親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
粟米媽
他的寶貝
他的興趣
文章分類
日期
#Tag
Hi~ 小寶真是可愛
資料載入中...
今日BOOK左SHISEIDO皮膚護理,見早去左BB CARE到睇下有冇野抵,結果無野岩就閃人!! 見仲有時間行左一陣GAP,估唔到依家做緊七折,岩岩轉季咁快又七折!!好多都想買,但係衫又好似太多了!! 最後反覆諗左陣,買左一PACK底衫俾粟米,頭一個月就話有陪月姐姐幫我洗BB衫,但係之後我應該唔會日日洗咁勤力,因為我係懶人一個!!於是都係買多幾件底衫以防萬一,咁就買左一PACK純白既BB衫同一件有象象圖案既衫仔!!
唔記得幾時報過bb反斗城既講座,個陣報係貪得意,同埋見得十個名額,覺得都無可能抽中! 點知擒日收到電話通知我報左講座,咁遲先通知又幾搞鬼喎! 今日出門前都有電話再確認到唔到,睇黎好多人放飛機喎! 去到將軍澳babiesrus, 只係細細位咁,十張摺椅,到夠鐘夾埋d爸爸,先叫做有八個人!真係好唔爆下喎! 我join既topic 係寶寶睡眠及餵食用具 結果聽完,我覺得並唔係講座,只係一個產品推銷售包被及用具推銷,好既係只係介紹唔會迫人買,但係就浪費時間囉! 張包被最平都要求298.9!原來覺得象象款好可愛,點知仲貴d, 308.9!!!哇,當然唔會買啦,之前mothercare 都買左張百幾既!已經夠用!就算佢話送隻價值六十幾蚊既學習杯化都仲係好貴囉! 完左,我地都行下,之前見學行車399有部,反正黎到都順便睇下,見個玩具可以拆出黎,變返bb檯,結果都係買左啦!特價之餘,之前join左做會員有張九折卡,問姐姐用唔用得,姐姐話用得,結果架學行車又再平d!又順手買左盒huggies 濕紙巾$27.9(無得折),埋單姐姐話買滿400,有個huggies 禮品包送,結果又整多包濕紙巾$14.9,夾埋就$403.7! 是次講座禮物係aprica 既紗巾兩條及手襪一對! 下次babiesrus 有講座都真係唔洗去了!
擒日已經收過電話,話會今早9-11早上,送貨黎,但係無諗過真係咁早! 9:38am 手提電話響,我由夢中嚇醒,即時聽電話,原來係送貨黎,九秒九飛出去開門,又飛返房,粟米爸出廳搞掂!當時眼都仲未適應d光啊!真係估唔到咁早送黎! 醒左當然訓唔返啦! 唯有開始執房! 收到木床,床單被鋪同床鈴! 將客房既物品移晒去廳,將床仔放返入房先,當然都開紙皮望下係咪我要個張床啦,因為個陣職員話無貨,仲要得返dsiplay,為免我到時買唔切,所以都照要! 一打開,咦?! 之前個display床邊有一忽崩左,但係呢張無喎,另一塊都無,仲要係新既添喎,因為包裝得非常好,仲有陣焗漆味!太好了,係新床,雖然唔介意display,仲諗可以唔洗早d 砌,因為唔洗散味,不過依家有新既仲開心,不過就要早少少砌,散下味! 是日度肚: 37寸 (26w3d)
唔知有幾多人好似我咁依家 25w5 都仲係可以打平訓!! 臨訓個陣feel到個肚有d唔對路,唔係痛又唔係痕,而係你會feel到有一舊野係某一個位,當你呼吸個陣,你發現個肚收縮唔到,好似個層皮包住左d乜野咁!! 於是我就用手膜下係咩啦,原來粟米仔佢轉左去我肚臍位,唔知係咪因為平訓既關係,所以佢一上到去肚臍位,就特別明顯,摸落去係摸到有舊野,一隻手咁上下既大細,應該係粟米仔既size了,唔知佢做咩要塞去呢個位,感覺似係保鮮紙包住薑咁,摸到形狀咁!!!哈哈! 見咁樣,咁就用手摸下佢啦,慢慢佢就無咁硬,可能佢知有人摸,佢就乖乖地慢慢轉返去d闊位,肚臍位都開始鬆返!! 摸到佢有個形感覺都幾搞笑,知佢有幾大隻,但係又覺得好似好怪咁!!好難形容個感覺...哈!! 究竟佢捲到去咁迫既位置係做咩既呢??想人摸佢??知佢存在???
不知不覺開始進入倒數一百日!!希望黎緊到最後都可以平平安安同健康咁渡過!!
