親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
婆婆生日
唔肯返學
復活節假期後第一日返學, 一切順利, 但返學時媽媽發現書包裡竟然無功課, 很是奇怪, 於是打電話問obi的工人姐姐, 證實原來有一本英文功課, 但我的功課簿下落不明, 相信是放錯入同學的書包, 或被同學拿走, 呢種情況時常發生, 有時我的書包會莫名奇妙地出現別人的功課, 餐盒, 毛巾..等, 至於唔見左功課簿都係第一次!
屋企換新傢俬, 經歷一星期艱苦勞動之後, 大致回復秩序, 以前屋企儲物空間不足, 東西亂放, 現在換了兩個新大櫃, 爸爸媽媽將物品有條理分類存放, 感覺煥然一新! 我有左自己的房間, 有新床床和新衣櫃, 我好喜歡自己的"竇", 馬上就肯自己訓新床了!
. 今堂The Little Gym的主題係"Friends around the world", 可以邀請一位小朋友一齊參加, 上次叫左灝仔, 今次雅雯同我一齊去玩, 本來以為雅雯比較慢熱, 去到陌生環境會怕醜, 點知佢玩得仲開心過我! 時間過得真係快, 我地好愉快地玩左一個鐘頭, 之後爸爸同我去食早餐, 逢星期六10:00我就出現在重慶大廈大家樂, 收銀姨姨都認得我, 我每次都同姨姨講:"姨姨, 我想食蘿蔔糕!" 但好多時都賣晒, 今日姨姨一見到我就話:"細佬, 今日又無蘿蔔糕囉!" 好失望, 好彩仲有炒蛋雞扒和通粉
今日the Little Gym好特別, 因為媽媽今早難得唔洗教琴, 同我一齊去上堂, 但我習慣左爸爸同我去, 竟然想趕媽媽落車! 的主題係Stuffed Animals, 每個小朋友可以帶一個毛公仔一齊上堂, 爸爸提議我帶Barney, Barney係紫色恐龍, 都算係Stuffed animal, Ms Lee見到, 即問:"Is it Barney?" 然後Ms Kansy竟然唱起Barney的主題曲: I love you.. you love me! 我的Barney大大隻, 全身紫色, 特別搶眼, 我地帶住自己的公仔玩遊戲, 做體操, 媽媽見到我好守秩序, 好投入參與, 覺得好開心, 連導師都讚我有進步.
今天去愉景灣參加掘復活蛋比賽, 我掘得26隻, 非常精彩, 詳情再續.
媽媽數月來受腰痛困擾, 呢兩日突然惡化, 蹲下後無法起來, 要扶住物件借力才能活動, 痛苦非常, 媽媽是實幹型女士, 一個人做兩人份的事, 教琴, 家務, 湊仔煮飯一腳踢, 分秒必爭, 不知幾充實, 突然患上惡疾, 跌野落地都執唔到, 只可以"求生不得, 求死不能"來形容, 廢人一樣, 沮喪得很. 究其受傷原因很多, 列點分析如下: (1) 追溯至三個月前, 我家到祈福新村一遊, 訓著張不知所謂的床褥, 一晚訓唔好已造成損傷, 連月來隱隱作痛; (2) 長年累月教琴的坐姿差, 身體慣性傾前及偏向一方; (3) 書枱拆掉, 電腦放在膠衣箱上面用; (4) 運動少, 心廣體胖, 血液循環不好 (5) 染上感冒, 氣管敏感發作, 咳嗽令身體內部抽搐, 痛楚加劇..... 幸好爸爸正放大假, 可以幫手照顧我, 今日爸爸帶媽媽去做針炙拔罐, 稍有好轉, 希望媽媽快d好返, 因為媽媽唔舒服, 我以為媽媽唔睬我, 我都好唔開心.
今日係復活節假期前最後一日返學, 但我呢幾日有d咳, 昨晚微微發燒, 今早醒來仲有d, 雖然我鬼打咁精神, 但都要留家休息. 我校學費特貴, 告假一日損失$217.5, 幾肉赤. 我除左少少沙聲和少少咳之外, 無乜大礙, 同平時一樣咁古怪. 校車姨姨將功課跟車送返過來, 我好快就做好了, 值得一提係我已經好喜歡做功課了, 填色, 連線, 圈答案都可以自己做, 寫字就真係未得, 但我己經好有意識去寫, 知道trace和write應該點做, 只係手未夠力, 媽媽扶住我的手協助我寫, 有時我想媽媽放手, 要"自己o黎", 但寫到歪歪斜斜和輕飄飄. 今日下午我用蠟筆畫畫, 第一次畫出有頭眼耳口鼻的樣子, 我話係smiling face, 我每畫完一個就拎轉頭望住爸爸媽媽, 等佢地讚我一翻, 我畫完一個又一個, 好開心. 晚上媽媽同我畫水彩畫, 我提議畫草, 媽媽提議加一隻黃色貓, 但我想要藍色, 眼睛係黑色, 我竟然話係sunglasses! 鼻子係綠色, 然後我又想加一點啡色, 最後加上啡色斑紋, 顏色配搭不錯. 媽媽覺得樓下dream house的畫畫班越來越唔好了, 每堂都係搓皺紙波波, 貼上去, 加少少顏色, 頭三堂的圖畫還可以, 呢兩堂越來越求其了, 可能和導師臨盆在即有關, 課程完左唔會再參加呢一間了.
