親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
henry叔叔真係好人, 因為我的飛甴曱一號遙控直昇機壞了, 佢就再送一架比我, 我認得個盒, 一見到就嘩嘩叫, 飛機起飛了, 我興奮到不得了, 玩完了, 媽媽叫我拜拜飛機, 我當然傷心得哭起來! 看我的傷心程度, 就知道我愛那件玩具有多深了!
今早我地又有得去大角咀室內遊戲室玩, 玩完大家提議去逛街市, 好啊, 我未去過街市, 一入街市見到生果檔, 有好多apple, 我當然同佢地打個招呼, 生果叔叔讚我叻仔, 仲攞住一抽香蕉問我係乜, banana我食得多, 但我未識講, 三個音喎, 好深架! 仲有金魚檔, 我太喜歡魚魚了, 不停叫住佢地, 好彩無叫錯汪汪, 講開又講, 我已經無再將狗叫錯做魚魚了, 但我凡是在水中的東西都叫魚魚, 包括在電視見到的綠海龜, 甚至在會所泳池游水的住客, 都叫魚魚, 雖然依然古怪, 但總算聯系到水先叫魚魚, 總比認狗作魚好!
最近媽媽每天都同我睇flash cards, 我好鍾意媽媽讀卡卡比我聽, 讀完一張, 媽媽會將卡卡比我, 有時我會好整齊放埋一邊, 有時會亂掉, 通常我會好留心聽媽媽讀晒成叠卡卡, 所以媽媽好enjoy呢種親子活動! 有時我會靜雞雞倒晒d卡出來, 扮媽媽讀, 當然係亂作一通! 早幾日, 我偷偷地攞出卡卡, 攞住橢圓形那張, 講"o~~~~val", 今早返playgroup, 老師拿出橙的圖畫, 我大叫一句疑似orange的音, 晚上我玩積木, 拿住黃色圖形講yellow, 綠色圖形講green! 原來不經不覺我已經在睇卡卡的過程中吸收左一d詞彙, 而且能夠引用到其他地方, 呢d都令只係負責讀卡卡的媽媽感到好意外!
[left1]今日我實在太開心了, 因為我第一次參加kindermusik, 媽媽好辛苦先揾到比我玩, 仲有obi, anson和河村駿一齊, 真係非常完美的組合! 導師ms mary好好人, 我地第一個unit叫做milk & cookies, 內容關於掃地, 煮飯, 洗衫... 剛關始時我有點緊張, 但音樂一開始我就放鬆晒, 但我始終唔係舞林高手, 唔似得anson, obi, 河村駿佢地跳舞咁叻, 不過從我長期笑騎騎的表情, 可以知道我非常樂在其中! 其間ms mary熄晒燈, 播放柔和的音樂, 媽媽抱住我輕輕搖晃, 我地四個小朋友都完全安靜, 直到音樂播完為止, 我地竟然可以一粒聲都唔出, 乖乖地聽晒首音樂, 好神奇啊! 我的寶貝: 紫色包包和樂器stir xylophone我地每個小朋友有一套at home material, 一個紫色包包裡面有cd, 圖書和一個樂器! 媽媽播cd比我聽, 我記得今日聽過, 尤其是聽到hammer和saw的聲音, 笑得好誇張! 我又鍾意和媽媽玩washing machine, 玩十次都唔厭. cd播完了, 我想再聽, 攞住遙控企圖自己開CD機, 呢種行為係以前未試過的, 爸爸話: 好好啊! 鍾意聽cd, 以後唔好睇咁多電視囉! 等我試範下點玩啦, 就係咁搞搞下就有聲啦!我又好鍾意果個名叫stir xylophone的樂器, 呢個貎似筆筒加一隻匙羹的木頭, 早幾日在柏斯琴行見過, 爸爸仲問媽媽係乜, 媽媽都唔知, 原來叫做stir xylophone! 我將佢當係寶, 幾乎唔比人掂, 但鍾意還鍾意, 我將隻匙羹放入口係唔正確的, 媽媽一見到我咁做就會即時制止! 唔知係唔係我今日實在太開心, 竟然好夜都唔願訓, 上左床都走返出廳, 攞住遙控要開cd機!咁多樂器都唔知玩邊樣好?
