親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
今日的日記主題有點不雅, "屎忽唔連櫈"係嫲嫲用來形容我的, 雖然屎忽二字不太文雅, 但能令聽者馬上知道我的行為特徵, 充份表現出廣東俗語的精闢傳神, 確實值得保留, 所以媽媽決定原用這五個字, 而唔用"pet pet唔連櫈", "囉柚唔連櫈", "屁股唔連櫈"或"臀部唔連櫈"呢類不夠準確的代用詞. 今晚為慶祝爺爺壽辰, 我地又在旺角倫敦大酒樓聚餐, 媽媽未收工, 爸爸先行同我到酒樓, 未有得食, 我在酒樓四圍跑, 爸爸像傻佬般追, 有得食了, 我先肯埋位坐低, 嫲嫲雖然話我"屎忽唔連櫈", 但食野都幾乖, 肯坐住食晒餐飯. 今晚再有蛋糕, 近期生日蛋糕食得密, 但我唔會厭, 每次都以為係為我而設, 唱完生日歌, 我搶住要切蛋糕, 最後比我成功切左一下! 好有型呢!
逢星期六媽媽就會好早出去教琴, 今早我都好早起床, 爸爸提議同媽媽一齊出門口, 然後和我去會所玩, 媽媽先入升降機, 爸爸和我尾隨, 誰知媽媽一入升降機, 門就關了, 媽媽想按開門掣, 但掣是壞的, 媽媽搏晒命按, 但升降機毫無反應, 就係咁我和媽媽就被活生生分離, 爸爸和我馬上搭另一部升降機下去, 媽媽到了地下大堂, 聽到我哭聲如雷, 由11樓一直傳下來, 很淒涼, 爸爸以為媽媽唔等我地, 其實係升降機壞了, 媽媽很憤怒, 向當值石q姨姨反影, 然後再打多個電話到管理處, 將剛才骨肉分離的慘事再講一遍, 要求馬上維修! 升降機門壞可大可小, 好危險呢! 管理處都算反應敏捷, 收到媽媽投訴後馬上派師傅修理, 今次就咁算數. 晚上約了susanna姨姨一家到海港城食飯, 慶祝爸爸生日, susanna姨姨送了禮物比我, 作為給爸爸的生日禮物!? 今晚我相當坐唔定, 食飽就走, 爸爸媽媽輪流陪我到處行和追逐, 身心疲累, 難得同朋友食餐飯, 但我唔合作, 食不知味, 希望我快d乖d, 等爸爸媽媽有啖好食.
婆婆家有兩只小巴西龜, 名叫龜龜, 婆婆每天都將佢地放在騎樓晒太陽, 原因係龜龜和植物一樣, 要晒太陽, 如果唔係好易死喎! 我每次返婆婆家, 都會hello龜龜, 婆婆會抱我睇龜龜晒太陽, 有時會將佢地放在地下行下, 但我只敢遠觀不敢褻玩, 掂都唔肯掂, 龜龜爬過來, 我就"哎吔吔吔.."怪叫, 走遠d...我對龜龜是又怕又愛, 有趣的事情今日發生了, 婆婆叫我鍚鍚龜龜, 平時掂都唔敢掂, 今日竟然比塊面龜龜, 想佢鍚我一啖呢! 媽媽話好彩係我比塊面龜龜鍚, 而唔係我鍚佢, 如果唔係就好驚嘞, 雖然婆婆每日都同龜龜沖涼, 不過人龜鍚鍚總係有d接受唔到呢!
齊食雪糕
齊齊小便
媽媽今日終於問左ms hazel, 點解我會成日講yes, it is! no, it isn't! 原來係每堂的circle time講天氣的時候, ms hazel講is it a sunny day? no, it isn't/yes, it is. 以前ms hazel只會講yes or no, 最近開始教短句啦! ms hazel見我平時上堂唔聲唔聲, 估唔到我記得, 返到屋企同媽咪講喎! 不過ms hazel話我有點不合作, 例如排隊洗手, 我唔肯搭住前面小朋友的膊頭, 又唔肯手擺後面, 今日又拍打reception前面塊板, 又被ms jenny罰坐, 玩搖小船又唔太願意, 媽媽都察覺到我唔多鍾意和同齡的小朋友接觸, 希望返左學會好d!
