親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
Annie & Clarabel
爸爸在電視裡
今早婆婆打來, 話荃灣好凍, 只得8度, 叫媽媽唔好比我返playgroup, 其實媽媽一早都打算請假, 因為我又流鼻涕了, 今早起來鼻涕很多, 於是又去見高醫生. 我對高醫生係唔抗拒的, 只要佢唔好要我張開口比佢睇喉嚨就可以. 爸爸媽媽同醫生傾談其間, 我見到有個磅, 我叫佢做clock, 雖然我講錯左, 但鐘和磅都係有支針, 都係顯示數字的儀器, 都幾合邏輯呀!
天氣又轉冷, 晚上特別寒, 手都凍彊了, 打電腦好艱難, 難怪媽媽多日無寫日記! 今日我9:30起床, 天氣凍, 媽媽無帶我出街, 只在屋企玩昨天新買的城巴, 我玩車很暴力, 喜歡玩車車衝落懸崖, 媽媽常常教我要愛惜玩具, 但我無理, 城巴新買一日, 車窗已經破裂了, 我話極唔聽, 激到媽媽紥紥跳, 於是沒收我的車, 我即時喊得呼天搶地, 最後媽媽無比返車車我, 因為我太唔愛惜玩具, 要接受懲罰. 昨天媽媽和我用一個膠盤做左一個水的浮力實驗, 今日我學識磁力火車兩極接合的方向, 明天唔知又會發現乜野科學原理呢?
Noddy English係好好睇的, 但我以前唔識欣賞, 媽媽收埋一輪, 今日心血來潮摷返出來播, 竟然媽媽和我都睇得好入神, 因為佢有唱唱跳跳時間, 故事時間, 遊戲時間, 唱K時間...好得意, 我仲跟住Spotty和Dotty呢兩隻草蜢一齊玩遊戲, 認顏色和認物件, 我答對晒, 媽媽讚我叻仔! 今日比較悶, 天氣凍又唔去得遠, 媽媽就帶我去海麗村散步, 媽媽話今日我可以買一個玩具, 我入到玩具店, 在車堆中揀呀揀, 左揀右揀, 媽媽叫我: "揀到就去比錢啦!" 我攞住兩架大巴士, 一架係黃色城巴, 一架係綠色環保巴士, 二話不說走向收銀處. 其實婆婆之前已買左呢架綠色的巴士比我, 唔知點解我又要買, 可能覺得似曾相識, 份外親切, 想買多架! 我攞住兩架巴士去收銀處交比姐姐, 媽媽解釋我聽綠色的巴士我地屋企已經有, 叫我唔好買, 但我聽唔明白, 於是媽媽叫店員姐姐收起綠色巴士, 姐姐將黃色城巴"嘟"完之後交比我, 我一臉茫然望住收銀處, 點解另一架巴士唔見左? 返到屋企, 媽媽揾返綠色環保巴士比我, 我終於明白了, 原來我已經擁有呢架巴士! 於是我起勁地玩起呢兩架巴士, 不過我太粗魯, 將車撞來撞去, 新買的城巴車窗馬上裂了, 媽媽要懲罰找, 兩架車被沒收一晚.
我鍾意食雪糕, 以往都係爸爸媽媽食雪糕雪條時, 我咋咋帝埋去lam一兩啖, 媽媽話我已經兩歲, 可以食多少少, 只要無咳就可以食些少. 今日媽媽買左美碌大杯雪糕同我一齊食, 我喜歡自己捧住個杯, 自己食, 但雪糕好硬, 我唔夠力, 要媽媽幫手"撬". 喜歡食的人自然喜歡煮, 男仔無話唔可以玩煮飯仔的, 我每日都要玩一兩次, 特別喜歡煮粟米和炒菜, 有時會蒸下魚, 對象是媽媽和我的老友阿pooh, 煮好了, 會用筷仔夾比佢地食, 仲會幫食客們扮埋聲: "um! um! ya yum!" 成個廚神咁款.
