親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
奶粉大加價
今日太得閒, 媽媽同我去盈輝台揾豬姨飲茶, 我飲茶都幾失禮, 坐唔定, 食飽要落地, 媽媽似傻婆咁追住我, 抱我睇窗口的車車, 雖然我今日十分坐唔定, 但媽媽總算成功食左好多點心. 然後我地去盈輝的會所兒童室參觀, 有個姨姨在清潔, 佢話\"四點先玩得呀!" 但我太開心了, 不停run和jump, 姨姨亦由得我, 媽媽和豬姨坐埋一邊打牙骹, 我run和jump左十幾二十分鐘, 然後自行要求離開, 媽媽覺得好奇, 我竟然想走? 豬姨話:"梗係啦, 會所都無咩玩, 得個run字!" 雖然無咩玩, 但都幾好玩, 地方好安全, 跑下都好. 然後上豬姨屋企, 一入屋我就嘩! 嘩! 唔知嘩乜. 媽媽和豬姨搞電腦, 教豬姨學用msn, 豬姨終於學識用msn, 好勁. 話說媽媽三年前已幫豬姨set好左個msn, 但唔知點解到今日先識用. 豬姨的媽媽買左雪糕比我, 仲要係chocolate icecream, 太意外了, 我開心到兩眼發光! 在媽媽的協助下我食晒成杯, 然後自行入廚房掉垃圾, 我雖然頑皮, 但我有時都好企理的, 食完野收拾, clean up一定做足. 教豬姨用電腦工程浩大, 媽媽和豬姨一直黐住電腦, 我唯有自我娛樂, 我好唔客氣咁跳上豬姨的床, 聲稱"覺覺", 但當然係假的, 我搞東搞西, 連豬姨的壓歲錢利是都摷埋出來, 然後無端端靜左落黎, 原來我正在大便!!!! 以往只在家大便的我, 竟然在豬姨的床大便, 相信係前兩日都無所出, 終於忍唔住釋放出來!
婆婆實在令人佩服, 今日午餐後如常同我落街玩, 但今日竟然搭上6c巴士, 原因為婆婆知我鍾意搭巴士, 就等我開心下, 上左車先決定去邊, 到左太子落車, 我地行金魚街, 我鍾意睇魚, 龜, 貓狗白兔等小動物, 大把有得我睇, 我開心到不得了, 見到有雞蛋仔賣, 我話:蛋蛋! 婆婆馬上買一抵比我一路行, 一路食, 然後去花園街, 買左一架打關斗車, 因為太多人, 太熱, 買完就搭車返屋企. 媽媽知道我地去左咁遠散步, 嚇左一跳! 因為媽媽從來唔會帶我去咁遠行街, 就算去, 都會帶bb車, 或揾外援幫手, 先敢遠行, 所以話婆婆真係好堅. 返到屋企想訓晏覺, 我跳上床聲稱要覺覺, 跟住無端端彈起身, 話"wake up!" 婆婆唔知咩叫wake up, 媽媽話wake up即係起身喇, 婆婆就叫我sit down! 然後我就話: Good night! 睇來婆婆的英文進步了好多, 相信好快佢就可以同西人對話.
大家捐款賑災未呢? 媽媽有個五年級的學生用自己的零用錢捐了一百蚊, 另一個三年級的學生自己有六百蚊身家, 捐左四百蚊出來, 媽媽問佢捨唔捨得d錢, 呢個姐姐話:"梗係有d唔捨得啦!" 小朋友能夠自發捐出自己的零用錢, 實在令人鼓舞, 我都有d錢, 但我仲細個, 未明白天災人禍, 救急扶危的道理, 賑災一事暫時由爸爸媽媽代理, 媽媽希望我大個可以好似d姐姐咁, 無私獻出自己擁有的東西, 去幫助受苦難的人!
再慶祝母親節
唔知幾時開始媽媽開始教我身體部位的名稱, 又唔知幾時開始我大致已經識得晒, 我尤其喜歡指住媽媽, 爸爸或婆婆的眼耳口鼻, 又喜歡強行伸手入媽媽的口, 指出teeth和tongue的名稱, 又會揭起媽媽的衫找出bellybutton... 後來媽媽連elbow, ankle, chin, cheek, back都教埋我了, 應該知道的部位都齊了, 唯獨是屁股(bottom), 講極我都無反應, 媽媽一邊同我沖涼, 一邊打我pet pet, 話我知呢個係屁股bottom, 我都無鬼理佢. 誰知今晚沖涼, 我將個洗頭水蓋放上頭頂, 話係"Head", 無錯, 講得正確, 然後我不停自打pet pet, 不停講著"bottom bottom bottom bottom..." 初時媽媽唔知我講乜 (近來好多怪語言, 要諗一諗先大概估到意思), 思考十五至二十秒之後才叮一聲諗到, 原來我打住個pet pet, 想講BOTTOM. 近來的語言開始多樣化, 媽媽腦筋轉唔切, 都估唔到我想講乜野, 較常講又能夠理解的句子, 有"tunnel! Out the (other) side!(過隧道, 天橋底, 玩火車時講" "Green means go!(交通燈轉綠色時講)" "train! here it comes! (見到地鐵時講) "蝴蝶蜜蜂! (見到花草樹木時講)" "Come here! (叫人過嚟)" "喂! 邊個! 拜拜! (扮打電話, 有時會用花灑頭來扮)"
Swim!
