親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
嚇到喊
媽媽遊深圳
今日仲有少少咳, 少少鼻水, 媽媽比左5ml收鼻水藥水我飲, 果然有睡意, 服藥後兩小時我就扭計, 又再入房覺覺, 一直訓到中午1:45, 先起身食飯. 飯後同媽媽去海麗村行下, 我地先去買麵包, 媽媽叫我負責捧住個托盤, 等媽媽可以將包包放上去, 但我一見到包包就心急想食, 媽媽教我要先比錢, 才可以食. 比左錢我馬上揀左個蒜蓉包食. 然後去百佳買餸, 比錢時媽媽漏左袋麵包在購物車, 排後面的太太叫住我地, 佢稱呼我做妹妹, 昨天在沙田被誤認作姐姐, 今日又被人叫妹妹, 我真係咁似女仔咩? 去完百佳當然去睇玩具, 媽媽見我好鍾意一套洗車場組合, 問我要唔要, 我話"要", 問我乖唔乖, 乖先買, 我話"乖", 然後媽媽比八達通卡我自己doo, 買左真係好乖, 我和媽媽手拖手行返屋企, 玩車車. 調琴師傅Thommas哥哥今日來了, 幫鋼琴調音, 哥哥話鋼琴有點損耗, 最好入廠修理, 要拆走琴膽, 最少一星期無琴用, 媽媽正為呢件事煩惱中. 晚上和媽媽玩新買的玩具, 我突然心血來潮, 講左好多食物名, 芝士, 粟米, 麵包, 沙律, 壽司, 蕃茄...玩完就沖涼, 我見到水點一滴滴從浴簾滴落來, 我又開始數數目了, one, two, three, four....一直數到thirteen, 似乎開始有點數學概念了.
飛曱甴3號
今天爸爸帶我去荔枝角公園
https://bb5.babyhome.com.tw/UPLOAD7/117460/122525.83493189.74147.wmv
https://bb5.babyhome.com.tw/UPLOAD7/117460/122525.83492367.82070.wmv 教育局突然宣佈全港幼稚園, 小學停課兩週, 連帶令校際音樂節比賽取消了, 媽媽有三個水準好高的學生就係今日和明日出賽, 多月苦練就等台上一刻, 有望再奪錦標的諾澄姐姐今早去到會堂撲個空, 現在連有無機會恢復比賽都係未知之數, 不過即使再有安排都未必能發揮最佳表現, 正所謂: 一鼓作氣, 再而衰, 三而竭, 真係天意弄人! 學校停課, 婆婆叫媽媽唔好帶我返playgroup了, 今早起得比較晏, 媽媽就同我玩認字卡, 原來phonics kingdom的卡卡我已經認得好多了, 182張卡已經用左113張, 屋企的教材已經用得七七八八, 早前買的"國家地理兒童百科" 反應一般, 要雪藏一輪再用, 媽媽睇中GC reader, 覺得適合我, 我睇過網上demo都好喜歡, 跟住唱daddy! daddy! mami! mami! 相信媽媽好快會買GC reader! 下午和媽媽去delifrance嘆下午茶, 我喜歡去delifrance, 因為可以睇住d姐姐整包包, 媽媽請我食蜜桃橽, 但我竟然將表面的糖醬當係搽面的cream, 搽上自己塊面, 搞到黐立立!
爸爸媽媽終於都趕上時代了, 學識用3G視像電話, 每月有30分鐘通話時間, 爸爸返工時有時會打比媽媽, 媽媽出去教琴時又會打比爸爸, 目的只係想見下我, 透過電話見到爸爸媽媽, 感覺好新奇, 聽到聲又見到仔仔個樣, 令人更想快d返屋企, 現代科技實在太好了! 今晚我地去長沙灣的細細間西餐廳食dinner, 其實我已經食飽, 只係陪爸爸媽媽食, 老闆娘好喜歡小朋友, 每次都比包包我食, 等我可以乖乖地坐, 今晚仲比左半碗仔cream soup我飲, 我用個匙羮仔好安靜地自己飲, 飲完一碗再一碗, 爸爸媽媽可以好慢慢据羊扒, 姨姨都讚我乖仔呢!
