親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
昨天放學回家突然要求睇Teletubbies(天線得得B), 已經有一段長時間無睇了, 唔知點解突然想睇返, 點知一睇就不得了, 全套6集睇完一集又一集, 一次又一次, 大個左翻睇興趣不減, 反應比以前多好多, 我不停又中又英雙語旁述, 又做動作, 忙到咩咁. 得得B熱潮今日持續, 今早六點自動起身, 想食奶奶, 七點多d走左出廳, 要求睇Teletubbies, 媽媽見時間仲早, 比我睇一陣, 講明睇一陣就要返學, 媽媽幾驚我睇到迷頭迷腦唔肯行, 好彩我都似樣d, 夠鐘出門口就自行關掉dvd機, 媽媽覺得我大個仔左, 情緒穩定返少少, 少左亂發脾氣, 扭眼訓時例外. 放學在校車訓著左, 落車濛濛鬆鬆要媽媽抱, 不忘要求"返屋企睇Teletubbies!" 訓醒晏覺又想睇, 媽媽唔比, 安排我畫畫, 媽媽比我一盒水彩顏色餅, 我可以自己玩, 媽媽去煮飯. 我今日畫樹樹, 其實係一攤藍藍綠綠, 要加好多想像力先似樹樹. 晚飯後又睇! 媽媽叫我先做功課, 我唔制, 媽媽話唔做功課miss lee會唔開心架, 於是我又乖乖地做好功課, 放返入書包先去玩, 爸爸都讚我乖. 半夜發開口夢, 無端端講"Dipsy's hat!" Dipsy係天線得得b綠色果隻, 鍾意戴帽, 發夢都掛住得得B, 明天開始要暫停收看, 降降温, 以免壞腦.
今日係畫班第二堂, 午飯後媽媽比我睇一陣tikkabilla, 然後準備去畫畫, 點知我話:"唔去dreamhouse畫畫囉!" 媽媽嚇一跳, 以為我已經無興趣了, 好彩最後我都好樂意去畫班, 仲自己攞住個thomas畫袋, 到達後穿上多啦A夢圍裙手袖, 我話:"好靚哦!" 入到畫室, 同爸爸媽媽講拜拜, 態度輕鬆無扭計, 似乎已經完全接受了畫班, 非常好. 今日畫蜘蛛, 媽媽在外面偷窺我好幾次, 最後完成左呢幅"網上蜘蛛". 新買的potty終於肯用, 我戒片的進度實在慢得驚人, 之前我態度極為強硬, 寧死不屈, 最近態度軟化, 在家可以疴屎屎和尿尿了, 事後堅持要自己倒, 自己沖廁, 今晚媽媽幫我倒左一次, 1分鐘後我返轉頭揾, 不滿媽媽倒左我的尿尿, 媽媽馬上加d水喉水當尿尿, 比我倒, 魚目混珠成功了.
婆婆買停車場
我要綠色床
今日返完little gym, 去荃灣揾蘇姑娘玩, 我好鍾意同蘇姑娘玩遊戲, 佢有好多玩具, 但今日我似乎有d唔專心. 之後爸爸帶我返青衣去婆婆屋企, 媽媽要返屋企教琴, 我唔鍾意媽媽彈琴, 因為又要同媽媽分開. 點解星期六我要返婆婆屋企呢? 因為爸爸媽媽今晚要揾裝修公司搞裝修, 唔帶得我去, 出世以來我都係同爸爸媽媽一間房, 我的bb床仔特大, 可訓到三歲, 已經三歲了, 特大床仔都已經好勉強, 轉身時"啪" "啪"聲, 踢到木欄杆, 係時候換床了. 細房基本上是電腦+雜物房, 亂得恐怖, 爸爸媽媽決定來個大裝修, 將細房變成我的房間, 客廳都要搞搞佢, 增添貯物空間. 四月復活節學校假期其間我家將會展開工程, 到時必定頽垣敗瓦烏煙瘴氣, 裝修好後我就有自己的房間啦, yeah!
最近好喜歡睇明珠台四點鐘的恐龍小教室Tikkabilla, 係英國BBC的節目, 通常4點我訓緊晏覺, 媽媽會錄影左比我睇, 內容好益智, 前幾日介紹巴士廠生產巴士的過程, 我好有興趣喎, 仲話:"叔叔整架巴士比歐昭駿坐", 今日媽媽在廚房煮飯, 聽見我話:"叔叔整架火車喎!" 原來今日係生產火車, 啱晒我胃口. 可憐爸爸晚飯時間都無得睇鹿鼎記, 要陪我睇兒童節目!