下午走人去食個米線再去產檢,今日真係好鬼曬又熱,仲有d唔舒服添,擒日狂流鼻又有d鼻塞!! 去到登記完,磅重,量血壓,驗小便!! 之後埋到去醫生房出面坐係到等,點知遇岩醫生要去接生,姑娘同大家講叫病人出去登記處講聲,等登記處再作安排!! 通常人就係咁,一聽到有突發事,就即刻好緊張!!有個女人不斷講"下個到我架啦喎,咁要等到幾時呀??咁我點呀?",另一個大陸女人就好緊張咁講"我個女痛得好緊要,你地有冇急症架??" 一連串既慌張,結果係登記處安排下,安排左佢地去21號房等睇症,佢地都唔係睇產科!! 姑娘見我同粟米爸坐左係到唔郁,就同我地講醫生無咁快返,岩岩去左接生!! 我問姑娘:"咁醫生係咪都要2-3個小時先返?" 姑娘話:"唔洗咁耐,應該一個半小時啦" 我回應:"哦,咁好快,我地坐下等啦,出面又曬又熱,唔想出去" 因為唔太舒服,所以我都係訓陣等啦!! 一個鐘到醫生係我訓到矇矓個陣返左黎,仲第一個叫我名添,好快咁就睇完!! 醫生話粟米SIZE 正常,大脾骨正常,頭圍都岩SIZE,依家佢有 760g(即係1磅11安士)!! 下次預約:2013-09-05 12:45
終於等到bb展啦,mark好晒要買既野,原本粟米爸話唔洗拎行李,但係昨晚我拎個list俾佢睇,佢就唔敢話唔拎啦哈哈!! 原本係昨晚去bb展既,但係落大雨,都係今日先出發啦,見有好多媽媽去完bb展都有好多收獲!!真係好想快d去!! 食完個午飯,再向bb展出發!!! 去到會展,原來都行到好遠先有得買入場卷,今次有本優惠書仔,但係要俾十蚊本,諗諗下都係加錢買兩本書仔啦,有好多免費贈品都係要書仔既優惠卷先有得送!! 買完飛同書仔,就當然罰抄啦,狂填d資料,等一陣入到去就可以殺呀!!淨係填書仔個d都用左成半個鐘,好彩都有d位俾人坐下!! 填完想要既野,就出發行去入口啦!!入到去其實都開始多人!!書仔d優惠又唔跟number,所以有時要搵返個間店既野都幾難!! 有d搵到埋到去,贈品已經派完,有d就排長龍,我同粟米爸都唔想排!! 欣賞個d寫住第幾頁有優惠或贈品既店鋪,咁就唔洗搵得咁辛苦啦!! 本身想話由頭行到尾,但係又要對返書仔有冇優惠好浪費我時間,所以我都係不如先去買左我自己個list想要買既野先!! 首先路經無聊地見到麵包超人尿墊,買一左一張 多謝 $80蚊!! 之後去到沿途有咩贈品有寫住幾多頁就換左先!! 去到思詩樂攤位,原來佢同goo.n尿片係同一公司,等我換完尿片又傻傻地走去另一邊諗住換潔綿,又要行返去換尿片位到換一.一" 不過係思詩樂我都有買到野,買左兩盒潔淨濕棉(80蚊一大盒),買左兩盒,再加一盒棉棒(20蚊),想話要多盒都話賣晒,原本買夠100會有門夾送,但係送完,所以無得送一.一慢一步果然係慢一步呀!! 之後隔離就係mustela,呢間朋友話尿片膏好用,可以防尿疹,所以走埋去睇啦!! 299有個套裝(有兩枝lotion,一枝沖涼同一枝尿片膏),之後買滿600蚊可以成為會員,同即時有八折,咁另外買多三枝尿片膏啦!!呢間書仔有coupon,可以免費換包試用裝同埋可以用 40蚊買一枝200ml既沖涼GEL, 咁有兩張COUPON 就換左兩枝,阿姐好好問我係咪懷孕中,仲俾多枝肚紋膏我!! 搞掂就俾粟米爸放行李!轉殺TOMMEE TIPPEE!! 一去到好開心,因為好大咁,好多款哈哈!!不過又無咩頭緒係咪真係要買,好彩有個阿姐係到講解,最後我買左兩盒蓋(一盒兩個),兩盒奶咀3-6個月(一盒兩個),一個奶咀夾,一個牙膠,一個座熱器同手多多都係忍唔住買左一盒兩個既粉藍色奶樽HEHE!!因為多人排隊俾錢,所以粟米爸都係排住隊,我再揀到有D咩再拎俾佢俾錢!! 買完就放入行李,再行下有咩要買!!結果經過NUK又買一餐!!先問乳墊,依家買一送一,咁就拎俾粟米爸俾錢,仲想有其他野買,於是又係佢排隊我再睇有咩買!! 結買左 乳墊兩盒(買一送一),粗棉棒(買一送一),幼棉棒(買一送一),指甲鉗,象形牙膠,一SET梳,吸鼻器,洗奶樽,洗奶樽液補充裝(一袋兩包)!!!買咁多野先送得一枝....細到爆既洗衣液試用裝!!一.一好孤寒呀!!! 之後又去下D要排隊拎贈品既攤位!!去左JOHNSON,排左一陣先到我地,一GROUP人聽野,聽完就拎SAMPLE!!最好笑係竟然BB皮膚比我地大人既乾,BB得47%,有個孕婦有 54%,我都有TEST 59%,粟米爸都唔弱有57%,另外孕婦既老公 48%!!竟然BB係最弱哈哈!!! 跟手去荷花攤位換雜誌啦!!一.一呢到既人態度非常有問題!! 首先見有入會,走去禮貌地問,書仔有冇佢地入會FORM,我諗住有既話就唔洗再填啦!!點知...個女仔西住面咁講"我地無做呢D優惠架喎!! OK!我再問,咁你地入會係點呢?? 佢都仲係西住佢既口面同我講"入會要俾年費150蚊,填FORM之後登記,係荷花買野先會有折扣!!!"講完仲要行左去添!!咁既服務態度係想點呀??? 算啦,唔入會也吧,反正佢地間野係MARK UP左再折俾會員,其實無話比出面平!! 去換雜誌又遇到個西面阿嬸,我行到佢到,佢同我講要兜返出去係佢前面換!!點解要老點我兜大圈先換得呢???又唔係有人排緊隊,算,都兜啦,跟住有個揹住BB既媽媽都同一待遇,即係阿嬸,如果你唔想做就咪做啦,洗唔洗咁樣呀,都唔醒目既,又唔係有D咩龍係到,點解要虐待孕婦同D揹住BB既媽媽呀!!! 粟米爸都睇唔過眼,仲話呢間野以後都唔好幫襯!!拎到個兩本雜誌更加係舊到爆,2012年架!!比起之前去BABY MO個BB展送個本雜誌舊太多,人地都只係上一個月既雜誌!!真係完全唔得囉!!!仲要態度咁差!!唉...!!! 再排下拎下尿片,望完仲有咩未拎,都無咩野未拎,所以都走人了!! 夾埋入場卷,優惠書仔,TOTAL 用左差不多 1600蚊!!! 買唔到想買既浴盆,明明入場前見到有,但係入左去又唔見,所以都係算啦,係出面買吧啦!! 咁就行左四個鐘了!!出黎都六點半了!!!