今日媽媽約左豬姨做facial, 情商婆婆過來湊我, 婆婆準時十一點前出現, 然後我地三人一齊落街, 婆婆和我去會所玩, 媽媽乘機逃去. 呢種情況平均1.5個月發生一次, 係媽媽難得的休息日, 面部護理加全身按摩, relax一下好重要! 然後媽媽又幫襯楊幽幽醫生剝埋另一隻智慧齒, 楊醫生近日又被空姐投訴箍牙失敗, 要接受牙醫會紀律聆訊, 媽媽被時都有d猶豫, 好唔好再揾楊醫生, 但過去幾次療程都做得好好, 媽媽決定繼續信任楊醫生, 果然今次拔牙完全在無痛狀態下順利完成, 剝牙連洗牙, 今日又用左$1350! 兩隻惱人的智慧齒已經消失, 媽媽的智慧將會加倍提升, 下顎仲有一隻出左一半唔出, 暫時唔搞佢住, 要搞的話都唔慌有好事發生, 一係蛀牙, 一係牙肉發炎, 千祈唔好出現! 婆婆話我今日非常乖, 會所玩完返來就食飯, 食飽就自己飲水, 玩完玩具自己clean up, 仲識分門別類, 眼訓就熄電視入房訓 (但當時婆婆正在睇緊"萬家燈火", 並唔係我的dvd), 媽媽返來我就起身, 十分有規律, 婆婆大讚我今日表現好好, 係個乖BB呢!
唔知係咪流感關係, 今日playgroup只有我和maggie兩個, ms hazel有更多時間同我地傾計, 放學時ms hazel匯報返比媽媽聽, 話我好多野講, 仲全部係英文, 因為比多左注意力在我身上, 可以引發到我講更多野, 佢又話平日我會在課室走來走去, 搞呢樣搞果樣好唔專心, 但其實我聽到ms hazel講乜野, 知道要做乜野. 可能今日人少, 我得到ms hazel好多注意力, 放學時顯得特別興奮雀躍! 夜晚爸爸睇電視, 無意中轉台到ATV world, 播緊西片Big Fish, 我本來玩緊玩具, 聽到片中一男一女在對話覺得好有興趣, 仲想跟住黎講, 但我只捉到句子裡其中幾個字, happy, house, thank you, yes! 唔知我係唔係鍾意睇西片, 媽媽準備左好搞笑的"朱古力掌門人", 過幾日會播比我睇睇!
媽媽在吉之島十蚊店買的煎pan玩具, 實在太好玩了, 今日又攞出來玩, 我一見到隻鑊, 就講: 蛋蛋.. 香腸.. 菜菜.. 阿條(薯條), 我又話要"煮mum mum", 比我的四個朋友食, 包括Minnie(通常錯叫Mickey), 阿wo(電動小狗), 阿la(Koala)和史迪仔, 玩公仔和煮飯仔唔係女孩子的專利, 我地男孩子都可以煮得一手好餸! 話說回來, 媽媽今日收工返來第一次聽見我講"煮mum mum", 之前我都係講food...cook, 相信係今日婆婆同我玩的時候教我的. 話又再說回來, 婆婆的英文進步左唔少, 甚麼up呀, down呀, sock, shoe...等等, 都學識左了, 公公也學識了car, 相信短期內大家的英文詞彙都會增加不少!
今日要返幼稚園註冊, 所謂註冊, 其實即係比錢, 買校服, 書包, 校車...全部都係錢! 其實純粹放低兩張支票, 根本唔需要全家出動, 不過媽媽想我多早d認識學校, 就帶埋我來, 為左隆重其事, 媽媽仲自製了一日假期, 今日全日休業, 暫停學琴服務一天. 一打開學校鐵閘, 還未入去, 我兩眼已經發晒光, 馬上衝往playgroup玩呀玩, 最好玩的係兩條路軌, 我坐住車車可以沿住路軌衝落去, 非常刺激! 我玩到成頭汗, 媽媽叫我入課室揾爸爸, 我唔入, 但媽媽叫我入課室玩玩具呢, 我就擒擒青走入去. 課室有好多玩具, 但媽媽叫我唔好搞, 只可以睇, 我都乖乖的無亂搞, 但一見到好多煮飯仔玩具, 我就忍唔住要煮返兩味! 我逗留左足足一個鐘頭先玩夠, 我本來唔肯走的, 但眼訓了, 媽媽話要返屋企訓覺, 我竟然走去學校大門企圖自行打開鐵閘! 然後我同書記Ms Ng講拜拜就搭地鐵返屋企, 同之前兩次一樣, 去完幼稚園總係唔肯訓, 今次只係搭車訓左半個鐘, 返到屋企完全無訓過! 晚上我地返爺爺嫲嫲屋企, 我依然係咁搗蛋, 電視播六合彩, 我最鐘意六合彩了, 大叫"波波! 波波!" 波波轉呀轉轉轉.... 然後一個個跌出來, 笑到我卡卡聲 (唔知有乜好笑!?), 我爸爸都係六合彩fans, 但佢比較重視轉出來的數字, 多於果d紅綠藍色的波波, 若然有一期六合彩佢忘記買, 佢就會失驚無神大叫"哎吔!!! 又唔記得買六合彩添!"