今日要帶兩隻白色力康蛋回校做復活蛋, 放學時媽媽問我"你o既復活蛋呢?"我馬上打開書包, 拿出一個用紙杯做的籃, 內有兩隻好色彩鮮艷的復活蛋, 一隻係我最鍾意的綠色, 另一隻係黃色, 我興高采烈拿住個籃跑返屋企, 媽媽好驚我跌左d蛋出來, 原來老師已經用透明膠紙封住杯口, 以防復活蛋跌出來. 返到屋企, 媽媽馬上將復活蛋拿出來欣賞, 製作方法好簡單, 老師用蠟筆畫上圖案, 然後放入顏料中染色, 即成! 綠色的蛋有眼耳口鼻, 我話係"humpty dumpty"呢! 咁靚的復活蛋當然要放出來應節, 點知我話:"拆呢個蛋囉!" 說時遲那時快, 我已經捏碎左一部份蛋殼, 媽媽為拯救可憐的綠色蛋, 入廚房攞另一隻蛋比我"拆", 復活蛋得以保命. 不過兩隻復活蛋都唔放得幾耐, 因雞蛋是事先煮熟, 會變壞, 幾日後就要棄掉, 唯有影相留念.
昨天開始有幾聲咳, 聲沙晒, 今早媽媽帶我去揾高醫生, 高醫生話:"冷親下, 無乜野o既, 食d藥啦!" 我話:"唔食藥!" 高醫生苦笑:"咁開隻甜d既藥比你啦." 睇完醫生去食早餐, 麥當勞對面開左一間玩具店, 上次媽媽送左一個剷泥車lego玩具比我, 今日我食髓知味, 好想要一副火車玩具, 但媽媽反對, 我最近已經好乖仔, 好少扭計了, 但見到火車實在好難抗拒, 於是施展扭玩具戰術, 喊+怪叫+賴死唔走, 不過媽媽條頸比我更硬, 加上訓練有素, 百忍成金, 不打不鬧都成功將我制服!
好耐無揾雅雯, 今日終於約埋佢去會所玩, 以前我地各有各玩(應該係雅雯想同我玩, 但我只顧自己玩), 現在我地會一齊玩了, 我地合作用大lego砌牆, 砌好仲叫媽媽來睇, 玩到八點都唔願走, 我話:"要玩雅雯砌幅牆" (即係想同雅雯玩砌牆), 媽媽容許我地再玩一陣, 之後我就乖乖地返屋企食飯. 會所兒童室6:30至8:00係黃金時間, 幾乎無人, 我地喜歡包場, 一到八點就好多嬰兒出現, BB多就出問題, 原因係我地玩得大動作, 佢地d媽媽會好驚青, 玩得激烈d都唔得, 通常我地會盡快撤退. 晚上媽媽同我畫水彩畫, 媽媽比我自由發揮, 自行決定圖畫的每個位置畫d乜野, 我選擇畫windmill, garden, 紅色花和太陽花, 仲有蝴蝶, 顏色都係由我決定, 畫左三幅, 好開心!
