親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
近日又收到不寫日記的投訴，疏於更新日記的原因之一，是媽媽忙於睇電視，自從家裡有了高清和外置硬碟機，媽媽發現預錄節目竟能如此方便，於是不停錄影，係又錄，唔係又錄，待晚上整我訓左後慢慢嘆。高清台重播“夢想飛行Good luck”，媽媽作為木村Fan屎，當然要日日捧場，再三回味。 今晚媽媽太心急想看，而我又自顧自在玩Thomas, 媽媽就提早在晚飯後開始睇。誰知睇左一陣，我突然指住電視用英文講：“Off TV，mami.”媽媽說：“Mami is watching this programme.”媽媽完全無關電視的打算，我再說：“Ok, off TV mami, please.”竟然出動到please, 媽媽拿拿淋熄電視，同我玩泥膠。各位家長記住唔好學我媽媽，掛住睇木村唔同小朋友玩呀，飯後睡前的時間一定要陪小朋友哦！
今日大年初二, 爸爸放假, 我地唔洗去拜年, 想揾地方去玩下,林村許願樹雖然已變成塑膠樹, 但在選擇不多的情況下, 勉強可以一去, 可能我地缺乏誠意, 搭火車去到太和, 先知去林村的路大塞車, 的士唔肯去, 小巴排晒長龍, 唯有折返. 白行一趟我無所謂, 因為又可以搭火車出返九龍. 爸爸決定過海帶我搭電車, 因為我未搭過tram, 好有興趣, 今日終於一嘗所願, 原來電車好少坐位, 仲會叮叮聲, 我話係ring the bell呢! 我地在無乜計劃的情況下, 去到灣仔, 決定睇埋煙花! 爸爸話灣仔海旁少人, 我地又誤打誤撞行到公眾泳池平台, 位置好好, 人唔多, 唔洗霸都有好位. 搭正八點, 煙花砰砰聲飛上天, 我睇到目瞪口呆, 興奮得大呼小叫, 又叫又跳, 全場最嘈就係我呢! 一直睇到最後大堆煙花連環發出, 完滿結束了, 我唔開心, 扭計要再睇, 但媽媽叫我明年請早. 完場後又有得搭多轉電車, 到中環搭地鐵返屋企, 今日搭車的行程佔多, 我好滿意, 一沖完涼就大覺訓, 聽日仲有其他節目, 快d休息先得.
Happy牛year!
三歲的細路真係幾麻煩, 今日係假期第一日, 又係星期五, 媽媽和我如常返婆婆家, 今晚食團年飯嘛, 唔洗返學, 我竟然6:30自動起床(昨晚成十二點先訓呢!) 中午過後已經好累了, 勉強食埋餐飯, 就入房訓晏覺. 我訓到2:30都未醒, 媽媽趕住3:00上課呢, 然後媽媽在我半夢半醒時, 話帶我搭的士返青衣囉, 點知我聽到就喊起來, 梗係啦我都未訓夠, 就要帶我出街, 喊左好耐好耐, 媽媽無晒辦法, 由得我喊一陣, 點知我突然講:"要搭小巴!" 哦..原來想搭小巴! 媽媽於是拿拿聲抱我著襪著鞋, 我仲繼續喊住話:"唔愛的士, 要搭小巴!" 臨出門前不忘攞一包果汁先生橙汁. 下午搭小巴唔係咁容易, 媽媽已經好頭痕, 真係無小巴點算呢? "昭駿呀, 不如我地搭地鐵呀?" "唔愛地鐵!" "咁不如我地搭的士啦, 媽媽好趕時間呀?" "唔愛唔愛!!" 正當媽媽不知如何是好之際, 竟然有架紅色小巴出現了, 我哈哈大笑跳上紅van, 媽媽應該比我仲開心! 我對全部有關交通的東西都很關心, 在葵芳見到一支柱, 我指住話:"呢個燈壞咗!" 媽媽望一望, 原來係一支用布袋包住的交通燈, 唔知真係壞左還是未正式啟用, 我唔講, 媽媽真係留意唔到. 晚上的團年飯菜色非常豐富, 雞, 乳鴿, 魚, 髮菜蠔豉, 大蝦...我主要食雞和魚, 和少少乳鴿, 阿公和婆婆好勁哦, 煮咁多餸, 食都食唔切! ,
近日媽媽忙於大掃除(夜間進行), 十分繁忙, 日記無時間寫, 可能會後補!
