親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
媽媽每日的願望, 就是希望可以和我一齊好好訓一個晏覺, 但呢個願望係奢侈的, 星期五六日係唔可能的, 因為好多堂要上, 星期二都係, 唯有寄望星期一, 三和四, 今日本來係可以的, 但今早angel姐姐病了, 無得返協康會playgroup, 我在家無無聊聊, 十一點鐘竟然訓著了, 一覺訓到一點幾, 媽媽在我訓早覺時起身打點一切, 煮飯比我食, 搞好晒野, 我已經醒了!之後就一直無訓覺, 直到夜晚eco姨姨來我家坐, 再出葵芳食飯, 最後我支持不住, 在酒樓扭眼訓, 好唔容易先訓左一小覺... 媽媽又企圖比開奶茶我飲, 今次加左糖冬瓜, 但我唔上堂, 飲一啖就吐出來, 後來用來開奶, 又比我發現, 到晚上媽媽只用了一安士開奶茶, 再用水開了六安士奶, 都比我發現, 唔肯飲... 最後成煲開奶茶媽媽自己飲晒!
我已經開始用褲仔一段時間, 現在識行識走, 無可能用到普通尿片了, 現在用緊輕鬆穿加大碼, 不過尿片越大條, 就越貴, 有時我一換片就大便, 又要換條新的, 一日最少用五六條, 條數都好襟計呢! 其實最近有d和我同齡的女生已開始戒片片了, 於是媽媽有感而發, 要唔要同我試下呢? 不過諗諗下, 男孩子和女孩子的發展完全唔同, 早開始都未必係好事, 等成熟d再開始, 可能好快成功呢! 於是爸爸媽媽繼續節衣縮食, 留返d錢繼續買尿片!
最近我每天都有d新的語言, 今早自行開dvd睇Sing Along 4, 我第一次講four, 媽媽既驚訝又感動, 因為媽媽教我用flash cards認數目字只係開始了好短時間, 幼兒的學習能力真係好強啊! 晚上我地去左香港仔探爺爺嫲嫲, 我主動叫爺爺, 但發音好特別, 叫了阿yeah, 嫲嫲都有叫了幾次, 但發音和媽媽好似, 其實我好少叫媽媽, 爸爸就叫得好多, 所以媽媽有點呷醋! 我在爺爺家好頑皮, 多次衝入廚房, 要爸爸媽媽捉雞仔咁捉, 被人捉到我就卡卡笑, 身水身汗, 媽媽話帶我返一次香港仔, 章苦程度等於行左一日山!
上星期五提到我一見細舅父就不停叫佢做阿虎, 今日又係咁喎! 但佢始終唔肯比遊戲機我睇, 又無同我玩, 又唔同我講野, 但我始終只係叫佢一個, 大家於是認為因為細舅父好cool, 唔同我玩, 於是我就要主動撩佢, 同時佢有遊戲機, 所以我特別刷佢鞋!
今日又有得返Ms Hazel的playgroup, 我最喜歡點名, 一開始叫第一個小朋友, 我已經急不及待舉手了, Ms Hazel說:"Isaac, not you!" 但我還是好心急, 叫了自己的名, 但只叫了一個"石"! 後來我在carpet轉來轉去, 失平衡跌倒, 額頭腫起, 我喊了幾聲, Ms Hazel為左安慰我, 比我第一個貼日期卡, 但我唔夠高, 要抱抱先貼到, 我每次貼完都好開心, 會跑向媽媽然後幾乎撞入佢懷抱中! 今日的美勞係貼海洋生物, 我貼到一團糟, 幾乎都係媽媽幫我, 但貼好了我覺得好滿意, 想比Ms Hazel看, Ms Hazel話very nice! 今日我開始用Your Baby Can Read呢套教材了, 因為我非常喜歡睇flash cards, 所以媽媽認為呢套教材會適合我!
行書展
點名要舉手!