近排我訓覺幾乖, 食飽奶奶就自己跑入房訓, 唔洗人"暗", 今日婆婆報告返比媽媽聽, 話我玩左一個下午, 食左5:30支奶, 就同婆婆講話要"覺覺", 因為我已經玩到好攰了, 所以一跳上床就訓著, 真係"好湊"! 不過細路仔係唔讚得, 今日你話我乖, 聽日我就跩比你睇!
我好鍾意坐車, 最喜歡坐窗口位, 有得睇車, 媽媽教我車係car, 巴士係bus, 的士係taxi... 每次都係媽媽一個人自己有自己講, 我有我睇車, 其實我已經吸收左一d詞彙, 無端端就會講, 令大人失驚無神有無驚喜! 前幾日開始講car, 今日唔知點解, 不停咁講, 玩車時講, 睇sing along時講, 望窗睇風景又講, 睇flash cards又講, 後來發展到係又講, 唔係又講, 大大話話, 今天講左不下100次car, 真係長氣. 夜晚obi來玩, 佢都係愛車之人, 好欣賞我的珍藏, 當然啦, 男人行埋梗係講車, 不過今晚我地除左講車, 仲講car, 我不厭其煩講左十幾二十次car, obi竟然都同我一齊講起car上來, 字正腔圓, 好似仲有捲脷呢, 場面真令人感動! 不過兩個細路不停地car car car, 兩個媽媽都咪話唔煩!
今日婆婆屋企停電30分鐘, 婆婆帶我落街行下, 買益力多, 我her her聲飲晒一支, 唔夠喉, 見到婆婆仲有四支, 我"eat eat聲" (意思是叫大人幫我開一d野), 想婆婆再開一支比我, 但婆婆唔肯, 我唔肯行, 發晒爛渣; 又打婆婆的面, 又扯頭髮! 好橫蠻的行為, 婆婆於是急急腳抱走我, 但最終都無比多一支益力多我. 夜晚返屋企, 媽媽拖住我出了電梯, 到了平台, 我忽然唔肯行, 成個人扒左係地下, 媽媽唯有抱走我, 返到屋企, 我又要按自己家的門鐘, 要按幾次先肯, 扭計得好犀利! 我實在太離譜了! 爸爸媽媽係唔會容許我咁野蠻的行為的, 要好好教育一下先得!
今早返英文playgroup, 老師拿出幾件玩具, 我一眼就睇中左架車, 忍唔住想上前攞, 當然被媽媽和老師制止, 媽媽當然知道我鍾意車, 但估唔到攞唔到架車我會發晒狂咁喊, 扭計, lur地... 真係好失禮, 老師想比返架車我, 但被媽媽制止, 因為唔想縱容我, 媽媽於是出動手機動畫分散我注意力, 好彩我都好快收聲, 幼兒的記性真差, 咁快就唔記得左. 之後老師講圖書故事, 故事叫做dadday's back, 講幾個小朋友等爸爸放工返屋企, 爸爸是坐咩車返來呢? Bus? Lorry? Taxi? 見到咁多車車, 忍唔住講car, 最後爸爸從一架car落車, 小朋友就好開心去迎接爸爸. 講到呢度, 我竟然大喊起來, 因為無晒車車嘞! 媽媽真係點都估唔到, 圖書的車都會令我激動, 車車真係我的第二生命啊!
https://bb5.babyhome.com.tw/UPLOAD7/117460/122525.57622649.54191.wmv 難得今日有美相伴, 我點能夠失禮!我見水就開心晒, 完全唔需要warm up!第二年約埋anson游水, 我地大個左好多呀!