今日要去健康院做三歲發展評估, 等得太耐, 我一見姑娘就訓著了. 晚上去宇晴軒新開的pizza hut食飯, 我唔太喜歡pizza, 喜歡雞翼. 媽媽話我今日乖, 去對面的家品店買左一個shopping cart玩具比我, 我鍾意到不得了, 一返屋企就拉住爸爸同我玩, 我扮顧客, 爸爸扮收銀員, winnie the pooh扮BB歐昭駿, 坐在購物車裡面. 我買左好多食物, 仲自備購物袋, 我同爸爸講:"唔洗膠袋!" 在家玩遊戲都要支持環保呢!
好好朋友
逄星期日媽媽都好忙, 婆婆會過來湊我, 今日媽媽安置左我入房訓晏覺, 就準備出去教琴, 點知我唔比媽媽走, 仲話:"唔愛彈琴, 要訓覺!" 我似乎對媽媽彈琴好無好感, 相信我都唔會鍾意彈琴!
the Little Gym
珍貴照片三張, 特別請june姨姨幫我scan左入電腦, 和大家分享! 萬聖節派對: 有大量巫婆巫師, 都係我的超人造型最特別! 三歲生日會: 以前幼稚園生日會必備的紅雞蛋和一盤盤糖果, 花生, 今日都變成花巧的生日蛋糕, 不變的依然係天真可愛的壽星仔笑臉!竟然肯戴生日帽呢, 真難得! 學校旅行: stafford的學校旅行安排得好好, 行程豐富, 印象難忘!
睇歐昭駿
最近媽媽接校車發現我無以前咁開心了, 之前我一見到媽媽來接我, 未落車就叫定先, "媽咪~~媽咪~~~" 仲會笑得好開心! 最近落校車我都木無表情, 見到媽媽都會叫一下, 校車開走前不忘同車上的小朋友道別:"bye bye小朋友! bye bye school bus!" 唔知會唔會和最近評估考試有關, 少左遊戲活動, 所以無咁開心? 今日落校車時我懷疑與同學你推我撞時跌倒, 男人大丈夫流血不流淚, 我從來唔會跌倒喊, 今日竟然喊了, 仲喊得好淒涼, 可能眼訓, 又可能咋嬌, 一直返到屋企先平靜下來. 婆婆話我訓醒晏覺悶悶不樂, 一個人在睇書玩i-pen, 甚無聊, 婆婆於是和我入廚房整牛油多士, 煎好的多士要搽花生醬, 我爭住來:"昭駿搽!" 然後切開一塊塊, 我又爭住要"昭駿切!" 入廚和美食真係會令人心情好, 食完花生醬多士, 心情靚晒, 人都生猛返晒! 昨天爸爸買左蛋糕慶祝七週年結婚, 但我地出左去食自助餐, 蛋糕留待今晚切, 有蛋糕實在太開心了, 我帶領爸爸媽媽唱生日歌(?), 竟然以為媽咪生日, 唔理為咩事買蛋糕, 我唱完生日歌, 吹蠟燭, 許願, 切蛋糕..全部做足, 當然最重要係食蛋糕啦! 爸爸買的黑森林好好味哦!
學校的親子聖誕卡設計大賽, 我得獎了, 我校有好多類似比賽, 中秋節花燈, 聖誕卡, 新年掛飾... 每班選出一個得獎, 上次中秋節花燈, 同學的家長做的花燈簡直靚到唔信, 今次的剪剪貼貼勞作仔, 竟然被選中呢! 所謂親子聖誕卡, 其實只係媽媽用左好多老師和同學的相片, 剪個頭出來, 貼在一架火車上, 我負責用白膠漿將車輪貼上, (有圖為證) 其他都係媽媽做的! 最搞笑係, 獎狀會在上學期頒獎禮頒發, 可以想像到我上台領獎時一臉迷茫的樣! 名符其實的豬肉獎, 不過總算係我的第一個獎, 求求其都要記載一下!
入暖房
今日午睡時間, 和媽媽在被竇中培養睡眠情緒, 媽媽唱起歌來: (旋律: "打開蚊帳") 媽媽唱: Where is Isaac? Where is Isaac? Here I am! Here I am! Where is Isaac? Where is Isaac? Here I am! Here I am! 我唱: Where is Mommy? Where is Mommy? Here I am! Here I am! XXXXXX XXXXXX (???) I love you! I love you! 昭駿竟然識回應媽媽的歌詞, 仲添加了I love you呢! 感動哦!