認得自己
弄壞椅子
今日係星期六, 爸爸放假, 下午帶我去會所泳池游水, 媽媽因為要工作, 無得同我地一齊玩! 爸爸話今日我在泳池的表現係嚇親人的, 有泳客說: "嘩! 呢個bb牙都未出齊, 咁細個就咁大膽!" 有幾大膽呢? 我完全唔需要熱身就跳入水, 由爸爸托住肚仔游蛙式, 唔比爸爸扶要自己在水中漫步, 失驚無神將個頭浸晒落水, 仲三翻四次自行上岸, 再表演跳水... 3:30落去泳池, 五點幾都未返來, 原來我唔肯走, 爸爸最後用餅氹我, 先肯返屋企. 聽返爸爸報告今日的情況, 媽媽聽到個心卜卜跳, 小朋友夠膽去探索係好事, 但我未免太唔知驚, 太無安全意識了! 返到屋企沖完涼, 仲好精神, 媽媽一定要我訓一訓, 最後七點幾鐘我訓著了, 一覺訓到幾點? 係第二朝的清晨五點, 無食晚飯, 無飲奶...於是清晨的奶八安士我全支吸光, 到八點鐘再食多支, 原來游完水, 真係好攰, 好肚餓的!
我有兩個舅父, 大虎和細虎, 細虎是很cool的, 甚少同我玩, 上星期我見到佢在房打遊戲機, 我好想睇, 走過去摸佢, 又叫佢做\\"阿虎"! 今日我在婆婆家玩, 到夜晚, 媽媽, 爸爸, 舅父, 舅母佢地放工就會陸續返來食飯, 我一聽到門鐘響, 竟然望住大門叫"阿虎", 進來的竟然是爸爸! 並唔係我要等的人, 於是我唔理佢, 走返去玩, 搞到爸爸好無奈. 再有人返來了, 今次係大虎和舅母, 我都好鍾恴佢地, 為左引佢地注意, 我將我識的英文拋晒出來, 包括A, B, C, D, E, Bird, Cat.... 大家都讚我叻仔. 門鐘又響了, 今次終於今細虎返來, 我馬上跑上前叫了好多聲"阿虎", 又熱情地傻笑, 但細虎都不為所動, 完全無比我睇打遊機的意圖, 算吧啦, 打機真係無乜益, 媽媽話一定唔會買比我, 我唯有刷下舅父鞋, 搏佢比我睇下算了.
媽媽大約在我一歲時開始幫我揾playgroup, 好多人話荃灣Joyful English的Hazel老師教的playgroup係無得頂的, 當時媽媽打電話去查詢, 那些人叫媽媽等我15個月再打去, 點知再打去時已經無位, 要排好耐好耐隊, 於是我地就誤墮入荃豐果間豆泥野Jolly Clown, 好艱難先捱過兩個月. 終於排到我了, 今日媽媽帶我去Joyful玩, 我一入到課室有點緊張, Hazel老師就過來比好多車我玩, 又同媽媽傾好多計, 講解初來的小朋友點去適應, 我的班有8個小朋友, 全部都大過我的, 佢地識講好多英文, 又識自己掛書包, 拿水杯, 有個哥哥仲幫手派茶點! 遊戲時間我地入左一間有好多大玩具的房, 媽媽試下離開我一陣, 我好開心咁同大家玩, 突然發現媽媽唔見左, 我就喊, 媽媽其實在房外, 我一見媽媽又笑返, 再玩過. 幾分鐘後媽媽又聽到我喊聲, 然後見到Hazel老師抱住我, 原來有個比我大的男孩子橫衝直接, 和我爭玩滑梯時發生碰撞, 於是媽媽入來抱抱我, 今次喊得耐d. 之後茶點時間, 我食得好暢快, 媽媽坐埋一邊看著我, 唔需要跟到我實招呼我, 因為Hazel老師照顧得我地好好, 其他小朋友的媽媽好多都唔需要陪了. 臨走時老師送我一個sticker, 但我無端端扮獅子WOW左一聲, 於是老師將sticker送左比媽媽! 媽媽覺得呢度非常好, 最重要係呢度鼓勵家長比小朋友慢慢去適應獨立, 父母漸漸退出課室, 小朋友將來升幼稚園都會容易d適應!