星期日的安排
今日係爸爸媽媽結婚六週年紀念, 我地一家乘機出去玩, 今日的目的地係離島塔門! 我坐過幾次天星小輪, 每次都好緊張, 縮埋一舊唔敢郁, 今次仲要搭街渡添! 初時我唔肯上船, 呱呱大叫, 後來爸爸抱實我, 氹下我先搞得掂, 上到船我坐在櫈上發呆, 同行的obi已經通船跑! 媽媽於是比塊餅餅我定下驚, 食完餅餅後我就放鬆晒, 夠膽落地行, 但爸爸媽媽抱住我睇海, 都仲有d抗拒. 塔門係一個好寧靜的小島, 據聞島上只剩百幾個居民, 聽講好多村民都搬晒出市區, 假期先會返去開鋪做生意. 我地搭11點半的船, 中午12點前已到塔門了, 第一時間去島上唯一的酒家新漢記食午飯, 我地叫左海膽炒飯, 椒鹽鮮魷, 時菜炒斑塊, 仲有一窩鴻圖伊麵, 我好喜歡食炒飯(但爸爸話海膽係假的), 自己食左一碗, 媽媽又餵我食左d麵. 一食飽我就坐唔定, 呢個時候爸爸已食飽, 就陪我四圍睇下, 輪到媽媽食飯. 無錯, 爸爸媽媽有時仲要採取頭尾圍用膳制度, 諗起都覺得可憐. 沿住舊村的小路可以上山, 唔洗15分鐘, 我地已經登上山頂了, 望下去海灣景色非常好, 加上今日風和日麗, 萬里無雲, 水天一色, 我馬上忍唔住要在山坡跑吓! 唯一剎風景的係草披地滿地牛屎, 每行三步, 最少見到十堆, 數目之多簡直令人嘆為觀止. 但只見其糞不見其身, 果d流浪牛影都唔見, 媽媽又話帶我睇cow, 我仲練習左mooo mooo~~聲準備同佢地近距離接觸, 爸爸話中午太陽晒, 牛牛匿埋左抖涼. 我地沿路落山返到漁民新村, 唔洗兩個鐘頭就行晒, 媽媽買左d蝦乾做手信, 仲請我食云呢拿雪糕, 我第一次自己拿住杯雪糕食, 我好開心, 食到上船都唔捨得放手.
我的頭髮長得好快, 最近實在太長了, 前額的頭髮撩到眼晴, 搞到我好唔舒服, 唔剪唔得. 今日我第四次光顧商場的高級髮型屋La Cutterie (小童剪髮$68, 指定髮型師加$20, 人人都話貴!) 去髮型屋理髮係好大陣仗的事, 要爸爸媽媽齊齊出動先得, 媽媽預備左我最心愛的卡樂B蔬菜餅餅和一支益力多, 媽媽抱住我坐在鏡前面, 爸爸就負責比餅餅我食, 和扮鬼扮馬引我笑, 務求令我肯坐15分鐘, 比髮型師哥哥剪個靚頭! 媽媽最擔心我扭計唔肯剪頭髮, 好彩今次有備而來, 我忙住食餅餅, 飲多多, 雖然都有少許不願意, 及曾一度企圖逃走, 但最後總算大功告成! 晚上爸爸帶我返爺爺嫲嫲屋企, 媽媽因要工作, 只有爸爸帶住我, 爸爸話我好乖, 好搞笑, 引得爺爺嫲嫲笑到卡卡聲!
今日返playgroup, 媽媽早左來接我, 就在門口裝下我, 睇下我上堂表現如何, 我食完餅餅, 竟然攞住隻碟仔走去垃圾桶, 倒左d餅乾碎, 然後將碟放好, 媽媽從來未見過我做事咁井井有條! 其實近來媽媽都察覺到我同以前有d唔同, 喜歡聽兒歌cd, (想聽時會同媽媽講要:"sic!" 即music的"sic") 不會隨便自己開電視, 只有媽媽批準, 話:"好啦, 準你睇一陣電視啦!" 我就會擒擒青去開電視和dvd機, 一叫"夠啦, off tv!" 我就會去關機. 連爸爸都覺得我比以前乖左, 聽話左. 但亦有惡劣的情形, 在街上我永遠企唔定, 想去邊就盲中中衝過去, 唔會等埋大人, 被制止做一d事情, 例如媽媽唔準我入萬寧, 要我入惠康, 我會大發脾氣, 尖叫, 甚至訓在地上, 呢d唔乖的行為, 就要改改!