遙控車
跌倒, 無事!
自己碌卡
我雖然頑皮, 但有一件事係值得稱讚的, 就係我肯食肯訓, 小朋友食得訓得, 起碼媽媽唔洗愁. 我最近沉迷睇barney, 午飯時間總要睇, 之前睇好多次都唔肯關電視, 但呢幾日我乖左, 睇夠就自己關機, 話要:"覺覺", 然後自己入房訓晏覺. 呢一覺可以訓2-2.5小時, 對媽媽來說已經好好, 可以休息下, 有時間仲可以同我一齊訓添! 媽媽在吉之島十蚊店買左d好野, 係一個煎pan玩具, 附有一隻太陽蛋, 一條紅腸, 一塊菜菜和兩條薯條, 太陽蛋係我至愛, 其他食物都好喜歡, 呢個十蚊玩具令我愛不釋手, 由荃灣攬到返屋企呢!
肥妹表姐逢星期一放工後在我家出現, 名義上來學琴, 實際係來食零食, 玩電腦, 同埋同我玩遊戲. 肥妹表姐係幼稚園老師, 為人也很幼稚, 今日我地在家捉迷藏, 屋企咁細, 只有廁所, 睡房和電腦房三個地方可以匿, 表姐匿下呢間房又匿下果間房, 但我次次都揾唔到, 好水皮, 就係咁我地兩個在豆腐潤咁大的地方玩左好耐, 一玩呢d傻瓜遊戲, 我就笑到收唔到聲呢!
媽媽最近為校際音樂節比賽不停鞭策學生, 就快發癲了, 幸好同學們不負所望, 第三場比賽已經有一位姐姐拿了季軍, 其他同學表現都好滿意. 下星期四竟然在同一場賽事有三位同學出賽, 好刺激啊! 今日星期日, 係媽媽搏殺日, 同時又係"婆婆與我日", 食過午飯婆婆帶我四圍去, 我在海麗村兒童遊樂場爬高爬低, 婆婆捉我唔到, 就叫一個八, 九歲的姐姐捉返我落來! 我地又去買麵包仔, 去7-11買益力多, 去巴士總站睇巴士, 行程非常豐富! 媽媽收工打電話返來, 竟然係我接電話, 電話傳來一把嬰兒聲, 長長的"喂~~~" "媽咪~~媽咪~~" 令疲倦的媽媽甜在心頭! 我成個禮拜無玩playmate機了, 媽媽已經放心比我自己將卡放入機, 我仲自己揀喜歡的卡來"碌", 我已經對d舊卡好厭, 今日專揀未睇過的新卡, 我對stove, refrigerator, oven好有興趣, 可能同食有關, 碌到day and night的卡時, 我把頭伏在梳化, 說"sleep, 咕咕~~~" 然後又說"morning!" 媽媽讚我叻仔! obi借我幼兒園的兒歌cd, 我好喜歡聽, 有幾首歌仔配有大自然的聲音, 聽到小河流水聲音, 我說:water, 行雷落雨我說:rain, 聽cd時我通常同時在玩玩具, 但其實我一心幾用, 已經將聲音記入腦了.
爸爸話今日係同媽媽拍拖八週年紀念, 2月29日係好易記的日子, 四年先有一次, 於是今日係爸爸媽媽第二次的拍拖紀念日! 無無謂謂的紀念日實在太多, 只不過2月29日特別好記, 爸爸就提一提, 其實都無特別, 幾十歲人, 兩隻老野, 有咩話慶祝唔慶祝, 咪又係照常返工放工上堂落堂, 但求個仔聽教聽話, 醒醒目目, 早日戒片, 慳返d錢錢, 就飲得杯落!