唔知點解依家D BB咁矜貴,問起朋友用D咩洗衣液之類既野,當然好多都用日本啦,但係成百蚊細細枝,真係有需要??? 加上星期五就會係BB展,所以做得功課,有D咩BB展買,有D咩就附近都有唔洗特登個到買,做好功課,唔好買到一大堆返黎原來附近有,到時就真係辛苦自己!! 結果放工我去CHECK藥房有冇嬰兒洗衣液,好彩有!! 59蚊 2L 威潔牌!!太好了,咁就唔洗特登要去買D貴既洗衣液!! BB用品多時,清潔既液又多,又要專用沖涼,連洗奶樽都話要用專用液,邊得黎咁矜貴架!!! 見藥房都係得兩枝,都係買定一枝放屋企,以防萬一要買個陣無,樓下華潤都有得買但係得1L $35.9!! 價錢同藥房真係差得遠了!!!
今日放工見信箱有一包野,原來係早前唔記得幾時登記既,依家寄返份HUGGIES濕紙巾試用!!
飲完茶見得閒,同埋TWINSTARS出左即影即有相機,我都想順便出旺角買野!! 等細姨教完琴,就一齊出旺角行,先去MOTHERCARE買 機械人款既包被用黎包住佢訓既,咁岩見到有另一張厚D既可以出院用既包被,細姨見到有好多得意既衫,係咁叫我買俾粟米,粟米依家夠晒衫了!!唔買咁多啦!!等佢第日再大D先啦!!順便我又買埋一個可以換片用既墊,好彩要訂,唔洗自己拎,因為都有D重量,訂左第日可以叫粟米爸拎!!!^^ 連續幾日買既野都係粟米,係時候抖抖!! 之後同左細姨去買返自己既野HEHE!!買左部TWINSTARS既即影即有既相機,好可惜既係太遲去,無TWINSTARS相紙送,唯有要第二款先啦!!遲D出面再返到貨先再買返TWINSTARS相紙!!^^
今日無咩做,咁岩之前訂落既墊有得拎了,所以先去食米線,再出發去銅鑼灣! 唔知係咪條裙既關係,俾人讓座一次,感謝那位小姐!!^^ 先去銅鑼灣地帶去拎野,去到個小姐拎俾我個陣得一PACK,我明明訂左兩PACK,結果佢又要行一轉拎俾我!!一.一' 見出開街都順便睇下有冇BB學行車買,我想要最普通無玩具個D,寧願有張檯仔俾佢放野食好過!!但係原來都好難搵!! 反斗城同荷花都唔見!! 之後又搭巴士返屋企,經旺角粟爸都順便望下有冇佢要既GAME啦,有就係有,但係原價299既GAME依家炒價變 429真係超貴,無買到!! 無野好做,今晚就買野自己煮算了!!^^成日落雨都懶出去!!!
可能近排粟米奶奶煮既野唔太岩食,粟米爸咁岩又有GAME買,所以出街食順便睇野! 結果GAME就買唔到,粟米既毛毛外套買左一件哈哈!! 收工先去荃灣,隻GAME 斷左市,所以就去食個晚飯,之後再去一田行下啦! 估唔到呢一間新開既一田,都有我地上次係沙田個間有得賣BB床上用品個間野,而且個阿姐仲好NICE,我諗住拎手機出黎抄低尺寸,點知阿姐竟然叫我影低,你知啦唔係個個都咁好人俾人影架麻,尤其係店鋪既貨品!! 阿姐仲不厭我地煩咁,叫我地自己拎出黎睇,有好多款,真係好多喎,我地上次去沙田都係得三款,估唔到原來有成五六款!!有咁好既服務態度,我地度到岩尺寸一定會返黎幫襯架!!同埋要申請定一田信用卡拎折扣!! 之後走左去H&M到睇下新開呢間有冇BB衫,原來都有喎,我仲見到D毛毛外套好得意,原本想買白色,粟米爸話好易污糟,最後買左啡色一件!!! 買完又走去對面吉島睇野,咁岩見有SET裝TT牌,仲好抵 610蚊,驚搞錯價錢,仲問多次職員,叫佢\幫我地CHECK價,估唔到會員仲有九五折添BOR!!見咁抵又買埋啦!! 估唔到最終粟米爸買唔到GAME,反而買左粟米既野哈哈!!
