親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
我媽媽好喜歡買教材, phonics kingdom都買左一年, 第一(learning alphabets)和第二(alphabet sounds)階段大致完成, 然後暫停左一段時間, 只係間中聽下cd, 今日媽媽突然想試下第三階段, learning short vowels, 記得之前試過, 但我無興趣, 今日再試, 竟然出奇地專注, 所謂short vowels, 即 -at, -ad, -an, -et, -en....之類, a cat and a rat sat on a mat一句句rap出來, 我覺得好有趣呢!
一年一度書展係盛事, 等足一年, 等到頸都長, 媽媽今日晨早起來, 賣甩我和爸爸, 隻身出發. 書展的兒童館照舊設在hall 5, 迪士尼美語世界和English Time一如以往, 佔據最有利位置, 非常搶鏡, 我好鍾意的Noddy就執輸d, 縮埋一二角, 媽媽的目的係搜索中文字卡, 但無驚喜, 無收穫, 反而買到東西圖書出版的"good baby好寶寶說英語"的國語版, 仲平過書局一截, 然後再買廣東話兒歌一套, 陪eco姨姨和zane叔叔在Gift Child為左套phonics kingdom點解唔包182張flash cards一事, 糾纏了好久, 睇下手表, 原來已12:30, 媽媽與eco姨姨分道揚鑣, 高速到hall 1打個白鴿轉, 買了兩本李碧華小說(八折), 就急步離開, 此時是1:00, 人潮已不斷湧入, 早走早著. 爸爸因為晚上要去睇蝙蝠俠, 將我帶到婆婆家, 晚上媽媽教琴回來, 食埋飯就接我返昇悅居啦, 因為太熱, 又買左書, 我地搭的士返屋企. 不可不提的係我今日又將媽媽放左床頭的眼霜扭開蓋, 四圍搽, 爸爸發現時已經一滴不剩! 前兩日我嘔吐整污糟左個攬枕, 媽媽攞左去洗, 今晚媽媽比返我, 但發現原來仲未乾透喎, 媽媽問我攞返, 但我攬到實, 仲話:"It's mine!" 其實個攬枕係媽媽的, 用左好多年, 但已被我據為己有, 有時和媽媽爭呢個攬枕, 爭唔到, 我就話:"Share!" 好搞笑呢!
洭龍哥哥生日
今日表姐開始放大家, 媽媽下令佢每日來我地屋企練琴, 原因係佢好快要考六級琴, 但水準令人擔心, 唯有實施地獄式訓練, 表姐和媽媽一同來湊我放學, 我放學出來見到媽媽, 好開心, 但一見到表姐, 就頭耷耷, 記得佢上星期鬧鬼我, 有心理陰影. 我地去樓下食日式便當, 我當然又係食滑蛋豬扒定食, 然後我地去萬景峰新開的大商場"荃新天地"參觀, 地方幾大, 但無咩好睇, 最後扭左隻蛋, 係thomas毛巾仔, 我鍾意! 扭蛋機竟然可以用八達通, 好先進! 然後再去荃灣廣場, 我第一次去吉之島, 有好多toys, 最吸引我當然又係thomas火車, 今日第一次見到女仔火車頭rosie, 佢係紫粉紅色, 車卡載左好多balloons, 我馬上愛上了, 媽媽都喜歡, 我地於是又帶左佢返屋企. 返家途中我訓著了, 但小巴未到家, 我就醒左, 全程訓左唔夠30分鐘, 返到屋企又鬼打咁精神, 仲落會所同雅雯跑左一大餐, 晚上飯後我呈現呆滯, 媽媽叫我入房訓啦, 我就乖乖地入房, 以為好快訓著, 點知完來係假的! 唔知從何以而來的精力, 最後撐到十一點, 先訓著!
發泡膠
點都唔落未精
手機陷阱
有曱甴!!!
今日約左豬姨去盈輝台飲茶, 我先食一塊花生醬包打底, 然後去酒樓飲茶, 今日食量都唔少, 食野時好乖, 但我正一"屎忽唔連櫈", 一食飽就落地, 叫到叫唔住, 呢種情況已經見怪不怪, 都唔需要詳細描述. 然後去會所玩, 盈輝台會所兒童室細細間, 但今日好多小朋友, 氣氛熱鬧, 令我情緒高漲, 然後上豬姨家打搞, 我第一次睇now TV的迪士尼台, 好多野睇, thomas, barney, noddy.. 全部都係我鍾意的節目! 媽媽又示範微波爐自製薯片, 我都唔蝕底, 食左三塊. 搞下搞下已經五點, 過晒我的訓晏覺時間, 但我都唔見攰, 媽媽拖住我一齊去荔枝角公園出面搭小巴, 返昇悅居, 話咁快就到. 返到屋企已經呈現扭眼訓狀態, 但我堅持不睡(唔知為乜), 食支奶, 糾纏至六點半, 先肯訓, 媽媽驚我訓到唔知醒食飯, 好彩九點前我醒左, 乖乖地食飯, 夜d爸爸同我剪頭髮, 我現在肯比爸爸剪頭髮了, 爸爸掌握到剪髮技巧, 今晚足足剪左半個鐘, 媽媽讚我好乖呢!
