親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
好耐無見
我喜歡玩車, 屋企乜車都有, 我喜歡在電視櫃前面兩吋空位推車, 我玩車很粗魯, 偶爾喜歡製造墮崖意外, 令車車受損, 呢種行為媽媽最唔鍾意, 我話極唔聽激嬲左媽媽, 媽媽就狠狠地打我的手板, 平時被打pet pet我都唔喊, 但今次我"哇~~~"一聲喊出來, 應該真係好痛了, 我喊到面紅耳熱, 我一大喊就會嘔, 唔洗問今次又嘔左d晚餐出來, 好彩媽媽接得住! 被罰完不久我又若無其事, 媽媽就同我訓話, 叫我一定要愛惜玩具, 我知道媽媽要捉住我訓示, 表現得好唔耐煩..
又有cake
今日我又在婆婆家過了一日, 我在一餐晚費闖了兩次禍, 首先係我坐在矮櫈仔時玩櫈, 失平衡撞左落媽媽身上, 令媽媽倒瀉湯, 全身衫褲濕晒, 我自知道已做錯事, 縮埋一舊唔出聲. 然後我繼續玩婆婆比我的lipton茶包, 最近我鍾意玩婆婆的花生醬, lipton茶包, 荼葉罐和保暖杯, 個茶包比我玩左一日, 終於比我撕爛左, 茶葉飛晒出來, 成張梳化都係茶葉, 又要婆婆抹抹. 家有一個兩歲頑童就會係咁, 你永遠估唔到下一分鐘會發生咩事!
昨天媽媽偷懶, 今日要補返d堂, 返完playgroup就返婆婆屋企, 玩到夜晚食埋飯先走, 今晚婆婆係煮燃手雲吞雞, 我食左好多雲吞. 我食緊的雅培3號奶粉又斷市, 全線藥房都無貨, 媽媽唯有去萬寧買貴奶粉, 一罐足足比藥房貴15蚊! 我最鍾意買野比錢的過程, 經常爭住攞東西去收銀機比收銀姐姐, 又會爭住比錢/doo八達通卡, 有時仲求其攞d貨品去比錢, 上次在百佳堅持要買佳能密實袋, 今日在萬寧竟然攞左包"樂而雅衛生巾"去比錢, 激到媽媽就快發癲, 但萬寧的職員姐姐就笑到肚痛! 樂而雅呢類產品我永遠用唔著, 唯一可以解釋的係包裝袋係綠色, 係我情有獨鍾的顏色, 所以就一手攞左去比錢!
今日爸爸放假, 媽媽本來要教琴, 但爸爸提議去探秋盈, 於是媽媽自製了一日假期, 我地下午先同世儀姐姐到尖東魚翅城飲一餐高級下午茶(我初嘗馳名蛋散!) 今日星期三全線博物館免費, 當然要好好享用, 我去過科學館, 媽媽於是提議去香港歷史博物館, 但正值我午睡時間, 未到博物館我已訓著左, 幸好到休館前半個鐘醒左! 爭取時間睇下幾件精選展品, 我喜歡裡面的電車, 可以上車玩, 我仲係模擬士多和課室影相, 但剛訓醒似乎好呆滯, 唔知自己身在何處. https://bb5.babyhome.com.tw/UPLOAD7/117460/122525.80862864.47192.wmv 到六點鐘休館了, 我地離開, 原來對面的科學館係收九點的! 於是我地又唔蝕底, 入去行個圈, 點知呢個圈真係耐, 科學館實在太多啱我玩的東西, 我最鍾意玩幾何立體圖形, 小乖球, 碌啞鈴和錯覺屋, 足足消磨左一個鐘頭! 然後我地去土瓜灣同秋盈一家食飯, 再上佢地屋企玩, 秋盈家有Elmo, 又有煮飯仔玩具, 我最鍾意, 我地兩個玩左好耐, 玩得好開心, 媽媽覺得我同秋盈係最夾的, 因為每次見面我地都好和平相處, 秋盈亦好鍾意同我玩!