今日在kindermusik我又係坐唔定, 但無扭計, 媽媽都算飲得杯落, 最近有一首歌仔叫做Jelly in the bowl, 今日媽媽專登買左啫喱粉, 同我一齊整jelly! 今日係媽媽第一日自製星期三day off, 但爸爸唔好彩病了, 原本想去沙灘玩, 唯有取消! 晚上我攞住部大計數機玩, 我講了"one", 媽媽係最近開始同我睇數字flash card的, 但無用計數機教過我數字, 於是媽媽捉住我的手指仔, 由1按到9, 我好開心, 媽媽比我一個one字啟發到, 所有東西都可以係好好的教具!
今日係我和obi在jolly clown的最後一堂playgroup, 今日係在不太完美的情況底下結束的, 因為我吃茶點時突然發難, 原因可能係媽媽掉左我食完的蛋糕的膠袋! 我發晒脾氣大叫大喊, 又將蛋糕"鍊"成蛋糕碎, 又掉水杯...簡直不可理喻, 媽媽唔理其他小朋友和家長奇怪的目光, 堅持唔抱我出去, 面懞懞咁由得我發癲, 目的係要我冷靜落黎, 但我實在好硬頸, 扭計足足有五分鐘多, 最後喊攰了自行收聲. 據說兩歲的孩子是很可怕的, 所謂的Trouble 2, 就係指呢段父母最難管教的時候, 不過我只係得20個月大, 已經開始咁惡搞了, 連爸爸都好擔心, 擔心我越來越扭計, 越來越大脾氣, 各位為人父母的朋友, 係咪個個小朋友都係咁架? 快d過料比我爸爸媽媽喎!
20個月, 臭脾氣!
[left1]自己在浴缸沖花灑了!
爺爺生日
今日我好有禮貌, 屋企樓下的石q叔叔, 不論年紀, 我一律叫佢地做"哥哥", 就連平時好cool的叔叔, 都開心到大讚我叻仔, 當然啦, 叔叔變哥哥你話係咪好開心呢! 返到婆婆屋企有得睇香港寬頻, 見到爸爸在電視機報新聞, 我好奇怪咁望到唔眨眼, 媽媽話: bb你睇下, 爸爸上電視呀! 但係我竟然叫了一聲"哥哥", 可能我唔覺得爸爸會走入電視機裡面, 電視機裡面出現的人, 一定係其他人, 所以我就叫佢做\"哥哥"!
晏食飯
媽媽在房用電腦時, 我成日會走入去叫佢比我睇A, 所以睇A, 就係睇呢個網址: http://www.starfall.com/n/level-k/index/load.htm?f 我尤其喜歡E和G, E的雞蛋打爛了, 我會笑到見牙唔見眼, G的gorilla彈結他我也會卡卡大笑...一日睇一次, 久而久之, 完來我已認得了好多字母了, 呢幾日媽媽發現我原來連M和S都認得, 仲講得好標準, 但幼兒係令人頭痛的動物, 你要我講我偏唔講, 在你唔為意時就會無端端講, 嚇你一跳!
一塊蝦餅
https://bb5.babyhome.com.tw/UPLOAD7/117460/122525.62116046.81485.wmv 今日係公眾假期, 媽媽想帶我去玩, 但爸爸無假放, 幸得肥妹表姐, 大舊表哥和阿華華哥哥同我和媽媽去玩, 今日我地的目的地係迪欣湖! 迪士尼樂園我去過三次了, 隔離的迪欣湖原來都係一個值得遊覽的景點喎! 除左個湖, 仲有好多好多任踩唔嬲的草披地, 仲有一家大細都啱玩的四輪車, 可惜今日的車比人租晒, 我無機會做司機! 於是我地去兒童遊樂場打韆鞦, 我自己坐入個兜形韆鞦, 我玩到瘋狂大笑, 前所未有咁興奮, 呢個兜形韆鞦係好安全的, 各位一歲小朋友都可以放心玩的! 之後表姐提議去東涌行outlet, 媽媽大鄉里, 未去過, 點知去到先知係扼人的, outlet賣的款確實很out, 但價錢一d都唔平, 明顯係扼遊客的生意, 於是我地去揾麥當勞叔叔. 姑媽約我地夜晚去食buffet, 慶祝肥妹表姐2x歲生日, 於是我地一行人浩浩蕩蕩剷上旺角帝京酒店, 我想話比大家聽, 帝京的自助餐原來好抵食, 好好食, 仲好多野食! 8:30後入座, 大人每位$198, 假期$208, 長者和小童只係$138, 價錢平和質素高, 而且地方大, 人少!!! 我地個個都食得好開心, 我搏晒命食薯蓉, 點知食到嘔, 好彩媽媽有帶衫同我換!睇下我, 摸下d水就笑成咁!玩得咁開心, 呢張相媽媽好喜歡啊!迪欣湖有好多草地比我任跑, 但我跑得太快了, 媽媽好辛苦都追我唔到!