爸爸從長洲回來了, 原來佢無參加搶包山比賽, 只係去左採訪太平清醮, 但為人永無蝕底的佢, 今日都攞到幾個平安包, 仲斥資好多蚊買左d包包, 印章, 電話繩果d唔等洗野, 不過好得意, 媽媽好喜歡, 爸爸影左好多靚相, 同大家分享下! 搶包健兒似足馬騮, 爬包山快到無倫, 睇下個包山幾高, 媽媽懷疑我有d運動細胞, 話唔埋15年後我會係其中一個搶包手呢! 可能到時如麥兜所願, 搶包山已經成為奧運比賽項目之一. 第二朝包山的包被拆下來, 派比市民, 一地都係包, 叔叔有排忙囉. 印有平安紅字的大包包, 樣子好有趣, 但唔係太好食呢! 爸爸攞到一串包, 你睇佢幾開心, 心情就如我得到雪糕一樣! 講返我, 今日媽媽同豬姨做飛素, 又係我同婆婆相處的日子, 婆婆話我唔肯落街玩, 只顧在家玩玩具, 又唔肯訓覺, 好似昨天咁, 又係搞到五六點先訓, 媽媽回來時我剛好訓醒, 攬實媽媽唔放, 原來媽媽仲電左髮!! 媽媽話: "媽媽d頭髮luen左呀!" 我話:"亂左!" 媽媽話:唔係亂左, 係luen左呀!" 我話:"luen左!" 終於搞清楚了.
今日佛誕假期, 爸爸去了長洲搶包山, 我和媽媽無特別活動, 媽媽本來想等我訓醒晏覺落街玩, 運動下, 點知我唔肯訓, 擾擾攘攘到五點先訓, 大失預算. 訓醒已經七點幾, 表姐已經到左, 媽媽馬上煮飯我食, 趕得切8:15落兒童室玩一陣, 媽媽話細路仔無運動唔得, 點到要跑下跳下, 兒童室地方大又安全, 我一入到去就不停跑, 轉圈, 玩好多玩具..非常忙碌, 至9:00要關門了, 我同另一個女孩子唔肯走, 職員叔叔話:要消毒玩具嘞, 返屋企嘞... 我拿拿聲跳上木馬, 玩多幾下, 玩完一隻再玩另一隻, 唔蝕底, 然後乖乖地著鞋返屋企. 講開又講, 表姐今日無彈琴, 唔知係媽媽太忙還是表姐太忙, 媽媽太懶還是表姐太懶, 今年尾就要考六級, 真係擔心佢會肥佬.
母親節-兩個蛋糕
我叫歐昭駿
兩歲半!
昇悅居三寶係本人歐昭駿, obi勞逸大少和梁雅雯小姐,好耐無一齊玩了,尤其是雅雯,真係好耐無見,今晚媽媽和june姨姨約埋落club玩, 媽媽帶備兩包零食請雅雯食, 我圍住雅雯氹氹轉, 一路係咁講"好味? 好味?" 好似一條飢餓的鯊魚圍住一個在大海漂浮的人, 搞到雅雯不知所措, 最後雅雯分左好多零食比我. 玩完返屋企, 爸爸已經準備好晚飯, 係咪好奇怪呢? 爸爸竟然煮飯, 無錯, 爸爸今晚竟然買餸煮飯, 真係奇蹟呢!
媽媽今晚收工, 約我和爸爸到葵芳新都會廣場食飯, 本來想去元氣食迴轉壽司, 點知媽媽好老定, 以為時間尚早, 唔洗點位, 點知一去到就嚇親, 人龍已經排到廁所門口, 估計最少要等一個鐘, 媽媽就話:"哎吔, 咁多人, 我地去第二間食囉!" 然後拖住我朝電梯方向走去, 我以為媽媽呃我, 又話食壽司, 又唔入去, 就甩開媽媽的手想走入元氣壽司, 慘叫:"壽司! 壽司!" 又坐在門口地毯唔肯走. 媽媽解釋比我聽, 我地今日唔食壽司嘞, 因為好多人, 我地試下食第二間啦, 不如食牛肉飯啦! 然後我地去左吉野家, 媽媽叫左三文魚蟹子飯, 爸爸叫左雞扒牛肉雙拼, 我食第一啖飯已經講:"好味!" 原來唔係一定次次都要食壽司, 吉野家都好好味, 仲平好多添!