今日我訓醒晏覺, 見到有個穿窿的紙巾盒放在飯枱上, 我好開心地講:"tunnel!" 原來喜歡花錢買玩具的媽媽今日學人廢物利用, 用紙巾盒剪出一條隧道, 比我的thomas四大天王玩捐山窿! 媽媽買左一隻baby bumblebee出版的vcd比我, 係教相反詞的, 呢套opposite實在令我非常興奮, 我自從接受左閱讀文字訓練之後, 對生字好有興趣, 屋企的相關教材幾乎已用晒了, 呢套baby bumblebee系列就正好補充已經乾塘的教材庫. 呢套opposite除左有我學過的yes/no, fast/slow, up/down, open/close之外, 仲有我未學過的mine/yours, in/out, on/off, big/little, top/bottom, 通常我接觸新知識後, 十日至兩星期後我便會突然運用, 當媽媽以為我無唔入腦, 學唔識, 我就會突然間爆發出來, 這是經常發生的正常現象. 今日媽媽陪我訓晏覺, 媽媽陪住我會訓得好耐, 今日竟然訓到3個半鐘, 夜晚就慘了, 十二點幾都唔願訓, 直到爸爸返來我先訓著.
今日同婆婆落街行下, 撞啱媽媽的學生同佢媽咪來上堂, 婆婆叫我叫姨姨, 我唔叫, 姨姨然後攞出一條餅餅, 送比我, 我就拿拿聲叫"姨姨!" "姐姐!" 有好處先叫人, 現今的細路真係現實, 爸爸媽媽要好好教育一下我! 婆婆買左好多鴨心, 今晚用左三個煮飯比我食, 我好鍾意, 婆婆煮的飯係好味過媽媽好多的, 但我比較鍾意返婆婆家同大家一齊食, 同大人食一樣的飯餸, 覺得自己好勁, 心情特別興奮!
玩口水
喜歡花生醬
西方人打乞嚏, 身邊的人會講"bless you!" 中國人打乞嚏, 身邊的人會講"好o既!" 我想意義大致相同, 即係祝福打乞嚏的人唔好傷風, 我打乞嚏, 媽媽會馬上講"好o既!" 我唔知打乞嚏有咩咁好, 總之就係好! 久而久之(其實只係呢幾日的事), 我一打乞嚏, 就會自己講埋"好o既!" 之前我每次打乞嚏之後, 就會講"乞嚏", 但我將咳咳和乞嚏混淆了, 咳咳完後又講"乞嚏", 後來弄清了咳咳和乞嚏的分別了, 咳咳就講"咳咳", 乞嚏就講"乞嚏", 然後再補加一句"好o既!" 咁先算完整. 媽媽的學生洭龍哥哥是我最喜歡的哥哥, 今日佢又來了, 我馬上上前叫叫聲"哥哥", 呢種禮貌行為係洭龍哥哥獨享, 就連爸爸, 婆婆, 我都唔會主動上前叫人, 我同洭龍哥哥特別投綠, 佢今日帶左搖搖表演表我睇, 我笑到卡卡聲呢!
今晚爸爸媽媽又去大家樂打邊爐, 我已經在家食過飯了, 所以我只係去陪坐, 在快餐店打邊爐令我很好奇, 肉肉, 菜菜, 麵麵都放在隻船上, 職員姨姨會捧個爐過來, 仲用支槍點火! 然後熱氣騰騰升上來, 爸爸媽媽把肉肉呀, 菜菜放入窩, 撩撩下, 一陣就食得, 爸爸比我一隻碗仔, 媽媽分少少雞柳, 墨魚滑比我, 我用牙簽吉吉. 然後我又食米線, 但弄得一地都係, 要清潔姨姨幫我清理, 姨姨話我靚仔, 我故作怕醜, 在傻笑, 姨姨叫我唔好怕醜, 因為要溝女! 臨走時我仲同姨姨飛吻, 媽媽從來未見過我飛吻, 因為無教過我呢個動作, 唔知點解我突然咁熱情!
今個月爸爸返晏晝更, 每晚只有我和媽媽相依為命, 雖然我同爸爸聚少離多, 就快唔認得佢, 但有個好處, 就係每晚可以早d食飯, 早d沖涼, 早d訓覺! 平時我沖完涼, 玩一陣就自己入房訓, 已成習慣, 今晚媽媽將沖涼時間提早一個鐘頭, 我如常沖完涼, 玩一陣, 入房訓覺, 無為意生理時鐘撥快左一個鐘, 就係咁我好早就訓左, 媽媽不知幾高興!