要自己做功課
新年假期之後都無去過郊外玩, 今日係爸爸媽媽難得的星期日假期, 我地約埋大舊表哥去南丫島玩下. 我地搭地鐵去中環, 似乎男仔都對地鐵站有興趣, 我幾乎已記得晒荃灣線的地鐵站名了, 媽媽會考下我記唔記得下一站的月台顏色, 今日媽媽問我:"金鐘站係咩顏色?" 我話:"係藍色同埋黃色." 媽媽諗到無諗, 就話:"唔係呀, 金鐘站係藍色, 無黃色架." 點知列車埋站, 先醒起金鐘站的月台有一部份係黃色的! 媽媽年紀越大越糊塗, 小朋友反而心水清, 睇一次, 聽一次就入晒腦, 以後媽媽要記住諗清楚先好回應小朋友的說話. 最近幼稚園有交通工具主題教學, 早幾日我罕有地唱起中文兒歌:"嗚嗚嗚, 輪船輪船快快開!" 媽媽安排今日去離島, 其實都有d教育用意. 我已經搭過好多次船了, 今日再搭, 興奮程度不減, 去程全程企住望窗, 船將埋岸, 我見到遠處山上有風車在轉轉轉, 開心大叫:"係風車! Teletubbies windmill!" (天線得得B裡的神奇風車) 落船第一件事係揾食, 我地無錢食海鮮, 茶餐廳常餐做午餐, 我仲開心, 因為有煎蛋和通粉, 仲有多士, 都係我喜歡的食物. 媽媽十年無到過南丫島, 感覺有d似去左台灣九份, 榕樹灣大街窄窄長長, 兩旁全部係食肆, 多左好多特色手信, 媽媽買左椒鹽白飯魚乾, 香辣蝦干, xo醬等等...價錢可以接受. 飯後上山睇風車, 路程有點遠, 山路有點斜, 我起初唔相信爸爸媽媽真係帶我揾風車, 直到快到山頂, 見到三條風車葉轉轉轉, 我先相信真係可以咁近睇風車喎! 現場仲有好多小朋友來參觀, 好多哥哥姐姐在玩竹蜻蜓, 媽媽都買左一個教我玩, 但我唔係好識飛上天, 要爸爸幫我, 竹蜻蜓飛到好高好高又跌返落地, 已經令我開心到極點! 最好笑的係我玩完竹蜻蜓竟然比返檔攤的姨姨, 我堅持要放返原位, 老師教我玩完玩具要收拾好, 估唔到我咁聽話. 睇完風車已好眼訓, 但我想食雪糕, 我憑意志撐到落山, 買左一杯云呢拿雪糕, 終於得嚐所願, 爸爸媽媽表哥去食泰式串燒, 十蚊一串大大串, 值得推介. 夜晚媽媽同我沖涼時, 重温一下昨天和今天的行程:"尋日去左little gym...運動場跑步...壽司店食壽司...今日去左南丫島..." 我搶住話:"仲有搭船船, 睇windmill!" 今日好充實, 媽媽話復活節假期再帶我去玩, 可能會係長洲!
參加了little gym兩個多月了, 一直係爸爸帶我的, 逢星期六9:00至10:00, 同平時返學一樣咁早起身, 長途跋涉到尖沙咀新世界中心, 參加初時極度抗拒, 之後開始嘗試融入, 但毫無紀律, 不聽指令, 學習效益極低, 每次媽媽聽爸爸匯報當日上課表現, 都好沮喪, 心想係唔係揀錯活動比我參加? 最近情況好好多了, 今早我一早起床, 整裝待發, 見媽媽同我換上便服, 知道今日唔洗返學, 就話:"搭火車(地鐵)去尖沙咀little gym!" 著鞋時仲同媽媽講:"bye bye媽咪. 媽咪彈琴囉!" 然後快快樂樂同爸爸一同出發, 唔需要媽媽陪了. 放學返來, 馬上同媽媽講:"媽咪~~little gym好玩!" 爸爸話我表現不錯, 無再亂衝亂撞, 肯聽老師教導, 有d動作未掌握到, 但都肯去嘗試, 媽媽好感動! 旁晚爸爸去運動場跑步, 媽媽見我無所事事, 帶我去揾爸爸, 比個驚喜佢, 我跟住爸爸尾跑左三個圈, 仲未夠喉, 但爸爸媽媽話一定要走了, 要食飯, 我要求食壽司, 媽媽就請我地去新開的惠比壽, 我食左玉子壽司, 拉麵, 天婦羅, 味道不錯, 好滿足.
爸爸喜歡用攝錄機拍我, 媽媽喜歡用電腦做後期製作, 燒錄成dvd光碟保存, 我就最喜歡睇呢d"歐昭駿家庭影院", 但媽媽覺得我太沉迷睇自己, 已停看了一段好長時間. 另一個原因係我地轉用了jvc數碼攝錄機, 影片格式比較特殊, 媽媽自去年六月都搞唔掂個新的軟件, 年紀大真係無得傾, 適應力自然減退, 學野慢, 相信好快會被社會淘汰. 話雖如此, 媽媽有無窮的意志力, 先後嘗試用power director, ulead, premiere...都失敗! 不過原來之前的999次失敗原來都係成功之母, 今早媽媽終於靈機一觸, 諗到另一個方法, 原來只需分兩個步驟, 先將mod合併轉成一個mpeg, 然後再用另一個軟件燒成DVD光碟, 即成! 呢個"難題"如發生在一個初中生身上, 可能唔洗一陣就解決到, 年代已經唔同左, 今時今日媽媽要用幾百倍時間精神先做到, 真係唔認老唔得. 宇晴軒開左吉之島十蚊店, 飯後媽媽帶我去參觀下, 好大間好齊全, 以後又多個購物+消閒點. 晚上媽媽摺衫, 我突然幫忙摺起毛巾來, 媽媽好高興, 分配左幾條方型毛巾仔比我摺, 我摺得似模似樣, 認真工作的樣子好好笑!