今日午飯後, 如常跟婆婆落街玩, 我入左樓下影視店, 見到有一盒盒的thomas玩具, 我左睇右睇, 然後話: "買左!" 梗係啦, 呢d火車仔媽媽已經買左好多比我, 幾乎已經齊晒, 店員姐姐話: "你買左就唔洗睇嘞!" 無錯, 既然買左就無謂再睇, 於是我放低d玩具, 就走左. 呢兩日媽媽聽到我成日自言自語, 類似在講"yes, it is. no, it isn't." 仲做晒動作, 好肉緊, 但媽媽從來無教過我教呢d短句, 懷疑是miss hazel教的, 媽媽一定要查證一下.
超級跩
食野的口味應該係父母遺傳, 我越來越鍾意食迴轉壽司了, 用compass visa到元気壽司有八五折, 唔食對唔住自己, 爸爸七點半鐘先去葵芳排隊, 我訓醒同媽媽搭地鐵過去, 但今晚人好多, 我地要等位, 但我好心急想入去, 媽媽解釋比我聽, 搭車要排隊, 去廁所要排隊, 食元気壽司都要排隊, 要守秩序, 估唔到我咁聽話, 乖乖地去排隊, 隔住玻璃睇人地食壽司, 仲幫手講:"唔~~yummy!" 排左20分鐘左右, 我開始唔耐煩了, 好想快d入去食野,有點失控, 好彩呢個時侯我地有位了, 我拿拿淋入座, 侍應哥哥比我一張幼兒櫈(家陣唔叫bb櫈嘞!), 我馬上自行跳入去, 正正經經地坐好, 睇住壽司轉呀轉, 一見到玉子壽司, 就指住叫:"雞蛋!" 兩件玉子壽司就比我一個人擦晒, 媽媽叫左一碗三文魚頭湯, 仲有豆腐皮壽司, 蟹柳壽司, 全部都yummy, 爸爸媽媽同時又狂食十幾碟, 最後$195埋單, 有折頭真係抵食. 然後去葵涌廣場打個轉, 買左兩件冒牌thomas T恤, 好靚, 仲講左10蚊價, 我一見thomas衫就愛不釋手, 仲比個背脊媽媽度身, 媽媽揀衫其間我去揀褲, 揾到條thomas褲, 但媽媽話我有好多褲, 唔洗買. 返到荔枝角我想買雪糕, 一出地鐵站就想入ok便利店, 但媽媽話返到屋企樓下果間先買, 我聽媽媽話, 最後買左五杯雪糕, 搭升降機返上屋時, 有個印度籍的哥哥撩我傾計, 媽媽鼓勵我同哥哥講英文, 但我唔肯, 因為佢叫我比左d雪糕佢, 我梗係唔掣!
我出生時婆婆做了一個小米袋比我, 一直放在我的床仔, 變成我臨訓前的玩具, 今日訓晏覺時, 米袋終於破了, 米走晒出來, 我好似玩泥沙咁開心, 米粒搞到通屋都係, 半日都清理唔完呢! 仲有2個月幼稚園就開學了, 今日收到stafford的信, 我同obi編埋同一班, 正式做同學呢! 幼稚園的書簿費都好貴, 全部買齊要一千八百幾, 真係好貴! 夜晚媽媽陪我入睡, 我見到媽媽的t恤有鋼琴圖案, 我話:彈琴! 然後兩隻手放在媽媽身上, 作狀彈琴, 然後竟然講: "do-mi" 媽媽問我係唔係想講do-re-mi呀? 就同我一齊唱do-re-mi-fa-so-la-ti-do', 我一一跟住媽媽唱, 但當然沒有音準, 但媽媽好開心, 因為我自出娘胎媽媽都唔察覺我有音樂興趣, 今日竟然自發唱出do-mi, 就如三百幾年前三歲的莫扎特爬上鋼琴彈出三度和弦一樣, 令人振奮非常!
唔見左!
今日返婆婆屋企, 婆婆話端午節要做節, 晚飯十分豐富, 有一條大魚魚, 蝦(公公煮), 豉油雞, 仲有菜菜, 湯湯...我最鍾意大家一齊食飯, 一來可以食好多餸, 二來全部大人圍住我, 我特別沙塵招積, 好多野講. 誰知食得太多, 臨訓前媽媽又比5oz奶我飲, 胃部已無晒位, 嘔左出來! 我嘔的次數都幾頻密(通常係食得過量), 爸爸媽媽最怕我嘔, 清理嘔吐物令人厭惡, 不過我每次嘔完心情很好, 又笑又叫, 仲鬼咁多野講, 令爸爸媽媽吹到啤啤聲!