太多thomas
muSIC
今日媽媽接我放學, 見我手上攞住一幅填色畫, 係一隻donkey, 我的donkey係咩顏色? 唔駛問實係綠色, 因為我最喜歡綠色. Ms Hazel同媽媽講, 今日派蠟筆時問我Which colour do you like? 我話要green, 媽媽聽到覺到好好笑, 因為我的色彩世界只有綠色! 獅子, 長頸鹿, 雪人, 聖誕老人, elmo, 甚至thomas, 都係綠色的! 咪以為我係色盲, 其實我認顏色不知幾叻, 紅橙黃綠藍紫黑白粉紅啡, 我都分得好清楚, 扼我唔到, 不過我只係對綠色情有獨鍾, 雖然如此, 我同好多細路一樣, 都係唔鍾意食菜的, 可能因為我太愛綠色, 唔捨得食佢落肚!
平時媽媽收工返來, 婆婆就會走, 婆婆同我講bye bye, 我就bye bye, 仲幫手關門, 從來無依依不捨, 唔比婆婆走的, 婆婆話我無良心. 今日爸爸先返屋企, 婆婆餵我食左飯, 就走了, 但我唔比婆婆走, 仲大喊! 喊左好耐, 爸爸開返門話比我聽婆婆已經返左屋企了, 我先唔喊, 無幾耐媽媽返來, 我馬上撲上前叫, 好嗲的叫"媽咪~~~" 然後緊緊擁抱一分鐘. 由此可見, 媽媽的排名第一, 婆婆第二, 爸爸係排最尾的!
陪爸爸配眼鏡
今日係星期五, 但我無返婆婆屋企, 反而係婆婆來我屋企, 天氣太凍了, 婆婆話青衣好凍, 叫我唔好返去, 媽媽揾返我初生時著過的紫色雞仔厚夾衣比我當外套著, 我著到漲卜卜, 成隻teddy bear咁. 晚上媽媽趕返來煮蕃茄牛肉通心粉比我做dinner, 我鍾意自己食, 我實在太喜歡通心粉, 牛肉和蕃茄呢個組合, 一路食一路講"ya yum" (=yummy), 因為份量好多, 媽媽估我實食唔晒, 但我竟然食晒一個大人碗的份量!
最近天氣冷又乾燥, 媽媽用娥羅納英軟膏幫我搽面仔, 防爆拆, 我好喜歡搽面面, 一到早晚, 通常食完奶, 就攞起支娥羅納英, 同媽媽講: "搽!" 我會用右手食指篤一篤d膏, 然後輕輕掃一掃自己的面, 然後重覆四五次, 但我只集中搽右邊面, 搞到右邊面太多膏, 好"立". 媽媽見我鍾意飲湯湯, 今日又煲犀利野, 有川貝舞茸, 一舊豬展和兩個apples, 有強肺作用, 我飲了2碗, 好潤. 最近有好多thomas玩具, 但我無忘記媽媽買比我的第一套廉價火車路軌玩具, 今晚我突然指住書櫃頂, 說: "train! train!" 媽媽都唔記得呢副火車已被放上櫃頂, 唔知點解我會知道. 我和媽媽玩左好耐, 好開心!
昨晚凌晨三四點我醒了, 不停大哭, 擾攘了整整一個小時, 爸爸媽媽都累壞了, 婆婆話大舅父細個時都有咁情況, 日頭玩得太多, 發惡夢, 就會半夜哭鬧. 由於太累了, 今早我地全家訓到十一點! 本來今早有禮賢幼稚園的面試, 我地無出席, 其實媽媽昨晚已決定放棄, 因為我地已揾到心儀的學校了. 於是我地全家訓多陣, 下午仲去君臨飲下午茶, 然後爸爸帶我去會所玩. 天氣冷特別好訓, 最近的午睡時間特別長, 2-3小時不等, 爸爸媽媽可以乘機一齊休息下.
