陽晒上頭頂, 氣温30度, 可憐我仲著住外套, 熱得無頭太汗, 老師竟然無幫我除掉外套, 唔通老師太忙, 還是無注意到天氣?
放學時在校車睡著了, 整日無訓過覺, 下午去會所跑左一個鐘, 夜晚沖沖下涼, 係浴缸訓著左...
上星期開始有第三本功課, 現在每星期要做三次功課, pre-writing, 中文和shapes, pre-writing我最唔鍾意做, 基本上每次都係媽媽捉住我的手完成!
搭渡輪
今日訓醒晏覺, 在床上不停碌來碌去, 大笑, 婆婆問我咩事, 我話:"好開心!" 唔知為咩事咁開心, 唔通發左個好夢?
今日爸爸帶我返香港仔探爺爺嫲嫲, 我如常紥紥跳, 無時停, 嫲嫲都怕左我. 飯後爸爸想帶我去跑馬地運動場踢波, 但我已開始攰了, 搭巴士時訓著左, 呢一下小睡不得了, 返到屋企鬼打咁精神, 唔肯再訓了, 情況就同前幾日在校車小睡後直撐到夜晚, 最後沖涼時在浴缸訓著一樣, 今晚我撐到十點, 下午至睡前都在家搞搞怪怪, 媽媽最怕我唔訓晏覺, 會變得好扭計, 好野蠻, 好惡搞...
Where are you?
在浴缸睡著了!
https://bb5.babyhome.com.tw/UPLOAD7/117460/122525.101335387.79375.wmv 今日國慶假期, 唔洗返學, 媽媽早上都要教三個學生, 爸爸去踢波, 婆婆就提議帶我去玩, 首先媽媽帶我搭地鐵返青衣, 去翠怡商場食早餐, 商場食肆全部爆棚, 我地去麥當勞, 我第一次在麥當勞食早餐, 以為有薯條食, 點知媽媽買左早晨全餐, 我覺得好奇怪, 食左炒蛋和脆薯餅(終於知道hash brown係乜野), 然後同媽媽講拜拜, 婆婆同我出發去玩了. 我地沿住海濱長廊散步行, 見到青衣站好多地鐵穿梭往來, 令我心情格外興奮, 我仲同婆婆講:"好多train!" 到達青衣城, 去冒險樂園睇下(只看不玩), 有一架thomas機動車, 我太鍾意了, 坐住唔肯走, 但多人排隊想玩, 婆婆又唔識買代幣, 唔能夠霸住部車, 唯有強行將我抱走, 我好似被割走忽肉, 傷心極了, lur地大喊, 最後婆婆同我行超市, 買雪糕補數! 媽媽中午過後收工, 返到婆婆家我已訓著, 玩得好盡興, 訓醒心情特別愉快, 然後同媽媽一齊返屋企! 返到屋企我又不停睇書了, 最近花左好多時間睇書, 特別喜歡sight words kids和GC readers, 其他書本都好鍾意呢!
上次爸爸接我校車, 情況如同兒童被綁架, 今日交比婆婆試下, 媽媽暱埋一邊睇, 校車一停站, 我就擒擒青從座位走出來, 見到婆婆馬上開心笑! 馬上投入婆婆懷抱! 此時媽媽現身了, 我照樣要求"除書包, 除校服!" 但婆婆抱住我無咁放肆, 返到屋企不知幾乖, 幾開心! 媽媽放心去做facial. 最近我食午餐有點扭計, 揀飲擇食, 媽媽今日煮南瓜, 怕我唔食, 婆婆回報說我好乖, 食清光, 明顯係蝦媽咪. 晚餐媽媽煮左d好味雞雞, 仲有茄汁豆, 我"自己嚟"食晒碗飯, 仲飲湯, 好合作.
扮老師
阿公, happy to you~~