港記芝士餅
買奶粉
旅行後好活潑
今日的行程係九份+平溪, 我地原定以最傳統的方法前去, 坐國鐵到瑞芳轉車上九份, 但火車飛竟然在前一日已經賣晒! 嘻, 傻人有傻福, 我地轉乘基隆客運(長途巴士)竟然仲舒服快捷, 好坐到我訓著坐, 大家記住, 以後去九份唔洗辛苦同人逼火車, 搭捷運到忠孝復興站, 一出站就有巴士站, 直到九份, 非常方便, 仲唔貴! 九份以"悲情城市"聞名, 容易落雨, 呢個時常都係陰陰濕濕的山城, 顯得份外淒美, 浪漫! 呢d只不過係旅遊書所寫的, 我地就完全無呢種感覺, 人多到不得了(預左, 一年四季都係咁熱鬧) 基山街基本上係食街, 商業味極濃, 但我地唔介意, 因為我地全部都鍾意揾食, 一到步就被第一檔烤魷魚吸引住, 嘩! 好香好香的烤魷魚, 在香港從來未食過呢! 食晒魷魚, 點能放過台灣臘腸, 一個字: 正! 然後買d手信, 豆干, 蝦片, 黑糖糕, 再即場食埋大大粒魚丸, 紅糟玉圓 此時開始落雨了, 我地要揾地方避, 就入左一間茶室, 呢類茶室在九份實在太多, 我地順便食埋飯(其實已很飽), 玩下火車和新買的三個西瓜跎螺, 消磨時間, 其間玩得太癲, 我將食左的炒飯嘔返出來, 原來台灣餐廳唔會幫客人清理嘔吐物, 只會比你一卷廁紙, 自行清理! 雨一直無停, 但不算大, 我地唯有打傘四圍略略參觀, 雅興不大, 然後開始落大雨了, 唔走唔得, 最後我地好艱難地由豎歧路長樓梯急步下山, 媽媽抱住我落樓梯, 落住雨, 又翳焗, 果種滋味真係難忘, 最後我地成功下山, 跳上一部的士, 講好價, 900蚊包車直返台北, 幾豪氣! 由於天氣惡劣, 媽媽最期待的平溪小火車之旅唯有取消, 好失望! 返到酒店約下午三,四點, 稍事休息梳洗, 食支奶奶, 就去食寧記麻辣火鍋! 事關今日係大虎阿姈結婚一週年, 當然要食餐勁慶祝, 我地去呢間寧記聲稱係最正宗, 別無分店咁話! 打邊爐令我心情興奮, 我仲初嘗酒精, 飲左幾啖蘋果西打! 今餐難得坐得咁乖, 來台第三日, 終於有一餐食得正經, 我食左唔少麵麵, 魚丸, 魚腐之類, 牛肉太厚, 唔適合我, 當然我食的係唔辣果邊鍋. 媽媽覺得台灣的麻辣不夠重慶的犀利, 重慶的辣更為刺激, 風味不同, 大家可以比較一下. 然後再去台北101, 今次真係買飛入場了, 台北101係現時世界最高摩天大樓, 媽媽抱住我入升降機, 係全世界最快的升降機, 一開動, 裡面的燈會變暗, 天花板會出現好靚的星空, 好奇妙, 令我目瞪口呆! 只係二十幾秒, 我地已經登上觀景台, 完全耳仔痛呢! 在觀景台上我異常抗奮, 跑個不停, 媽媽被我搞到幾近精神崩潰, 好羡慕人地的孩子可以乖乖地跟住爸媽, 而我呢, 一放手就一支箭標左去, 橫衝直撞, 唔知我幾時先可以安定下來, 同爸爸媽媽並肩而行, 一齊參觀展品, 聽爸媽講解, 然後我發問問題, 一齊討論台北101是怎樣建成的....