每日放學媽媽都會問我:"今日學校食左乜野?" 今日我答:"食蘋果!" 原來今日的茶點係生果餐, 水果之中我只食香蕉, 其他全部唔吼, 媽媽都無晒我符, 唔食生果, 今日的茶點點算呢? 夜晚媽媽幫我洗杯碟, 發現餐盒裡有一片充滿牙齒印的蘋果, 和一細舊相信係食剩的香蕉, 好核突, 媽媽馬上召見我, 要我解釋發生咩事, 我傻笑說:"好辣撻!" 唔肯食生果的問題以前已經和醫生討論過, 高醫生話肯食香蕉都好過無, 香蕉都好有營養, 不過世界上有咁多好味生果(e.g. 芒果, 荔枝...) 唔食就真係太蠢了! 將食剩的生果留在餐盒帶回家, 好核突呀!
今日我疴左一篤好特別的尿尿, 我疴完尿尿起身, 發現potty裡的尿尿, 係J型的! 我興奮大叫: "係J! 尿尿係J!!!" 媽媽馬上將呢個奇景拍照存檔, 唔知我以後會唔會奇到A, B, C...Z型的尿尿? 家中的傢俬設計已有了大網, 爸爸媽媽今晚要去裝修公司傾談細節, 婆婆來湊我, 到晚上10:30爸爸媽媽先返來, 原來訂做傢俱係好繁複, 仲有好多手尾, 好辛苦吓架!
逢星期五返婆婆屋企係必然的, 放學後會直接返青衣, 食飯訓覺到夜晚, 我一落校車媽媽就會抱我上的士, 原因係我例牌扭計, 聲稱"唔返婆婆屋企~~要返屋企昇悅居~~~~" 但今日我出奇地合作, 原因係媽媽請我飲少少陽光檸檬茶(少甜), 我同的士司機叔叔有講有笑, 叔叔讚我叻仔, 又有禮貌. 我對花生醬情有獨鍾, 而婆婆就係最常比花生醬搽麵包比我食o既人, 所以每次返婆婆屋企, 婆婆都預備好新鮮白麵包, 比我做下午茶點. 但我實在太心急, 食完午飯就想馬上食, 在廚房騰來騰去, 攬住樽花生醬, 當係老婆. 上星期又係咁(日記標題係"花生醬", 本來就係想寫呢件事), 今日又係, 我訓唔著覺, 原來掛住花生醬, 媽媽話"訓醒覺, 食完奶奶, 婆婆就會比花生醬麵包你食", 但我無理會"訓醒覺"三字, 馬上要求食奶奶, 放低奶樽就去揾花生醬, 最後媽媽比左一小塊麵包, 我自己用刀搽花生醬, 好開心. 媽媽要出去彈琴了, 我大大聲同媽媽講拜拜, 毫不綣戀, 因為我已有花生醬麵包, 好滿足, 事後媽媽先知道我食完一小塊後唔夠喉, 再食多一大塊, 先肯乖乖地訓覺...
我家將於復活節其間進行工程, 細房將會變成我的睡房, 今日大舅公來將入牆的書枱和書架拆走, 爸媽昨夜將房內雜物徹底移走, 工程浩大, 攰到隻野咁. 我放學回來, 細房已經空空如也, 我話:"無o既? 無枱枱o既? Nothing!" 媽媽話比我知我好快就有自己的床, 書枱, 衣櫃, 成間房都係我o既! 唔知我明唔明白係咩一回事, 我已經表現得好開心咁話:"歐昭駿o既房, 歐昭駿有床床, 要綠色床床!" 書枱拆走, 電腦被放在膠衣箱上, 媽媽坐在矮櫈打電腦, 坐得耐骨頭都散, 所以相信未來一個月昭駿的世界脫稿的情況會持續!
爸爸買的potty (我稱為toilet) 成二百蚊, 好貴, 初買返來時我唔肯用, 後來媽媽在圖書館借左一本圖書, 講一個叫henry的男仔用potty的故事, 我態度開始軟化, 在家終於肯定時定候疴尿尿, 事後堅持要自行清理, 我將自己的排泄物當成朋友, 倒落廁所時會同佢地道別:"拜拜屎屎, 拜拜尿尿" 今日仲加多句:"下次再見喇!" (.........仲有機會再見咩?)
姑媽生日
見家長
花生醬