可惡的蚊子+高空擲物左面有四大粒mosquito bites, 好礙眼!
https://bb5.babyhome.com.tw/UPLOAD7/117460/122525.57446850.34795.wmv 協康會playgroup最後一節, 好唔捨得d玩具!今日係協康會playgroup最後一堂, 我地已經參加了兩期, 要讓位比其他小朋友玩了, 今日我地玩得我別開心, 所有犀利野一次過出晒場! 有幾犀利, 睇片就知啦! angel姐姐話我有好大進步, 起碼口水都流水左先! 仲有我學識等候, 開始時我好心急, 見到有趣的事就衝出去, 現在雖然都有, 但情況好左好多了, 媽媽可以做證, 以前媽媽一放水沖涼我就好心急要衝入浴室, 要跳落水, 現在媽媽叫我在出面等, 唔準入浴室, 我就真係會等, 等媽媽準備好晒, 叫我名我先會行入去. angel姐姐又話我, 收玩具是會大吵大鬧, 情況好左少少, 但未完會改好, 要繼續努力, 要學識放手, 唔可以霸住玩具唔放! 呢個鞦韆可以承托四千磅重量!今日的playgroup特別盡興, 玩完返屋企訓左三個半鐘! 媽媽幫我揾左kindermusik音樂班, 下星期一同樣時間開始, 好期待!
飲水的樣子好趣怪! 在廚房用膳, 食完唔肯走!今日係母親節, 爸爸媽媽如常工作, 所以我地無特別慶祝活動, moon姨姨好有心思, 買左母親節蛋糕同大家一齊慶祝, 我最鍾意食蛋糕, 也喜歡砌, 今次當然又要爭住砌, 無端端有得食蛋糕, 好開心啊! 婆婆又買左好多衫比我, 媽媽真係唔洗買囉! 今晚我初嚐茄汁焗豆, 我好喜歡! 之後約埋june姨姨和雅雯去運動場行圈, 但今晚我唔在狀態, 唔肯依照跑道行, 一圈400米搞左好耐先行得完, 因為我不停調轉頭行, 又跑來跑去, 媽媽要捉雞仔咁追住我!
我爸爸係個有d運動細胞的人, 媽媽話佢過度活躍, 唔做運動唔安樂, 就算周身傷晒, 呢度痛果度痛, 都話要用跑步方式去療傷. 今日爸爸放假, 又帶我去深水埗運動場跑圈, 星期三我好認真咁行了一圈, 今日開始搞事了, 我唔依規則, 不停逃離跑道, 走入草地搞搞陣, 又行入龍門搞個網, 於是唔小心跌親, 膝頭損左嘞! 返屋企己經好攰好攰, 飲完支奶自己行入房訓, 5:30訓到8:30, 要媽媽叫我先起身食晚餐! 夜晚媽媽又帶我再去運動場, 今次係陪obi去玩, 一日落場兩次, 依然不減我對運動的熱愛! 我又行左一個圈, 整整四百米有多, 真係好大運動量喎! 臨走時我仲好依依不捨, 好想再行多幾個圈!
今日婆婆同我落街玩, 想去長康酒樓坐果d入錢車車, 但好多剛放學的小學生霸住, 又唔入錢, 我唯有睇下就算, 去士多買益力多. 今次係我第二次飲益力多, 上次婆婆比支熱的益力多我飲, 我死都唔飲, 今次係正常温度的, 我一條氣飲晒成支! 飲完仲唔捨得唔要個樽, 仲學人篤飲管! 婆婆買左隻會行會走又會吠的汪汪狗玩具比我, 我鍾意到不得了, 因為我成日講錯汪汪做魚魚, 婆婆話呢隻會汪汪叫的狗狗可以幫我糾正返喎!