今日搭小巴去荃灣返ms hazel的playgroup, 沿途我都好開心, 但一落車, 我就同平日唔同, 表現得好緊張, 伏在媽媽膊頭, 搭升降機上joyful時都有點不安, 但又願意自己走入課室, 總之十分奇怪. 見到ms hazel和小朋友, 我馬上喊出來, 攬住媽媽唔放, ms hazel抱抱我, 點知我嘔左出來, 嘔晒今早飲的奶奶, 我和ms hazel的衫都污糟晒! 嘔完出來我舒服晒, 竟然唔再喊, 清理完之後我換上借來的衣服, 竟然同ms hazel穿著一樣的淺藍色joyful制服! 然後我又如常上課, 若無其事. 媽媽買左沙灘玩沙套裝比我, 但我今年仲未去過沙灘, 唯有在浴缸模擬一次, 自行幻想, 呢套玩具令我諗起sand和beach, 估唔到咁耐, 我仲記得呢兩個生字呢! 晚上媽媽煮我最喜歡的三文魚頭湯, 半邊三文魚頭竟然加左價, 由15蚊加到18蚊! 好貴呀!
搭小巴, 食壽司
今日終於無落雨, 媽媽同我搭地鐵返青衣, 我成日話想"搭train", 今日終於得嘗所願, 沿途不停講野, 怪叫, 好嘈, 我最近搞清楚地方名, 識講搭地鐵去"青衣站", 搭大舅父車回家, 識講"荔枝角", 見到昇悅居, 就講"返到屋企", 但有時搭地鐵會無端端用國語講"淡水", 原因我經常翻睇上次去台灣旅行, 搭捷運遊淡水的片段, 所以搭地鐵時常會以為去左淡水! 中午婆婆煮菠蘿炒飯, 食到大半, 突然同媽媽講想"自己嚟", 我自己食飯係好叻的, 但媽媽好怕我搞到周圍飯, 通常都係餵我, 但我已經大個仔, 唔鍾意被餵. 夜晚餐飯仲好餸, 六餸一湯, 我好開心, 大舅父考我食物名稱, 蝦, 粟米, 火腿, 青豆我都答對, 只係節瓜講錯了菜菜, 太多好餸, 我驚食唔切, 叫大家"慢慢食"!
圖中所見的係一個薯片製作器, 係媽媽今日買的, 我地去左june姨姨屋企一齊試用, 只需要將薯片去皮, 然後用薯片器的削刀切成薄片, 再一塊塊插入圓形烤籃, 一條坑放一塊, 之後放入微波爐, 750W大約5分半鐘, 就食得! 仲好脆添! 想要少少味道, 可以將薄片沉一沉鹽水. 但我覺得原味最好, 我同雅雯搶住食呢! 毋須油炸, 但都會熱氣, 少食多滋味! 呢個薯片器好玩又神奇, 媽媽一次過訂左十幾個(因為好平), 有興趣的朋友請快d叫媽媽留返一個比你, 手快有手慢無囉!
我在1歲半時開始認字, 現在已經認得250-300個英文單字, 但中文字還沒有開始, 媽媽打算今個月尾書展認真搜羅下中文教材, 既然英文可以, 中文亦同一道理, 只係媽媽疏懶, 欠系統, 真係要快快手, 錯過了0-6歲黃金學習期, 就恨錯難返. 今晚有少許驚喜, 我在看一本好喜歡的flip-flap圖片的時候, 能看文字讀出"three socks", "seven spoons", "brown truck" 等, 以前只能讀出單字, 今次仲係自發性讀出, 媽媽好開心呢!