最近英國有王子出世,網上見到mothercare有tommee tippee出既 royal baby系列奶樽,突然見到有好可愛既奶樽,有分王子同公主系列!!非常可愛,本身想叫大姨幫手搵朋友買,結果原來香港都會入貨,所以唔洗咁遠水lu!!! 朋友提我,如果決定買呢個牌子就成set買,因為奶咀頭會唔同,闊身d!! 結果我諗過之後,決定俾粟米用tommee tippee既奶樽啦!!反正之前都無咩idea要買咩牌子,仲諗住是但買返nuk算!! 依家有目標,粟米爸話不如順便都買埋床仔一次過!! 今日媽媽會fb,有人放圖,原來擒日已經有鋪返左貨,唔洗等星期五添,心急既我反正都係約左fd,梗係順便都去買埋啦!! 因為買夠3千可以做會員,之後買野正價有九折!!反正都要買床仔就湊夠3千蚊做會員啦!! 原來白色床仔開始無咩貨,得一款普通既有貨咋!!一.一但係我始終最like都係揀定左個款!!sales話要九月先知船紙,先會知幾時有貨返!!九月先知,到時黎到香港就太遲了!! 結果我都係要左我最like個張床仔,以防萬一買唔到,順便買埋馬戲團系列既床單,被鋪,床圍,床褥同床仔玩具!!! 仲買多兩件特價衫仔俾粟米,又買左一SET王子,一SET公主既tommee tippee奶樽!! 本身想話買包被,但係megabox呢間無貨,所以無買到了!!或者睇下其他鋪有冇啦! 床仔會係8月17號先送黎,咁我就有時間去執間客房!!哈!!懶人都係拖到最後,先會執野!! 依家剩返d細微既野,下星期bb展再買啦!!^^
公公今日俾左張票我,原來公公俾錢我,d錢係用黎買野俾粟米既!!仲好大手筆添!!要好好諗下買咩俾粟米用了!!
第一次去健康院做產檢,我揀左近娘家個邊個間,因為起碼我識去同有車到,方便好多!! 一早起身,留起小便,帶齊要帶既文件,出發!!! 去到西九才8:50am,講真我都係依家先知呢個政府合署有健康院,平時行過都唔覺!! 上到去先去2號窗登記,已經有d媽媽排緊隊!! 2號窗個女人....好似唔多善良,我見佢....將d文件係用掉咁掉返俾媽媽一.一" 好彩排到我個陣,佢轉左去3號窗做野,而2號窗有第二位做登記!! 因為第一次,所以拎左貼紙,要填個人資料,另外有兩張細既紙就寫地址電話,要寫埋粟米爸既電話!! 之後交去1號窗,跟手就去2號房磅重(59.1KG)--> 量血壓(71/109)--->心跳 (87)---> 驗小便(正常),搞好就出去等叫名!! 一陣又俾人叫左去1號房,入面有4個人(唔知點解會有4個人係入面),只有一個阿嬸係幫我check,佢話佢負責check bb既,叫我上床俾佢check,其實都只係望下你個肚,用部機聽下bb既心跳,咁就叫check完!! 粟米 心跳有 142-143!! 又再出去等啦,等到我都好眼訓下!!突然又叫我去5號房,去到姑娘問我有冇聽講座,我答無,佢又叫我返出去,一陣聽完講座先再叫我!!我問佢係邊到聽講座,佢又話要等叫名!!...咁我又返出去坐!! 粟米爸見我咁快出黎,問係咪走得,但係未走得住囉哈哈!! 又叫我名啦,今次要去 17號房,所謂既講座,原來都只係去睇DVD ONLY!!!姑娘仲講其實俾我個袋野入面都有隻DVD,返去都可以同屋企人睇!!(咁點解我仲要徙時間依家睇呀??) 睇完隻無咩野特別既DVD,姑娘俾左張野我,話叫我返去可以上網址睇下,又走返出去等叫名!不過睇完DVD先知原來自己成日留錯小便哈哈!! 粟米爸又問係咪走得,我答佢我岩岩只係睇完DVD,所以都係未走得,要等叫名!! 唔夠一陣又俾人叫左去6號房,一行去我以為有人唔敢入,原來一房有兩個姑娘,叫我個位係埋邊!!! 呢位姑娘好NICE,佢問我野,跟住都解釋我聽母乳既好處!!原來母乳好勁,BB可以唔洗飲水,仲有就算媽媽病都照可以餵,而且更加要俾BB人奶,因為當媽媽病個陣,母乳既抗體會好多,咁對BB更加有幫助!!聽落都唔錯!! 之後姑娘幫我約期,因為無咩事,所以六星期後見,同埋又俾左張講座既紙我,仲同我講唔知個講座有冇禮物送架,佢上次都係得隻CD咋!!^^姑娘真好有講有笑,我覺得佢有D似商天娥哈哈!! 出黎就去3號窗到BOOK預約期!!一去到3號窗就唔開胃...一.一'我已經好有禮貌咁講唔該,佢幫我MARK完個期之後,就飛張覆診卡俾我!!妖!!樣衰格賤就係呢隻囉!!!! 下次產檢 2013-08-26 9:30AM
今日又唔記得帶電話係身!!唉....! 永安會送貨黎,好驚佢地因為無人聽電話而唔送貨! 最後 12:35n 佢地終於送貨黎了!!好彩!! 都幾大箱,到時要用先拎返屋企啦!!^^
本身無諗住記呢d無聊野,但係見咁多人有咁多怨氣,成日就講到d人咁衰,所以我要記住d好心既人!! 今日中環線俾一個媽媽同女女讓座一次,媽媽叫我坐,之後轉柴灣線又俾一對情侶讓座!!! 我覺得讓座係出自人既真心,而唔係你去強迫人地讓座俾你,有人讓座就要感激,無既就當練習企耐d囉!!