https://bb5.babyhome.com.tw/UPLOAD7/117460/122525.61681655.12125.wmv 今天一早, 我用媽媽的手機打電話比美玲姨姨, 仲開埋speaker, 媽媽睡夢中聽到睡夢中的美玲姨姨不停地"喂..喂..喂.." 馬上搶回電話: "唔好意思呀, 係我個仔打比你..." 收左線之後, 我仲拿著手機在講"哈佬佬", 似乎好enjoy傾電話! 媽媽知道秋盈已開始自己進食了, 今晚就試下比我自己來, 其實我一直都想自己食飯, 但媽媽怕dirty, 次次都唔肯比我自己試, 今晚在媽媽從旁監督下, 我終於好成功地食晒一碗飯! 能夠自己用匙羹把飯送入口, 真係好有成功感喎, 每一啖飯我都係笑住食呢! 哈哈, 我又大個仔左囉!
秋盈爸爸和我爸爸是老死, 我們的媽媽差不多同一時間懷孕, 我地兩個都係十一月在法國醫院出世, 我早佢一個星期出來, 嚴格來說我是哥哥, 佢係妹妹, 但佢b時肥過我好多好多, 現在我地已經扯平了, 高度非常接近, 但佢始終好肉過我! 今晚佢地一家來我家玩左一陣, 秋盈似乎好喜歡的d玩具, 玩完呢樣又果樣, 好忙碌, 但我比較牛精, 成日攞走佢玩緊的玩具, 但我地係和平相處的, 媽媽覺得我在秋盈一家到訪一事感到好開心, 因為從我整古做怪的行為已睇得出! 今日媽媽和我研究動物的叫聲, 媽媽問: 獅子點架? 我就"wooowwwwww~~" 咆哮一聲, "汪汪點架?" 我就"wooooooo~~~" 貓貓點架? 我又"meew meew.." 但暫時扮得唔夠似, 遲d似d, 先拍video比大家睇, 仲有媽媽今天著一件有棵椰樹的t-shirt, 於是我又學識Tree了!
今日有件小事, 令媽媽覺得我真係唔同左, 大個仔左! 事情係咁, 今早媽媽比左兩塊餅仔我, 我坐在梳化自己食, 媽媽諗住我食完餅餅, 就比水我飲, 於是將個飲管杯放在梳化隔離, 誰知媽媽返轉頭, 已見我自己攞住水杯在啜啜啜! 在旁人眼中, 食完野飲水係平常不過的事, 但在媽媽眼中就唔同了, 因為每次食完野, 都要媽媽將水杯遞到嘴邊, 我再睇下心情靚唔靚, 先會飲, 今日我竟然自己打開水杯, 自己飲水水, 呢個咁微不足道的生活小片段, 足以令媽媽開心了一整天!