媽媽在網上訂購的大批蒙特梭利教具, 今日終於由浙江省抵港了! 從大陸直接訂購只係香港一半價錢, 真係經濟又實惠! 媽媽現在好努力咁整理全部教具, 好快就可以開始用了! 不過屋企又多左咁多野, 要揾地方安置, 真係好高難度!步步高數字拼板砂紙字母板幾何體階梯
歲半了! 落場跑
綠色不見了
https://bb5.babyhome.com.tw/UPLOAD7/117460/122525.56844240.33131.wmv有點麻甩的造型喜歡環保袋塗鴉不是我喜好
分顏色
今日婆婆趁媽媽上課帶我落街玩, 今次唔係落公園會所咁普通了, 係去行長沙灣廣場! 富臨酒樓門口有塊落地大玻璃, 我最鍾意企係果度, 望落去見到長灣灣道好繁忙的交通, 好多車和car, 睇到我入晒神! 之後婆婆帶我去睇衫, 我唔鍾意, 我有時唔肯行, 要抱抱. 去完街返屋企, 攰到散晒, 入屋即刻坐係地上休息, 婆婆抱我入房上大人床, 然後去開奶比我, 點知返來見我睇緊SING ALONG! 仲好沙塵咁woo~~ woo~~聲, 好跩呀, 竟然自己開電視和dvd機, 開著部機係好容易的, 但識得按play播碟係第一次, 婆婆和媽媽都比我笑鬼死囉!
婆婆生日, 我幫手砌蛋糕 婆婆明天舊曆生日, 我地提早一晚食飯慶祝, 近近地都係去君臨啦, 我帶埋自己的飯仔同大家一齊食, 未來舅母買了生日蛋糕, 婆婆同我一齊砌, 我好似自己生日咁, 有得砌蛋糕好開心呀, 仲食左少少蛋糕和士多啤梨! 席間我突然講"魚魚", 原來電視有熊貓出現! 我最近經常把狗仔叫做魚魚, 見到街上有人放狗, 我諗到唔諗就叫"魚魚", 已經夠離譜了, 竟然連熊貓都係魚魚? 媽媽頭到大埋, 已經不停糾正我, 但我依然好固執, 見到真正的魚魚, 我有時都叫一叫佢地, 但無理由咁大隻狗, 熊貓, 都叫魚魚嘛!
https://bb5.babyhome.com.tw/UPLOAD7/117460/122525.56496333.91697.wmv 今日又無得返英文playgroup, 原因係緊急停電, 真掃興! 樓下會所已玩到厭了, 連人地的會所, 泓景台, 碧海藍天, 荔枝角公園, 都去過好多次了, 好彩媽媽發現左一個好地方, 就係大角咀市政大廈的兒童遊戲室, 於是就約埋june姨姨和雅雯, 一齊去打探下呢個新地方! 嘩~~~! 好大好大的遊戲室, 仲係以森林就主題, 全部設施都係軟林林的, 又乾淨又安全, 我一到步就急不及待四圍跑, 發現在兩個七彩大波波, 我開心到哈哈笑, 推住個波四圍行, 初時只有三個小朋友, 後來人越來越多, 我地玩左30分鐘, 有點攰, 但兩個媽媽仲攰, 於是我地就撤退, 搭巴士返屋企嘞! 呢度地方又大又多野玩, 唔捨得走呀!原來政府對我地幼兒真係好, 有咁好的地方比我地玩, 媽媽真係發現得遲了, 大家記住一定要用吓嘞, 各區都有呢類遊戲室, 仲有唔同主題添, 詳情可瀏覽呢個網址: http://www.lcsd.gov.hk/b5/ls_fac_playroom.php
今日媽媽的舊同事阿陽叔叔來揾我地飲茶, 今次係我同叔叔第三次見面了, 第一次係初生, 第二次係幾個月大, 今次見面初時有d緊張, 但我都肯比佢抱, 玩一分鐘就熟晒了, 媽媽叫了馬拉盞比我食, 食飽了我忘於玩那個"盞", 和用手執枱上的碎, 鍛鍊手指的小肌肉, 媽媽就安心同叔叔聚舊, 大談湊仔經. 最近我常把狗叫做"魚魚", 今日又係咁, 在街上見到史納莎, 我大叫"魚魚", 令媽媽很頭痕... 但我都有語言進步, 一行出街見到馬路的車, 我講"car"; 望住新買的thomas海報, 我又講"car"; 玩磁力積木, 我攞住架車, 細細聲講"car"; 夜晚媽媽和我一齊推車, 我推三下, 然後好認真地望住媽媽, 講"car", 再推三下, 再望一望媽媽, 今次係講"a car". 另一件小事, 媽媽話唔比我睇咁多電視, 最近聽多左cd, 我鍾意望住部cd機來聽, 昨晚媽媽抱住我在cd機前聽joshua bell小提琴音樂, 我好乖咁聽左三首, 唔知同胎教有無關係, 呢隻cd媽媽懷孕時成日聽, 仲有joshua bell親筆簽名, 好名貴架!