最近媽媽得到一部免費的3G手機, 可以上網的, 其實唔係咩新發明, 只係媽媽大鄉里覺得好新奇, 成日攬住部手機當係寶, 每朝早起床就用手機上網睇蘋果日報, 睇下點解陳冠希連續一星期日日可以上頭版. 今早媽媽如常用手機睇報紙, 我在旁邊玩我心愛的basket(收銀機玩具的膠籃仔, 內有兩盒"的答糖") 媽媽睇報紙未免睇得太放心了, 忘記左我無時無刻都有機會搞搞震, 原來我靜雞雞將媽媽新買的眼霜扭開了蓋, 搽到自己成面都係, 連睡衣, 褸仔, 枕頭套都沾滿! 媽媽發現時已經太遲了, 眼霜已經得返半樽, 各位女士應該知道眼霜係最貴和用的份量係最少的, 本來可以用半年的一樽, 唔洗一分鐘已經被我當成$23一樽的娥羅納英搽到成面都係. 其實上星期我又誤將媽媽的一支牙膏形狀的眼霜掉落床頭的隙縫, 至今仍未尋回, 於是媽媽再買一樽新的, 豈料今日又被我消耗了50%, 肉赤死媽媽! 今日在會所玩左40分鐘左右, 我將玩具食物收集一堆, 然後請小朋友食, 唔洗返playgroup少左出街, 一定要落club跑下跳下, 消耗下體力先至得架.
現在的孩子太辛苦, 讀書壓力大, 課外活動又多, 學三, 四樣野已經算少, 媽媽有個學生, 星期六全日學六樣野, 珠算, 鋼琴, 畫畫, 小童軍, 上門補英文, 再加普通話, 朝早九點晚八無停過. 呢種填鴨式教學後再加填鴨式課外活動, 媽媽當然唔贊同, 但媽媽強烈堅持每個孩子都應該自小培養一動一靜的興趣, 音樂/美術和一種運動, 持之以恆, 己經好好, 足以終生受用. 近年流行學Phonics, 媽媽年代無呢d野, 對之甚感興趣, 稍作了解後發現對學英文有好多幫助, 因為舊有的方法是死串字, 硬背誦, 少數醒目的學生可能會自行整理出音節中的共同點, 建立出一套邏輯, 串字發音就覺得無難度, 但唔醒目的學生呢? 唯有死背, 死記, 甚至用中文去拼音, explosion拼作"x煲純", 最後考試都係串成expotion.學好phonics就唔同, 看到陌生的字都識讀, 聽到一個全新的字, 都可以大致準確地拼出來, 而且學過phonics, 發音都更準確! 現在的孩子辛苦咩? 媽媽就話現在的孩子好幸福, 一動一靜之餘記住學埋phonics, 打好基礎, 第時上小學... 中學, 起碼唔洗受串字之苦, 讀寫聽講根基好, 星期六學琴游水返來, 仲有時間同爸爸打下機! 望就係咁望!
今個月爸爸返晏晝更, 每晚返來我都訓左覺了, 只有我同媽媽食晚飯, 爸爸陪我的時間少左好多. 今日大年初四, 我和媽媽無任何外出活動, 但已有三個學生來上課, 我同媽媽在家玩左好多玩具, 玩到夜晚, 我主動同媽媽講要tidy up! 幫手將d玩具收返好, 媽媽第一次聽到我講tidy up的, 但我發音好唔準確, 基本上只係聽到個up字, 但我用動作搭救, 媽媽終於明白我講乜野!
最近媽媽經常被親友投訴, 原因係"昭駿的世界"本來聲稱會每日更新的情況大不如前, 今個月仲離譜, 竟然整整一個禮拜無郁過, 投訴者包括媽媽的好友, 學生, 甚至學生家長都有微言. 以下是媽媽對於疏於更新網頁的解釋: (1) 太忙: 為應付三月校際音樂比賽, 密鑼緊鼓鞭策學生 (2) 太攰: 密鑼緊鼓後當然會攰 (3) 太凍: 手指凍僵唔想打字 (4) 太懶: 無須解釋 大家的意見媽媽是接受的, 如能突破以上四項阻滯的話, 我的網頁依然會每日更新, 就算唔係每日, 都會隔日, 隔三日, 或四日, 不會超過一個禮拜, 就算無內容, 最少會有標題, 有相.... 講開又講, 長隆之旅都未補寫內容, 有朝一日會寫的, 一定! 今日寶儀姨姨和豬姨來探我, 但我態度唔好, 唔睬人, 只顧玩泥膠, 仲玩到亂晒龍, 通地都係, 媽媽以為自己去左塔門, 滿地牛屎! 夜晚cell姨姨和obi又過來玩, cell姨姨送我一個好玩玩具, 我攬埋入房陪訓, 臨訓前都玩左好耐呢!
