親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
[left1]上星期在黃金海岸酒店渡假游水不成, 今日爸爸再帶我去屋企會所泳池暢泳, 天氣咁熱游水真係最好不過, 玩左個半鐘, 夠晒皮, 返屋企食午餐, 同展充哥哥玩左一陣, 訓返個靚覺, 游完水特別攰, 三點未到訓到差不多七點. 晚上和表姐一家去惠比壽食日本野, 慶祝表姐唔知幾歲生日, 進餐前先到快圖美影學生相, 因為明天要開學了, 老師話要交六張相, 我對影相特別抗拒, 好艱難先影到一張好少少, 媽媽覺得我唔露齒笑好睇d, 斯文d, 不過影到一張有望鏡頭, 樣子正正常常, 都收貨了. 臨訓前和媽媽一齊準備明天返學的用品, 最緊要帶茶杯碟, 要食茶點嘛, 仲要貼上名字貼紙, 以咨識別. 同舊年開學完全唔同, 媽媽的心情都好輕鬆, 因為我已經有返學經驗, 我亦已做足心理準備, 知道"Stafford完晒", 你問我讀邊間學校, 我會大大聲答你"St Nicholas Kindergarten" 或"金巴倫稚園" (寺院?), 希望明天返學一切順利, 回來再同大家報告.又係影學生相的時候了
五堂的暑期活動"聽聽講講小孩子"今日完滿結束了, 媽媽覺得今次的活動十分好, 內容充實全面, 我在小組中的表現也主動投入, 透過群體活動可以睇到我需要改善的地方, 蘇姑娘認為我的專注力較弱, 例如玩遊戲前導師講解方法和規則, 我似乎無留心聽講, 掛住東張西望, 到正式遊戲時就玩錯了. 蘇姑娘提議媽媽教我彈鋼琴, 可以改善專注力, 呢一點媽媽當然有諗過, 不過我對鋼琴不單止無興趣, 仲好抗拒, 所以我應該係與琴無緣
我實在太為食, 今日中午媽媽已經煮左飯我食, 食左一大塊blue cod魚柳和大碗菜飯, 返到婆婆屋企, 見到媽媽食麵, 我又要食, 仲食晒食隻煎蛋, 火腿, 腸仔都唔放過, 婆婆再煎一隻蛋比媽媽, 又被我食左半隻, 然後仲要食麵, 媽媽落左辣椒油, 我都唔怕... 食到個肚仔圓碌碌, 漲卜卜!
食雪條
整理中..
逛尖沙咀
大有進步
腳腳終於好返了, 可以玩返夠本, 今日約埋obi去海麗村做村童, 我地好耐無一齊玩了, 海麗村的兒童遊樂場實在非常好, 又大又多野玩, 難得今日仲無乜人, 我地可以大玩特玩, 痛痛快快出一身汗, 然後去阿波羅雪糕屋食返杯鮮果乳酪, 真係人生一大享受!
今日K座覆診, 今次係見返兒科的醫生, 係一個我未見過的年青醫生哥哥, 所謂覆診其實同健康院做評估差不多, 只係叫我行吓跳下, 單腳企, 從樓梯級跳下來... 比筆我畫公仔, 認顏色(好無聊), 然後問下我的日常行為習慣, 識唔識自己食飯, 刷牙, 洗頭, 綁鞋帶(!?), 其間有一個實習女醫生用我來做練習, 我都好樂意同佢玩遊戲, 完成後媽媽叫我同醫生講再見, 我竟然叫錯左佢做Dr. Yellow, 之後在樓下撞見真正的Dr. Yellow去食飯, 我好熱烈地打招呼! 每次覆診後我都心情輕鬆, 步出醫院後即口若懸河, 懶風騷咁, 爸爸媽媽同我去圖書館睇圖書, 揾唔到thomas圖書, 我隨便揀幾本都ok, 後來圖書館姨姨準備將圖書上架, 被我發現有好多thomas, 姨姨好人比晒我睇, 我坐埋一邊睇晒, 安樂晒, 懷住愉快心情離開. 爸爸提議去海麗村五十嵐食下午茶, 好難食, 以後唔會再比機會佢. 例牌衝入玩具店睇玩具, 無野買, 玩左一鋪波波機, 贏左個汽球. 好返晒真係好, 又可以同爸爸媽媽行街食野, 爸爸話遲多少少帶我去游水, 好期待哦!