今早又落雨, 本來諗住返playgroup補堂, 然後同婆婆飲茶, 點知黃色暴雨, 行程取消, 真掃興, 中午後婆婆來了, 我一見到婆婆, 就知道媽媽要出街, 於是我攬住媽媽, 唔比佢走, 婆婆就話: "一齊去買雪糕囉!" 買雪糕喎! 梗係第一時間著鞋! 然後我地三個一齊出去, 出門口時我拖實媽媽, make sure佢係同我一齊行, 先放心! 我一手拖媽媽, 一手拖婆婆, 紥紥跳哈哈笑, 走入ok便利店, 我媽媽趁機離開, 有雪糕就連阿媽都唔要, 媽媽在對面馬路望返過來, 見到婆婆和我從便利店離開, 我好謹慎咁攞住雪糕返入昇悅居, 不時回頭望下望下, 媽媽認為我係揾佢, 但係真唔係就不得而知, 總之婆婆話, 我返屋企食完杯雪糕, 就自動入房訓晏覺, 訓足兩個幾鐘. 夜晚扭計, 因為我想上網睇starfall的ABC, 其實係教phonics, 但媽媽好攰, 陪我睇左少少, 頂唔順入房攤抖, 當然又被我糾纏, 最後我又喊, 唔肯沖涼, 無次扭計都好惡搞, 以前過一陣就唔記得, 現在大個左少少, 熄左電腦都仲記得, 係都話要睇kitchen(k for kitchen), 又喊左一輪, 媽媽無我咁好氣, 採取忍字訣, 最後我屈服, 入房訓覺, 扭唔贏就大覺訓, 都幾唔錯.
今早又落大雨, 我地又無返playgroup, 好彩joyful有得補堂, 儲儲埋埋我有4堂未補, 明天一定要返, 因為約左婆婆在荃灣飲茶. 我八月就要讀幼稚園了, 媽媽緊張到不得了, 最近有意無意開始將學校和校巴概念灌輸比我, 一提到"學校"二字, 我就會諗起stafford, 早幾日坐june姨姨的砵砵車, 講起學校, 我以為去stafford, 不停講"stafford! stafford!" 很傻. 今日媽媽上網睇新聞, 關於李小龍故居, 我見到張圖片, 見到間屋, 以為係stafford! 媽媽話: "唔係學校嚟架!" 然後媽媽就開左d在學校影的相比我睇, 我好開心哦, 話:"stafford 好多野玩!" 媽媽第一次聽見我識得咁講, 好開心呢!
媽咪幫!
節目豐富
星期五臨訓不要食奶
遊車河+游水
今晚媽媽收工, 又去葵芳元氣壽司等我和爸爸, 媽媽趁我地未到, 靜雞雞在偷食牡丹蝦, 呢個時候我出現了, 我一見到媽媽就衝埋去:"媽咪! 食壽司!" 然後用0.9秒極速將雙腳插入元氣的特製幼兒櫈, 媽媽已經預先叫定三文魚頭湯和玉子壽司, 我最鍾意玉子壽司, 喜歡表面果塊甜蛋, 食完又想再食, 見到迴轉輸送帶有玉子壽司出現, 我大叫:"雞蛋!" 然後從櫈彈起身, 伸手去攞, 當然被即時制止. 今晚有千層忌廉蛋糕, 但我認為食迴轉壽司不應食蛋糕, 堅拒罷食, 真係少有. 夜晚訓覺前, 我攞返我最鍾意睇果本"寶寶的食譜"(一本介紹嬰幼兒飲食的書), 看見一舊飯團, 諗起今晚好開心, 不其然細細聲講: "食壽司...食壽司.." 看來我已經變了壽司狂魔.
媽媽的學生阿童姐姐養左一隻八哥狗狗, 名叫蕃薯, 今日趁假期(其實都無話假期唔假期, 媽媽鍾意幾時放假就放假), 帶我去姐姐屋企玩, 等我同狗狗交流一下. 搭升降機上樓其間, 有個婆婆撩我傾計, 我的間歇性怕"生保"又發作, 躲在媽媽屁股後面, 十足裙腳仔, 到了姐姐的家, 我一出走廊又咦咦哦哦, 有點唔like, 陌生環境嘛, 唔怪得我! 誰知姐姐一打開門, 我見到姐姐媽咪抱住蕃薯, 我就"DOG!"一聲, 大踏步走入人地屋企, 急不及待同蕃薯認識打, 人狗馬上打成一片, 蕃薯拍得住我咁活潑, 我地差點扭作一團, 有幾次佢撲過來, 動作大d, 嚇得我呱呱叫, 我又怕又要玩, 初時姐姐叫我咪除鞋, 最後我連襪都除埋, 當左係自己屋企! 最離奇的係, 我見到蕃薯有一條塑膠玩具骨頭, 我執起講:"It's a bone!!" 媽媽第一次聽我講完整的英文短句, 大吃一驚! 我又摸仿姐姐, 將骨頭和膠波拋向蕃薯, 人類拋東西, 狗狗應該會跑去執返比主人, 但蕃薯無咁做, 有幾次仲係我代替佢執返來呢! 然後搭小巴返青衣, 在婆婆家食餐飯, 媽媽再同我搭地鐵返屋企, 的士, 小巴, 地鐵都搭齊, 真係好, 最近我見到天空有飛機飛過, 鍾意講"搭飛機!" 媽媽話遲d先, 因為幼稚園學費貴, 有排都無得搭飛機去旅行嘞, 哈哈!