今早媽媽手提電話響, 來電顯示係"Stafford", 上課時間學校打電話來, 梗有事發生, 原來係miss lee打來, 話我比一個女同學大力搣了面豬一下, 面紅左有條痕, 該女同學聲稱覺得我好得意, 所以搣下我喎. miss lee又話, 有一日我同佢講:"媽咪彈琴, 爸爸返工, 歐昭駿畫畫!" 我真係好鍾意畫畫喎, 於是爸爸媽媽今日帶我去樓下的畫室參加畫班, 所謂畫班其實只有我同另一個四歲男仔, 初時我唔比媽媽走, 熱身後好快就同媽媽講拜拜了, 老師教我用皺紙搓波波, 做左兩隻龜龜, 然後用水彩畫了一副七彩的海草畫, 貼上兩隻龜龜, 真係好靚呢! 有點苦惱的係星期六的體操班, 我似乎唔太喜歡, 每次提到去little gym, 我都話唔去, 不過比左錢就一定要參加到底, 小朋友唔能夠半途而廢, 辛苦爸爸繼續帶我去上堂嘞!
唔願返學
我對顏料有興趣, 尤其喜歡水彩, cell姨姨送我一套mickey顏料, 我愛不釋手, 時常要媽咪比我玩"painting", 媽媽見我咁有興緻, 就買左一盒水彩比我, 仲有色碟, 畫筆..好齊全, 最重要係圍裙和手袖, 我死都唔肯著, 但媽媽話唔著就唔可以畫畫, 我最後態度軟化, 首次肯穿上圍裙手袖, 係多啦A夢呢, 我話:"圍裙好靚!" 著住就唔怕整污糟衫褲啦, 可以盡情塗鴉.
跌鞋後遺症
今日教師發展日假期, 放假第一件事係去揾高醫生打預防針, 上個月已打流感和肺炎鏈球菌, 今日打流感加強針和水痘針, 由爸爸陪我, 喊得好大聲呢! 我迷上玩氣墊球, 我會攞住張住戶證, 去會所同職員哥哥講:"唔該哥哥, 要氣墊球!" 原本只能借玩半個鐘, 但我每次都超時, 今日同媽媽爸爸足足玩左40分鐘有多, 夠晒皮. ! 然後去健康院, 見返我出世時睇我的何小芳醫生, 時間過得真快, 轉眼我已經三歲! 同醫生姐姐玩完後, 我地搭隧道巴士過海, 去西寶城, 原意係想去新開的室內遊樂場playtown玩, 點知我唔肯入去, 任由媽媽點氹我都唔肯入, 爸爸話唔玩仲好, 慳返d錢. 反而我鍾意去書局睇書, 我在三聯逗留左足足半個鐘有多, 買左4本barney習作, 食飯時急不及待要睇. 返屋企搭地鐵途中, 我情緒亢奮, 大聲高歌, 越唱越大聲, 仲興奮尖叫, 被媽媽訓斥, 點知落車時一時分神, 隻腳叉左落列車與月台之間條罅隙! 有名女乘客馬上幫忙抽返我隻腳出來, 無受傷, 但隻波鞋仔就跌左落去路軌, 我眼白白睇住車門和幕門關上, 無左隻鞋, 大喊!!! 慘叫:"執返~~~執返~~~~~" 我從來未試過喊得咁淒涼呢, 爸爸媽媽帶我揾職員叔叔, 叔叔話今晚收工先執得返哦, 叫我地明天再來. 我繼續喊呀~~喊呀~~~~ 喊到返屋企,好傷心
班主任Ms Barkha放婚假, 另一位外籍老師Mr Bobby來代課, 我似乎對Mr Bobby好有好感, 今日放學後, 我同媽媽講:"Mr Bobby同歐昭駿玩." 媽媽問:"玩乜野呀?" 我話:"玩屋仔, 玩火車." 今日媽媽打電話問老師, 得知Mr Bobby原來好錫我, 上堂成日叫我, 我上他的堂特別開心, 原來Mr Bobby教的主題係transport, 仲帶左好多車車返來, 唔怪之得我好似封左佢做偶像咁啦. 最近迷上氣墊球, 今晚同媽媽去KFC食左d無益快餐之後, 去會所玩氣墊球, 我已經夠高可以同媽媽玩, 在氣墊枱前同媽媽對打, 媽媽覺得我大個左好多呢!