今日係勞動節假期, 媽媽約好june姨姨, 想帶我和雅雯去圖書館, 不過我地兩個細路訓醒晏覺己經四點, 圖書館五點關門, 唯有改去荔枝角公園, 公園今日太多人了, 整個兒童遊樂場逼滿小朋友, 我一落地就興奮到大笑, 跑來跑去, 由於公園太多人, 媽媽怕我走失, 又怕我被人撞倒, 唯有貼身跟實我, 但我現在跑得好快, 媽媽追到氣咳, 又要彎低身, 玩一陣已經好攰, 係媽媽攰, 唔係我呀! 之後去麥當勞食野, 媽媽終於肯比少少薯條我試下了, 仲有茄汁, 點知我一食就上癮, 但媽媽唔肯比好多我食, 因為係油炸食物喎, 唔好話比我爸爸知呀, 佢實會鬧媽媽亂比野我食架!
https://bb5.babyhome.com.tw/UPLOAD7/117460/122525.56241758.37813.wmv
[left1]好專心玩三角形拼圖
我有無話你地聽, 我大虎(大舅父)好快就會結婚? 今日公公婆婆和未來親家第一次見面, 去富臨飲茶, 唔知點解婆婆話叫埋我地去! 一坐低見到有陌生人, 我成個人硬晒軚, 郁都唔郁咁坐住張bb櫈, 唔敢搞枱面d碗筷, 媽媽叫左馬拉糕比我食, 我好快就relaxed晒, 然後開始放肆, 搞碗筷, 搏命食馬拉糕, 坐唔定... 其實呢d場合真係好悶, 有個怪細路調劑下, 氣氛就輕鬆得多, 所以我今日的任務真係好重大啊!
[left1] 我一向砳鍾意毛公仔, 但近來同屋企一隻啡色啤啤熊就左好朋友, 原因係媽媽用flash card教我認顏色, 啡色的一張就係一隻熊仔, 同屋企果隻係好似樣的, 就係咁我就鍾意左佢, 仲會攬住佢鍚, 今日返婆婆屋企都帶埋佢去, 婆婆話我成日抱住佢通屋行添!我的好朋友啤啤熊
今日要返英文班, 同上次一樣, 開始時我有點吵鬧, 不過好快就平靜返, 老師叫我將紅色波波放入紅色杯裡面, 我答對了, 好叻仔啊! 仲有, 我最近在學英文字母ABC, 媽媽找來ABC地墊, 拆出字母比我玩, 我比較喜歡A, 我會舉起個A, 大叫"A!", 上星期六睇"警訊", 有個問答遊戲, 主持人講出A, B, C三個答案, 我好肯定咁話"A! A! A!" 相信答案一定係A啦!
https://bb5.babyhome.com.tw/UPLOAD7/117460/122525.55636447.31531.wmv 新買的vcd"和天線寶寶學英文", 太好睇了! 笑到我卡卡聲, 尤其是up and down, 睇完一集唔夠喉, 我就喊, 因為一集只有二十幾分鐘, 太短了, 所以我要睇三次先夠! 婆婆買了紅色小巴比我, 我的車車珍藏又多一架了!