今日睇barney dvd "齊齊做運動", 學識左打保齡球, 我摷返自己果套保齡球玩具, 係婆婆買比我的, 應該係我得幾個月大時買的, 我一直都唔知呢d膠樽和波有乜用, 兩年後今日終於大派用場. 初初我唔知點玩, 拿住保齡樽亂掟, 媽媽睇唔過眼, 試範一次比我睇, 我馬上明白了, 我將三個樽排成一直線, 然後拿住個波撞埋去, 撞冧晒, 就"YEAH! 哇哈哈哈~~~" 無錯, 我係波不離手咁用個波一次過掃冧晒, 就當自己贏左, 打保齡真係有益身心的運動, 消耗左我好多體力, 媽媽當然好高興. 晚上去藥房買野, 獅王兒童牙膏送thomas贈品, 我馬上拿去比藥房的老細叔叔, 我將牙膏雙手遞比叔叔, 話:"比錢! 比錢!" 叔叔話:"好呀, 錢呢?" 然後攤大手板問我攞錢, 但我無錢, 於是我又比返隻手板佢! 我雖然無錢, 但最後都買到牙膏, 值得一提是我最近刷牙好合作, 肯比自己刷, 又肯比媽媽幫我刷, 牙齒乾淨晒!
婆婆有個怪習慣, 就係在媽媽教琴時抱我入廚房食飯, 婆婆會放我坐在星盤旁邊, 餵我食飯, 婆婆每星期日都會煮好味的飯比我和媽媽, 有時係粟米肉粒飯, 有時係蕃茄蛋牛肉薯仔飯, 好味過媽媽煮的多多聲, 我一邊食, 一邊講"好味! Yummy!" 氹得婆婆好開心. 今日我在廚房用膳其間, 發現左一包快熟通心粉, 婆婆竟然打開比我當玩具玩, 我如獲至寶, 記得以前在協康會playgroup玩過通心粉, 已經係一年多前的事, 我食飽飽, 好開心地攞住包通粉出廳玩, 我放入杯, 又倒入碗, 忽然間又諗到可以放入thomas火車的車卡, 叫arthur火車拖住一車通粉行走, 每一粉通粉我都當係寶, 唔小心跌左一粒, 拿拿聲執返, 一粒都不可少. 媽媽夜晚收工返來, 見我仲還緊通粉, 婆婆話我四點訓醒後玩到夜晚! 不過通粉數目明顯比中午減少好多, 當然係我將通粉不斷轉移位置, 中途流失了不少, 媽媽找來一個名貴朱古力吉盒, 我將通粉一粒粒放入盒中, 珍而重之收好, 好似女士們收藏鑽石一樣, 留返聽日再玩.
我係雪糕狂魔, 大家都知, 但大家可能唔知我唔係乜野雪糕都食的, 呢一點媽媽都係最近先知. 我第一次食雪糕, 係一歲唔夠, 大約十個月大, 在中環天星碼頭(已故)出面的富豪雪糕車, 在藍色多瑙河音樂襯托下食左我人生第一口軟雪糕, 其後爸爸媽媽食雪條, 雪糕, 我都會上前要求分一杯羹, 漸漸養成我雪糕的熱愛! 兩歲以後我可以獨享一杯雪糕, 最先買雪糕比我的人, 應該係表姐, 佢每次都買雀巢呍呢拿, 香芋之類, 媽媽多數買美碌麥精味雪糕(最近好難揾), 有時又會買維記豆腐/芝麻雪糕, 呢幾隻牌子我都超級喜歡. 上月去台灣, 在淡水被暴雨圍困, 我地在7-11避雨, 媽媽買左杯只值18新台幣(HKD4.5)的小美冰淇淋給我, 食得準準有味. 奇怪的事情發生在台北101觀景台, 媽媽斥資100新台幣買左一杯瑞士高級品牌movenpick草莓味雪糕比我, 我興致勃勃準備品嘗高級雪糕, 點知試左半啖都唔肯再食, 媽媽一試, 嘩! 好酸! 媽媽唔信我有雪糕都唔食, 第四日在微風廣場再買一杯movenpick, 今次係香蕉味, 點知我一啖都唔肯試, 原來100%天然的雪糕, 唔係咁易入口, 唔係人人識得欣賞呢! 上次在eco姨姨屋企, 有haggen daaz蜜瓜味, 有原粒蜜瓜, 媽媽覺得好正, 叫我食, 點知我都係唔鍾意, 於是以後爸爸媽媽婆婆都學精左, 只買10蚊三杯的雀巢迷你雪糕杯仔, 貪佢夠細杯, 夠平!