2008年到了, 我出生後已進入第三個年頭, 新年似乎對我未有任何意義, 我依然活潑好動, 百厭和搞鬼, 前兩三年開始, 媽媽和uncle zane和joyce姨姨都會在1月1日搞派對, 今年都唔例外, uncle zane話呢個傳統要直到永遠, 每年今日都要到我家聚一聚, 媽媽仲煲響螺竹絲雞湯招呼大家. 夜晚姑媽來接我和媽媽去旺角倫敦酒樓食飯, 原因係大舊表哥23歲生日! 表哥生日, 唔知點解我會得到一份thomas禮物! 爸爸要返工, 媽媽一個人招呼我食飯, 自己都無乜點食, 連嫲嫲都發現媽媽無乜食過飯! 由於荔枝角地鐵站無電梯, 推bb車出入係好唔方便的, 飯後大舊表哥護送我返屋企, 眨下眼大舊表哥都大個仔了, 出來社會做事了, 唔再係以前傻更更的迷茫少年了!
我一向叫媽媽做"咪咪", 有時叫"咪呀咪", 叫得好好聽, 今日媽媽湊我放學, 我突然改叫"媽咪", 回家又一直叫"媽咪", 叫得都好好聽, 媽媽完全唔知道我點解會突然改變叫法, 無論叫"咪咪"或"媽咪"都媽媽都好開心啊! 另一個改變就係, 我平時同人講拜拜, 都係好豪邁地"bye~~~"一聲, 今日又改為"bye bye"! 今日係除夕, 但爸爸要返工, 負責做"count down"的新聞, 我只識count up, 唔識count down, 講開又講, 我已經識得用英文由1數到13了. 本來媽媽只教我數1至10, 但我發現10之後仲有11, 因為我家是住11樓, 每次搭升降機返屋企, 數到10, 就到11, 於是媽媽就順理成章, 話比我聽10之後仲有11至20, 誰知講過一次, 第二日爸爸同我上樓梯, 我就由1數到13了, 相信好快可以數到20. 祝大家2008年新年快樂, 身體健康, 各位小朋友快高長大, 精乖伶俐!
天氣漸漸轉冷, 天時凍, 乜都唔想做, 包括寫日記, 所以媽媽近來寫得好慢, 又好少, 就係咁解! 今日係"婆婆與我日", 我地去會所玩左一個鐘頭, 可能天氣凍的關係, 今日會所無人, 只有我一個玩晒, 爸爸今日開夜, 媽媽又要八點半先收工返屋企, 婆婆就煮埋晚飯比我食, 等媽媽返來先走. 唔知因為天氣關係, 還是我仲食緊藥, 比較呆滯, 說話都唔多, 但今天我鍚鍚會有啜一聲, 好識冧人!
出街食飯
鼻塞
我的傷風仲未好, 鼻涕長流, 媽媽懷疑高醫生的替工蔡醫生開的藥份量唔夠, 今日再去揾高醫生, 果然不出所料, 高醫生都話蔡醫生開的藥唔夠, 所以食極都唔好, 今次再開d新藥比我, 仲要食抗生素! 我第一次食抗生素, 係一支用玻璃樽裝住的白色藥水, 味道似益力多! 今次的藥藥味無咁濃, 溝入奶我都無發覺, 但有時都要用針筒強行餵, 有一次被爸爸成功餵到, 第二次我好精, 合埋d牙唔比爸爸塞入針筒, 又大力啜住支針筒, 好艱難先灌到5ml藥水, 但我成功噴反最少3ml出來, 所以果次餵藥係失敗, 媽媽唯有夾啱時間, 盡量將藥溝入奶或飲品, 等我神不知鬼不覺飲左落肚.