今日大年初二, 行程是先去大虎(大舅父)家拜年, 再去太婆家晚飯. 大虎和阿妗(我幫舅母改的名)住在紅磡, 我地在屋企對面坐6C巴士就可以去到, 但我地難得去紅磡, 當然先去黃埔行下, 媽媽斥資二百蚊買左好多美食同大家分享, 認真豪爽. 大虎一開門, 我初時唔肯入屋, 但我見到有兩隻貓貓, 就兩眼發光, 馬上入屋睇貓貓, 大虎養左兩隻靚貓, 大貓係來自澳洲的英國短毛, 細貓係美國摺耳, 我一見到佢地就不停叫cat! cat! 又扮佢地咪咪叫, 我仲想攬住細貓, 但佢地似乎好驚我, 大貓仲第一時間衝入廁所避難! 聽講貓係好怕人類的兒童的, 為免佢地受驚, 大虎將佢地放返入籠, 於是我就踎在地下"裝"佢地, 我請佢地食開心果, 但阿妗話佢地唔食得開心果, 只能食貓糧. 然後我地又出發去太婆屋企, 每年年初二太婆屋企都有盛大的晚飯, 好多餸, 我出奇地唔怕陌生, 玩得好開心, 食左好多飯, 因為姨婆煮的餸好好味!
大除夕
Isaac knows his colour!
今日成日企, 唔肯坐, 又唔出聲講野, 好唔妥, 有經驗的媽媽和婆婆一睇就知道我大唔出便, 就連食飯我都唔肯坐, 企在廚房枱面食晒餐飯! 到下午媽媽出去教琴, 婆婆和我在家, 我都一直坐立不安, 訓醒晏覺仲係咁, 真係令人擔心. 婆婆於是叫爸爸買甘油條幫幫我, 但爸爸被藥房的人老點買左一包好貴的塞肛藥, 無幾耐媽媽收工返來, 一入門口就見到我好開心的樣子, 原來我已經憑自己的力量大左好多便了, 成身鬆晒, 馬上心情靚靚, 通屋走來走去, 又笑又叫, 變返本來的小頑童! 塞肛便秘藥已經無用, 幸好藥房肯比我地退貨, 換返支護髮素!
團年飯again
對於香港人來說, 攝氏九度可以算做嚴寒了, 昨晚婆婆打電話來叫媽媽今日唔好比我返playgroup, 話荃灣會好凍喎, 但媽媽唔贊成, 人地返幼兒園的小朋友, 會因為天氣太凍隨便唔返學嗎? 於是我和媽媽決定不畏嚴寒, 冒住寒流和雨點照常上學去. 媽媽終於出動羽絨, 但我無羽絨, 於是媽媽同我著左一件底衫, 一件睡衣, 棉襖背心, 再加件抓毛衫, 再套多件厚絨褸, 著埋抓毛褲, 漲到成個波咁, 差d連書包都孭唔到. 返到Ms Hazel度, 個個小朋友都著到隻糉咁, 好好笑. eco姨姨同我地食lunch, eco姨姨的bb好快會出世同我地見面了. 今日我津津有味食緊野菜餅時, 媽媽叫我請佢食, 我唔請, 叫我請姨姨食, 我都唔請, 但叫我請姨姨肚裡面的baby食, 我竟然攞出一塊餅餅比姨姨! 媽媽覺得我唔明白"姨姨肚子裡有個bb"呢個事實, 看來媽媽太低估我了! 下個月bb出左世, 我就可以同妹妹玩了!
我以前唔鍾意睇barney, 但最近突然愛上, 有人說barney的英文有很多澳洲口音, 不太純正, 所以媽媽無買比我睇, 今日舅婆帶左好多barney vcd比我, 係梓延表舅父細個睇的, 已經睇到識背, 就轉送比我, 我開心都不得了, 成日話要睇BAR-BIE! 一見到隻紫色恐龍就卡卡笑, 跳跳紥, 仲自己揀碟來睇添!
我家有個暖爐, 在我出世第一年有用過, 舊年唔算好凍, 無用到, 暖爐放在細房, 雜物堆積如山, 今年實在太凍了, 無辦法唔出動暖爐, 爸爸媽媽於是展開愚公移山行動, 將雜物一件件搬走, 救出暖爐, 放入睡房晚上取暖用. 睡房於是變得暖笠笠, 令媽媽更開心的是暖爐可以用來烘乾衣服, 天氣潮濕, 洗左的衣服好難乾, 但一放上暖爐, 唔洗五分鐘就乾好一件, 一物二用, 真係令人感動!
我表姐
婆婆最近經常投訴唔知我講乜, 其實我講的係英文單字, 只係婆婆唔識聽, 最近我講的單字多左, e.g. slow, fast, drink, melon, carrot, fork, track, glue, sleep... d字深左, 唔再係cat, dog, elephant, 難怪婆婆聽唔明. 婆婆一來投訴我多講洋文少講中文, 二來不滿我仲係講單字, 歸咎於媽媽比太多英文教材我, 令我的語言進度慢... 關於呢類投訴媽媽係接受的, 媽媽亦察覺到有同樣問題, 於是近日將頻道由80%明珠台+20%翡翠台轉為中英雙語廣播. (家陣做父母真艱難...) 我鍾意搞媽媽的眼耳口鼻, 喜歡用手指住講nose, eyes, ears, mouth, 最離譜的係伸手入媽媽的口找佢的teeth, 今晚食完飯返屋企, 搭升降機時媽媽抱住我, 我又搞媽媽的eyes, 但今次我唔係講洋文, 我講:"眼睛!" 係兩三晚前臨睡前媽媽教過的, 媽媽仲以為我唔記得, 點知我無端端講返出來, 連爸爸都覺得好好笑呢!