有小朋友的家庭豈能無攝錄機! 我家的攝錄機係我出世前買的, 前後用左兩年半多d, 就壞了, 想修理, 但原來時代已經變晒, 用dv帶的攝錄機原來已經out晒, 修理都嫌費事, 早前去台灣旅行, 問eco姨姨借用數碼攝錄機, 質素比用dv帶的舊款大牛龜好好多! 由於星期六我要返stafford參加迎新會, 媽媽千叮萬囑爸爸要快d買新攝錄機, 終於爸爸揀定左一部jvc咩咩型號30GB數碼攝錄機, 今晚我地全家出動, 的起心肝去旺角買機, 媽媽用信用卡積分, 慳左六百幾蚊, 終於買到一部好型的攝錄機, 仲攞左好多贈品! 然後求其揾個地方食飯, 爸爸叫左蒸飯和三寶麵, 媽媽比蒸飯我食, 諗住實啱我口味, 點知我食左兩啖就唔食, 同爸爸講:"唔該, 麵麵!" 原來我比較鍾意食麵. 今晚我心情十分high, 搭車, 食飯, 回家途中都好嘈, 好多野講(只有媽媽聽得明的英文!), 返到屋企再食一杯豆腐雪糕, 好滿足!
今天很悶
今日媽媽帶著我去雅雯屋企, 接埋佢去會所玩, 我以為有得去雅雯屋企玩, 點知無得入屋, 唔開心, 不過有得去會所玩, 跑下跳下, 運動下身體, 都幾好, 不過我最近不守秩序, 時常在會所搗亂, 最離譜係故意推跌晒小朋友放在枱上的煮飯仔玩具, 有幾次仲翻枱, 令媽媽好煩惱. 雅雯話:"isaac唔乖呀!" 係喎, 我確實係唔乖, 有時會有d細bb來玩, 媽媽最怕我搗亂, 整親bb. 我仲係bb仔爬下爬下時, 在會所玩都遇到好多2-3歲唔守規矩的細路, 當時爸爸媽媽都好緊張, 怕我比人整親, 現在調返轉了, 不過媽媽現在仲緊張過以前, 因為現在我有點不受控, 好容易會同小朋友發生磨擦, 一唔對路媽媽就會衝出來調停, 適當時加以制止, 以免發生"流血衝突"!
今日返到joyful, 如常好開心自己行去課室, 敲門, 但一入到課室見到ms hazel, 我就攬實媽媽, 唔比媽媽走, ms hazel話應該係上星期四鬧過我, 我仲記住, 最後媽媽將我交比ms hazel, 走左, 我於是大喊! ms hazel抱住我, 比巴士我, 但我都喊唔停, 媽媽在電梯大堂都聽到我劏豬的喊聲, 有d擔心, 怕我喊到嘔. 個半鐘頭之後媽媽返來, 見我埋頭苦幹在填色, 無異樣, 事後ms hazel話我只係喊左一陣, 相信上星期被罰一事起左作用,今日好乖. 回家途中已經攬住媽媽訓著左, 又無食lunch, 梗係啦, 今早又八點未夠醒左, 平時我最少訓到九點, 話時話, 八月就開學, 到時每日返9放12, 全家的作息時間一定要調整下. 夜晚去長沙灣道的speed cafe据扒, 呢間餐廳仔的羊扒好好味, 生熟程度和肥瘦適中, 頭盤鴨胸沙律和甜品黑芝麻芝士餅, 都好有水準, 連埋餐湯, 餐包和飲品, 都係六十幾蚊, 最重要係老闆娘姨姨好鍚小朋友, 每次都比多一碗湯湯我, 等我自己飲湯湯, 有d勢藝, 唔洗搞住爸爸媽媽用餐, 每次去呢度食飯我都好乖, 坐足全場, 爸爸媽媽好難得可以一邊睇下電視, 嘆羊扒, 令人感動!