今日媽媽帶我去青衣圖書館的兒童圖書室, 我第一次去圖書館, 很合作, 靜靜地坐低睇書, 主要係thomas圖書, 媽媽覺得我專心睇書的樣子好乖呢! 真少有. 話時話, 我現在每日都有閱讀習慣, 有時係媽媽買的故事書, 有時係學校教完派返來的教科書, 有d係表姐在幼稚園攞返來的書...種類繁多, 不能盡錄. 下午訓晏覺和晚上臨睡前必定會睇一陣圖書, 睇完就訓, 有時訓醒又睇, 良好習慣從小陪養, 希望書本永遠同我做好朋友.
今早媽媽唔知醒, 7:45先彈起身, 趕頭趕命, 終於8:00搞掂可以出門, 我雖然已換好衫飲左奶, 但仲係濛濛鬆鬆, 唔願郁, 媽媽叫我出門口, 我好唔願意, 仲喊起上來, 最後仲嘔到校服污糟晒, 今日趕校車作戰失敗, 媽媽投降. 趕唔到校車就在家玩多陣先, 我換上便服, 8:40重新出發, 媽媽話校車走了, 我地搭的士, 我聽見好開心, 仲話:"No school bus today!" "Let's take a taxi!" (媽媽已轉去中文台, 但我依然常說洋話) 早上截的士又係另一件苦差, 幾經辛苦終於上到架的士, 遇到個好人後生又靚仔的司機哥哥, 無著校服, 又搭的士, 我傻到以為返婆婆屋企, 點知一到校門口, 我馬上哭鬧起來, 老師帶我入課室, 我喊苦喊忽話:"要媽咪~~要媽咪~~~" 媽媽走為上著, 返到學校咁多野玩, 最多喊1分鐘就唔記得阿媽!
今日媽媽來接我放學, 我在課室等, 一見到媽媽就開心晒, 因為我又可以去操場玩車車! 我揀左架有頂砵砵車在操場奔馳, 同場仲有好幾個家長接送的同學, 大家都玩都唔願走, 最後ms ng下令收車, 連最爛玩的我都唔敢違抗, 拿拿淋泊車走人. 媽媽同我去又一城kfc食飯, 再去玩具店逛一逛, 當然又有收獲..以前媽媽獨自帶我出街係超高難度, 諗起怕怕, 可免則免, 現在難度不變, 改變了是媽媽"豁出去"心態, 而且開始享受兩母子去街街的樂趣, 大手拖小手, 說傻話, 唱怪歌, 行到攰, 講句:"好嘞, 媽咪抱!" 就舒舒服服伏在媽咪膊頭休息, 做小朋友就係咁快樂!
今日大虎(大舅父)終於將電腦修好, 原來係兩條新買的RAM壞了, 媽媽用手推車將電腦拖返屋企, 電腦一入屋我就好興奮, 狂呼:"要玩電腦! 要玩電腦!" 糾纏了好一陣, 我向來無玩電腦的習慣, 可能以為部電腦係新玩具, 後來證實電腦與我無關, 好快就忘記了. 最近做功課的情況有改善, 肯坐下來寫字, 媽媽協助下寫出來的功課唔算太核突, 但有時都要用零食引誘先能發揮動力, 今晚寫好"人"字和Big letter G, 每次做完我都會將功課放返入書包, 今次有兩本功課, 我話:"好多功課!" 媽媽話:"係呀, 你學校好多功課架!" 話雖如此, 做兩本功課其實只用左5分鐘.
玩沙+珍寶海鮮坊
家中電腦又再故障, 昭駿的世界嚴重受影響! 不便之處, 敬請見諒!
今日寫個"田"字, 我很乖. 很快完成了八個"田"字 仲識得將耕田的農夫圈出來 媽媽很感動哦! 但便便就好唔乖, 唔肯用新買的toilet仔, 被媽媽責罰, 仲打pat pat 媽媽好重手打到我屁股開花, 打在兒身痛在母身哦!