今日行程豐富, 早上先去酒店附近揾野食, 大虎阿妗想食炒米粉, 但四圍都只賣三文治呢類快捷早餐, 估計附近係補習街, 學生趕住補習温書, 乜都要快, 三文治就係最方便的早餐, 好唔容易比我地揾到一間賣台式早餐, 我地叫左鹹/甜豆漿和幾款煎餅, 好地道, 鹹豆漿特別好味, 比香港的正. 今早我地要參觀總統府和中正紀念堂, 我地決定行路過去, 沿重慶南路(書店街)一直向前走, 15分鐘左右就到, 好大間總統府就在我地面前, 小馬哥就住在裡面! 爸爸職業病發作, 走出凱達格蘭大道馬路中心, 以總統府為背景扮做"扒", 好無聊呢! 行下行下, 我地又走到中正紀念堂, 陳水扁將之改名自由廣場, 紀念堂又改作民主紀念館, 不倫不類, 紀念堂裡面又擺放很多唔等洗展品, 請小馬哥快點回復原狀, 恢復中正紀念堂的莊嚴氣氛! 中正紀念堂有一條很長的樓梯, 我憑自己的力量走到上頂, 難為媽媽要背著bb車陪我爬樓梯呢! 媽媽去音樂書店逛一逛之後, 我地就搭的士去馳名的台南度小月食擔擔面 (搭捷運亦可, 忠孝敦化站步行幾分鐘即到), 度小月果然名不虛傳, 我地叫左三碗面和其他小食, 好好味! 但我有點扭計, 媽媽未能認真品嚐, 有幾好味, 未能仔細描述, 有點可惜! 媽媽因為忘記帶尿片(題外話: 我仲未戒片呢, 真失禮!), 飯後要先返酒店, 阿虎因為唔慣著新買的birkenstock, 腳好攰, 乘機抖一抖, 稍事休息後, 我地就出發去參觀至今還是全世界最高的摩天大樓"台北101", 台北101的商場全部係超級名店, 類似香港的圓方, 我地無品味亦無錢, 完全不感興趣, 大虎想上觀景台參觀, 但時間緊迫, 唯有明晚再來. 離開台北101沿松山路直行, 就係所謂全台最大的書店"誠品信義旗艦店", 媽媽一心想要買很多兒童教材, 豈料去錯地方了, 在五樓的兒童書店找不到任何驚喜, 教材亦唔齊全, 最後總算買到兩本thomas寫前運筆練習書, 總算有少許收獲. 離開誠品後我地和大虎阿妗分道揚鑣, 到永和去探親, 是爸爸的堂家姐, 我應該稱呼為四姑媽, 四姑媽和姑丈已經係八九十歲的老人家, 佢地的女兒佩華, 即我的表姐亦比爸爸大十幾年, 表姐的兩個兒子都高中了, 論輩份我係舅父呢!!! 我地先去太平洋百貨裡面的酒樓用膳, 但我第一次同大家見面, 扭計, 唔肯坐, 媽媽就帶我去樓下玩具部買左套火車玩具, 先搞得掂! 不過坐低坐竟然唔肯食野, 表現反常, 媽媽好唔容易先餵到我食少少飯, 但後來竟然嘔晒出來! 原來我唔舒服, 唔想食, 可能下午大風, 吹親, 好彩嘔完舒服晒, 我即刻要媽媽比蝦我食, 仲攞住個包包大大啖咁食添. 再上四姑媽屋企坐下, 就同四姑媽姑丈告別, 佩華表姐再帶我地參觀佢屋企(就在附近), 表姐家有一隻狗狗, 名叫富妹, 只得幾個月大, 又大力又貪玩, 我同佢玩到癲晒, 後來媽媽話狗狗要訓覺了, 我竟然走去打開騎樓門, 叫佢"wake up!" 台灣人好客熱情, 真係無講錯, 四姑媽和佩華表姐一家招呼得我地好週到, 掉返轉我地一定做唔到! 多謝晒!
由今日起一連四日, 我和爸爸, 媽媽, 大虎(大舅父), 阿妗(舅母)去台北旅遊+探親哦! 我地係自由行, 媽媽已經去過台灣三次, 今次再訪台北, 再加上有了捷運, 就算帶埋我, 基本上無乜難度. 我地坐早上十一點的長榮航空, 我地搭的士入青衣轉機場快線, 貪佢夠快和舒適, 我係火車迷, 搭機鐵己經好興奮, 全程都企係度睇窗口呢! 之前媽媽已經同我briefing過我地會搭飛機, 但我在上機前一刻仲以為自己會搭船, 因為登機閘口同上次去澳門的碼頭一樣, 都要"嘟"飛, 好似樣哦, 直到上左機, 我先知道自己會坐飛機呢! 第一次坐飛機, 媽媽擔心我會耳仔痛, 於是帶備emily火車和糖糖比我食, 但媽媽大懵, 將emily漏左係bb車, 長榮航空的姐姐送我玩具, 我稍為玩左一陣, 食左d糖糖, 就開始眼訓, 然後好快就訓著左, 直到飛機降落一刻, 我就訓醒了! 