今日好悶, 媽媽決定同我揾d野玩, 上次幫襯港灣豪庭山田日本料理好滿意, 今晚約埋爸爸再試, 媽媽本來想同我先去北河街運動場的室內兒童遊樂場玩一陣, 點知行錯路, 最後直接去港灣豪庭商場行吓啦. 由於要等爸爸放工, 我地要揾d做消磨時間, 我地入左一間商店玩兒童波子機, 一蚊一鋪, 媽媽同我一齊研究點玩, 好快我已經知道點玩了, 入波子的位置比較高, 媽媽幫我將波子一粒粒入落部機, 但我想自己入, 叫媽媽:"比BB入." 我平時多數自稱歐昭駿, 媽媽時常提醒我已經唔係baby, 係big boy, 但我有時唔記得左, 叫左自己做BB. 然後我地去千色店睇玩具, 我好鍾意一套thomas火車, 有rocky和percy, 仲有兩架好得意的貨卡, 但percy我已經有了, 媽媽提議我揀其他玩具, 但我非常鍾意rocky喎, 媽媽最後答應買比我. 買完玩具, 爸爸仲未收工! 媽媽決定唔等佢了, 我地去山田食晚餐, 我食左好味的雞蛋壽司, 蛋包飯因為裡面有洋葱和青椒, 食得唔多, 忌廉粟米薯餅好好食, 食左好多呢! 搭31B話咁快返到屋企, 沖完涼攬住新買的玩具入房, 陪住我訓覺哦!
仲有兩日就要評估了, 呢三日都係温習日, 無得出操場玩, 有點無聊. 我地學校係採取舊式的考試式評估, 第一次評估已經要認20個中文字, 認字係我強項, 但只限英文, 中文字到目前為止, 只認得"口"和"水"(可能和我bb時流好多口水有關). 媽媽在假期其間自製了一段短片, 與your baby can read類似, 粗製濫造, 但我相當喜歡, 不過唔係睇左好多次. 今日媽媽同Ms Lee傾左一陣電話, Ms Lee話我識得好幾個中文字喎, 認為媽媽一定有同我好好温習呢! 媽媽聽後簡直唔相信自己的耳朵, 我在家確實只係識 "口水", 態度亦有欠合作, 返到學校竟然變左另一個人? 媽媽同Ms Lee訴苦話覺得有壓力, Ms Lee就話會以遊戲形式做評估, 叫媽媽唔好太擔心云云. 另外今天普通話課, 我突然從坐位彈起身, 以普通話說:"一二三四五六!", 然後坐返低. 令普通話老師莫名其妙! 晚上睡前, 我和媽媽在床玩, 突然我連續做了兩次一字馬, 做得好靚呢! 媽媽拍爛手掌, 叫爸爸入來睇, 我又再做多一次, 爸爸急急腳去拿攝錄機, 拿得過來, 我已經唔肯再做了! 原來我收埋好多野唔比人知架, 真係估我唔到!
開學了
Postman Pat
星期六無節目
上星期和媽媽在地鐵站搏鬥, 媽媽說要返青衣, 我偏要去尖沙咀返beekids, 糾纏間弄傷了左眼對下位置, 昨天又被一架從而降的玩具車擦傷鼻子(都怪媽媽不小心). 我自出娘胎, 從未因為跌一跤, 或撞瘀了而流過一滴眼淚, 因為我實在太忙了, 跌倒就馬上爬起來, 慌死執輸, 趕快再玩過, 跟本無時間去哭去咋嬌. 今日返到婆婆家, 婆婆見我臉上又多了一塊傷痕, 大表不滿, 當然是指媽媽照顧不妥善, 令我青靚白淨的面豬仔慘遭"破相". 眼下的傷口較深, 有點痕, 我用手去抓, 婆婆大叫: 死囉, 有"啦"了! 可能被大人感染了, 我照鏡, 見到鼻子"損"了, 感概地摸著鼻子叫:"哎唷~~~!" 媽媽大為緊張, 叫著"唔好搣唔好搣, 千祈唔好搣!!!" 再多一撻"啦", 媽媽唔比婆婆省到暈先奇!
我的第4個新年來臨了, 媽媽和美玲姨姨, uncle zane有個微妙的約定, 就係每年1月1日都要我家開派對, 呢個習慣已經持續了好幾年, 今年亦不例外. 所謂派對, 其實只係大家食吓野, 傾下計, 每年必定在呢一日聚一聚, 風雨不改. 每年媽媽都會準備簡便的美食, 今年泡製了兩款雞翼: 蜜糖燒烤雞翼和醉雞翼, 本來以為醉雞翼未必人人鍾意, 誰知大受歡迎, 第一次整, 非常成功. 另外仲有羅宋牛尾湯(Uncle Zane喜歡西式食物)和cheese triangle, 係蘇good教的, 簡單快捷好味, 後來uncle zane又入廚房試做, 雞手鴨腳, 一分鐘內順利完成, 大家都話好味道, 我本來已食了一塊, 後來又要求再食, 脆卜卜有d芝士流出, 好好味!
麥當奴開幕