司機叔叔
我五月初病了就一直無返過爺爺嫲嫲屋企了, 因為唔想老人家擔心, 無將病情講比爺爺嫲嫲知道, 病好了又要料理腳仔的傷口, 除每日出入醫院洗傷口和到樓下參加畫班外, 甚少外出, 後來爺爺嫲嫲問起, 就話我的腳受傷了, 所以唔可以返去探佢地. 今晚爺爺生日飯, 我終於可以出席了, 我仲帶備thomas書包仔, 放左好多玩具和爺爺嫲嫲分享! 今晚我食飯餸唔多, 壽包就食得頗多, 因為我好鍾意裡面的蓮蓉, 但記住要"吹凍吓先"喎!
今日再去K座揾譚醫生, 傷口已經完全癒合, 醫生宣佈正式好返, 唔洗返來覆診, 仲可以游水嘞, yeah! 傷口仲有一塊焦, 醫生話要等佢自己甩, 暫時用藥水膠布貼住就可以, 媽媽買左好靚的thomas藥水膠布比我, 我好開心可以每日揀一款膠布貼腳腳, 好有型哦!
宇晴軒開左間新玩具店, 專賣thomas玩具, 搞到我成日囉囉孿, 前兩日去dreamhouse畫畫, 唔記得咩事被媽媽鬧, 我一氣之下跑左出商場, 一個人跑左去玩具店(都幾遠), 媽媽從後跟踪, 見我企係店外睇玩具, 睇電視(今日仲加裝左電視專播thomas片段, 問你死未), 睇到連阿媽都唔記得, 離晒大譜. 放肆的下場當然很慘, 被媽媽鬧足一日一夜, 媽媽話我一個人亂走係好危險, 會唔見左媽媽, 之後警察叔叔就會來帶走我, 帶我去警署... 呢番說話媽媽重覆了好多遍, 又同表姐, 姑媽, 爸爸, 婆婆各覆述一次, 前前後後我聽過不下十遍. 今日再去上畫畫堂時, 我學乖了, 出門時說:"要拖住媽咪喎!" 沿途媽媽又向我問長問短, 不停警愓, 我說要"做乖孩子, 唔去商場(=唔會一個人在商場亂跑)". 下課時ms lo話我表現不錯, 尚算認真, 牛牛很趣緻, 藍天白雲仲有翠綠的山, 桂花粉做的花花, 很好看. 媽媽見我認真改過, 就送我一份禮物, 就係我好好好鍾意的thomas鐘! 我實在太開心了, 竟然有神秘禮物, 媽媽又解釋一大輪點解買呢份禮物比我, 要我明白有獎有罰, 要守規矩, 不可扭買玩具...做得好的時候禮物自然會出現!