擦傷面珠
冬去夏來, 我的冬天衣物堆積如山, 懶惰成性的媽媽一直無去收拾, 事關工程浩大, 拖得就拖, 冬天衫未處理, 夏裝已紛紛出場, 一叠叠摺好的衫白天放入bb床, 夜晚走鬼出梳化, 日日如是, 真係離晒大譜. 媽媽昨晚終於的起心肝執衫! 執衫係大工程, 好彩進度還算順利, 媽媽成功將三大箱衣物成功分成三類, 分別係: (1)唔啱著的, 由初生至2歲不等, 有兩大袋一小袋 (2)未啱著的, 或下季可能仲啱著的, 分一大袋+一膠箱 (3)今季衣服, 分兩櫃, 一個放上衣, 一個放褲仔. 整理完畢後已經凌晨三點! 雖然好攰, 但心情好好, 起碼可以整齊一段時間. 我的衫媽媽係唔捨得掉的, 佢話有記念價值, 見到d衫就諗起我bb仔時的模樣, 於是收埋收埋, 留念留念...直到屋企變成垃圾堆填區, 媽媽可能會改變主意.
今日食過午飯, 婆婆突然同媽媽講話帶我去太婆屋企, 有得去街無咁悶, 媽媽當然舉腳贊成, 但擔心婆婆搞我唔掂, 又驚我唔肯行, 要抱, 婆婆會攰, 婆婆當然話無問題, 仲好堅咁話湊大三個, 點會搞我唔掂. 逢星期日午飯後我都同婆婆落街散步, 但今次去到慈雲山咁遠散步, 都係第一次, 記得我一歲咁上下, 婆婆曾經同我去過一次黃大仙飲茶, 但我大喊, 最後櫈都未坐熱就撤退. 今次好好多, 我入屋唔怕醜, 還表演沿地自轉, 大家笑到肚痛, 姨婆叫我去佢屋企玩(與太婆住同一層樓), 我跟佢去, 入屋玩左一陣, 發現唔對路, 屋裡面的人我都唔識, 婆婆又唔見左, 好驚, 嘩一聲喊左出來! 後來婆婆來到, 氹返我, 我又開心返, 同大家玩. 玩多一陣我突然自己擺鞋仔, 要婆婆同我著, 原來我眼瞓, 想走了, 婆婆就同我返屋企, 搭巴士途中已經瞓著...zz..z... 臨走時姨婆送我兩包泰式卡樂b薯條, 我到第二天返playgroup前仲記得, 要帶埋包薯條返學, 放學時媽媽就開比我食, 好味.
探爺爺嫲嫲
玩啤牌
今日係五一勞動節假期, 我和媽媽無節目, 無人約, 但勞動節豈能呆在家, 點都要出下街, 近近地去海麗村行下. 星期日同婆婆去得多, 我已經熟晒架步, 第一站去嘉富利文具睇玩具, 大部份玩具車我都有, 巴士(九巴, 城巴, 機場巴, 環保巴, 單層巴), 小巴(專線, 紅van, 校巴), 的士(市區, 新界, 澳門)..連郵局車, 貨櫃車拖頭, 機場快線都有了, 仲有咩車可以買? 不過媽媽最後都買左一架德國警車比我, 因為覺得幾靚. 我帶住新車去大快活食tea, 食西多士, 然後去公園玩, 海麗村的兒童設施好多, 但今日細路特別多, 我爬高爬低sir滑梯, 行吊橋, 媽媽從旁看到實, 小朋友雖多, 追追逐逐少不免, 但大家都玩得有分寸, 見我細個都讓我三分. 玩到夠晒皮, 自願離開, 去完百佳就返屋企, 原來都出左兩個鐘頭街. 呢幾日我成日老點爸爸媽媽, 成日要攞"lee個", "果個", 有時係想要一架放到好高的車仔, 又可能係好耐無玩突然又想玩的串珠玩具, 又會係完全唔屬於我的京都念慈奄潤喉糖, 甚至想攞一個我以為有糖糖但其實無野的空盒...等等一切物件, 都被我稱為"lee個", "果個"...而爸爸媽媽就被我點去"lee度", "果度", 點到跎跎拎.