book左去mega box戲院睇2D既怪獸大學,順便都去睇下有冇野買,最終MOTHERCARE減價既轉轉公仔買唔到,只係樣衰既先有得減,所以無買到!最後只係買左一件TEE俾粟米因為45蚊一件好抵,要6-9個月先著得LU!!! 轉左車去沙田LESPORTSAC買奶粉袋!!咁岩我會員七折有得平!^^ 呢個奶粉袋亦都係粟米爸送俾我既生日禮物!!
粟米爸見決定好晒,連醫院都交左留位費,所以今晚晚飯通知佢屋企定(特別係粟米爺爺女麻女麻)!! 以下對話方式記錄: 當時爺爺,女麻女麻,二姑媽,大伯,伯娘,粟米爸和我一同晚飯!!! 在食晚飯的時候,突然粟米爸向女麻女麻講: "阿媽你地第時玩B唔洗去咁遠啦" 全場本身講緊其他野,突然靜晒!!! 粟米爸見無反應,又再講:"我話你地以後玩B唔洗去咁遠啦,EMILY有左啊" 女麻女麻先聽清楚,再講:"好呀好呀,有孫抱" 二姑媽:"好呀,又多個B玩" 大伯:"咁幾時預產期呀?" 粟米爸:"十一月" 大伯:"有冇話十一月邊日呀?" 我:"醫生就講大約係 十一月二十" 二姑媽問:"咁知唔知仔家女呀?" 粟米爸好快就答左:"知呀,仔黎架" 二家姐:"好呀好呀,咁又有BB玩,之前有女孫依家有男孫,咁咪好囉" 唔知係麻麻開心得濟還是諗緊野,佢講左句:"邊有咁快知呀,無咁快" 二姑媽:"下?佢岩岩講左話知喎,話係仔喎" 麻麻仲係好強調無咁快知住!! 二姑媽再一次講:"佢地岩岩講左囉咪,講左係仔喎" 麻麻先開始醒,問我:"你依家幾多個月呀??" 大伯加把咀:"應該都五個月啦" 我:"五個月" (其實個陣都有21W了) 麻麻先講:"下?乜五個月呀?咁就知了" 粟米爸係我之前未去食飯前提過佢要同奶奶講薑醋事宜,以免佢阿媽又記在心,因為上次大姑媽事件,奶奶一直都怨話大姑媽俾得一兜佢,想派俾朋友都無得派!!為免佢老人家又再記多一仇,都係叫粟米爸問一問奶奶!! 粟米爸:"阿媽,我想問你有冇精神煲薑醋,如果你無精神既話,而你又想派俾D朋友既話,我地可以出去買D薑醋卷俾你派俾D朋友" 二姑媽:"唔好呀,唔好食架!" 我:"係唔好食,但係如果奶奶想派俾D朋友,但係又無精神煲既話,呢個都係一個選擇!" 二姑媽依家強調唔好食!!! 麻麻呢D舊思想,當然係講:"我幫你地煲" (意料中事) 麻麻問我:"你要派俾你D朋友幾多架??多唔多朋友要派?" 我答:"其實我地呢D後生呢...依家好多唔派架啦,你預你同你D朋友份量得架啦,唔洗理我D朋友" 麻麻話:"咁如果你地唔洗派俾朋友,咁就十斤都夠啦!!" (十斤係多定係少呢下???) 粟米爸:"我都唔洗,我都唔會派" 麻麻又再講:"咁你地唔洗,十斤就夠啦,買個煲,你臨生之前一個月開始煲,....(下刪重覆字句), 上次盧魚(大姑媽簡稱)俾得一兜我地咋,我D朋友問我做咩唔見我派薑醋,我同佢地講,我自己都係得一兜都唔夠食,仲邊有得派呀!!(果然仲係記緊仇)....(再一次下刪重覆記仇句字)" 老爺:"盧魚個到有煲喎" 麻麻話:"唔洗啦,買過啦" 我:"係囉,買過好過啦,咁遠去拎咁麻煩,煲又唔係貴,奶奶買過仲快啦" 粟米爸:"得啦阿媽識買架啦!!唔洗咁遠去拎啦" 粟米爸:"老豆阿媽,我想個BB搵你地幫佢改名,你地改幾個名俾我地,之後我拎去問邊個名好" 麻麻:"咁你地唔出去搵人改名??" (一.一你估我地係大姑媽咩) 粟米爸解釋:"我地唔會搵街外人改名,我覺得改名都係搵返自己親人改有親切感D" 爺爺係呢個時候正在偷笑!!! 麻麻開心地講:"得,咁到時我改囉" 爺爺:"阿媽改好D" 跟手麻麻問:"咁你地諗住第時BB邊個湊呀?" 粟米爸無聽真問題,答:"到時我地會請陪月到時,咁阿媽你唔洗咁辛苦煮兩份" 麻麻答:"陪月梗係要請啦,佢負責(望住我)煮野食俾你丫麻,但係我想問之後,邊個湊BB,如果你地第時要搵人湊B,可以拎落黎我地幫你地睇住" 我回應:"其實呢...到時我應該會帶埋返工湊" 老爺好大反應:"梗係唔得啦,咁危險" 我好奇地問:"下?點解會危險呀?