我地的酒店係台北車站對面的凱撒飯店, 地理環境超級方便, 一出門口就係捷運站, 係台北市黃金地段, 但酒店設施比較舊, 唔似五星級, 但整體都算整齊清潔, 職員亦好友善, 值得推薦. 我一如以往, 有得住酒店就開心, 不停走來走去, 跳床, 碌來碌去, 玩窗簾, 樂此不疲. 安頓好後我地先去酒店樓下食街醫肚, 爸爸竟然在下午茶時間打邊爐(麻油雞套餐), 媽媽則選擇輕食, 叫了一客台式鯊魚烟, 點台式醬油加wasabi, 超美味! 然後我地搭捷運去淡水, 旅遊書中的淡水老街有野食有野玩, 仲有情人橋睇日落, 可惜我地一到步就落大雨, 我地唯有躲入餐廳食魚丸, 但好難食. 雨越落越大, 大虎阿妗於是負責去買阿婆鐵蛋, 爸爸媽媽和我在7-11食雪糕, 然後玩夾公仔和投籃機, 我特別喜歡夾公仔落空, 一見公仔跌左, 爸爸媽媽大叫"哎唷!" 我就哈哈大笑. 台灣的夾公仔機有點人情味, 只要你肯堅持就會保證得到一個公仔, 爸爸玩的啤啤熊機, 保證玩八次必有一隻, 豈料爸爸在第八次就夾到一次啤啤! 大虎阿妗好艱難先買到阿婆鐵蛋, 返來時對波鞋已濕透發漲, 兩人即時斥資六百元買birkenstock, 當時大雨情況如香港的黑色暴雨, 大家如得到我地的阿婆鐵蛋做手信, 請好好珍惜, 因為係大虎阿妗千辛萬苦先買到返來! 大雨關係我地的淡水之旅基本上係運吉, 狼狽不堪的我地呢班港燦, 唯有冒雨跑回捷運站, 拿拿聲返酒店沖涼換衫, 媽媽最擔心我的飲食, 到步後都唔多食野, 驚我肚餓, 就買麵包比我頂肚, 但我又唔鍾意食(因為唔好食), 唯有飲多支奶. 夜晚我地再次出動, 去士林夜市掃街(小提示: 去士林夜市請在捷運劍潭站落車, 較士林站近), 我地係早有預謀的, 先食蚵仔煎, 甜不辣, 炒米粉呢d油膩煎炸野, 再來兩條"大腸包小腸" (糯米腸包台式香腸). 然後去飲杯鮮榨果汁, 媽媽和我叫了集五種水果的綜合果汁, 爸爸要了很酸的酸梅湯, 阿妗飲珍珠奶茶, 大虎飲蜂蜜苦瓜汁, 大家都一致認為大虎的苦瓜汁最好味. 果汁檔的生果很多, 我能夠逐樣叫出佢的名字: 香蕉, 波蘿, 蘋果, 西瓜, grapes, papaya, 但叫錯了白苦瓜做corn. 買完爵林花生糖, 再去都會叢林寵物街睇小動物, 搭捷運返台北車站, 我對台北的交通燈份外鍾情, 喜歡用手指指住, 紅燈講stop, 綠燈講go, 見一次講一次, 大家聽左不下一百次, 好厭, 但我唔厭, 因為我要指揮台北的交通. 返到酒店已經好夜了, 但我都未想訓, 仲玩多一陣thomas, 媽媽今次帶左percy, emily和murdoch三架車仔來台灣, 仲有路軌, 搞到我好唔得閒呢!
扮BB
Thomas大展
今日屋企無水, 媽媽同我上完playgroup後出街食lunch, 又係例牌滑蛋豬扒定食, 我貪d蛋夠滑, 豬扒夠林, 呢間五月花餐廳我去過好多次了, 次次都係食呢個餐. 飯後媽媽提議行下街, 荃灣城市廣場有一間鋪頭賣玩具, 媽媽本來想同我睇毛毛狗的, 但我被另一個thomas火車打關斗玩具吸引住, 呢個玩具好無謂, 只係睇住thomas行來行去, 打關斗, 毫無啟發性, 媽媽當然唔會買, 但八卦問下價錢, 竟然要$380, 個女sales仲話"真正日本版, 最後兩套, 出面無得賣, 你實揾唔到!" 我被thomas吸引住, 但媽媽細細聲同我講:"我地不如去千色店, 果度仲多thomas". 一分鐘後我地到左千色店玩具部, 果然好多thomas, 媽媽馬上發現大量剛才的thomas打關斗無謂玩具, 正價只售$238, 媽媽熟知玩具行情, 一件玩具大約值幾錢, 心裡有數, 你咪當我羊古! 大家請注意荃灣眾安街荃灣城市廣場三樓, 唯一一間玩具店, 係黑店, 小心, 買玩具請到毗連的千色店, 又平又多款. 回家途中大累, 訓著左, 返到屋企馬上醒, 全程訓左30分鐘唔夠, 夜晚一沖完涼就自動入房覺覺, 連奶都無食, 昨天搞到媽媽好勞氣, 今晚好好多嘞啩.
大整蠱
爸爸煮飯
游水好累
食物類
我的初吻