好耐無見秋盈了, 上兩個月幼稚園面試戰大家都忙, 只能以電話互通消息, 現在總算塵埃落定, 各自都揾到心儀的學校, 趁聖誕假期出來聚一聚先. gordon叔叔提議去塔門, 我地都好有興趣, 可惜我傷風未好, 天氣較涼, 於是改去半室內/室外的海防博物館, 以我地的年紀, 行博物館當然純粹行下跑下, 海防博物館就好適合嘞! 一到步, phoebe姨姨就攞出兩隻香蕉, 比我同秋盈一人一隻, 博物館唔比飲食, 我地就坐在門口的長櫈食晒隻蕉先準入場, 我地兩個size差唔多, 一人一隻蕉, 好趣怪, 連場館職員都忍唔住撩下我地玩! 一樓係展覽廳, 展品唔多啱我睇, 我只係睇左一頂清兵戴的帽(但我話係umbrella)和一個類似美利樓的模型(我話係house). 二樓有兒童天地, 提供桌椅, 蠟筆和紙比我地即席揮毫, 塗鴉我最拿手, 唔洗五分鐘我就完成一幅大作, 當然又係以綠色為主. 食奶時間到了, 媽媽去餐廳開奶比我飲, 秋盈竟然唔食奶, 食曲奇餅! 我見狀又要求gordon叔叔比餅餅我, 但gordon叔叔唔肯, 一定要我食奶先肯比, 我再三please please懇求, 佢都唔肯, 最後我攞起支奶咕嚕咕嚕飲, 飲剩2oz放低奶樽, 即刻要求gordon叔叔比餅餅, 終於得到一塊了! 我地一直玩到5:00博物館關門, 就搭車去太古城行吉之島, 然後食晚飯, 我地由2:00玩到8:00, 其實只係幾個鐘頭, 但爸爸媽媽已經攰到不得了, 年紀大就係年紀大, 無得傾, 行多陣都頂唔順, 老實講, 生一個孩子已經攰成咁, 過幾年萬一再來一個, 年紀再大d, 點搞得掂???
打邊爐
今日我仲有點傷風, 媽媽考慮比唔比我返playgroup, 唔返我只會在家發霉和倒亂, 最後決定返囉! 今日有好多人, 有d唔係星期四班的小朋友join埋我地一齊, 加埋好多大人, 突然變得好熱鬧! 由於人多的關係, 開始時我有點怕醜, 要黐住媽媽, 但一到circle time我就回復本性, 因為我最喜歡幫ms hazel貼上天氣卡和日期卡, 今日我成功爭取到貼一張日期卡, 我開心到yeah一聲! 我一開心就會順時針方向沿地自轉, 係咪好古怪呢! 排隊洗手時我有點搞搞震, 拍打ms jenny的reception desk係例牌工作, 平日媽媽無陪我, 我可能已經被鬧了無數次, 今日無人鬧我, 因為大家都好忙, 只有媽媽制止我. 幾經辛苦洗好手, 當然係返課室準備食野, 一講到食我就雙眼發光, 我拿拿聲揾位坐, 我揀左個主席位, 端正坐好, 姨姨將一碟碟美食放上, 有好多三文治仔, 波蘿腸, 啫喱糖, 燒賣... ms hazel帶領我地禱告, 我負責大聲講"阿門"! 我第一次參加咁多野食的大食會, 仲任食唔嬲, 我地一路食, ms hazel一路將d餅仔呀, 糖呀..開完一包又一包, 成枱都係, 我食完兩件三文治, 波蘿腸(只食腸不食波蘿)之後, 仲食左甘大支和大量脆卜卜零食, 媽媽覺得我食得太多, 就叫我去玩, 因為一日唔離開枱, 我的食慾係無止境的. ms hazel話我地會有個visitor, 大家估下係邊個呢? 之唔係聖誕老人! 叮叮叮一響, 聖誕老人就入來派禮物, ms hazel叫everybody sit down, 我馬上好認真坐低, 等候叫名, 哈哈, 第一個就係送比我了, 我一聽到isaac, 就出來, 但唔知搞乜, 我竟然係爬出來...雖然古怪, 總算得到聖誕老人的禮物, 我好開心, 攞住份禮物研究又研究, 原來係一個唔太啱我年紀玩的玩具, 回家不久就打入冷宮, 不過總算感受過得到禮物的喜悅! 下午去睇醫生, 攞左d收鼻水藥, 食左有睡意, 但我完全無睡. 夜晚我地同姑媽一家去葵芳新天地食飯, 今晚爸爸好闊佬, 同我去玩具店買左一架percy火車, 就係有左呢架車, 我好乖咁食晒食餐飯, 姑媽讚我好乖, 媽媽心諗: 無左架車, 邊有食得咁安落! 今日開心事和搞笑事多蘿蘿, 平安夜我過得好開心, 祝大家都有個快樂聖誔!
傷風
再做冬+夜返扭計
做冬+有cake