你驚人地劫走你個孫呀??" 二姑媽搭咀:"唔係驚俾人劫走個B,不過你係公司行出行入,照顧唔到個BB架麻" 麻麻依家自顧自地講佢既PLAN!!! 麻麻:"拿,到時你地返工,可以拎落黎我地睇住,到時你地買定多一SET奶樽送我呢到,我地呢到有三個人,就算BB喊都可以輪住抱丫"(化...又要買多SET..仲要輪住抱....) 我:" 下?輪住抱咁大獲??咁樣縱法唔得喎!!" 麻麻:"放心啦,我地唔會成日抱架!!" 不放心既我懷疑中,亦望向爺爺,爺爺又再一次偷笑!!! 其實我真係唔想交俾佢地湊,雖然佢地係好心幫我,但係係我有能力既時候,我盡量做,做唔到先算,點解我公司一定係有危險,點解佢地好似覺得我一定唔得呢??唔通我以前屋企請工人,就代表我咩都唔識做??佢地對我既了解又有多少??? 麻麻講左好多次可以拎落去俾佢湊,放工接返佢!!救命呀!!做咩同我搶粟米呀!! 之後都講到時先算啦,但係麻麻依然KEEP住講!! 粟米爸都講:"呢D到時先算啦" 一.一"突然覺得有俾人搶野既感覺..... 係邊個講唔LIKE湊,但係依家邊個搶住湊呀???果然係信唔過!!! 跟住大伯問:"咁你地BOOK左係邊間醫院生未?" 粟米爸:BOOK左啦,法國醫院" 大伯問:"即係邊區呀?" 麻麻:"咪係九龍城囉" 我:"九龍城同何文田之間啦" 麻麻突然講:"丫,盧魚個到留左BB床同BB車俾你地喎" 我:"下?唔洗啦,都唔岩用"(打死都唔會用怪獸既二手物品) 粟米爸:"唔洗,唔要,我地大把朋友生左B,D野唔要送俾我地" 我坐返去梳化,唔好阻住人地睇電視!!! 麻麻偷望我,其實我係知既,我見咁樣,我就唯有大方展示個肚俾佢睇啦\" 佢竟然同我講"唔怪之你呢排肥左啦" (一.一其實兩日前先見過面咋喎,有冇肥得咁快呀又) 粟米爸都知麻麻馬後炮扮細心!!! 粟米爸食完生果,咁我地就走了!!!
又到左去法國醫院產檢既時候啦!!! book左 11:45am,但係我地10:55am已經到左,都照去拎籌啦!! 今日有 60.2KG,血壓 58/102 驗尿正常! 去到想話等下啦,見到醫生門口貼左張紙寫"進行手術中,需時約半小時"!! 見時間尚早,行去星巴克到坐下飲下野啦都!!! 之後見差不多時間 11:37am,咁我地又返去等!! 醫生 12:00n到返到黎!! 都好快叫名開始睇症!! 到我入去,醫生問我近排有冇咩特別野!!我答呢排feel到粟米郁!! 醫生話呢個週數係會開始感覺到bb郁動,之後都係問我有冇肚痛,有冇流血! 我就答無啦! 醫生問我有咩問題問佢,我問佢我仲洗唔洗食 materna,佢話其實呢d維他命藥,食到bb出世都ok,葉酸就唔洗另外食,因為materna已經有!! 醫生問返我之前照結構個到有冇講點樣,我答佢話政府個邊個正常,無咩問題出現!! 醫生講:" 大致上既重要檢查都已經完成,之後剩返d細既檢查,應該到28週會有個血糖測試同埋34週後既B形鏈球菌測試!! 我答: 係丫,個邊有提過!! 醫生又再問我有冇其他野問 ? 我問:" 我想問如果想係呢到生,係幾時要book定呀??" 醫生:" 係啦,我一陣會問你呢個問題,一陣就會問你,同埋訂金個到6千蚊,除左呢d仲有冇其他問題 ?" 我答:" 無了" 跟住就係上床照下粟米啦!! 私家醫生係好d,佢照到乜都同你講佢照緊咩,果然係要俾錢同唔洗俾錢既分別!! 一上床,醫生先檢查我個肚既大細,佢話我個肚既大細都岩週數!! 話我知依家粟米升到去我肚臍個位,係正常!! 之後就開始照啦, 先搵粟米個頭,幫佢度下頭仔既大細,再照佢個腳,醫生同我地講大脾仔,仲講係男仔黎既,係螢幕見到好明顯既-菇菇,我就講"哇,終於見到啦".醫生好奇地問"乜上次無講咩?" 我答"上次你話佢坐左係到,所以照得唔太清楚嘛" 醫生笑一笑!!之後再顯示俾我地睇 粟米既手,心,胃,背脊,仲有頭!! 我問醫生有冇得照下個樣架??醫生話呢個就係佢個樣啦!!(我係想要正面,唔係側面呀) 醫生誤會左,不過佢都話俾我地聽 佢有鼻仔同嘴仔,醫生話睇過bb無兔唇!! 最後醫生話bb各方面都正常,都乎合返個週數!! 之後醫生就俾張紙我地,係用黎落訂book係呢到生bb既,不過要 6-9pm先可以交錢同埋俾返頭先醫生cap低既相俾我!! 今次粟米有三張照片!!粟米仔今次好明顯係訓左,所以無咩點郁,哈哈,係粟米爸見到佢個口不停開合,俾人照到菇菇都唔知哈哈!! 希望之後都係KEEP住健健康康!!! 約下一次產檢 2013-08-08 1:30PM20w5d 頭仔 20w5d 腳仔(中間是慈菇哦) 20wd 頭圍