今日媽媽煮鴨心菜飯比我做午餐, 我唔鍾意咁多菜, 媽媽係知道的, 但佢竟然加左好多芥蘭苗入我的飯, 我一啖都唔肯食! 其實我今朝早起身, 到午飯時間已經好眼訓, 自己熄電視想入房訓, 但被媽媽叫返出來食飯, 心情已經不佳, 媽媽本來以為呃呃氹氹可以令我食晒碗飯, 點知徹底失敗, 於是媽媽拿拿聲塞塊芝士夾麵包比我頂住肚, 食飽飽先去訓. 下午我訓醒, 唔見左媽媽, 大喊, 爸爸用3G電話打比媽媽, 媽媽在電話中見我得淒涼, 爸爸又搞我唔掂, 無眼睇. 然後爸爸發現我想大便, 又大唔出! 去會所奔跑一陣, 竟然大左出來! 拿拿聲返屋企清理. 媽媽懷疑我訓覺時冷親肚仔, 於是喊醒, 然後肚疴, 好彩夜晚返來見我無異樣, 仲好搞鬼, 應該無事.
媽媽的皮膚敏感仲未好返晒, 尤其夜晚, 發作頻密, 要長期食抗敏感藥, 食左好眼訓, 所以近日疏於寫日記, 原因就係咁解!
又到星期日, 婆婆準時中午時出現我家, 我一見婆婆, 就招招積積地上前"Hi!" 婆婆今日煮左蕃茄牛肉薯仔飯比我同媽媽食, 我捧住個保鮮盒在廚房外等婆婆拿碗筷, 心情既興奮又焦急, 我喜歡食婆婆煮的飯, 比媽媽煮的好食得多. 我乖乖地在餐椅食左一碗, 飲水, 玩一陣火車, 然後婆婆話:"去街玩囉!" 我馬上"clean up!" 攞襪仔著鞋, 跟婆婆逛街去, 每個星期日都係咁既程序, 我都已經習慣! 同婆婆去街好處多, 可以去公園玩, 有時買下小食, 小玩具, 今日唔例外, 我地去海麗村sir滑梯, 買包包, 仲買左一架澳門的士! 去過澳門, 記得澳門的士係黑色的, 我當然要添置一架!
參加飲宴
婆婆生日
昨晚在大堂遇到一隻大狗狗, 我一見到佢就好興奮, 走上前不停叫佢做dog, 呢隻狗狗有戴口罩, 狗主夫婦話佢好純的, 媽媽於是放心比我同佢玩, 狗主叔叔叫佢sit, 佢就坐, 叫佢hand, 佢就比手, 乖過我好多! 我見叔叔同佢玩比手, 我又學佢, 笑騎騎地遞隻手比佢, 點知狗狗真係比手手我! 我開心到咩咁, 爸爸教我細細力摸下佢, 掃下佢d毛, 狗狗又好熱情lam我! 入升降機時我想同狗狗一齊, 但佢地坐另一部升降機, 我唯有同佢講拜拜, 期待下次再遇見!
今日爸爸放假, 竟然唔去打tennis, 陪我落街走動, 會所無開, 公園落雨後好濕, 但我都偷雞sir了一次滑梯, pet pet濕了. 買個腸仔包就返屋企, 見到媽媽還在賴床, 我馬上將佢摷醒. 下午爸爸再帶我去會所玩, 玩到無晒電, 返屋企訓晏覺, 點知5:30訓到7:30, 媽媽約左我地去葵芳食壽司, 爸爸馬上帶我出發, 好快就同媽媽會合. 我對迴轉壽司越來越喜歡, 今日食左兩件雞蛋壽司和一件豆腐皮壽司, 三文魚魚頭湯(好多三文魚肉, 有益!), 仲食左半件朱古力蛋糕(元氣壽司有甜點供應, 適合兒童!). 媽媽訂了好多jshoppers衫比我, 尺碼是100, 但看上去有點大, 畢竟我生得細粒, 身高幾多? 90cm應該未到卦...度清楚再話比大家知.
入廚房
逢星期一表姐都會來我家學琴, 我一向好喜歡表姐, 因為佢會買零食, 同我玩古怪遊戲, 但今日佢一入屋, 我竟然叫錯左佢做表哥!!! 表哥只係同我地去左澳門兩日, 我就連表哥表且都認錯! 枉表姐今日仲買左雪糕比我食! 晚上同爸爸媽媽出去食飯, 我太跩, 媽媽要我坐bb車, 返屋企時我唔肯坐, 要拉住前面的扶手, 辛辛苦苦咁將bb車拉返屋企, 情形就同牛拉車一樣, 五分鐘的路程足足行左十五分鐘, 先返到屋企!