忘記了想談甚麼...算吧.
我家的Thomas & Friends大軍又新添一名新成員, 就係靚女火車頭Emily, Emily係善良, 勇敢又漂亮的小火車, 媽媽今日在千色店見到佢, 忍唔住又帶埋佢返屋企, 媽媽介紹Emily比我認識, 我不停叫住佢個名, 連同Thomas, Percy和Arthur, 我家已有4架火車頭成員, 媽媽數過總共有27個火車頭角色, 要集齊咁多要二千幾蚊! 今日媽媽開始同我在家做勞作, 我喜歡用漿糊筆黏貼, 第一幅家中勞作係我非常喜歡的traffic light, 我依照媽媽寫在圖上的red, yellow and green英文字, 貼上顏色紙, 好快就完成第一幅大作!
今日媽媽難得約了豬姨去做facial, 仲要教三個琴學生, 於是特別情商婆婆來湊我, 平時媽媽懶得帶我落街玩, 但婆婆就唔同了, 今日帶我落左兩次街! 我地昇悅居的會所兒童室都幾好, 地方還算大(起碼大過泓景台), 玩具還算多(雖然好多係募捐得來的二手玩具), 仲有好多同齡兒童一齊玩, 呢一點係最重要的! 媽媽以前有個學生住在豪宅, 但佢唔鍾意自己的豪華會所, 反而鍾意來我地的會所玩, 原因係佢地的豪華會所人煙稀少, 兒童室揾個兒童睇下都無! 今日有個哥哥同我say hello, 我馬上當左佢係知心友, 想同佢講返hello, 但我發音唔正, 只識講"佬", 於是我就追住呢個哥哥不停地"佬! 佬!"
最近我比較唔聽話, 郁d大發脾氣, 令爸爸媽媽好頭痛! 今日返完playgroup, 食完中午飯, 似乎有睡意, 照理係時候午睡, 誰知扭扭拎拎搞來搞去, 到6:15先訓得著! 媽媽心諗: 死啦, 今晚實唔洗訓! 於是8:00我醒左, 食飯後媽媽馬上帶我去obi屋企玩, 消耗體力. 每次去obi屋企我都吼住果個thomas碌落山玩具, 今日唔例外, 雖然佢買左thomas big set路軌套裝, 但我依然迷戀碌落山遊戲, 一路玩呀玩, 不時傻笑, 不時大呼小叫. 係時候返屋企了, 媽媽驚我唔肯走, 叫cell姨姨將玩具收入房, 今我竟然無發爛渣, 仲同玩具講bye bye, 仲幫忙收拾, 然後我發現cell姨姨執漏左一個配件, 我想將佢放回原位, 但碌落山玩具在姨姨的書房, 而房是黑媽媽無開燈的, 於是我將配件放在房門口, 然後離開. 小朋友的行為舉止真係好有趣, 你以為佢會扭計, 偏偏又唔會, 仲幫忙收拾! 真係估我唔到呢!
媽媽終於肯買泥膠比我玩了! 點解遲遲唔買呢? 因為先前在協康會playgroup玩麵粉, 我好抗拒, 而且市面上的泥膠有一陣好臭的香味, 媽媽好怕果種似酒樓廁所好俗的香薰味, 所以一直唔買泥膠! 媽媽終於克服到呢種心理障礙, 今日在青衣一間玩具店仔買左一盒用泥膠做車的玩具比我! 夜晚食完飯, 我和媽媽在廳地下鋪張墊, 一齊玩泥膠, 我可以四個唔同款式的車殼倒模成車, 然後加上車底, 就成了一架上鍊會行的泥膠車! 不過呢盒玩具有另一樣野更吸引我, 就係一支可以將泥膠"吱"出來成條狀的針筒, 我見到泥膠好核突咁從針筒走出來, 就大笑, 然後我用刀將呢條核突泥膠切切切和斬斬斬. 隨盒只有黃, 藍, 紅三色泥膠, 媽媽將黃加藍扭作一團, 變成我心愛的綠色, 紅加藍變紫, 黃加紅又變橙! 真係神奇!