見今晚都得閒,都係拿拿聲搞掂D野佢安落D,放左工約粟米爸一齊搭巴士去法國醫院!! 我都唔知搭左幾耐,我諗應該都有一個鐘!!架巴士好慢好慢,同埋越坐就越熱!!而我就訓著左,直到到站粟米爸叫我起身!!一醒全車都係人好迫哦!!! 一去到就先去新樓個邊既3樓到交資料,姑娘俾左一疊紙我地,話下次產檢個陣叫醫生解釋俾我地聽,之後又落返去藥房部2號窗交留位費!!6千蚊乖乖地獻上,仲講明唔會有得退!! 交完錢對好資料就收好佢,直到俾醫生同埋到時入院用!!! 粟米爸交完錢,安心晒,佢話怕無位,個心好唔定!! 其實都無左雙非,咁驚做咩呢??
放晚同粟米公公食完飯,陪兩個姨姨去行街,去左又一城睇野,見有間大既H&M就睇下有冇BB衫!! 結果都買左一D返黎!!都係長袖的!!
今日諗住睇下有冇D和尚袍FOR初生時粟米著,去到先施見都有減價睇下啦! 都買左幾件衫仔!! 阿姐唔老實,明明個件衫個價錢牌係寫 99蚊3件,但係一件要 39, 個阿姐話無特價,個價錢係以前!!!
不知不覺又係時候照結構啦!! 同粟米爸去食lunch之後再搭車去瑪嘉烈!! 今次要去H座,我睇左樓層,我以為係1F,原來係LG1!! 1:30PM就去到,人地2點先開始登記,所以都等陣!! 到登記職員話可以登記個陣,我排隊,佢話我要排另一邊!!原來係有分...哈!! 因為未到2:00PM,所以都係唯有等啦!! 呢邊又無平時產檢咁多人,有D係照X光,好似我咁係孕婦既好似唔多見添BOR!! 到有得登記,就排隊去啦,拎完籌就入更衣室換衫,除左內衣褲,其實都要脫,著返醫院提供既衫,著完我覺得自己似病人多D!哈哈!換完衫就等叫名啦!! 登記個陣成日聽到個職員問D人有冇食野,心諗"死囉..乜要唔食野咩??張紙無寫既??",應該係照X光個D唔食得野掛!! 等到2:36PM 叫我名啦,咁就入房啦,因為唔知俾唔俾粟米爸入,我都問左阿嬸先,阿嬸幫我問醫生,醫生話可以先再叫佢入黎!!! 照既期間,我地都唔敢問野,醫生又無出聲講野,我斜望個MON,真係唔知佢照緊邊到,不過有時都見到佢照緊BB D骨,頭,手同心臟咁!! 照照下醫生叫我打側身,可能粟米b又唔知屈左去邊哈哈!! 照到咁上下,醫生叫我出去行陣先,因為有d位仲未照到!! 唯有係出面企下行下睇下電視等下!! 差不多照晒出面d病人,我先再次俾人叫返入房!!! 又再上床照,今次醫生唧個d野係肚係暖,唔知係咪近電腦得濟哈哈!! 又係照左好耐,照到我好眼訓,最後醫生終於開口講野啦,話俾我地知粟米b成日背住佢,成日面璧,醫生想話照個樣俾我地睇,好快粟米b又縮埋無得睇!! 醫生話大致上都無咩野都正常,話粟米b應該係男仔(點解又係加 "應該" 呢兩個字?) 睇黎粟米都真係好唔like人地篤佢,成日都縮埋一邊!!! 照完無咩事都放心d,咁即係又過左一關!!之後就仲有八月糖水測驗!! 醫生話預產應該係 11/20 比之前m到計出黎既預產期遲3日,比私家早2日!! 就係咁搞到4:30pm先走得!!!
之前見媽媽會有人POST過件衫仔幾得意,問左係邊到買,原來係H&M,襯今日得閒,反正都要去尖沙咀拎野,都順便去H&M到睇下!! 買到件衫仔寫住 2013年既衫衫,仲買多SET厚少少既衫連褲!!
大阿姨同姨丈去完蜜月,仲幫粟米買左好多衫,被仔,仲有BEARBEAR墊添!!原本諗住俾返錢佢地,點知姨丈話送俾粟米!!哇...咁多樣野,真係多謝晒呀!!!