今早如常返little gym, 今日係第4堂, 開始有進步了, 少左亂跑亂跳 肯聽老師指示, 今日仲有氣墊, 我地坐在氣墊上, 然後老師充氣, 氣墊慢慢升氣, 好神奇, 玩得好開心! 然後和爸爸食早餐, 我喜歡和爸爸食早餐, 炒蛋, 通粉, 蘿蔔糕..我可以食好多! 然後搭車去香港仔踢足球, 爸爸開始帶我落場踢波了, 我仲帶備自己的小足球, 當然唔係認真地踢, 但有地方比我跑跑跳跳, 已經係好好的運動! 玩完後全身污糟辣撻, 爸爸同我沖涼, 我第一次在球場更衣室沖涼, 爸爸話我好乖, 無走來走去. 沖完涼換好校服, 搭隧道巴返九龍, 今日係學校上學期頒獎禮, 我贏左親子聖誕卡設計比賽, 要返去攞獎, 入學校前我大喊了一場, 原因係我想睇火車, 唔肯入學校, 最後老師和姨姨搞掂我. 領獎對我來說唔知係咩一回事, 上台後我見到爸爸拿住相機影我, 就叫:"爸爸!" 然後miss chan叫媽媽過來一齊影相, 我見到媽媽, 大聲叫:"媽咪~~~" 全場都笑了! 可能我大攰了, 影相時撲在媽媽懷裡. 離開學校後發現原來我唔係太攰! 就去又一城食野, 我拆開老師送的禮物, 竟然係一本thomas畫冊, 真係喜出望外! 爸爸送我一副thomas發聲路軌玩具, 我晚上繼續好唔得閒, 雅怡姐姐一家過來食飯, 我地去左打邊爐, 我帶埋新買的thomas車和一條路軌, 食飯都唔會悶!
麥當勞叔叔
今晚媽媽收工返來已差唔多八點, 拿拿淋入廚房煮飯, 今晚煮薯仔炆雞翼, 功夫較多, 媽媽已開行turbo加快速度, 務求快d食完飯, 同我做功課. "仲要同佢做功課呢..." 媽媽煩惱地對爸爸說. 幾分鐘後, 奇怪的事情發生了, 我拿住功課簿出現在廚房門口, 騰來騰去, 原來我想做功課! 媽媽於是放低廚房工作, 出來同我寫個E字! 媽媽捉住我的手, 一個個E順利完成, 爸爸在旁打氣, 令人感動落淚! 突然肯做功課, 媽媽比中六合彩更開心, 日日係咁就發達囉!
今日放學返來, 媽媽在書包發現我有兩本功課, 分別係中文writing和shapes, writing寫個"下"字, shapes學畫semi-circle. 點解會有兩樣功課架? 乜唔係每日一樣咋咩? 咁細個做兩本功課, 想做死人嗎? 我最唔鍾意做功課, 但在有食物利誘下, 我都勉強能合作完成兩本功課, 花了五分鐘時間, 我暫時仲只會拿筆塗鴉亂畫, 要我乖乖地依指示做功課, 咪搞我.
爸爸媽媽結婚七年一直用住一張兩座位梳化, 攤係梳化對腳伸唔直, 屈住屈住, 實在好唔過癮, 爸爸媽媽好恨有一張三張位梳化, 新年前終於的起心肝, 買了一張三座位, 為慳少少錢, 決定過年後先送貨, 今日我同媽媽恭迎新梳化登場, 好心急, 新梳化終於來了, 係深啡色水牛皮, 好靚! 以後攤o係梳化可以伸直對腳了! 順帶一提, 舊梳化去左邊呢? 因政府開始微收大件廢物處理費(唔知係咁叫呢) 媽媽之前call過社區二手店上來回收, 以為可以捐比有需人士用, 點知師傅上來睇完, 話我地張梳化座位的皮開始剥落, 拒絕回收, 最後唯有請送梳化的叔叔將舊梳化送走, 承惠$120!
Little Gym+踢波+小朋友聚會
唔返婆婆屋企!
今日一早阿陽叔叔打電話來約飲茶, 媽媽提議食早餐, 於是我地就相約左宇晴軒麥當勞見面, 媽媽要我自己叫餐, 我已經好熟練了, "姨姨早晨, 三號餐, 飲橙汁!" 然後和媽媽一餐分享炒蛋, 鬆餅和少少薯餅. 明天要返學了, 我的頭髮太長, 爸爸決定今晚操刀, 要我安靜坐在浴缸20分鐘, 當然要出動法寶, 媽媽終於攞出早前買的finger paint, 我發現竟然可以用手指畫畫, 好有興趣, 最後爸爸幫我剪左一個好靚的髮型! 其實我今日下午都玩了一陣水彩, 畫了三幅, 玩夠了就拿著畫紙走去同媽媽講"I have finished my work!" 今個假期有三樣功課, 之前做好了一樣, 今晚趕工完成另外兩樣, 我依然唔喜歡功課, 每次做功課媽媽都好頭痛, 唔知幾時先肯坐定定!
今日休息下