今天黃色暴雨, 我和obi都無返荃灣playgroup, 改到會所兒童室玩, 昨晚我地因為爭車而發生衝突, 今日又若無其事相約一齊玩, 將車車在滑梯sir落去, 好好玩! 又在隧道玩拋波波, obi成日跟住我, 我去邊佢去邊, 又不停講外太空話, 有時我懷疑佢可能真係天外來客. 後來我和一個姐姐為左爭開櫃筒而喊, obi竟然隨手執d垃圾比我, 企圖安慰我, 但如果佢比塊餅餅我, 我應該會開心d, 媽媽話obi係一個善良的好孩子, 如果我能夠多多學習佢關心別人, 就好了! (昨晚爭車衝突另作別論) 今天睇program 2, 見到pooh pooh從大樹上跌下來, 我大叫down! down! down! pooh pooh然後跌入草叢, 我就"嘩~~~~~"一聲, 最近我愛上了"嘩", 事無大少都嘩一餐, 當然啦, 香港人就係鍾意"嘩", 我也是典型的香港人, 當然嘩得好好聽!
今日一早起床, 媽媽已經覺得我好跩了, 首先我強行衝入浴室, 家中的浴室和廚房是禁地, 除非沖涼洗手, 否則我是無理由入去的, 誰知今早我趁媽媽刷牙, 強行闖入去, 平時我偷偷想入, 媽媽一喝令我, 我就不會踏足半步, 但今日我好野蠻, 點都要入去, 結果當然係被媽媽嚴斥, 我就唯有坐在浴室門口地下嚎哭. 返到kindermusik, 我除左有身體律動的時間外, 其餘時間都唔乖, 跑來跑去亂搞東西, 不肯聽媽媽指示, 聽故事時間尤其百厭, 其他同學乖乖地坐在story blanket聽新故事, 我竟然去搞呼拉圈, 結果當然係完全無聽到故事, 令媽媽好勞氣!
我係一個好有生活秩序的小孩, 訓覺食飯都有時有候, 一搞亂左就麻煩了, 昨晚媽媽食左藥, 十點鐘就上床訓覺, 我要跟埋媽媽一齊訓, 於是我就無食奶, 一覺訓到天光, 點知清晨六點幾就醒左, 比平時早左兩個鐘頭有多, 醒左唔肯訓返, 就不停玩, 睇dvd, 媽媽心諗:弊囉, 咁早起身, 點捱到11點返playgroup? 果然不出所料, 十點幾已開始扭眼訓, 媽媽於是決定今天唔返荃灣plagyroup了, 於是我由11點訓到下午2點! 搞到好晏先食lunch, 之後整個下午都維持精神亢奮狀態, 但到晚上七八點晚飯時間, 我又眼訓了... 哎...總之整日的生活秩序都亂晒, 明天要tune返正嘞!
https://bb5.babyhome.com.tw/UPLOAD7/117460/122525.61163558.58242.wmv 你地知道嗎, 以前我聽到音樂, 只會一舊飯咁企係度聽, 家陣唔同啦, 我會跟住節拍手舞足蹈, 不停自轉, 有時甚至用腳打拍子, 搖頭擺腦咁, 笑死人! 婆婆話: 比咁多錢返學, 就係學左呢咁既嘢咋? 哈哈... 據媽媽的觀察, 返左kindermusik之後我係改變左好多, 說話語音多左, 表達能力強左,認字母都叻左, 唔單止我, 我的同學仔obi和anson, 都叻左好多, 介紹媽媽返ms mary的kindermusik那位媽咪話, 遲d會有意想不到的專注力和情緒提升...唔通音樂真係咁神奇? 話說回來, 今日其實係返協康會的, 今日又有得玩吹泡泡, 今次仲有部泡泡機, 製造左好多好多泡泡, 我用手去篤, 篤穿左好多泡泡波! 仲搞到成頭都係泡泡添! 嘩~~~好多泡泡呀! 等我用手去捉下佢地先!
今日婆婆帶我落商場散步, 發覺我有點忟憎, 額頭仲熱熱地, 原來係打針的反應, 發燒了! 好彩只係輕微燒, 但我現在大個左, 無以前bb仔咁順攤了, 你叫我食藥, 我係都唔食, 婆婆唯有出絕招, 強行灌藥! 最後經一輪搏鬥成功餵晒碗藥水, 但唔知吐返幾多出來, 不過燒總算退了, 以後要我食藥, 無咁易!