襯永安減價,又咁岩出開去,順便都去買野,之前媽媽會通知永安有大減價,我都上網CHECK定價錢,BB車有八折,比吉島既81折還要抵!!所以都決定買了!! 去到當然先去第一目標BB車啦,落左單,之後睇搖搖椅,都有折不過得九折,咁就買埋!!夾埋成七千幾蚊,有得抽4次獎!! 夾埋抽到現金卷75蚊,拎左75蚊去買探熱器,原本要505蚊,減完430咋,好抵!! BB車同搖椅到時會送去公司!!^^唔洗自己搬太好了!!
大約 00:30 我同粟米爸係到傾枕頭計個陣,個肚有d古怪,有d實!! 突然間feel到粟米郁左兩下!! 成日見媽媽會話feel到胎動,我就會諗係點既呢??? 第一次感覺到佢郁,雖然只係兩下,真係會嚇一跳,佢個兩下好似係平時血管跳咁,但係佢係慢既同埋大力既!!好似有人係入面用手撩左兩下咁!!
今日2:00pm要去瑪嘉烈做產檢,因為張紙乜都無寫,唔知係搞d咩,不過都帶定小便去啦!! 因為食飯時間後,所以都同粟米爸出去葵芳食午飯先,食完午飯就打的上去醫院! 去到大約 1:35pm啦,一上到去已經見到有一條龍排緊,等緊下午產檢啦!! 姑娘見到咁多人排,都叫阿嬸盡快安排,所以未夠2點就開始登記了!! 都係做例牌要做既野啦,磅重,量血壓同驗小便!! 話晒都係食飽飯先去磅,又唔係重好多咋BOR,都係58KG,重過上次 0.5KG咋!! 姑娘對住我地講話有個小講座叫大家入去聽,入左去一間細房,大家分批聽!! 其實個講座同我上次聽既都係差不多,不過呢個係短版,咁呢次粟爸可以聽下囉!! 出到去搵張凳住,俾人叫名入護士室交資料,交完又係出面坐等叫名!! 今次原來係會見醫生既,好彩既係見我個位係女醫生,見醫生之餘仲會幫你驗下個胸同陰道,仲會聽埋bb既心跳!! 醫生問我知唔知預產期幾時,我答11/17,但係私家報11/22!!醫生話如果唔係差好多日既話,人地問你預產期係幾多你就答11/17,除非超過十日啦!! 粟米爸就坐係到等,拉埋簾,因為聽左心跳先,醫生一搵到bb心跳就扭到勁大聲,當然坐係簾後既粟米爸都聽到啦!!醫生話:"聽到啦咁大聲,係正常架"(佢究竟係指有心跳係正常丫,定係心跳既次數係正常呢下???) 驗胸個陣好似有d求其,淨係禁幾下就無野了,跟手就驗陰道,插舊野個陣有d痛,跟住醫生話陰道無問題,咁就落返床!! 之後又醫生講之前既報告都無問題,叫我地之後去健康院做檢查!! 又再出去等叫名,叫名入1A房,叫我揀一間健康院,我都係揀返娘家個邊啦,搭車方便D,之後又去2號窗登記!! 健康院要自己打電話去登記,阿姐話可以依家打,但係我打左幾次,唔係唔通就無人聽!!一.一"唯有聽日再打啦!! 8月要做糖水測試,10月先會再返黎醫院產檢!!
約左12:00見醫生,唔知係咪醫生有事,好耐都唔見醫生出現,仲見到有d約左 11:00am都仲未睇添!! 大約 13:45pm 終於醫生返黎啦,可能醫生去左接生,佢著住左藍色既衫返黎!! 等到差不多2:00pm 終於到我啦!! 今次有細姨都跟埋去,原因係細姨驚我唔話佢知男定女!!XD 醫生如常咁問我有冇咩特別野,CHECK返我之前政府照既唐氏有冇事,問返我個邊有冇叫我照結構,我講俾左醫生知7月4號照,醫生就MARK起!! 跟住都係問我有冇肚痛同流啡,我話無,醫生問我有冇咩特別野?? 我問醫生最近D便便係黑色,係咪無事架?? 醫生話係正常,因為MATERNA係有鐵質,所以D便便係會有灰黑色!! 之後當然就係照下粟米啦,醫生話15W6應該就知性別,睇下照唔照到!! 醫生照左佢個頭仔先,度完話佢個頭仔都OK!!都係正常既呎寸!! 之後照大脾仔,都係正常!! 跟住又係見到粟米淺淺地色既閃閃下心跳,我見到佢食手指囉!! 醫生話粟米坐左係到,所以比較難照D,照左好耐,醫生話見到少少白色,估計應該係仔,以佢既經驗就多數係仔!! 之後都左照右照,照左好耐,照到兩隻腳既中間,都唔太見粟米有明顯既特徵,所以醫生以經驗睇係仔!! 雖然有D開心俾我估中係仔,但係始終一日未完全見到佢個特徵,一日都唔敢肯定係咪仔!! 之後無咩特別就再約下一次見 預約左 2013-07-11 11:45PM 走個時姑娘忘記俾照片我,粟米爸就好緊張咁問我點解無張相既??係喎點解呢???所以問姑娘拎返囉!!哈哈!! 15w6 頭圍 15w6 大脾骨