重返Little Gym
英文班很悶
媽媽幫我洗傷口洗左一個禮拜, 進度不錯, 傷口幾乎完全埋口了, 今日再返醫院覆診, 時間係下午3:15, 平時會撞正我午睡時間, 但現在無學返, 又夜訓, 午睡時間都順延了. 媽媽昨天已經同我briefing左好多次, 我好清楚今日要做d乜, 我一上的士, 就同司機叔叔講:"去瑪嘉烈醫院, K座!" 因為瑪嘉烈主座和專科是分開兩個入口的, 上車一定要講清楚, 但事前媽媽係無教過我咁樣同司機叔叔講的, 所以我識得講K座, 媽媽覺得好驚訝, 司機叔叔讚我好醒目. 3:30到達K座, 我顯得十分興奮, 大叫:"到嘞! 係K座呀!" 婆婆已經到左, 專科大樓實在好多人, 搭升降機都排晒長龍, 足足等十分鐘先入到. 上到五樓骨科, 我顯得好緊張, 呆若木雞, 媽媽問我要唔要抱住, 我話好, 唔洗一陣, 我就伏在媽媽懷裡訓著左, 訓左一個鐘頭. 等候時我顯得好緊張, 心事重重, 但又毫不抗拒, 似乎好想快d整好隻腳. 我有心事要同譚醫生講, 從昨天起媽媽就和我練習, 要我今日見到譚醫生時自己講出來. 等到4:45, 終於輪到我了, 一入診症室, 譚醫生在講電話, 媽媽叫我等一陣先, 譚醫生一放低電話, 我馬上衝上前同佢講:"醫生, 好返腳腳去游水, 去little gym!" 講出心底話之後我立即喊左出來, 如山洪暴發, 一發不可收拾, 醫生讚我好叻仔, 好勇敢, 仲話:"你睇下隻腳好返幾多, 上次係好大個窿架, 依家仲有好少就好返晒嘞!" 醫生話我可以做體操, 但仲未可以游水. 終於可以返Little Gym, 太好了! 睇完醫生我心情大佳, 馬上除口罩, 仲招招積積說話多多. 拿藥時我同藥房哥哥幾好傾, 唔該前唔該後, 今次譚醫生開左28包Unisept消毒藥水比我, 我拿到一大包消毒藥水, 竟然話要"數吓先!" 唔通懷疑藥房職員比少左? 媽媽同我返落去主座搭小巴返屋企, 我之前住在主座A1病房, 返到主座份外親切, 大叫:"係瑪嘉烈醫院! Princess Margret Hospital!" (剛才K座都係瑪嘉烈醫院哦...) 然後再加句:"Umar好懶訓(眼訓)哦..." Umar係我留院時的同房病童, 佢一出世就有好多身體殘缺, 基本上只會訓係床上, 媽媽同我講佢好眼訓, 所以成日要訓覺, 我出院前聽講Umar的父母會接佢返屋企住, 希望佢返到屋企開心d!
青衣開左一間名叫Kidsmart School, 教英文的, 媽媽覺得幾好, 想比我試下, 早陣子報左名參加試堂, 點知臨急臨忙決定做手術, 去唔成, 今日再安排試玩, 結果出奇地順利. 我參加的係下午兩點鐘的Chatroom英語會話班, 我地遲左五分鐘到, 小朋友都入晒課室了, 可能我太耐無返學, 一入到課室就好開心, 和老師初見面, 我第一句講的竟然係指住自己的T恤說:"I like Mickey!" 老師再問我叫咩名, 我只簡單地答了"Isaac". 小朋友正在唱遊, 都係耳熟能詳的英文兒歌, 我馬上坐低同大家一齊唱, 仲唱到鬼叫大聲, 完全唔洗熱身, 已經投入到不得了, 媽媽很放心, 乘機落樓下食車仔麵. 媽媽回來時見我和小朋友在做小手工, 我把口好似無停過, 不停地講說話, 聲線特大, 課後老師話我英文很好, 好專心, 但說話太大聲, 比老師更大聲, 要控制一下. 媽媽很滿意呢間learning centre, 已報名, 下星期正式參加! 另外要一提的係今日開始由媽媽幫我洗傷口, 醫生開左14包洗傷口藥水, 媽媽擔心自己搞唔掂, 今日去買左紗布, 棉花球和醫生手套, 沖涼後幫我洗傷口, 和爸爸夾手夾腳, 我十分合作, 過程順利, 無想像中咁困難, 傷口亦似乎慢慢癒合, 下星期四再覆診, 希望可以快d好返, 去游水, 去little gym!